* District Hospital ah CT Scan Machine zattheih in omta.
* District Social Welfare Office in Pension Sum hawm.
* Lamka Police te'n Juvenile Act tawh kisai in Consultation mei.
* DS Poonia IAS Chief Secretary in DC Churachandpur Office ah Meeting makaih ding.
* MC Mary Kom vaidawnna ding tawh kisai in Tribe Leader, Philantrophic Organisation, Student Organisation, Women Organisation leh Private School Association in Meeting neinawn ding.
* ZYA General Headquater Central Executive Committee in Meeting neiding.
* UPF leh KNO makaih te India Govt. tawh kihou theilou in hongkik.
TUN TANCHIN KIMZAW IN :
District Hospital Churachandpur a CT Scan vanzat mang muhkik omlou in, a thak a khek in om a, technician te'n a poimoh bangkim a bulh tuak nung un, tuni akipan zat theih in omta hi.
Churachandpur Assembly Constituency sung ading in tuni akipan District Social Welfare Office ah Pension Scheme tuamtuam neite ading in Sum hawm uhi. Manipur Old Age Pension Scheme neite ading in kha 6 sum, Indira Gandhi National Old Age Pension Scheme ading in kha 8 sum, Indira Gandhi National Widows Pension Scheme ading in kha 4 sum leh Indira Gandhi National Disable Pension Scheme ading in kha 3 ading sum hawm uhi. Hiai hun ah Bank Account hong nailou pensioner peuhmah in bank account honna ding in passport size lemlak copy 2, election identity card leh domicile certificate tawi ngai ding hi.
CRY-Kolkata leh Social Welfare and Social Welfare Department, Govt. of India kithuahpihna nuai a, District Police Churachandpur leh New-Life Foundation Manipur saina in tuni sunma dak 10:30 in Khuga Dam IB ah One Day District Level Consultation for Police Personels on "Juvenile Justice Act" nei uhi. Hiai hun ah L Mangkhogin Haokip IPS SP Churachandpur in Welcome address gen a L Pishak Singh Secretary New-Life Foundation Bishnupur in Key note address gen hi. Technical session hun ah Ashim Ghosh Senior Manager Development support-CRY-Kolkata in "Socio-Economic and Conflict Situations contribution to child right violation in Manipur" chih pansan in thugen a, K Saroja Devi Probation Officer Department of Social Welfare Govt. of Manipur in "Silent features of juvenile justice Act." tawh kisai sinsak a, K Padipkumar Singh State Convenor MACR in " Gaps and Challenges of Police on Juvenile Justice systems in Manipur" chih pansan in thugen a, Mala Lisham Member Secretary Child Welfare Committee Thoubal in "Role of CWC and JJB under Juvenile Justice Systems" chih pansan in thugen hi. Hiai hun ah Inspector, Sub-Inspector leh Assistant Inspector hunkhop tel uhi.
District eGovernance Society Churachandpur saina in zingchiang sunma dak 11 in DC Churachandpur Office a BRGF Resource Centre ah Functionalist Common Service Centre tawh kisai in Review Meeting om ding a, DS Poonia IAS Chief Secretary Govt. of Manipur in Meeting makaih ding hi. Hiai hun ah Village Level Entreprenuers leh MS Zoom Developer Imphal te telding uhi.
Autonomous District Council Churachandpur makaih a August 26,2012 Pathianni sunnung dak 1 a Lamka Public Ground ah London Olympic a Bronze Medalist ban ah Churachandpur District mi MC Mary Kom vaidawnna ding tawh kisai in zingchiang sun dak 12 in Langkhanpau Guite Chairman ADCC Office Chamber ah Tribe Leader, Student Leader, Philantrophic Organisation, Womens Organisation leh Churachandpur District Private School Association te'n Joint Meeting neiding ua, MC Mary Kom vaidawnna ding tawh kisai in ngaihdan kikumkhawm in detail programme bawl ding uhi. Hiai hun ah ngaihdan gennuam peuhmah leng teltheih ding hi. MC Mary Kom vaidawnna ah "To God Be The Glory" chih thupi in kizang ding hi.
Zomi Youth Association ZYA General Headquater a President Goukhomang makaih in ZYA General Headquater Central Executive Committee in August 23,2012 zinglam dak 6:30 in Zomi Council Administrative Building Nehru Mang ah Meeting neiding uhi. Hiai hun ah Autonomous District Council makaih a August 26,2012 a MC Mary Kom vaidawnna hun a ZYA leh Constituent Unit te thilpiak ding tungtang leh August 25,2012 a ZYA, ZHRF Myanmar leh ZYA General Headquater Cultural Exchange Programme ding tawh kisai ban ah YPA Kapkhovung Block leh ZYA Bangalore Region te ngetna tawh kisai genkhawm ding uhi. Hiai hun ah ZYA member peuhmah in name plate man ding cheng 50 tawi ngai ding hi.
Muanhuaitak apan thu kiza dan in Singtangmi Helpawl tuamtuam KNO leh UPF a kikhaikhawm te'n Govt. of India tawh Suspension of Operation (SoO) suai a kaih uh, a hun a bei tawh kiton in UPF leh KNO makai te Delhi ah Govt of India tawh kihou ding in kuan mahle uh kihouna om theilou in Meeting ding a hun suan in om a, UPF leh KNO makai te innlam zuan in hongkik vek uhi. UPF leh KNO makai te'n Suspension of Operation behlap ding ut nawnlou in kihouna taktak patding a ut ziak ua, kihouna om theilou hidan in kigen hi.
.