Heina Peuh Ah Film Honkhiatna Om
Tuni sunnung dak 2:30 in Churachandpur Reporters' Association leh CT Lian Convenience Store kithuah in a bawl uh 'Heina Peuh Ah' kichi film honkhiatna om hi. Hiai film ahihleh Bungfai Film Company in a bawl, Paite pau a ki letkhia hi a, film nuihzai huai mahmah ahi hi.

Tuni a film honna program ah ZOPA CT Lian in Welcome adress gen a, aman hiai program pen film honna leh 'Together For A Good Cause' chih thupi pansan a khopi sunga poimoh mahmah Chil siatna bawm ding bawlna dia summuhte zat ahih dingdan leng genna nei hi. Chief Guest Pu Ginsuanhau MLA, Singngat A/C in a thugenna ah hiai bang a CRA leh CT Lian Convenience Store in khotang hoihna ding a pan alak uh kipahpih mahmah ahih dan gen inleh, dakbawm piakna leng nei hi. Guest of Honours Pu Langkhanpau, Chairman ADC/CCpur inleng khotang hoihna dia panlakna kipahpih ahihdan leh chil tungtawn a natna kiloh sawn theih ahih dante a gen banah, film bawlna toh kisai a pau zatdan toh kisai pilvan tuak mahmah asak dante tomkim tak a gen in dakbawm piakna leng nei a. Functional President Pu Kamsuanlun EM/ADC/CCpur, in hiai banga chil siatna bawm poimohna ADCC office a ana zatte uh tungtawn a bawlkhiat ding ahihin amau hiai a dia role model bang ahihman un kipahhuai asak thu leng gen hi.

Lasa siam tuamtuam S Chingnu, Zakim leh Muanlal te akipan zaila ngaih khiatna om a, paikhom mite bil taisak mahmah uhi. Huai banah, paikhom mipite akipan khotan hoihna dia panlak dingdan kikupna a om banah, issue tuamtuam sau loulou a genkhopna leng om hi.

Veteran singer S Chingnu in siamtak a mipite zaila a hon mop zoh in program khak in om hi. Mipi paikhawm tengteng in ankuang umkhopna nei in, ngap dandan hiai project adia piak khomna leng om hi.

Hiai banga khotang adia phatuam ding project CCpur Reporters' Assn leh CT Lian Convenience Store in a honsai uh Zogam.com in kipahpih mahmah in, a hong lohchin ngei leng i deihsak hi.

Zogam.com News Service