Zomi laphuak le lasa siam Lengtong Pauno pen abeisa May 18,2012 ni-in, Kawlgam pan Malaysia lam hawh kik a, tulaitak Kualalumpur khuapi ah Pasian phatna Album thak khat bawlin manlah mahmah cih kiza hi. Lengtong Pauno in beisa hun ciangciang a laphuah le lasakte pen Zawlla, gam itna la, Nu le pa itna, Unau laizom ki-itna, Mopawi la, le khangnote thuhilhna etc.. cihte hi-in, tutung abawl Pasian phatna Album pen a masa penpen hipah dingin gen hi.

Album thulu zong " A Tamzan Lungtang " cih hi a, La aw (Vocal) pen Malaysia ah khum dinga, Music pen Pa Cinpi ( Lazy Club-Bass) makaih ahi " Gataam Band" te in Yangon ah tumsak in, tukha bei ma in zawh sawm cih kiza hi. Hih Pasian phatna lakhui (Album) thak pen Lengtong Pauno in a ma pian kum (50) cin phawkna le Topa' tungah Lungdamkohna  tawh a bawlkhiat cih Tongsan Media Group tungtawn in kiza hi.

Lakhui hawm hun ding tawh kisai Lengtong Pauno in a genna ah hong tung ding America gambup lungdamkoh Ni ( US Thanksgiving Day 2012) lapin CD (Audio) tawh hawm khiat sawm ing cih Tongsan Tanute' tunga zasak hi. Pasian piak asiamnate minam le Pasian ading zatkhiat sawm pha mahmah lai ahih manin, a theibeh nuam le a panpih nuamte in Email: This email address is being protected from spambots. You need JavaScript enabled to view it., Malaysia ah kizomthei ding cih kiza hi. Lengtong Pauno Album lathak i ngaih/  zak kal ding ngak kawmin thungetna tawh mapanpih ciat ni.

Reported By : Tongsan Media Group