17-New Lamka (East) MDC Pu Gouzamang In Diesel Auto Assn-te Toh Meeting Nei Nawn
ZNN | Tuni 26th July, 2015 sunnung dak 1:30 in Pu Gouzamang, MDC 17-New Lamka (East) in ama bialsung a Diesel Auto Association-te YPA Office, Vengnuam, New Lamka ah kimuhpihna nei nawn hi. Hiai meeting ahihleh, kal paisa 19th July (Pathiani) a YPA Hall, New Lamka a meeting a neihpihna hun a Student-te kianga Pass/Coupon piak ding toh kisai a thupukna omsate sutzopna ahih banah, maban a hiai toh kisai a panlak dingdan genkhopna dia consultation meeting neih dia thupukna omsa bohzuina leng ahi hi.
Hiai toha kisai in Pu Gouzamang, MDC 17-New Lamka(East) in Student-te kiang a Student Coupon piak ding hoih asak dan proposal tuamtuam, Auto Pute adia phatuam ding, Student-te adia phatuam ding leh Nu-le-pa adia a hoihna ding toh kisai point tuamtuam a thilhoih tungthei dingte putlakna a neih banah, hiai Coupon issue ding toh kisai a Mode of Operation leh a system pai dingdante hilhchetna leng nei hi. Hiai hun ah Pu Gouzamang in i gam-le-i minam in i poimoh thilte sepsuah zel a a omtheihna dia kithuahpihna poimoh ahihdan ama bialsung a Diesel Auto Associaition 5-te kiang ah ngetna leh chialna bawl a, Deisel Auto Association-te akipan inleng hiai toh kisai in thukup tuamtuam ngaihkhiatna leng om hi.
Tuni a meeting neihna hun ah, Pu Gouzamang, MDC 17-New Lamka (East) leh a team-te akipan inleh, paikhawm mipite akiapan in Student Coupon issue ding toh kisai a buaina tungthei ding leh hiai buaina tungtheite akipan bangchi panlak ding chihte naktak a kikup khawmna om hi. Tuni meeting hun a kihel Pu Gouzamang leh a teamt-te banah, ama bialsung a Diesel Auto Association 5-te', Sahei Road, Khominthang/Vengnuam, Rengkai/Moullhum, Pethuel-Zion leh Kanan-Ngathal a tai te'n a thupukna uh ahihleh:
1. Coupon System zatding
2. Tu-le-tu dinmun a hiai facility zangthei dingte ahihleh, student uniform silhte chauh ahi ding
3. Hiai Student Coupon System in 17-New Lamka (East) sung a student-te leh Diesel Auto Association 5-te chauh a huapkha phot ding
4. Hiai Student Coupon hawmkhiatna ding toh kisai a sen-le-pan omtheite tengteng bialtu MDC in khakhat sung etkhiatna kawm in sengvek ding hi
Hiai a tung a thupukna teng paikhawm mite te'n ki thutuaktak a pomkipna neihzoh ahih in, hiai toh kisai final a apai dingdan genkhop hithak ding a, huai tungtawn a nasep patkhiat hiding inleng bialtu MDC Pu Gouzamang akipan in thutut kingah hi. Hiai consultation meeting beitoh kituak in paikhawm mite'n bialtu MDC pu inn ah ann nekkhopna na nei uhi.
Tuni a meeting hun a thupukna hoihtak bawltheih a a ompen Zogam.com in i kipahpih mahmah a, maban ah sinlai naupangte adia thil phatuam leh nu-le-pa, khotang adia thilhoih a hon tut ngei ding lam-etna toh i kipahpih banah, a hong lamzan touhzel ding i deihsakna lianpen ipia hi.
Zogam.com News Network (ZNN)
