Buallian khua ah Awl-len, 2015 Festival zat in om
Manipur Express Lamka, Feb-2: Vaiphei community adin buh lakzawh (post-harvest) a nop bawlna poimawh Awllen, 2015 kichi tuni zinglam dak 10.30 akipan in Buallian khua ah Young Vaiphei Assn (YVA) Gen HQ nuai a Organising Committee saina in zat in om hi. Huai ah Chief Guest in Thangso Baite, MP(Lok Sabha) pang a, Functional President in Khatkhotong Baite, President, VPC Gen HQ; Chief Host in S. Minlianthang, IAS leh Guest of Honour in L.M Khaute, IPS, Addl DGP pang uhi. Awllen festival bel kum teng a Feb 3 in kizang sek hi.
Chief Guest in a thugenna ah khua bubit poimawhdan gen a, khaw khat apan khawdang a kisuan chihte hahbawl lou dingin mipite hasuan a, laisiam leh officer banah mihausate’n leng mihinpihte mangngilh phialin state dang ah nuamtaka khawsak sang in, mahni innkuante kipatkhiakna munte mah zun kawm in, inn-le-lou nei in puah le uh, mihinpih, nam leh society adingin thil manpha semkhe theizaw ding uh chi’n gen hi. Khua bubit leh hoih neitu Vaipheite’ ahi uh chi a unaupihte’n a theih ding ua panla ding in mipite leng chialhi.
Guest of Honour L.M Khaute in Awllen festival pen community khat ngeina leh tawndan (culture) etsakna hi a, pu-le-pa te’n haksatak a loukhou a nek a zonlai un, buhlak khit chiangin kithutuaktak leh nuamsatak in Awllen zang uh hi’n gen hi. Huai hunlai in khat leh khat kingaihnatna, kilainatna leh khawtang paidan hoihtak a om bang in tulai huna khangthakte’n leng Christian sahkhua lutma a paidan hoihtak omte zui dingin chial hi.
Chief Host S. Minlianthang in Awllen pen Vaiphei community adia cultural gou (asset) ahihman in kemhoih ni, chi a, huai kawm in YVA pen statutory body khat ahihman in Vaiphei community sunga orgn poimawhpen hi a, hihhat dingin mipite chial hi. YVA in Custom leh Culture theisiam kawm a panla din leng hasuan hi.
Functional President Khatkhotong Baite in siatni-phatni a inntekna lathei ding orgn alou-theilou in poimawh a, mi malmal in neih-le-lam ah khangtou kisa mahlehang, nam tellou in midangte’ zahtakna muh haksa mahmah chi hi. Nam khangtou leh masawnna ding in nam makaite thuman poimawh a, kithuman tuahna in nam khangtousak hi’n leng gen a, nam vai a kikhopnate leng a poimawhdan thei kawm in ngaihkhawk huai mahmah chi hi.
Awllen 2015 zatna ah Kh. Hena Vaiphei, Chairman, Awllen 2015 Organising Committee makaih in Puansan leh Memento piakna om a, lasiam tuamtuam banah cultural dance tuamtuam lahna leng om hi.Nitaklam dak 5:30 a kikhopna ah Chief Guest in T. Kamkholal, Functional President in Genneikhup Vaiphei, EM, ADC/CCpur; Chief Host in S.Minboi Vaiphei, MDC/CCpur pang hi. Guests of Honour in Kamsuanlun, EM, ADC/CCpur; Henlianthang Thanglet, Addl CEO/ADC, CCpur leh Soiminlian Lengen, SDO/Henglep pang uhi.
