Tuni 17th Jan, 2015 nitaklam dak 1 Muhchil Vangngaih kichi film honna YPA Hall, Hiangtam Lamka ah neih in om hi. Hiai hun ah film producer Pu H.Kamsuankham in Welcome address gen in, Pu Hatlang Mungpu, Director in Introductory/Keynote address genna nei hi.

Chief Guest Pu Langkhanpau Guite, Chairman ADCC in film honna a neih zoh in thugenna saulou nei in, aman hiaibang film hon bawlkhete a pahtak danleh, ki itna film i chih khong thilsia ahihlouh dante tomkim tak a genna nei a, tua banah film bawlte panpihna dakbawm leng pia hi.

Guest of Honour Pu H Mangchinkhup, EM ADCC in leng thugenna saulou nei in, i pau uh kepbit a poimoh dante, i tawndan chi tuamtuamte kembit a khangthak tenle theihsawm ding ahihdante leh hiai banga film hon bawlkhete pahtak huai asak dante gen in panpihna dakbawm pia in a hunzou hi.

Functional president Pu S Kamsuanlun, EM ADCC in leng thugenna saulou nei a, hiai banga a kuhkal tak a film hon bawlkhete' chihtakna thupi a sakdante leh, maban aleng pan hon laktouh zel uh deihsak thu gen hi. Amanleng panpihna dakbawm pia in a hun zou hi.

Chief Host Pu James Thangluai, Chairman ZOFIDA in hun hon zang a, ZOFIDA i cih Zogam Film Development Association chihna ahihban ah, naupang chik hilai ahihdante gen hi. Aman leng hichia film hon bawl khete a pahtak thute tomkim tak a gen in a hunzou hi.

Hiai program ah lasa siam tuamtuam in a vangkim in paikhom mipite bil taitak in koih uhi. Film thak CD muhtheihna mun ding ahihleh:

Laizom Musica, Tedim Road
Creative Photoshop, New Lamka

Mundang leh state dang a muhtheihna mun ding ahihleh awl a ki zaksak touh ahi ding.

Zogam.com News Service