* CMO makaih in District Health Society Executive Committee in Meeting nei.
* ZHRF saina in United Nations Declaration in the Rights of Indigenous People neih in om.
* Rayburn Presbyterian Church ah Leaders Training on Eschatology neih in om.
* MC Mary Kom vaidawnna ding tawh kisai in Langkhanpau Guite Chairman ADCC in Saptuam Heutu te Meeting neihpih.
* DLCC Meeting ah MC Mary Kom vaidawnna ding tawh kisai genkhawm.
* D Kamsuanthang in Press Release bawl.
* NYK Churachandpur in Outstanding Youth Club Award piak sawm.
TUN TANCHIN KIMZAW IN :
Dr. HL Liensang makaih in tuni sunma dak 10:30 in amah Office Chamber ah District Health Society Executive Committee in Meeting nei uhi. Hiai hun ah Rogi Kalyan Samti Fund, JSY, Untied Fund, Annual Maintenance Grants leh School Health Check-Up neiding tawh kisai genkhawm in Primary Health Centre leh Community Health Centre tuamtuam a Medical Officer Incharge leh Block Programme Management Unit ban ah District Health Society a Executive Committee Member District Family Welfare Officer, Medical Superintendent District Hospital leh Programme Officer ICDS Cell Churachandpur te tel uhi.
Indigenous Training Institute nuai a Asia Indigenous People Pact Chiangmai, sponsorna nuai a, Zomi Human Rights Foundation (ZHRF) saina in tuni sunma dak 10 in Synod hall IB road ah Community Training on United Nations Declaration on the Rights of Indigenous People kichi nei uhi. Hiai hun ah Siamzading Valte Lawyer in Free,prior and infromed consent, Development Issue, Land, Territories and Natural Resource tawh kisai sinsak a, Dr.R Sanga in Customary Law leh Culture Rights tawh kisai sinsak a, Chinlunthang Lawyer in Migration and Trans-border leh Special Sector tungtang sinsak a, Suanmawi Guite Indigenous Peoples Human Rights Defender in Self Determination and Self Government leh Human Rights and Militarization tungtang sinsak hi. Hiai Community Training Programme ahihleh August 25,2012 in zouding uhi.
New-Lamka a Rayburn Presbyterian Church ah ITEM, USA sponsor na nuai a Presbyterian Church in India (Reformed) saina in August 21,2012 akipan Eschatology kichi "Tunung a thil hongtung ding te leh Kilakna laibu hilhchetna paidan, hilhchet dingdan leh hilhchetna tuamtuam te tawh kisai" kisinsakna Leaders Training on Eschatology kichi nei ua, zingchiang in zouding uhi. Hiai Training sung in Rev. Will Hesterberg, ITEM, USA in sinsak a, Rev. Lian C Tombing kamlettu in pang a, mun tuamtuam apan Pastor, Elder, Deacon leh Saptuam Heutu 450 vel tel uhi.
Langkhanpau Guite Chairman ADCC in tuni sun dak 12 in amah Office Chamber ah Church Leader te samkhawm in August 26,2012 sunnung dak 1 a Autonomous District Council leh District Administration makaih a Lamka Public Ground a MC Mary Kom vaidawnna ding tawh kisai genpih hi. Pathianni a Programme bawl kichi saptuam heutu khenkhat in theisiamlou ua, himahleh MC Mary Kom in hun anei mahmah louh ziak a Pathianni tukha ahihdan genpih ahihnung un theisiam thei uhi. Langkhanpau Guite Chairman ADCC in Pathianni a Biakna kikhop panbaih deuh a zoubaih ding in ngetna bawl a, Lamka Public Ground a Churachandpur District tanu MC Mary Kom min a Pathian kiang a kipah thugenna a, telchiat ding in chialna bawl a, huaiban ah Pastor peuhmah in Pastor puan silh chiat ding inleng ngen hi.
Jacintha Lazarus IAS DC Churachandpur makaih in tuni sunnung dak 1 in DC Churachandpur Office a BRGF Resource Centre ah District Level Co-ordination Committee (DLCC) Meeting nei uhi. Hiai hun ah Autonomous District Council leh District Administration makaih a August 26,2012 sunnung dak 1 a Lamka Public Ground a MC Mary Kom vaidawnna ding tawh kisai genkhawm ua, hiai ni in SDO leh a Staff teng ban ah District Council Staff teng in Physical Arrangement leh Seat Arrangement lam mohpaw ding in lemsa ua, Security lam ahihleh L Mangkhogin Haokip IPS SP Churachandpur in mohpaw ding in thupuk uhi. Huaiban ah hiai ni a District Level Officer teng telkim ding in DC Churachandpur in theihsakna bawl a, District Level Officer a telte min LT Puii SDO Churachandpur in lakhawm ding a, District Level Officer teng in khatvei thu in thil piak peding uhi. Huaiban ah MC Mary Kom vaidawnna ding tawh kisai mah in August 25,2012 sunnung dak 1 in Lamka Public Ground ah Social Work neiding uhi.
D Kamsuanthang in Press Release a bawl kimu in a gendan in Zomi mipi te kiang ah theihsakna bawl in Zomi Re-Unification Organisation (ZRO) sung a makai ding kituhna omlou ahi chi a, mi khenkhat in D Kamsuanthang in ZRO sung ah dinmun sangpen a letnop ziak a ZRO sung a buaina piang ahi kichi thudik hilou ahihdan taklang a, amah min genkhak a omna dingthu leng omlou ahihdan leh zuau thuthang a kuamah kigolh nawnlou ding in ngetna bawl a, huaiban ah lungtup mualsuahna ding leh kipumkhatna ban ah kituahna om theihna ding in kimuanngamna a om hun mahmah ta chi in lungsim leh ngaihdan neu chik te tawpsan a mipi te lampi dik-le-tang a makaih theihna ding in ngaihdan pilhuaitak puchiat ding in ngetna bawl ngal hi.
Nehru Yuva Kendra (NYK) Churachandpur in District Level Outstanding Youth Club Award 2011-2012 piak sawm a, hiai ding in NYK Churachandpur nuai a ki-register leh Affiliated Youth Club leh Mahila Mandals te'n NYK Churachandpur Office Tuibuang ah Office hour sung in Prescribe form la in August 31,2012 tan in ki-ngetna piaklut theih ding hi. Hiai Outstanding Youth Club Award ngah te kiang ah Cash Award sing 1 leh Certificate piak hiding hi.
.