Nenem leh Sangkim KPOP ah lawhching uh

Tuni nitaklam dak 5pm in Korean Cultural Centre, Lajpat Nagar, New Delhi ah KPOP (Korean Pop) ah ei Zomi te Song category ah 3rd position va la uh hi. Delhi a om Goukhannem D/O Pu Khamkhanpau Guite leh Zousangkim D/O Pu Khamchin Naulak te'n le Korean la '2ne1ugly' chih la sa in 3rd position va la uhi. Amau band min ESEN ki chi ua, final round pen 30th August 2014 chiah Shri Fort Auditorium ah om ding hi. Song category a tel khiat a om khatna Rebecca Leivon leh nihna la Sparsh Bajpal te hi uh hi.

KPOP i chih Korean Pop chihna ahi a, South Korean music genre chi khat hi a, khovel mun tuamtuam a Korean Cultural Centre ten a sai uh ahi. India khopi mun tuamtuam a zong preliminary round kum teng a neisek dan uhi. Hichi bang International level a ei Zomi te'n lawhchinna i ngah uh iki pahpih mahmah hi.