* Khanthang Tonsing in "Jehova Shalom" kichi Gospel Music Video Album hong.
* Churachandpur Christian Women Fellowship in gamsung damna ding in Anngawl thumna nei.
* Voluntary Help Unit Committee RIMS Hospital in Hmar Veng ah Free Medical Camp hong nei.
* JAC Bandh sung in buaina bangmah gending omlou.
* SP Churachandpur in S Nabil khaw Hausa Henkhothang Haokip sihna tawh kisai a IO leh JAC makai te samkhawm in Meeting neihpih.
* Lamka Traders and Self Employed Association in kithuahpihna pia Dawr kaite tung ah kipahthu puang.
* United Chief Committee in Emergency Meeting neiding.
* Pastor Dr. HS Chinsuanthang in Website thak www.phualvatimes.com kichi hong.
* Assembly Constituency 6 a BLO teng in Special Summary Revision 2013 ding tawh kisai in Training neiding.
TUN TANCHIN KIMZAW IN :
Ngaihlun in apianna pa aphamsa Tunzakhup Guite theihgigena dia a bawl "Jehova Shalom" kichi Gospel Music Video Album honna tuni sunma dak 11 in YPA Hall New-Lamka ah nei uhi. Hiai hun ah Phungzathang Tonsing Health and Family Welfare Minister, chief guest apang ding chih himahleh Cabinet Meeting in ziak in teltheilou a, amah tang in atapa Khanthang Chief guest in pang a, aman Music Video Album hong in, a thugenna ah Music Video Album kichi te Zomi te adia gou manpha tak ahihdan gen in, Music Video Album bawlkhete kipahpih thugen in, lasiam te phungvuh theihna ding lampi ngaihtuah a, Album kibawlkhe te leisak chiat poimoh ahihdan gen in Album bawlkhetu Ngaihlun kithuahpihna in sing 2 pia hi. Rev. T Lalzagin Divisional Superintendent Lamka North Division EBC in Pathian kiang ah Music Video Album lan hi. Chief Host in M Gouzamang Executive Member ADCC pang a, hiai hun MDC leh mipoimoh tamtak in uap uhi.
Churachandpur Christian Women Fellowship makaih in tuni zinglam dak 7 akipan sunnung dak 2 sung in EBCC Zenhang Lamka ah Anngawl thumna nei uhi. Hiai hun ah District sung a Saptuam pawl tuamtuam apan nupi hunkhop paikhawm in gamsung damna ding in anngawl in thumna nei uhi.
Directorate of Health and Service Govt. of Manipur sponsor na nuai a Voluntary Help Unit Committee RIMS Hospital kithuahpihna tawh Nazarene Compassionate Ministries in India saina in tuni sunma dak 10:30 akipan Hmar Veng a Church of Nazarene huangsung ah One Day Free Medical Camp nei uhi. RIMS Hospital Imphal apan Skin, Ortho, Gynea, Padiatic, Surgery, Medicine, ENT leh Eye Doctor 11 leh technician 8 in damlou te a thon a en in damdawi leng a manbei in pia ua, natna tuamtuam nei a damlou mi 400 val ki-ensak uhi.
Joint Action Committee (JAC) Against the killing of Henkhothang Haokip Chief of S Nabil in Govt. in tualthattu Sehpu Haokip leh a lawm te matkhiak ding deihna a tuni'a kipan hunchiam omlou a District sung pumpi huap a General Strike a bawl ziak in Lamka khopi sung ah sum buk teng kikhak in, Lamka leh Imphal kikal ah Gari service omlou a, Govt. Office tamzaw leng kailou uhi. New-Bazar leh Tuibuang kikal ah Bandh khauh mahmah in New-Lamka area ah bel in Gari ngeina bang a tai in dawr teng leng kihong vek hi. Bandh Volunteer te'n gari taite khamkhawl in Gari chabi laksak uhi. Tuni'a Bandh ziak in buaina bangmah gending omlou hi. Bandh omlai ding hiam chih tawh kisai News gelh ahihtan in chiang nailou a, thuthak om leh TV nuai ah Scrolling in hon kitaisak ding hi.
L Mangkhogin Haokip IPS SP Churachandpur in tuni sunma dak 11 in amah Office Chamber ah Henkhothang Haokip Chief of S Nabil sihna tawh kisai a Investigation Officer Jugesh Chandra MPS Additional SP Bishnupur leh JAC makai te samkhawm in Meeting neihpih hi. Investigation Officer Jugesh Chandra Additional SP Bishnupur in tunitan a thil omdan report bawl a, theihtawp suah a Police in panla ahihdan gen hi. L Mangkhogin Haokip SP Churachandpur in JAC makai te kiang ah Bandh ziak a nektawm zong te'n haksatna genvuallouh tuak ding ahihman in Bandh Call-Off ding in ngen a, Police in hiai kithahna tawh kisai buaipih pen a nei ahihdan gen in, a Case leng a serious mahmah chi a, tualthahna tawh kisai a kigolhkha dia muanmoh mi 4 kimanta a, huai te lak ah mi 3 Jail ah om in khat bail in pawt chi a, Police te om maimai hilou ahihdan gen hi.
Lamka Traders and Self Employed Association in thusuah a bawlna uah, JAC makaih a Kuki Students Organisation leh Zomi Students Federation in S Nabil khaw hausa Henkhothang Haokip thattu te matkhiak ding phutna a tuni'a Bandh a bawl uh Lamka Traders and Self Employed Association inleng thuakpih mahmah ahihdan taklang ua, Lamka Traders and Self Employed Association in dawr teng hong chiat ding a News tungtawn a theihsakna leh ngetna kibawl pen kuapeuh in a kithuahpih ziak in kipah thugen uhi. Aban agenzelna uah, CDSU in "nikhat bek honna kithuahpih un" chia ngetna om ziak a dawr hon kikhaksak nawn pen poi kimahmah a chih ban uah, dawr kai te'n theisiam ding in ngen uhi. Huaiban ah Organisation khenkhat buai theihna ding zong a hai diang-diang pawl om mahleh Lamka Traders and Self Employed Association in lemna, kithutuahna, lungmuang leh thoveng tak a om theihna dia ngaihtuah ahihdan taklang ua, michih nam chiah hoihna ding a pawlpi kiphutkhia ahihdan leng theihsiam poimoh chi'n thusuahna ah taklang uhi. Aban agenzelna uah, JAC inleng lungpi gel tak a mipi subuailou a panlak dan lampi ngaihtuah a, migilou te matkhiakna dia panla ding inleng ngetna bawl ngal uhi.
United Chief Committee (UCC) nuai a Finance Committee in October 2,2012 sunma dak 10 in UCC Office Red-Cross Road ah Emergency Meeting neiding uhi. Hiai ding tawh kisai in UCC Block chih a UCC fund khonkhawm ding a mohpuakna piak a om te'n a kinlam a hihfel a, Emergency Meeting hun a tawi chiat ding in theihsakna bawl ua, Emergency Meeting ah Block chih apan President leh Secretary teng a tellou om theihlouh ding hidan in Secretary Information and Publicity United Chief Committee in theihsakna bawl.
Tuni sunnung dak 2 in New-Lamka Hebron EBCC Biakinn kiang a Computer zilna Digi-Info Tech ah Pastor Dr. HS Chinsuanthang in tulai akhangthak te adia poimohna liantak nei Webisite thak www.phualvatimes.com kichi Pathian kiang ah thumna a lan in hongkhia hi. Hiai Phualva Times ahihleh Joy Ngaihte in November 11, 2009 a SMS tungtawn a thuthak kapkhiak theihna ding SMS GupShup a group a, abawl, tua website piching a bawlkhiak a om hidan in kigen hi. Tulel in Phualva Times website khawpi tuamtuam a Zomi khangthak kipawlkhawm bangzahhiam in enkol ua, New-Delhi tel in Bangalore leh Lamka apan mi 7 in website enkol uhi.
Churachandpur District sung a Assembly Constituency 6 a Booth Level Officer (BLO) teng in Special Summary Revision 2013 ding tawh kisai in October 4, 2012 in mun tuamtuam ah Training ding uhi. 55-Tipaimukh A/C sung a BLO te'n BRGF hall DC Office ah sunma dak 10 in training neiding ua, 56-Thanlon A/C sung a BLO te'n DC Office Conference Hall ah sunma dak 10 mah in neiding ua, 57-Henglep A/C sung a BLO te'n District Training Centre Ground floor ah Training neiding uhi. 58-Churachandpur A/C sung a BLO te'n NREGS Hall SDO Office ah sunma dak 10 in training neiding ua, 59-Saikot A/c sung a BLO te'n a mun kibang mah ah sunnung dak 1 in training neinawn ding ua, 60-Singngat A/C sung a BLO te'n District Training Centre Top Floor ah sunma dak 10 in Training neinawn ding uhi.