‘Khangsawnte khualna a hinna pia ihi’- Home Secy/KNO
KNO/KNA te'n Camp Hermon ah Martyrs’ Day zang uh
Kuki National Organisation(KNO) nuaia om Kuki National Army(KNA) te’n zanhal (July 26, 2012) in Chandel dist sunga om Chehlep khua a a designated camp uh ‘Hermon camp’ ah Martyrs’ Day zang uh a, KNO Home Secretary Anton Kuki in KNO sik-le-tangin thugen hi. Huai ah Imphal/Sadar Hills leh CCpur district apan mi tamtakin a uap ban uah Kuki Inpi, Myanmar President Khailun Haokip leh Myanmar apan mi poimawh hunkhop in leng uap uhi. KCK Tengnoupal, KCC Church apan tuailai te’n la pawl sakna nei ua, avangkim in Moreh apan Lia Hoihnu leh Lia Boinu te’n special no present uhi. Camp Hebron apan Kuki army te’n phamsate zahna in gun salute pia ua, Nampi laa sakna leng nei uhi.
Anton Kuki in Psalm 126: 5 “Khitui ke kawma tuhte’n nuamsa takin a aat ding uhi’ chih (Psalm 126:9) pansanin thugen a, gam leh nam tundingna dinga hinna ana pia salphate Kuki khangthu ah mangnawnlou ding chi hi. Nampi khawsuahna dingin kuapeuhin pan i la ua, ahihziakin i panlakdante uh etthak poimawh mahmah a, adiakin organisation sung aheutu tuamtuamte’n leng Pathian lauhna tawh kithuah chihtakna, ginomna leh muanhuaina tawh kal suan poimawh chi’n gen hi. Nidang in Martyrs’ Day pen zalentakin kizangthei kei mahleh tutung in mipi tawh zatkhawm theihna ziak bel innlum taisan a gamnuai belte leh gam leh nam adia hinna pete ziak ahi chi’n gen hi.
Tuhun kikhenna hun hilou in kipumkhatna hun hi a, mi Nam pen kimawlpih hun hinawnlou in political survival omna dinga kalsuankhop hun ahi chi’n Anton Kuki in gen a, mite’n hon muanna ding un chihtakna leh diktatna poimawh a, tuhun a ihihkhelh ngeingei leh khangsawnte’n hon mawhsa mahmah ding uh chi hi. Mimal ading kia ngaihsut hun nawnlou in midangte’ ading leng ngaihsut hun ahihman in tuhun i zatdan pilvan mahmah kisam chi’n leng gen hi. KNO/KNA in July 24, 1994 akipan Martyrs’ Day zangpan uh a, KNA Commander in Chief masapen Thangkholun Haokip sih champha tawh kituak a kizang hi’n kigen hi.Kum 1992-2012 sungin KNA cadre-te laka private apan Brigadier tan mi 167 in gam leh Nam adingin hinna pia uhi. Zan a Martyrs’ Day zatna ah misite’ innkuante leng tamtak tel uh a, thilpiak (gift) piakna leng om hi.
Pix above: The bereaved families
.