* Langkhanpau Guite Chairman ADCC makaih in Tribe Leader, Student Leader, Philantrophic Organisation, Women Organisation, CDSA, Private School Association leh Organisation tuamtuam in MC Mary Kom vaidawn dingdan genkhawm.
* Common Service Centre tawh kisai in Review Meeting neih in om.
* Food Safety tungtang khauhtak a etzui hiding in Chief Medical Officer in gen.
* District Health Society Executive Committee in Meeting neiding.
* SSA State Mission Authority saina in Free Medical Assessment Camp om ding.
* Padma Vibhusan Padma Bhusan leh Padma Shri Award ngen nuam te'n DC Office ah ki-ngetna piaklut theih.
* CT Scan zattheih a omna dia panla te tung ah CDSU in kipahthu puang.
* Bangalore a ki-vaulauna thu tawh kisai in ZYA Bangalore Region in ZYA General Headquater kiang ah panpihna peding in ngetna bawl.
TUN TANCHIN KIMZAW IN :
Autonomous District Council Churachandpur makaih a August 26,2012 Pathianni sunnung dak 1 a Lamka Public Ground ah London Olympic a Bronze Medalist ban ah Churachandpur District mi MC Mary Kom vaidawnna ding tawh kisai in tuni sun dak 12 in Langkhanpau Guite Chairman ADCC makaih in ADCC hall ah Jacintha Lazarus IAS DC Churachandpur leh L Mangkhogin Haokip IPS SP Churachandpur tel in Tribe Leader, Student Leader, Philantrophic Organisation, Womens Organisation, Churachandpur District Sports Association leh Churachandpur District Private School Association te'n Joint Meeting nei ua, MC Mary Kom vaidawnna ding tawh kisai in ngaihdan kikumkhawm in detail programme bawl ding tungtang genkhawm uhi.
District eGovernance Society Churachandpur saina in tuni sunma dak 11 in DC Churachandpur Office a BRGF Resource Centre ah Functionalist Common Service Centre tawh kisai in Review Meeting nei uhi. Hiai hun ah Village Level Entreprenuers leh MS Zoom Developer Imphal te tel uhi.
Food Safety tawh kisai a Chief Medical Officer Dr. HL Liensang in a gendan in tunitan in nektheih zuak singtangmite ngaihsaklou in vaite kia in registration bawl ua, singtangmi nektheih zuak peuhmah inleng ngaih poimoh hoih ding chi a, huchi ahihkei leh license cancell sak hiding a, hotel leh nektheih zuak thei nawnlou dia om theih ahihdan gen a, Supreme Court Order dungzui in Food Safety tungtang ngaih poimoh hiding a, tunung sawtlou in DC Churachandpur tawh meeting neih hiding a, khauhtak in etzui hiding chi hi.
Dr. HL Liensang makaih in zingchiang sunma dak 10:30 in amah Office Chamber ah District Health Society Executive Committee in Meeting neiding uhi. Hiai hun ah Rogi Kalyan Samti Fund, JSY, Untied Fund, Annual Maintenance Grants leh School Health Check-Up neiding tawh kisai genkhawm ding ua, Primary Health Centre leh Community Health Centre tuamtuam a Medical Officer Incharge leh Block Programme Management Unit ban ah District Health Society a Executive Committee Member Zonal Education Officer, Executive Engineer PHED, District Family Welfare Officer, Medical Superintendent District Hospital leh Programme Officer ICDS Cell Churachandpur te telding uhi.
Sarva Shiksha Abhiyan SSA State Mission Authority saina in September 3,2012 sunma dak 10 in Synod Hall IB road ah One Day Free Medical Assessment Camp for Visual, Hearing, Speech, Orthophadic, Cerebral Palsy, Mental Retarded and Other Impairment for Churachandpur Block om ding hi. Hiai hun ah School naupang kum 4 apan kum 17 kikal te ki-etsak theih ding hi. Singngat Block ading in hiai bang Free Medical Assessment Camp September 4,2012 in Singngat Community Hall ah sunma dak 10 akipan neih hiding hi.
Deputy Commissioner Churachandpur in kumnawn a Republic Day hun chiang in Padma Vibhusan Padma Bhusan leh Padma Shri Award puankhiak sawm a, lunglutna nei leh chitna nei peuhmah in DC Churachandpur Office ah August 27,2012 tan in ki-ngetna piaklut theih ding a, thuchian kimzaw leng DC Office ah kanchet theih ding hi.
Churachandpur District Students Union (CDSU) in thusuah a bawlna uah, District Hospital a CT Scan vanzat mang teng a thak a khekkhiak a, a omna tung ah kipah thupuang in, CT Scan vanzat thak om theihna dia panla kha peuhmah tung ah kipah thupuang uhi. Huaiban ah Hospital a vanzat te a hiding bangtak a omsak a, kembit ding in a kisaipih te kiang ah ngetna bawl uhi.
Bangalore leh khopi tuamtuam a North-East mite vaulauna thuthang om te tawh kisai a L Khanmang Ngaihte Vice-President-External Zomi Youth Association Bangalore Region in Zomi Youth Association General Headquater kiang a, ngetna a bawl kimu in a gendan in, Bangalore ah thutang tuamtuam leh vauna sangtak om ziak in Zomi te lungmuang tak in ki-om thei nawnlou a, bitna zong in Lamka a hongkik pawl leng hunkhop ki-omta chi hi. bitna leh muan zong a pawlpi a kipei lai in mun tuamtuam ah vauna kituak zomzel chi a, August 15,2012 in North-East state tuamtuam apan Organisation tuamtuam in meeting ki-nei in panlak dingdan ki-genkhawm a, huchi kawmkal ah August 17 leh 20,2012 in Zomi sung a pan mi 3 leh nupa kop khat in vauna tuak ua, hiai tungtang Wilson Garden Police Station leh Jallahalli Police Station Bangalore ah ZYA panlakna in a sang theipen in FIR ki-bawl chi hi. Aban agenzelna ah ZYA in hiai buaina ki-ngaikhawk mahmah in panlak theihna teng ah panlak ding in lem ki-sa chi a, Sum-le-Pai haksatna ziak in deihbang in ki-gamtang theilou chi kawm in ZYA General Headquater in a kintheilam a panpih ding in ngen hi. Aban agenzelna ah lungkham leh mangbang a om Zomi te omna ding in Rev.Dr.Pumzathang Tombing leh Pastor Thiankhanlal in kiphaltak in inn honzang sak ua, himahleh ZYA in amau te tunitan in sum-le-pai a panpih zawhna kineilou chi'n leng genbeh a, Gilead Evengelical Theological Seminary President Rev.Dr.Pumzathang Tombing inn ah mi 35 vel ki-om a, Pastor Thiankhanlal Hermon Church ah mi 40 vel ki-omlel chi'n leng genbeh hi.
.