* Zomi Council in Executive Meeting nei.
* Thangkhal Bible Church in Lamka khopi sung a Biakinn masapen ding hong.
* One Day Legal Awareness Interaction Programme neih in om.
* PTC General Headquater in Executive Meeting nei.
* S Nabil khaw Hausa Henkhothang Haokip sihna thu tawh kisai in JAC makaih in Lampi zuihna om ding.
* NYK leh LRRC saina in Awareness Cum De-addiction Camp om ding.
* Tuibuang TD Block sung a khaw Hausa te'n MGNREGS tawh kisai in Workshop nei.
* EBC Lamka South Division Mission Kumsim Khawmpi om lel.
* Tuima khua a Mobile Medical Camp neih hun ding leh Sinzawl PHC ading Ambulance piakkhiak hunding kisuan.
* PHSC Management Society Meeting hunding kisuan.
* CDSA in Tuibuang Peace Ground a Mini-Sport Complex bawna munding enkhia.

TUN TANCHIN KIMZAW IN :

Tuni zingkal dak 7:00 in Nehru Marg a Zomi Council Administrative Building ah Zomi Council Chairman LB Sona makaih in Zomi Council Executive Meeting om hi. Hiai hun ah tuma a Political Talk neih theihna dia Union Minister tuamtuam mu dia zinkhia te'n report pia ua, Zomi Council Building Construction Committee-te panlakna tawh kisai leng genkhawm uhi. Huaiban ah, kum nawn 2013 in New Delhi ah Zomi Nam Ni National Level a lop ding thu , Imphal leh Shillong ah State Level a lopding thu kikumkhawm uhi.

Thangkhal Bible Church in Lamka khopi sung a biakinn masapen ding in tuni sunma dak 11:00 in Tangnuam khua ah Biakinn honna nei uhi. Thutut kingah dan in, Tangnuam khua a Thangliansuan inn ah Thangkhal Bible Church member-te kikhawm in, kum 2 sung vengveng hiai inn a akikhop nung un, mi phatuamngai khenkhat tungtawn in biakinn mun ding leikhia ua, August 7, 2012 in biakinn ding lampan uhi. Biakinn ding zawhsiang ahihtoh kiton in tuni sunma dak 11:00 in Rev. S. Thangnou, Area Pastor in hong in Pathian kiang ah lat ngal a, mun tuamtuam apan Thangkhal Bible Church member hunkhop kihel uhi. Tulel in Tangnuam Thangkhal Bible Church ah innkuan 30 vel om hidan in kigen hi.

District Legal Service Authority saina in tuni sunma dak 11:00 in District Training Centre, Tuibuong ah One Day Legal Awareness Interaction Programme on the Subject Relating to Juvenile Justice Act. and Narcotic Drugs and Psychotropic Substances (NDPS) Act. om hi. Hiai hun ah Ch. Momon Singh, Advocate in "Juvenile Justice (Care and Protection of Children) Act, 2000 chih thupi zang in sinsak a, Roland Keishing, Judge, NDPS in "NDPS Act" toh kisai in sinsak hi. Hiai program ah Churachandpur Police Department a Assistant Sub-Inspector apan a tunglam teng tel uhi.

Hiangtam Lamka a PTC office ah tuni zinglam dak 10:00 apan in PTC Gen HQ Executive Committee meeting om hi. Hiai hun ah PTC Constitution Amendment proposal draft bawlding, Paite Customary Law review bawl ding ban ah, suggestion tuamtuam omte etkhawmna nei uhi. PTC President in a gendan in, tuni a constitution amendment leh paite Customary Review kibawlte khanawn chiang a Central Working Committee toh etkhawmna om nawn ding a, tukum sung a Assembly ah pass hiding in gen hi.

S Nabil khaw hausa Henkhothang Haokip thahna thu tawh kisai a kibawl khia JAC leh Joint Student Body in tuni sunnung dak 2 in KIC Office Tuibuang ah Meeting nei in September 24, 2012 sunma dak 10 akipan Lamka Public ground a mipi kipunkhawm a DC Office tan lampi ziuh dingdan genkhawm uhi. JAC leh Joint Student Body paikhawm te'n tualthat te mohpaih thupuang in, gamsung a lemna leh muanna hihse thei ding a gamtang peuhmah mohpaih ding leh deihlouh ding ahihdan gen ua, Govt. in S Nabil khaw hausa that tute tutan mankhelou a, Govt. in mipi deihna bang a nna a seplouh ziak leh minautang pawng thahna deihlouhna ziak a lampi zuihna ding ah kuapeuh mah telding in chialna bawl uhi.

Nehru Yuva Kendra Churachandpur leh Lamka Rehabilitation and Research Centre (LRRC) saina in September 24, 2012 sunma dak 11:00 in Lametnamun, Bungmual ah Awareness cum De-Addiction Camp om ding hi. Hiai hun S. Kamsuanlun, Executive Member ADCC in Chief Guest hihna toh uap in Awareness cum De-Addiction Camp hong ding a, H. Doungel, District Co-Ordinator, NYK Churachandpur leh M. Ginzalian, Chairman, Management Committee, LRRC in thugenna hun zang ding ua, Rev. K. Kamchinkhup, Director of Ministries, EBC in camper-te a ding in thumsak ding hi. Awareness cum De-Addiction Camp a tel ding a registration bawl teng inauguration hun a telkim chiat ding in Secretary, LRRC in theihsakna bawl hi.

BDO Tuibuong TD Block saina in tuni sunma dak 11:00 in B. Vengnom Community Hall ah Tuibuong TD Block sung a khaw hausate a ding in MGNREGS toh kisai in workshop nei uhi. Hiai hun ah M. Ibotombi Singh, BDO Tuibuong, Thangkhohem, Section Officer leh Dinachandra, Section Officer in MGNREGS 2012-13 sung a nasep ding tuamtuamte hoihtak a sepsuah dingdan sinsak ua, program zawh in khaw hausate kiang ah first aid kit pia uhi.

Evangelical Baptist Convention, Lamka South Division saina in "Nungzui bawl un" chih thupi zang in zan September 21 apan September 23 tan daih ding in Vengnuam EBCC ah Mission Kumsim Khawmpi a 6veina kipan hi. Hiai khawmpi ahihleh zan nitak 5:30 in Rev. N. Thawndoulian, Divisional Superin tendent, Lamka South Division in hong a, Rev. L. Khamkholun, General Secretary, EBC; Rev. Paukhanmang Guite, Director of Institutes, EBC; Rev. S. Vungminthang, Director of Missions, EBC leh Rev. K. Kamchinkhup, Director of Ministries, EBC te'n thugenna hun zang uhi. Tuni sunnung dak 1:00 in vaihawmna hun neih in om a, January - December 2013 Annual Plan leh Budget ding genkhawm uhi. Hiai hun ah khawmpi palai dia registration bawl mi 195 te'n annual budget ding in lakh 4,sing 3 leh sang 1 kituaktak in pass uhi.

District Health Society saina a September 24, 2012 in Singngat PHC huamsung a om Tuima khua ah Mobile Medical Camp leh Reproductive Child Health (RCH) Camp om ding chih himahleh September 27, 2012 a ding in a hun suan in om hi. Huaiban ah, September 24 ni mah a DC Churachandpur in Sinzawl khua pha a, Sinzawl PHC a zat ding Ambulance pekhe ding chih leng September 27, 2012 a ding in a hun suan thak uhi.

September 28, 2012 sunma dak 11:00 a DC Churachandpur Jacintha Lazarus, IAS makaih a BRGF Resource Centre, DC office ah Primary Health Sub-Centre Management Society in meeting neiding chih himahleh October 5, 2012 zinglam dak 10:30 a neih ding in a hun kisuan hi.

Manipur Tribal Development Corporation (MTDC) in NLCPR Fund tungtawn a Tuibuong Peace Ground a Mini Sports Complex kibawl lel Churachandpur District Sports Association (CDSA) in tuni sunma dak 10:30 in etkhiakna va nei uhi. Tuibuong Peace Ground a Mini Sports Complex bawlna ding toh kisai in MTDC Chairman T. Manga Vaiphei in apaisa September 8, 2012 in hong enkhia in, nasep September 10, 2012 in kipan ngal hi. Thutut kingah dan in, hiai Mini Sports Complex ah Multi-purpose hall, building 1, basketball court, hockey ground, football ground leh volleyball ground bawl hiding in kigen a, nasepna toh kisai CDSA in quality hoihtak a enkai ding hidan in CDSA makaite apan thutut kingah hi. Hiai Mini Sports Complex bawlna ding in centre government 8.6 crores sanction in, tu'n 40 percent release hita in, hiai sum tungtawn in Tedim Road lampang fencing nasep kipan hidan in leng kigen hi.