Assam Rifles-te Toh Mipi Ki Subuai

Tuni zingsang in Imphal akipan Assam Rifles honkhat hong paitou in dak 10:30 lak in Dorcas Veng sung lut ua, sungkuan khat akipan unau civilian thum va man uhi. A mimatte uh khut lehhen a pikhe dia kisalai vengsung mipi'n a theihphet un kidelh huan ua, patau dak tanpha khen in kinawktuahna nasatak piang hi. Hucihlai in a mimatte uh nih nusia in khat Lanva luidung ah paisuk pih uhi. Himahleh New Lamka hanmual a hantou a omten a thu omdan ana thei uh ahiman in, ana khamkhol in a mimat uleng Army te akipan suhsak thei uhi.

Hiai bang thu a omlai in heutu khenkhat in Tuibuang a om AR 27 Sector thuzak in amau leng a thu bangmah theikha lou chi in amau mah inleng hon delh ngal uhi. Mipi leh Assam Rifles-te naktak a kinawktuah in mipi'n AR te gari hunkhop leng hentang sak uhi. Huchih lai in Dorcas Road leh Convention Road junction ah AR ten mipite suklau na din thau 3 vei kapging uhi.

Hiaibang thu a zak ahihphet in MDC-te, heutu tuamtuamte leh mipi hunkhop in amun ki delh huan in Brigadier, 27 Sector AR ngei inleng amun hong delh in awl a athu genveng theih in om hi.

Hiai hun ah thau kisuhtuah khak ziak in civilian khat sepaihte thau magazine in khut aatliam kha a, nupi khat leng sepaih ten a thau sialphei un khenkha ua, nupi khat mah a biang suang in dengkha hi. A thil zon na lam ua intekte numei khat puanten sepaih ten hawksak uh. Sepaih lam leng suang a denliam khak om hidan in kigen hi.

Sepaih ten insung van khenkhat a lakkhakte uh toh kisai in zingchiang in VA tetoh genkhom ding uhi. Dak 1:15 vel in Assam Rifles ten Dorcas Veng pawtkhiat san thei uhi.

Zogam.com News Service