Student Diesel Auto Pass New Lamka East bial ah bawl hi ding.
#Pu Gouzamang, MDC New Lamka(East) In Diesel Auto'ten Ki Muhpih
ZNN | Tuni sunnung dak 2:00 in YPA Hall, New Lamka ah Pu Gouzamang, MDC New Lamka (East) in ama bialsung a Diesel Auto Association tuamtuamte kimuhpihna nei in siamsin/studentte kiang a student pass piak hoih ding hia, hoihlou ding chih thu toh kisai meeting poimoh tak nei uhi. Hiai hun ah Pu Gouzamang in a ma bialsung (New Lamka- East) sung a Diesel Auto Association a kipawlkhawm Association 5'te toh houlim khawmna nei hi. Aman a genna ah, khotang thil toh et inleng, nu-le-pa tamtak in a tate uh khualna in auto tuanna ding sum pemah le uh, tamtak in huai heikawi in, auto tuanna a zanglou in a lehlam a zangsek uh ahihdan nu-le-pa tamtak akipan report zak ahihziak in poisak thu gen a, tuni a meeting kisapna pen khotang leh inkuansung a thilhoih' nasep tupna ahihdan leng taklang hi.
Hiai huna ah, ngaihdan tuamtuam genkhopna om a, student-te kianga pass piak hileh nawngkaina tuamtuam omtheite autopute' akipan inleng ngaihkhiatna om banah, siamsinte kianga hiai student pass piak hileh khotang thil hi in innsungkuan sung hileh thil tamtak a navakna a tut dingdan thute genkhopna om hi. Hiai toh kisai naktak a genkhop a hihnung in hiaibang in thupukna bawl in om hi: Student-te kianga STUDENT PASS piak ding chih paikhawm' mipi'n pomkipna nei uhi.
Hiai meeting ah New Lamka (East) sung a diesel auto association 5'te akipan office bearer hunkhop paikhawm uhi. New Lamka (East) sunga diesel auto association-te ahihleh, Rengkai/Moullum, Sahei Road, Khominthang/Vengnuam, Ngathal, Zion/Petheul. Tulel in hiai association ngate a kipan in New Lamka (East) sung ah Diesel auto 139 service lel uh ahihdan thutut kingah hi.
Hiai meeting hun ah Student-te kianga Pass piak ding lemsak ahih bang in, 26th July (Sunday) chiang in a sepkhiat taktak theihna ding toh kisai in meeting neinawn ding hi. Hiai banga Pu Gouzamang MDC, New Lamka (East) in khotang leh student-te khualna a i gam a om ngeilou ngaihdan hoihtak ahon patkhiat' Zogam.com in ikipahpih mahmah a, maban a hiai banga a tup-le-ngimte a hon sepsuah touhzel ding i deihsakna lianpen i pia hi.
Zogam.com News Network (ZNN)
