* District Social Welfare Office ah Manipur Old Age Pension Sum kihawm.
* DC Churachandpur in Teachers Eligibility Test, Application Form hawmte hawldalh in, a rate diktak a application form hawm ding in theisak.
* Churachandpur district Primary Teachers Association 2006 in maban a panlak dingdan genkhawm.
* Electricity Department Churachandpur in Drive sunzom.
* Ginsuanhau MLA panlakna in IPD leh PHED in Singngat ah Leinuai apan tui laksuahna ding nasep panta.
* S Nabil khaw Hausa Henkhothang Haokip thahna tawh kisai a kibawl khia JAC in zingchiang akipan hunchiam omlou in General Strike puang.
* Health and Family Welfare Minister Phungzathang Tonsing in Gospel Music Video Album hong ding.
* PTC Central Working Committee in Meeting a 5 veina neiding.

TUN TANCHIN KIMZAW IN :

District Social Welfare Office in tuma deuh a Manipur Old Age Pension Scheme, Red Card, Black Card leh Blue Card neite ading Pension Sum a hawmlai a lakhalou te ading in tuni'n Sum hawm nawn uhi. Bank Account hong nailou te bel sum pelou ua, Account hong nailou te'n District Social Welfare Office ah laktheih ding hi. Hiai Pension sum hawmna zingchiang inleng sunzom ding uhi.

Board of Secondary Education Manipur (BSEM) saina nuai a Teachers Eligibility Test Examination neihna ding tawh kisai in Churachandpur District Students Union (CDSU) panlakna nuai ah ZEO Office Churachandpur ah Application form laktheih in om a, Application te Imphal a valakna leh piakkikna ding in sum hunkhop lut a, huai a sen-le-pai te suktuahna ding leh Candidate te adia leng nna thamlou ding chi in CDSU leh ZEO Office in Application form man in khat ah 330 la uhi. Hiai thiltung tawh kisai Jacintha Lazarus IAS DC Churachandpur in complain a zakphet in tuni sunnung dak 1 vel in ZEO Office ah dianglut in Application form hawm tu teng hawldalh vek hi. Hiai thu tawh kisai in DC Churachandpur, Joseph lalrothang ZEO leh CDSU in ZEO Office chamber ah kihouna nei ua, DC in application form hawmna tawh kisai sen-le-pai om leh District Administration in a pawsuah ding a, application form rate diktak za 3 in a kihawmta ding chi hi. A lehlam ah Imphal a application form lading leh submit dia kuan te'n sang 1, sang 2 vel seng ua, tua district sung a 30 lel seng a form laktheih a submit theih a om pen hamphat huailua hilou hiam chih ngaihdan om thei hi. Pumshong Hangshing Deputy Inspector of School and Incharge TET Application form in a gendan in, banghiam a chihleh form kihawmzom theilou maithei a, sawmthum seng ding naasa a sang 1 sang 2 seng nuam zaw I hih leh bel theihsiam a haksa mahmah ding chi hi.

Churachandpur District Primary Teachers Association 2006 in tuni sunma dak 11 in KKL Complex Headquater veng ah Meeting nei in khaloh laklouh thu leh tuni tan a MGEL bawl fellouh tungtang genkhawm uhi. Churachandpur District Primary Teachers Association 2006 pawl in kum 2011 in appointment mu ua, december 2011 in joint uhi. Himahleh tunitan khloh munailou uhi. Hiai thu tawh kisai in Court tanpha ah beihpih suah sawm in panla ua, Govt. in a limsak keileh General Strike bawl sawm uhi. Hiai Churachandpur District Primary Teachers Association 2006 ah Member 189 om uhi.

Electricity Department Churachandpur Division in phalna neilou a Electric connetion bawl te drive bawlna sunzom in tuni'n Headquater veng lak ah Police tawh kithuah in phalna neilou a Electric connection bawl hunkhop lakkhiaksak uhi. Kum paisa a phalna neilou a connection bawl ziak a, electricity department in a lakkhiaksak nung a tutung a zom kiknawn te, a poimoh ngaih diak uh hidan in kigen hi.

Ginsuanhau MLA 60 Singngat Assembly Constituency panlakna in Finance Department nuai a Investigation Planning and Design leh PHED Churachandpur pankhawm in Singngat khua ah leinuai apan tui pump khiakna ding in tuni'n leivuh kipan uhi. Ginsuanhau MLA inleng tuni sunnung dak 2 in Singngat khua va pha in Leivuhna mun va enkhia hi. Aman a gendan in Singngat Primary Health Centre, Singngat Bazar leh Singngat Zoveng ah Leinuai apan tui pump khiak hiding a, NLCPR tungtawn a Water tanky kibawl leng zawhsiang ahihtawh kiton in, leinuai apan tui ki-pump khe te Water tanky ah kikhawl khawm ding chi a, hiai ding in tuilong leng hongtung pahta ding chi hi. Aban a genzelna ah Chief Minister deihsakna tangkha Singngat mipi te'n theihtawp suah a kithuahpih ding in ngen hi. Hiai hun P Sianzadong Chairman Finance Committee ADCC leh Tongkai Baite MDC inleng uap uhi.

S Nabil Khaw hausa Henkhothang Haokip thahna tawh kisai a kibawl khia Joint Action Committee in Press Release a bawlna uah, JAC in S Nabil khaw hausa Henkhothang Haokip thattu Sehpu Haokip leh akithuahpih te manding a Govt. kiang a ngetna a bawl Govt. in a limsaklouh ziak in JAC in zingchiang akipan hunchiam omlou in General Strike puang ahihdan taklang uhi. Govt. in Charter of Demand leh Memorandum a ngetna om bangbang a sepsuah masiah General Strike sutzop hiding in leng thusuahna ah taklang ua, general Strike in Press/ Media leh Medical chihlouh huamkha vek ding hi.

Ngaihlun in a sak "Jehova Shalom" kichi Gospel Music Video Album honna zingchiang sunma dak 11 in YPA Hall New-Lamka ah om ding hi. Hiai hun ah Phungzathang Tonsing Health and Family Welfare Minister, chief guest apang in Music Video Album hong ding a, Rev. T lalzagin Divisional Superintendent Lamka North Division EBC in Pathian kiang ah landing hi. Guest of Honour in Vungzagin Valte MLA pang ding a, Functional President in Ginsuanhau MLA pang ding a, Chief Host in M Gouzamang Executive Member ADCC pang ding hi.

PTC Central Working Committee in October 2, 2012 sunma dak 11 in PTC Head Office Conference hall Hiangtam Lamka ah Meeting a 5 veina neiding uhi. Hiai hun ah PTC Constitution Amemdmend Draft tawh kisai, Paite Customary Law bawl thak ding tungtang leh 63rd PTC Rising Day Committee phait ding thu leh PTC Court nasep paizia tawh kisai genkhawm ding uhi.

* Tuibuang a Mini Sport Complex bawlna ding in nasep kipan.
* Tedim Road a Truck kisia in Traffic hihbuai.
* ECA Secretariat Chiengkonpang ah Climate Change tawh kisai in Workhop neih in om.
* Mini-Secretariat Building lamna nasep kipan.
* (Late) Thangtual Hauzel 2nd Division District League 2012 ah M Songgel Youth Club in Vualzawhna ngah.
* DC Churachandpur leh Langkhanpau Guite Chairman ADCC in Guite kual ah Govt. School tuamtuam enkhia.
* All India Radio Churachandpur in Paite, Thadou leh Hmar Pau a Compere ding laksawm.
* YPA General Headquaters in Sihna leh Patau Meikang om hun ah Local Cable Operator te theisak ding in ngetna bawl.

TUN TANCHIN KIMZAW IN:
Manipur Tribal Development Corporation (MTDC) in NLCPR fund tungtawn in Tuibuong Peace Ground ah Mini Sports Complex bawlna nasep pailel a, tulai in a fencing kuam ding leh Multi-Purpose hall building ding foundation bawl lel uhi. Hiai Mini-Sport Complex bawlna ding tawh kisai in T Manga Vaiphei Chairman MTDC in apaisa September 8,2012 in hong enkhia a, September 10, 2012 in nasep kipan hi. A kigen dan in, hiai Mini Sports Complex ah Multi-purpose hall, building 1, basketball court, hockey ground, football ground leh volleyball ground bawl hiding hi.

Tedim road a Sielmat Christian Higher Secondary School kong ah tuni zingkal apan Cement pua Punjab body Truck khat lamlian lai ah kisia in tai theinawnlou hi. truck pu te gendan in gari kisiat dan baihlam tak a bawl theih maiding hilou a, tuzan a lamlian lai a om det mel leng theihlouh hidan in gen uhi. Lamlian laitak a truck kisiat ziak in traffic paidan nawngkai tuan mahmah hi.

EFICOR Delhi leh SPTWD, Manipur Branch leh Evangelical Churches Association pangkhawm in tuni zinglam dak 7:00 akipan nitaklam dak 4:00 sung in ECA Secretariat Chiengkonpang ah One Day Workshop on Issue of Climate Change, A Christian Perspective kichi nei uhi. Hiai hun ah Mang Doungel, Co-Ordinator, Centre for Policy Studies and Advocacy, EFICOR leh Lun Haokip, Program Co-ordinator, STPWD, Manipur Branch in climate changes tawh kisai in sinsak ua, hiai awareness Program ah area youth leaders, church leaders leh mission workers hunkhop tel uhi.

Tuibuang a Mini-Secretariat bawlna munding a, a fencing ding tamzaw bawlzawh ahihnung in building lampang bawlna kipan ta hi.

Churachandpur District Sports Association (CDSA) saina in tuni sunnung dak 3 in Lamka Public ground ah (Late) Thangtual Hauzel District 2nd Division League 2012 Closing Ceremony neih in om hi. Hiai hun ah H Mangchinkhup Executive Member ADCC, chief guest in pang a, aman a thugenna ah, tulai in khawvel pumpi in kimawlna a uang bawl mahmah ua, eilak ah infrastructure lam ah taksapna lianpi a om chi hi. Khawvel a kitaitehna tuamtuam in eilak leng hun sawtlou chik sung a honpha ding ahihman in huai te maituah dia mansa a om ding ahihdan gen hi. Guest of Honour in Khaipau Haokip MDC pang a, aman leng damtheihna dia kimawlna a poimoh dan leh kimawlna kichi nekzonna dia hoih mahmah ahihdan gen in kimawl mite hasuan hi. (Late) Thangtual Hauzel District 2nd Division League 2012 Final match ah Love United Football Club leh M Songgel Youth Club kimawl ua, M Songgel Youth Club in Love United Footbal Club te 2-1 in zou ua, winner hihna la uhi.Winner team M Songgel Youth Club in cash prize sing 1 leh trophy ngah in runner up team in cash prize sang 5 ngah uhi. Hiai (Late) Thangtual Hauzel District 2nd Division League 2012 ah kimawlna 42 vei om in goal 107 kikhum khia hi. Club 14 kihel in group 2 in kikhen ua, club 1 gukvei chiat kimawl kha uhi. Tournament sung in yellow card 38 leh red card 1 lahkhiak in om a, M Songgel te striker Jessy in match 6 ah goal 8 a khum ziak in top-scrorer hihna ngah hi. Hiai 2nd Division League apan Club 6, M Songgel Youth Club, Rengkai Athletic and Cultural Club, Mualvaiphei Youth Club, Love United Football Club, Lenlai Club leh Rangers United te first division 2013 ading in dopsang in om uhi. Hiai (Late) Thangtual Hauzel District 2nd Division League ahihleh Thongkhanmang Hauzel in apianna Pa suang a, a sponsor ahi.

Jacintha Lazarus IAS DC Churachandpur leh Langkhanpau Guite Chairman ADCC, Guite kual phading in zinkhia ua, tuni'n Sinzawl khua ah Langkhanpau Guite Chairman ADCC in Sinzawl Primary Health Centre a zatding Ambulance pekhia hi. Huaizawh in Jacintha Lazarus IAS DC Churachandpur in Songtal Govt. High School huangsung a 13th finance tungtawn a kibawl water tanky honna nei hi. Huaiban ah Songtal khua mah a BADP 2011-12 tungtawn a Mineral Water tanky 2 kibawl leng DC leh Chairman ADCC in khat tuak in hong uhi. Hiai Programme zawh in Mualnuam, Suangdoh leh Thuangtam a Govt. School te inspection bawl ngal uhi.

Chinkhanlian Programme Executive AIR Office Tuibuang in tuni'a thusuah a bawlna ah,All India Radio Churachandpur in Paite, Thadou leh Hmar pau a Compere ding laksawm a, lunglutna neite'n AIR Office Tuibuang ah Office nasep nii teng in prescribe application form laktheih ding a thuchian kimzaw leng ngah theih ding hi. Application form fill-up khit nung in October 10, 2012 tan in piaklut theih ding hi.

Young Paite Association YPA General Headquaters a General Secretary Tunglut Thuamkhopau in theihsakna thusuah a bawlna ah, Sihna leh patau meikang om hun a kintak a kithuzak theihna ding in Local Cable suan mahmah Hornbill Cable Network leh Angels Vision ah SMS ahihkei leh phone a houpi thoh in Customer Care number tungtawn a hilh sawn pahpah ding in theihsakna bawl a, hiai ding tawh kisai in Local Cable Operator te'n YPA leh mipi khualna in September 25,2012 a YPA General Headquater Cabinet Meeting ah, a thon a hon hihsak ding in lemsakpihna honpia uh chi hi. Thusuak in a genzelna ah hiai thu tawh kisai, YPA vaipaw kha peuhmah in Unit huap sung a om te theisak sawn ding inleng ngen hi. Huaiban ah YPA makai te'n Cable Operator te phattuamngaihna kithuahpih a, Cable gui kigu, kisattan chihte News a hongsuah nawnlouhna dia panlakpih ding in ngetna bawl ngal hi.