Hoihnu sih ziakin Lamka ah bandh om phut

Zan zinglam dak 7:00 vel a D.Phailian bazar a dawr sunga awklumsa a muhkhiak Ms. Luanneihoih @ Hoihnu(48) d/o (late) Thienkhopau Vaiphei of Red Cross Road, Lamka sihna tawh kisai in tu zingkal apan Lamka khawpi sung bouruak nuam chiahlou in om simsim a, Imphal a postmortem zawh ahih thu a kitheih zinglam dak 11 apan velin khawpi sung bouruak gik tuan mahmah hi. Hoihnu sihdan pen kuapeuhin gim neih huaisa mahmah a, aman sihna tuak kei leh zingchiang a Moreh a vanla dia zinsawm hidanin kigen hi. D Phailian bazar a a dawr ahihleh Moreh van tuamtuam koihna hi a, pii leng piisim mahmah hi. Phailian bazar ah nungak-tangval banah nupi/papi tu suun apan tu den in Tipaimukh road khak ua, tuanung sawtlou in khopi sung a dawr om tengteng leng thakhat thu in khaksak in om hi. Lamka khopi sung ah student pii dia kuante, bazar kaite leh sumbuk nei tuamtuamte buai mahmah in, New bazar a mehzuakte ngial buaidiak ua theih ahi. Phailian Welfare Committee in thuneitute’ kiang ah tualthat-tu ni 4 sung ngei a mankhe dingin theisak uhi. Siluang ahihleh tunitaklam dak 4 vel a Lamka hongtun zawh lamet ahi. Hiai thu sut ahihtan in khawpi sung bouruak giksim in security te alanglang ah taituah lel ua, nitak hun in bang hong chidiam chih theih hilou lai hi. Police te’n tualthat tudia muanmawh matkhiak aneihlam uh zak hitadih lou. Hoihnu sihna tawh kisaiin Police te’n FIR No. 72( 7) 2012 CCP-PS U/S 302 IPC registered uhi.

Pix above: Dosrap

Pics: Zogam.com FB Group