* S Nabil khaw Hausa Henkhothang Haokip thattute matkhiak ding deihna in mipi sang 15 val in Lampi zui.
* ZEO Churachandpur Office ah Teacher Eligibility Test Application kihawm panta.
* LRRC Bungmual ah Awareness Cum De-addiction Camp kipan.
* Hill District a Joint Student Body te'n zingchiang Bandh ding khawlsan phot.
* District Hospital ah Naunei panpihna JSY Sum kihawm nawn ding.
* District Health Society Governing Body Meeting hunding kisuan.
* Manipur Civil Service Examination result suak a, ST mi 46 in lohchinna ngah.
* Centre for Community Initiative in Events Co-ordinator ding leh Driver Cum Office Boy ding laksawm.
TUN TANCHIN KIMZAW IN :
Henkhothang Haokip Chief of S Nabil thah a omna thutawh kisai a kibawlkhia Joint Action Committee makaih in Joint Students Body Kuki Student Organisation, Zomi Student Federation, Churachandpur District Students Union, Gangte Student Organisation leh Hmar Student Association saina in tuni sunma dak 10 in Lamka public ground ah mipi tamtak kipunkhawm in apaisa September 7, 2012 nitak a S Nabil khaw hausa Henkhothang Haokip that tute matkhiak ding deihna in mipi'n lampi zui in DC Churachandpur Office ah Memorandum pia uhi. Pubilc Ground a mipi kikhopna hun Jacintha Lazarus IAS DC Churachandpur inleng uap in thugenna hunzang hi. Aman a thugenna ah tualthahna poisak thugen in, tualthatte kintak a matkhiak ahihtheihna dia Chief Secretary kiang ah thil om dan theisak ding ahihdan leh theihtawp suah a panla ding ahihdan genkawm in lusun innkuan te thuakpih thupuang in District sung a lemna leh muanna om theihna dia kuapeuh mah in panla ding in ngen hi. Hiai hun ah JAC volunteer te'n tualthattu hidan a ngoh a om Sehpu Haokip of Old Lambulane, Lamkhomang of S Nabil leh Thangkholal of Vongjang village te lem kibawl tawm mei in haltum uhi. Lamka public ground apan mipi'n IB road tawn in Tedim road apan DC Office tan lampi zui in DC Office ah C Hangshing Additional Deputy Commissioner khut ah memorandum pia uhi. C Hangshing Addidtional Deputy Commission in thiltung puaknat thugen a, Memorandum leng thuneihna sangzaw neite kiang tun pahding ahihdan gen hi. JAC in Stet Govt. kiang a demand a bawl te ahihleh Sehpu Haokip of Old Lambulane, Lamkhomang of S Nabil leh Thangkholal of Vongjang village te a kinlam a mankhia a, damsung suangkul a koih ding, tualthah laitak mit a mukha leh lusun innkuan te solkar in bitna a piak ding, tualthahna kigolhkha peuhmah dan tah kituak a gawtna piak ding leh Sehpu Haokip gou-le-gam neih tengteng Govt. in a hentangsak ding chih hi a, Govt. in ngetna bang a sepsuah keileh kiphinna sangzaw in zuiding a, thil deih huailou tung om leh Govt. in mohpaw ding chi uhi. Tuni'a Protest Rally ah pitek-putek tel in School 18 apan Student tamtak paikhawm ua, akigawm in mi sing 1 leh sang 5 val ding in kigen hi. JAC in Protest Rally neih zawh in Meeting nei ua, huai ah kiphinna sutzop ding a, lemsa in zingchiang akipan District sung a Govt. Office teng khak ding leh Govt. Activities peuhmah Bandh ding in thupuk uhi. Govt. in JAC demand te a sepsuah masiah sutzop hiding inleng JAC apan thu kiza hi.
Board of Secondary Education Manipur (BSEM) saina nuai a Imphal a November 4,2012 a Teacher Eligibility Test (TET) Examination neihna ding tawh kisai in tuni'a kipan ZEO Office Churachandpur ah Application form kihawm panta hi. Paper I ading in Class-XII passed hihngai ding a, Paper II ading in Graduate hihngai ding hi. Churachandpur ah Application form October 2, 2012 tan kihawm ding a, Form deih te'n za 3 pia in ZEO Office ah laktheih ding hi.
Nehru Yuva Kendra Churachandpur leh Lamka Rehabilitation Research Centre (LRRC) saina in tuni sunma dak 11:00 in Lametnamun, Bungmual ah Awareness cum De-Addiction Camp om honna nei uhi. Hiai hun S. Kamsuanlun, Executive Member ADCC in Chief Guest hihna toh uap in Awareness cum De-Addiction Camp hong a, H. Doungel, District Co-Ordinator, NYK Churachandpur leh M. Ginzalian, Chairman, Management Committee, LRRC in thugenna hun zang ua, Rev. K. Kamchinkhup, Director of Ministries, EBC in camper-te a ding in thumsak hi. Hiai Awareness cum De-Addiction Camp ahihleh tuni'a kipan ni 15 sung neih hiding hi.
Manipur Hill District tuamtuam a Student Body tuamtuam kigawm khawm te'n District Headquater teng a Teacher Eligibility Test form hawm ding leh Exam Centre leng District Headquater teng a om sak ding deihna a zan nitak zankim akipan zingchiang tan Bandh ding chi mahle uh, Exam saiding Board of Secondary Education Manipur (BSEM) a Secretary Raj Mohan in Application form hawm zawh chiang a Exam Centre ding tungtang ngaihtuah ding a thuchiam a bawl ziak in Joint Student Body te'n zingchiang a Bandh ding khawlsan phot uhi. Hiai tungtang a CDSU Press Release in agendan in BSEM Secretary in CDSU thil nget moral support pia ahihdan leh Student te haksatna ngaikhawk ahihdan leng gen chi uhi.
District Hospital Churachandpur a February apan April 2012 sung a nau a khatna leh nihna tan neite ading in September 26, 2012 in District Hospital huangsung ah naunei panpihna JSY Sum kihawm ding hi. Panpihna sum lathei ding peuhmah in District Hospital apan Discharge Certificate, Antenatal Card, Immunization Card leh Village Authority apan BPL Card tawi chiat ding in Dr. N Paulginthang Medical Superintendent District Hospital in theihsak hi.
Dr. VC Pau Tonsing District Family Welfare Officer leh Convenor District Health Society in tuni'a thusuah a bawlna ah District Health Society Governing Body Meeting September 28,2012 a neih ding chih himahleh a lemtangzaw ding gelna in October 5, 2012 sun dak 12 a neih ding kisuan chi hi.
Manipur Public Service Commission saina nuai ah february 6 apan february 21, 2012 sung in Manipur Civil Service Combined Competitive (Main) Examination neih in om a, huaizawh August 21 apan September 18, 2012 sung in Personality Test om nawn hi. Huai a paisuak te result September 22, 2012 in suak a, mi 138 MCS ding in lohching uhi. Huailak ah ST Candidate 46 in lohchinna ngah uhi. Amau te Lalrobul Fimate, S Thienlaljoy Gangte, Joel G Haokip, Daryal Juli Anal, Gangmei Ganguilu, Soiminlian Lengen, Paukhanmung Guite, Semmi Ramror, Emmanuel L Fimate, Sangboi Gangte, Lunzamung Tungnung, Tholu Rocky, Namsadai Peter, Dangmei Manglem, Lhingjakim Haokip, Chinlianhat Vaiphei, Wanneilen Serto, Alfred Jamlallun Khaute, Chingkhiulung Rianmei, Gaikhonlung Panmei, RA Ransing, PN Boipi, Lunminthang Haokip, P Duna Duo, Lucy Haokip, Meiringmei Agang Kabui, K Themreingam Rainam, T Vei, HL Christian Home, Lalthanzam Fimate, Namlalung Gangmei, Kaigoulal Kipgen, Sagongduimei Lunguiba Thangal, Zosanglur Joute, James Pani, Lalthazam, Philip John, Zorisang Thiek Pangote, James Doujapao Haokip, Anthony Mangkhothong Haokip, Renee Newmai, Solomon Lalneilien Fimate, Varewung Khongreingam, Thangliansiam Taitom, D Meidinbui leh Reikimdaar Khaling te hi uhi.
Non-Profit Organisation, Centre for Community Initiative in vualphalou te dopsangna ding tawh kisai in theihtawp suah in panlak sawm a, huai ding in event leh programme tuamtuam saiding leh Centre for Community Initiative project leh programme ading fund raise bawl thei ding Graduate apan a tunglam mikhat Co-ordinator ding in laksawm ua, huaiban ah Driver Cum Office Boy ding in mifel, pawl 10 passed ban ah four wheeler driving 5 years experience neisa khat laksawm uhi. Lunglutna neite'n October 1, 2012 mangei in The Executive Director Centre for Community Initiative, Zion Street, Central Lamka ahihkei leh The Malsawm Initiative, Lalpuithluaii Foundation School Campus ah mahni khut gelh kingetna piaklut theih ding hi.