Lamka 7 February 2015: Tuni sunnung dak 1:30 in YPA Hall, Hiangtam Lamka ah Zomi Idol India, 2015 2nd Level Audition (Semi Final) neih in om hi. Hiai hunzatna 1st Session ah Pu LL Muana in patna thumna nei in, Pu SN John, Secy ZII 2015 in welcome address genna nei hi. Chief guest in Pu Khaipao Haokip, MDC pang a aman, singtang miten Idol tamtak ana kizangta mahleh, Zomi Idol in tuate khupkhia in a penpen hihna la chi hi, aman Zomi idol kithuahpihna in Chairman, Organizing committee, Zomi Idol India 2015 khut ah dakbawm piakna leng nei hi. Guest of honour Pu H Jamkhanpau, MDC in a genna ah la ana lunglut lou himahleh, tuni a kipan lunglut ahihdan gen a, la in thil a hihtheihna tuamtuamte tomkim tak a a agenzoh in kithuahpihna dakbawm piakna leng nei hi. Chief Host Pu Thangkhosuanmung, Chief of Hiangtam Lamka in Zomite khangtou lawta ihih dante uh gen a, tua banah lasak siamkei mahleh, la a lunglut mahmah ahihdante tomkim in gena, agenzoh in kithuahpihna dakbawm piakna leng nei hi.
ZAA a kipan lasasiam Daniel Gangte, B Muan Ngaihte, Eloi, Muan Hangzo ten paikhom mipite naktak in a lasiamna utoh maitai tak in koih uhi. Comperes Pu Dr Liangoumuan leh Pi Joycee Vaiphei ten hiai hunzatna nuamtak in pi uhi.
2nd Session dak 5:40 in kipan a Contestant mi 20 te judges Pu Benny Khongsai, Pi Mimi Khaute, Pu Stephen Mang, Pu LL Muana leh Pu V Paukhansiam-te mai ah siamtak in kitaitehna nei uhi. Tuni in Contestant-ten soundtrack leh live music toh la khatchiat sa uhi. Live music toh a asak dipen uh organizer ZOMUS ten a telsak uhi.
Hiai 2nd Level Audition pen live a cable ah khah khiat hinawnlou a, a en utte Rs 50 pia a luttheih ahih banah, ana enkhalou tenleng CD ana leisak chiat ding in organizer ten ngen uhi.
Tuni a contestant mi 20 lak ah mi 10 telkhiat hi ding a, result ahihleh zingchiang dak 10 vel in muhtheih pan ding hi. Hiai a top 10 telkhiat teng 14th February, 2015 chiang in Final round, YPA GHQ Hall, Hiangtam Lamka neih in om nawn ding hi. Final round ah mi 2 telkhiat hi dia, amaute Tulsa, Oklahoma, USA ah India Zomite ai-awh in Global Zomi Idol 2015 ah va tel ding uhi.
Zogam.com News Service
LIMLAK TE HIAH ET THEIH DING: https://www.facebook.com/media/set/?set=a.10152750929913915.1073741830.156582853914&type=1
