* District Hospital ah Naunei panpihna JSY Sum kihawm.
* JAC Against the killing of Henkhothang Haokip Chief of S Nabil leh Joint Student Organisation in Meeting nei in maban a panlak dingdan genkhawm.
* UZO General Headquater Executive Committee in Ginsuanhau MLA kitawpna pomsak.
* YPA General Headquater Vice-President K Zamsiam innsung a thagum suah a Sum ngen te YPA General Headquaters in sangtak in mohpaih.
* MPSC nuai a lohchinna ngah S Thienlaljoy Gangte, Paukhenmung leh Lunzamung Tungnung te tung ah Kamsuanlun Executive Member ADCC in Hiangtam Lamka ADC Constituency mipi sik-le-tang in kipahpih thupuang.
* Mualnuam Meet thupitak in kizang ding.* Kholmun ECA Biakinn ah Youth Leadership seminar om ding.**Tuibuang ECA Biakinn ah One Day Seminar on Awareness Programme on Issue of Climate Change, Christian Perspective kichi om ding.
TUN TANCHIN KIMZAW IN:
District Hospital Churachandpur a February apan April 2012 sung a nau a khatna leh nihna tan neite ading in tuni'n District Hospital huangsung ah naunei panpihna JSY Sum hawm uhi. Panpihna sum ladia kuan peuhmah in District Hospital apan Discharge Certificate, Antenatal Card, Immunization Card leh Village Authority apan BPL Card tawi ngai hidan in kigen hi.
S Nabil khaw hausa Henkhothang Haokip thahna tawh kisai a kibawl khia JAC leh Joint Student Organisation in zanhal a Protest Rally nei a, Govt Office teng khaksak a, Govt. activities teng leng boycott a puang nung un tuni sunnung dak 2:30 in KIC Office Tuibuang ah JAC leh Joint Student Organisation in Meting nei in maban a panlak dingdan genkhawm uhi. Hiai hun ah JAC lam apan thu kiza dan in tunitan a Govt. in ngetna bang a bangmah dawngna hon piaklouh ziak in Govt. teng khaksakna leh boycott na sutzop hiding a, huai nung a leng Govt. in alimsak tuan keileh September 29,2012 a Churachandpur District pumpi huap a General Strike bawl hiding chi ua, Govt. Office leh activities teng boycott sung a, banghiam thil deihhuailou om leh JAC in moh a paw keiding chi in, mipi'n leng kithuahpih ding in ngen uhi.
Zogal Memorial Hall Complex Zoveng ah tuni sunma dak 11 in United Zou Organisation (UZO) General Headquater Executive Committee in Meeting nei uhi. Hiai hun ah Ginsuanhau MLA in June 5,2012 a UZO General Headquater President hihna apan kitawpna lai a piak tungtang genkhawm in President kitopna pomsak ua, Executive Committee in UZO General Hedquater President ding in Manglianthang approved bawl ngal uhi. Huaiban ah Vice-President ding in Vumchinkhup guang in om hi. Huailou in T Gougin Father of Zomi sihni June 5 pen kum teng a zatding in UZO Executive Committee in lemsa ua, hiai ni teng in nampuan kikhai ding hi.
Young Paite Association (YPA) General Headquaters in thusuah a bawlna uah Apaisa September 21,2012 nitak dak 9 vel a YPA General headquaters Vice-President K Zamsiam inn a meltheihlouh pasal 2 in, innluah a om vai Pan Dukan bawlpa kiang a sum sing 1 thagum a, a nget uh, piaksak ding a innsung a thagum suah a gun point a nohna a bawl uh, YPA General Headquater in poisa mahmah in mohpaihna sangpen a mohpaih ahihdan taklang uhi. Huaiban ah hiai bang a lungsim bei bang a gamtang a, numei naupang lung-am sak a, lungsim buaiden thei ding khop a Philantrophic Organisation makai te innsung a gamtatna YPA in nnasa mahmah ahihdan leh heutu a taihilh thei ding te'n taihilh ding in ngetna bawl ngal uhi. Aban a genzelna uah, mi neihsa tung a, thagum suah a gamtat kichi mawlhuai leh lungsim beihuai mahmah ahihdan leng taklang in Lamka khopi sung leh mundang koimah ah leng kuamah in sunzom nawnlou ding in ngetna bawl ua, tutung a thiltung a tawpna hileh chi uhi.
Manipur Public Service Commission saina nuai a Manipur Civil Service Combined Examination a lohchinna ngah S Thienlaljoy Gangte, Paukhenmung leh Lunzamung Tungnung te Hiangtam Lamka ADC Constituency mipi in kipahpih a kisaktheihpih mahmah ahihdan Kamsuanlun bialtu MDC and Executive member ADCC in kipah thusuahna ah taklang hi.
Thanlon Sub-Division sung Mualnuam khua ah October 3 akipan 6, 2012 sung in Mualnuam Autumn Meet thupitak in kizang ding hi. October 3 nitak in Khanthang Tonsing chief guest in pang ding a, October 4 nitak in Vungzagin Valte bialtu MLA chief guest in apang ding a, October 5 nitak in Langkhanpau Guite Chairman ADCC chief guest in pang ding a, October 6 nitak in T Goukhomang President Zomi Youth Association General Headquater Chief Guest in pang ding hi.
Zingchiang akipan September 30, 2012 sung in Kholmun ECA Biakinn ah "Challenge of Youth" chih thupi a zang in Evangelical Youth Fellowship, ECA leh Hope Baptist Fellowship Church, Bangalore saina in Youth Leadership Seminar - 2012 om ding hi. Hiai hun ah Uncle Victor Sitther, Bangalore; Rev. Sekar, Bangalore, Rev. Obed Haokip, Bangalore, Rev. Thangkholal Haokip, Guwahati leh Hemkhomang Haokip Resource Person in apang in thupi tuamtuam pansan in sinsak ding uhi. Hiai seminar ahihleh zingchiang nitak dak 6:00 in Pastor Chungkhojam Area Pastor, Koite Lui Pastor Area in hong ding hi.
EFICOR Delhi leh SPTWD, Manipur Branch leh Evangelical Churches Association pangkhawm in zingchiang zingkal dak 7:00 apan nitaklam dak 4:00 sung in ECA Tuibuong ah One Day Seminar on Awareness Program on Issue of Climate Change, Christian Perspective kichi om ding hi. Hiai hun ah Mang Doungel, Co-Ordinator, Centre for Policy Studies and Advocacy, EFICOR leh Lun Haokip, Program Co-ordinator, STPWD, Manipur Branch resource person a pang in sinsak ding uhi. Hiai awareness Program ah area youth leaders, church leaders leh mission workers hunkhop telding uhi.