* MC Mary Kom Olympic Medalist thupitak a Vaidawn in om.
* Police Constable T Nangkhanson in Thau tang khahsuah in T Dongzapau kaplum kha, mipi sousang.
* H Khamthianmuan Pukhri ah kelum.
* Police te'n Executive DRDA inn a Bomb paihpuak te KNLF te hiding in muangmoh.
* DC makaih in SSA tawh kisai in Meeting om ding.
* CDSU, ZSF leh KSO in zingchiang zinglam dak 5 akipan sunnung dak 4 sung in Total Bandh puang.

TUN TANCHIN KIMZAW IN:

District Administration leh Autonomous District Council Churachandpur makaih in zan sunnung dak 1 in Lamka Public Ground ah "To God Be The Glory" chih thupi a nei in MC Mary Kom Olympic Medalist Home Coming Reception Cum-Thanksgiving Ceremony thupitak in neih in om hi. CDSU leh CDSA makaih in Kangvai khua ah MC Mary Kom vaidawnna om masa a, huai apan Tedim road zui in Lamka Police Station sak apan Tipaimukh road tawn in Lamka Public ground lutpih in om hi. Lamkal ah mipi tamtak in vaidawn uhi. Public Ground lutna Gate ah G Thangkhosuanmung Chief of Hiangtam Lamka makaih in Gun Salute om a, huai apan Rayburn College NCC Senior Division te'n MC Mary Kom zawng in mipi muhtheih ding in paikualpih uhi. Rev.D Jangkholam in hun honna thumna nei a, Jacintha Lazarus IAS DC Churachandpur in vaidawnna thugen a, JL Sawmi President Churachandpur Joint Women Organisation makaih in District min in DC, ADCC Chairman leh SP Churachandpur in Pakkhi oksak uhi.
Mannuamching  Chief Executive Officer ADCC in District Council min in hunzang a, District Council min in MC Mary Kom khut ah Sial liantak khat pia hi. Right Rev. Dr. Ginkhanmung Zou Bishop in "To God Be The Glory Through Mary Kom" chih pansan in thugen a, huaizawh in vualzawlna ngetsak hi. Churachandpur District sung apan  Minister Phungzathang Tonsing, Ginsuanhau MLA, Vungzagin Valte MLA leh Dr. Chaltonlien Amo Chairman Hill Area Committee in thugenna hunzang in kipahpih thupuang in Nam puan silhsak uhi. Security lam ah BS Khasana DIG STC/BSF, Brigadier VS Ranade Commander 27 Sector Assam Rifle leh L Mangkhogin Haokip IPS, SP Churachandpur inleng thugenna hunzang in Memento pia uhi. Churachandpur District Private Schools' Association, Tribe Leader, Philantrophic Organisation, Church Leader, Chief Association, Churachandpur District Congress Committee, Lions Club of Churachandpur Greater, Lamka Traders and Self Employed Association leh District Level Officer te'n  thilpiak pia ua, District sung a nam tuamtuam tengkhawm teng in khatvei thu in Multi Cultural Dance lak uhi. Huaizawh in MC Mary Kom Olympic Medalist in thugen a, aman a thugenna ah lohchinna a ngah mipi te thumna ziak leh Pathian ziak ahihdan gen a, Churachandpur district sung ah electric vak ding deihna in electric department office hihsiat in om a, thukhat ah hihding mah ah ka chi a, himahleh a lehlam ah Pathian deihdan bel ahikei chi hi. Game poimoh om chiang a Electric vak theihna ding in ngetna ka bawl ding chi hi. Kimawl ding a ka kuan ding chiang in Ka pasal in hon phal keileh teltheilou ding ka hihman in phalna honpia ka pasal tung ah kipah thu ka gen chi hi.
Mi hiaizah lawmlawm in honna vaidawn ding in ka lam-en kei a, thupi ka sa petmah chi a, huaiban ah actor leh actress te dan a celibrities hihding ka utkei a, himahleh nou te celibrity non suaksak ta uh chi hi. Gamsung ah lemna om ding a deihdan leng gen in gamdang a kimawl lai a district  sung a buaina om chiang in lungsim a nuam theikei a, deih bang in lungsim teng a kipe theikei chi hi. Langkhanpau Guite Chairman ADCC in a thugenna ah Mary Kom min in Tuibuang ah Lampi kilometre 3 vel a sau MC Mary Kom ring road chih ding in thupuan bawl a, huaiban ah Lamka Public ground ah MC Mary Kom min in Lakh 10 tunglam bei in DRDA fund om masa penpen ah Gallary bawl hiding chi hi. Huaiban ah Executive Director DRDA C Hangshing tenna inn a bomb paihpuak te mohpaih thupuang in, mipi sum ding midang khut ah kipe theilou ding a, gamsung ah lemna hihse thei dia gamtang nawnlou ding in ngetna bawl a, lemna omna ding ahihleh hon that unlan ka taksa leng satnen un, kei sihnung a lemna leh muanna omding ahihleh ka hinna ka iitkei, maituah dia mansa ka hi chi'n chouna sangtak bawl a, mipi lungsim zou mahmah hi.

Zan sunnung dak 1:30 apan Lamka Public Ground ah MC Mary Kom, London Olympic Medalist vaidawnna thupitak a omlai tak in nitaklam dak 3:00 vel in Police constable number 064022 Mr T.Nangkhanson (30) s/o T.Tuanggin of Mualveng, Hiangtam Lamka in a zatlai AK 47 Public Ground khangzek ah kapging kha hi. Thautang leng in fencing kha a, a kilehkik lam in lampi a pailai Mr T.Dongzapau (67) s/o (late) Ngulkhothang of Mualveng, Hiangtam Lamka a dip kapkha hi. Kintak in District Hospital ah T.Dongzapau puaklut in om a, Doctor te'n Imphal ah refered mahle uh Imphal tungmanlou in Bishnupur lak ah si hi'n kigen hi. Mit a mute gendan in, District Council leh District Administration makaih a Olympic Medalist MC Mary Kom vaidawnna hun a, Mualveng lak a duty dia seh a om T. Nangkhanson in a thau zatlai khahsuahkha in, thautang leng in a kiang a fencing kha in, thautang lengkik in lamlian a pailai T. Dongzapau a dip kha hi'n gen uhi. T Dongzapau ahihleh Public ground a MC Mary Kom vaidawnna a hoh dia kisa a, a tutna ding News Paper ding tawi kawm a lamlian a pailai, hiai bang tuahsia tuak hidan in kigen hi. Hiai thu ziak in Police leh mipi kikal ah kitheihsiamlouhna piang ding in kisa a, mipi a sousang mahmah ziak in Police Duty teng Lamka Public Ground leh a sehvel apan kihemkhia uhi. Hiai thu tawh kisai in  tuni sunnung dak 3:00 in Police Department leh khutkhial lamte misi innkuan te inn ah pu-pa ngeina dan in va lut ua, lakh 3 in kihoulem uhi. Hiai thubuai toh kisai in Police te'n khutkhial T. Nangkhanson tung ah thubuai chiamteh uhi. Thutut kingah dan in, SP Churachandpur in Constable T. Nangkhanson tung ah zan nitak mah in suspend order suahkhe ngal a, tuni'n Chief Judicial Magistrate CJM mai a dinsak ahih nung in CJM in jail a koih ding in thutan khum a, tuni mah in jail a koih ding in Police te'n Imphal ah posuk uhi. T. Dongzapau luang ahihleh tuni'n RIMS, Imphal ah post mortem bawl in om a, sunnung dak 5:00 vel  in Lamka puaktung in om hi. T. Dongzapau ahihleh Electric Department a Section Officer pension hidan in kigen hi. Hiai thiltung tawh kisai in Young Paite Association Lamka Block in mohpaih thupuang in, mulkimna bei a gamtatna tunung a tung nawnlouhna dia kuapeuh mah in panla ding in ngetna bawl uhi.

Zan sun dak 12:00 vel in Ngalthal khua a Pateh bawlna mun a Pukri sung ah naupang bangzahhiam kisil in amau lak ah H.Khamthianmuan (13) S/o H.Langkhanmang tang khial kha in tuilak ah kia hi. YMA Ngalthal te'n thiltung theih in buaipih ngal ua, dakkal 2 val a buaipih nung un Pukri sung apan sisa in H Khamthianmuan lakhia uhi. H.Khamthianmuan ahihleh tulel in Blue Star Academy ah class VIII simlel hi'n kigen a, tuni'n YPA New Lamka hanmual ah vui uhi.

Apaisa -August 25, 2012 nitak dak 7:30 vel a Chapellane, Hiangtam Lamka a C. Hangsing Executive Director DRDA tenna inn a meltheihlouh pasal 2 Access gari tai te'n bomb a paih puakna utawh kisai Police te'n suizui lel uhi. Police thusuak kingah dan in bomb paipuaktute KNLF te hiding in muanmoh thugen ua, hiai tawh kisai in case chiamteh uhi.

Jacintha Lazarus, IAS, DC Churachandpur makaih in amah Office Chamber ah August 29, 2012 sun dak 12 in SSA toh kisai in meeting om ding hi. Hiai meeting ah Chief Medical Officer, Dr. HL Liensang Chief Medical Officer leng telding ua, National Rural Health Mission NRHM nuai a student-te adia  health card issue kibawlte tungtang tel in thu tuamtuam genkhawm ding uhi.

Churachandpur District Students Union (CDSU), Zomi Students Federation (ZSF) General Headquater leh Kuki Students Organisation (KSO) Churachandpur District in tuni sunnung dak 3:30 in New-Bazar a Bus Parking a CDSU Administrative Building ah Joint Meeting nei in C Hangsing Executive Director DRDA tenna inn a bomb paihpuak te leh hiamgamtak a gamtatna mohpaihna in zingchiang zinglam dak 5 akipan sunnung dak 4 sung in Churachandpur District ah Total Bandh puang uhi. Total Bandh in Medical leh Press/Media chihlouh huamkha vek ding hi.

Apaisa August 25,2012 nitak a Hornbill Cable News a Churachandpur Police te'n Truck khat a Gua puakman in za 5 ngen kichi pen thuzuau ahihdan TRABDA Information Secretary in News tungtawn in puang.

Subsidiary Training Centre STC/BSF in Mission Compound suahlam leh Pearsonmun, Mualkawi leh Gangpimual simtum kikal ah September 1 akipan September 15,2012 sung in zinglam dak 5 akipan zannung tanpha in thau-le-bomb kapna sunzom nawn ding ua, kim-le-kiang a om te pilvang a ganvulh te khahzanlou ding in theihsakna bawl uhi.

* Churachandpur Police te'n Truck khat a Gua (Bamboo) puak man in 500 ngen.

* Ginsuanhau MLA in "Simlei Tul Kuon-Vol-I" kichi Music Video Album hong. 

* Khangthah Zuun Pawl in Joint Freshers Meet zang.

* Thadou-Kuki Students Union Churachandpur College Branch in Freshers Meet zang.

* Zillai Rayburn College in Freshers Meet zang.

* S Kamsuanlun Executive Member ADCC panlakna ziak in Zellang Veng leh Zomi Colony ah Tuisiang hoihtak in kai.

* MC Mary Kom Vaidawnna ding tawh kisai in Lamka Public Ground ah Social Work neih in om.

* Govt. School 22 ading School Uniform lakhelou Headmaster te Police matsak hiding.

* Haichi Tui piakna deih te'n District Officer Horticulture and Soil Conservation kiang ah ngaihven theih ding.

TUN TANCHIN KIMZAW IN :

Tipaimukh Road Area Business Development Association (TRABDA) in tuni zinglam dak 8 in TRABDA Office Tipaimukh road Hill Town ah Emergency Meeting nei in Police te Sum ngetna tung a lungkimlouh thugen khawm uhi. Akigen dan in TRABDA Member Helun Singson 409 Truck Mn-04-4344 tuni zinglam dak 5:20 vel a Lamka akipan Imphal lam manawh a Gua pua a tailai Lamka Police Station kong a duty Police Constable khat in Gua puakman Sum 500 ngen a, Truck neitu in a piak nuamlouh ziak in Police Station ah Gari hentang in om hi. Hiai thiltung tawh kisai a Truck neitu Helun Singson in a gendan in Police Constable khat in Police Station kong ah khamkhawl in Gua puakman za 5 peding in hon ngen a, za 2 kipiak sawm mahleh utlou in za 5 mah hon phut tinten a, za 3 kilak inlan hihveng ni a kichih nung inleng ut tuanlou in, Gari document leh forest department lam apan phalna lai TP leng bawl tawm ahi chi'n ngohna hon bawl a, za 5 non piak keiding ualeh Police Station sung ah Gari tawllut un hon chi chi'n gen hi. Police Station sung ah Gari a ki-tawllut nung in Hotel ah handyman te tawh singpi ka dawn lai un, Police hongpai nawn in, za 5 hon pia unla Gari hong tawlkhia un, hong chi nawn a, Police Station OC hongpai leh hiai sang a tamzaw hon ngen ding ahi, chi'n hong gen chi hi. A ban a genzelna ah, Gari hichi mai a tawlkhiak theih ding hinawnlou ahihdan leh Association makaite theisak khin ka hihdan ka gen chi hi. Hiai thitung tawh kisai a TRABDA member khat in a genna ah, sing leh gua pua a nekzong truck pute'n haksatna tamtak kituak gige a, Lamka akipan Imphal tan puaktungna ding in lamkal ah Police te tung ah Sang 4 bang kiseng gige a, Imphal akipan Dimapur tan puaktungna ding in sang leh za 5 khong kiseng a, Lamka leh Imphal kikal ah kiseng tamzaw tham chi hi. Aban a genna ah Forest te'n truck liante ah TP sang leh za 4 leh Mini Truck ah za 7 leh 80 a cut nung ua, Police te'n hiaizah hon nget lai uh Truck pute ading in theihsiam haksa mahmah chi'n leng genbeh hi. Hiai thu tawh kisai in TRABDA makai te leh Police Station OC kihou in Gari khat ah za 2 zel lakding in kihoulem uhi.

Niengmuonching @ Boinu in Gospel Music Video Album a bawl "Simlei Tul Kuon-Vol-I" kichi tuni zinglam dak 8 in MGP Golden Jubilee Hall, ZPCS Office Zomi Colony ah ahonna nei uhi. Hiai hun ah Ginsuanhau MLA 60 Singngat Assembly Constituency, Chief Guest apang in Music Video Album hong a Rev. Stephen Chinzathang Senior Executive Secretary Zou Presbyterian Church Synod in Pathian kiang ah lan hi. Guest of Honour a P Sianzadong Chairman Finance Committee ADCC pang ding chih himahleh lemtanglouhna khenkhat a neih ziak in amah tang in T Goulal pang a, Functional President in Tongkai Baite MDC Sangaikot pang a, Chief Host in Michael Ginzasuan District Supply Officer Churahandpur pang a, hiai hun saptuam heutu leh mi poimoh hunkhop in uap uhi.

Khangthah Zuun Pawl (KZP) Rayburn College, Churachandpur College leh Don Bosco Higher Secondary School in tuni sun dak 11 in SYO Hall Sim Veng ah Joint Freshers' Meet 2012 zang uhi. Hiai hun ah Chief Guest in H Jamkhawnpau MDC Thanlon pang a, Functional President in B Dongzalian President Simte Tribe Council General Headquater pang a, Guest of Honour in L Dongchinthang Simte pang a, Chief Host in S Chinzalal President KZP General Headquater pang a, Rev. S Kaikhanmang in KZP Freshers te thumsak hi. Tutung in College 3 apan KZP Freshers 56 om hi.

Thadou-Kuki Students Union (TKSU) Churachandpur Branch in tuni sunma dak 11 in College Multi-Purpose hall ah Freshers Meet a 10 veina zang uhi. Hiai hun ah Functional in Ricky Vanlallawm Guite Principal Churachandpur Govt. College pang a, Rev. LB Angam General Director ECCI in TKSU Freshers te thumsak hi. Hiai hun ah TKSU in BA First Class a zou Student 9 te kipahpihna in Memento pia uhi. Tutung in Churachandpur Govt. College ah TKSU Freshers 80 om hi.

Zillai Rayburn College Unit in tuni sun dak 12 in Headquater veng a KKL Complex ah Freshers Meet zang uhi. Hiai hun ah Minboi Vaiphei MDC Haopi Range, Chief Guet in pang a, Guest of Honour in Dr. Seanbawi Surgeon District Hospital Churachandpur pang a, Functional President in Kaithianjoy Vaiphei President Zillai Churachandpur Block pang a, Upa Liankhothang in Freshers te ading in thumsak hi.

S Kamsuanlun Executive Member ADCC panlakna ziak in Zellang Veng leh Zomi Colony ah Tuisiang hoihtak in kaitheita a, veng sung leh khaw sung mipi kipak petmah uhi.

District Administration leh Autonomous District Council Churachandpur makaih a zingchiang sunnung dak 1 a Lamka Public Ground a "To God Be The Glory" chih thupi a nei a MC Mary Kom Olympic Medalist Home Coming Reception Cum-Thanksgiving Ceremony neihna ding tawh kisai in tuni sunnung dak 1 akipan Lamka Public Ground ah SDO leh a Staff teng ban ah District Council Staff leh MDC te'n social work nei in mipi kipunkhawmna ding bawl uhi. Zingchiang Programme hun ah Public Ground lutna Gate ah G Thangkhosuanmung Chief of Hiangtam Lamka makaih in Gun Salute om ding a, Rayburn College NCC Senior Division makaih in MC Mary Kom in mipi te khutvuan ding hi. Rev.D Jangkholam in hun honna thumna neiding a, Jacintha Lazarus IAS DC Churachandpur in vaidawnna thugen ding a, JL Sawmi President Churachandpur Joint Women Organisation makaih in District min in Pakkhi ohsakna om ding a, Mannuamching Chief Executive Officer ADCC in District Council min in hunzang ding hi.
Right Rev. Dr. Ginkhanmung Zou Bishop in "To God Be The Glory Through Mary Kom" chih pansan in thugen ding a, huaizawh in vualzawlna ngetsak ding hi. Churachandpur District sung apan MP, Minister leh MLA te'n minute 3 akipan minute 5 tan chiat thugenna hunzang ding ua, Security lam ah BS Khasana DIG STC/BSF, Brigadier VS Ranade Commander 27 Sector Assam Rifle leh L Mangkhogin Haokip IPS, SP Churachandpur in minute 2 leh minute 3 kikal chiat thugen ding uhi. Churachandpur District Private Schools' Association inleng hun sawtlou zang ding ua, Tribe Leader, Philantrophic Organisation, Church Leader, Chief Association, Churachandpur District Congress Committee, Lions Club of Churachandpur Greater, Lamka Traders and Self Employed Association leh District Level Officer te'n thilpiak peding ua, District sung a nam tuamtuam tengkhawm teng in khatvei thu in Multi Cultural Dance lakding uhi. Huaizawh in MC Mary Kom Olympic Medalist in thugen ding a, Langkhanpau
Guite Chairman ADCC in Vote of Thanks gending a, Rev. Lalrosiem Songate in thumna in hunkhak ding hi. Hiai MC Mary Kom vaidawnna hun ah Manashe Cultural Troupe in nam lam lak ding ua, Maneithangja, C Thianngai, Lucy Lhinghoikim Kom leh Muana Hangzo in special number present ding uhi. Hiai ni a MC Mary Kom Olympic Medalist Churachandpur District honglut ding kuan in Kangvai khua ah sun dak 12 in Churachandpur District Sports Association leh Churachandpur District Students Union makaih in vaidawnna om masa ding a, huai apan lampi honzuihpih ding uhi.

Churachandpur District sung a Govt. School 22 a Headmaster te'n tunitan in School Uniform ding lakhe nailou ua, August 28,2012 tan a, a lakkhiak kei ualeh, Headmaster te tung ah FIR bawl in Police matsak hiding chi'n DC Churachandpur in gen hi.

Ngulkhanthang Paite District Officer Horticulture and Soil Conservation in thusuah a bawlna ah Haichi tui piakna Drip/Sprinkler Irrigation lunglutna neite'n District Officer Horticulture and Soil Conservation Office ah August 27 akipan 31,2012 sung in ngaihven theih ding a, Department in beneficiary ding bawlfel utta ahihdan taklang hi.