Tribal Unity Day matna leh Tribal Martyrs Memorial Park hawnna nei

CCpur, Aug. 31 *(Nisin Thuhiltu)* : Manipur Assembly in August 31, 2015 ni ah Bill pathum - Protection of Manipur People Bill, 2015, Manipur Land Revenue and Land Reforms (Seventh Amendment) Bill, 2015 leh Manipur Shops and Establishments (Second Amendment) Bill, 2015 a pass dawilo ah Manipur thingtangmi, a biktak ah Churachandpur District ah thingtangmi te’n kithutuak tak ah kiphinna a nei hun ua, Tribe chuamchuam ah organization te’n mapuitu ding ah a siamdaw uh Joint Action Committee Against Anti Tribal Bill (JAC AATB) mapuina nuai ah kiphinna ziak ah thina a la tuak salpha 9 - Enkhankhup Suante (19) of L.V. Lane, New Lamka, Lamkhenthang (43) of Lower Chapellane, Pausuanlian (18) of Vengnuam, New Lamka, Thangzalian (30) of Hiangtam Lamka, H. Paulianmang (22) of Dorcas Veng, New Lamka, Robert Zamminthang Valte (27) College Veng, New Lamka, Khamthianmuan (22) of Vengkhang, Pearsonmun, Khaizamang (11) of Bijang leh Henlalson (19) of Headquarter Veng te hiat zingna ding ah Mata Dam ah a siam “Tribal Martyrs Park” hawnna leh “Tribal Unity Day” matna tuni, August 31, 2018 in a um hi. Zothanga leh Zenngaihniang ten hun matna mapui in, Rev Khamkhosiam Hangnung, President, Baptist Partnership Ministry NTBCA in hun pat pauchapna nei in, K. Suanthang President, Paite Tribe Council PTC GHQ in Tribal Martyrs Park main gate hawnna a nei a, Vanlalrinliana, President, Mizo People Convention MPC in left pavement hawng in, H Pauzacin, President Tedim Chin Unit TCU in Right pavement leh T. Khailianthang, President, Young Paite Association YPA GHQ in middle pavement banah Chinlunthang, President, United Zou Organization UZO in left pond leh B. Dongzalian Simte, President, Simte Tribe Council STC in right pond hawnna a nei hi. H Mangchinkhup Chief Convenor JAC AATB in MOU Memorial hawnna nei in, vaidawnna thu leh keynote address bawl in, R Sangkawia, President, Zo Re Unification Organization ZORO GHQ in salpha 9-te kivuina leh Tribal Martyrs Memorial Park hawndawna a nei a, salpha-te zana piakna um in, traditional gun salute in a zui a, Rev Father Emmanuel Kholi, Parish Priest, Good Shepherd Parish, Lamka in Tribal Martyrs memorial park Pathian kiang ah a latna nei in, Rayburn College NCC Cadets mapuina’ Martyrs families, special invitees, tribal leaders banah host organization JAC AATB ten salpha-te zana pakcha piakna a nei ui. RB Lalmawlsawma, President, Mizo Students’ Union MSU GHQ, B Vanlaltana, Vice President, Mizo Zillai Pawl MZP GHQ, Lalmuanpuia Punte, Zoram Peoples Movement ZPM, K Vanlalvena, General Secretary, Mizo National Front GHQ, R Vanlalvena, MLA & President, Aizawl District Congress Committeee leh R Sangkawia, President, Zo Re Unification Organization ZORO GHQ te apat thugenna um in, Joints Choirs, Chin Baptist Association, Evangelical Baptist Convention, Presbyterian Church of India, Tuithaphai Presbytery, New Testament Baptist Church leh Zou Presbyterian Church Synod mapuina’ Ni Tla Ngailo, Zion khawmpui ti laa sakhawm in, Rev Dr Kamkhanthang Mangte, Former Principal Grace Bible College GBC Lamka in pauchapna tawh hun matna a khak hi. H Mangchinkhup Chief Convenor JAC AATB in a thugenna a chun, tuni ah tribal martyrs park hawn mai ah kalsuanna bei mai hilo a hidan gen in, nasepna chiapi zawm zel hiding ti’n a gen a, Manipur thingtangmi kigawpkhawmni “Unity Day” aha kum thum tinni ah Tribal Martyrs Park ah salpha vui ah um te suunna leh venuam te ding ah park hawndaw ah um in a gen hi. August 31, 2015 ni ah bill thum passed a hi pat, JAC AATB in mipi tawh pangkhawm ah panlakna neito ah, May 10, 2017 ni ah Manipur government tawh Memorandum of Understanding (MOU) suai kai ah um, MOU ah Manipur government in bill banah thingtangmite sukha thei ding thil himhim a passed ding leh stakeholder-te hiatsak masalo ah, passed lo ding, gam leh nam in zalenna, eima kivaihawmna ding ah panla UPF leh KNO in India government tawh kihona tripartite talk ah Manipur government in pan a lak ding, bill thum tawh kisai Delhi ah puaklut ahi hun ah President in May 11, 2016 ah Manipur Peoples Bill reject bawl ah, bill pani te JACILP in Manipur Assembly ah puaklut gua panlakna nei maleh JAC-AATB in MOU ah taklat ahi banah Manipur Chief Minister kiang ah memorandum pia, press release sua ah, zia dungzui a chu Manipur government in July 23, 2018 ni ah assembly a nei hun ah bill nih um nalai te withdraw bawl a hidan gen in, bill pathum te thi vekta a hitakna chung ah, tuni chu dana ni hilo ah kipakpina ah mat ding a hi ti’n a gen hi.

USRA Chief (L) Lunsat Vaiphei kithana tawh kisai ah mi 7 mat hita: SP/CCpur

CCpur, Aug. 31 *(Nisin Thuhiltu)* : Kabib K., IPS, Senior Superintendent of Police, Churachandpur in tuni, August 31, 2018 nitaklam dak 5:10 in a office mun ah thuthak lakhawm mite kimupi in United Socialist Revolutionary Army (USRA) Chief Lalminthang Vaiphei thina tawh kisai ah police in khualna a neidan tawh kisai taklatna a nei hi. Senior SP in a genna a chun, achiata August 22, 2018 zingkal dak 7:40 vel ah kua ahi hiatlo pawl khat in, ZEO/CCpur office kiang ah United Socialist Revolutionary Army (USRA) Chief Lalminthang Vaiphei (60) s/o (L) Lunsat Vaiphei, Chief of T. Munjang meithal ah a kaplup uh a hidan gen in, kikaplupna tawh kisai chu police in FIR No. 90 (8) CCP-PS u/s 302 IPC & 25(1-C) Arms Act r/w 34 IPC ah tepte ah thil umdan khualna nei ah a kaplum tute matdawna ding ah panlakna nei zing in a gen hi.

Thiltung tawh kisai pilvang tak a suizui ngai a hina chung ah District Police in Special Team khat siamdawk ah, Lunkhomang Khongsai, MPS, Additional SP (Law & Order) mapuina’ leh Johny Sharma, MPS, SDPO Churachandpur leh A. Suresh, OC Police Station banah police officer hunkhawp te kithuapina tawh nisin ah thil umdan khualna chiapi ah um in a gen hi.

District Police panlakna chu Imphal East District Police in le kithuapi a hidan gen in, kithana kigawlkha hiding ah muanmaw pipen mi 2 te panna mi 7 matdaw ah umta hi’n a gen hi. Mi 7 te matdaw ah a um banah amau apat .32 Pistol leh magazine khat, 9 mm Glock Pistol (Austrian) khat leh magazine khat, A-1 Automatic Rifle khat leh magazine khat, .32 tang 7, 99 mm chang 18, 5.56 mm chang 71, Mobile phone 11, sum Rs. 31, 090 banah car pani matdaw ah um in a gen hi. Pistol matdaw ah um te lak ah (L) Lunsat Vaiphei thana kimang le pang in a gen a, car pani mat ah um te lak a khat pen chu mithatte puak lumletna kimang hi’n a gen hi. Kithana’ kigawl kha ding ah muanmaw zosia matdaw ahi masang sia, District Police in suizuina chiapi zing nalai ding, suizuina dinmun taklat zel hiding ti’n le a gen hi.

Political Level Tripartite Talks nei ding
Imphal, Aug. 31 *(Nisin Thuhiltu)* : Government of India; Government of Manipur leh United Naga Council (UNC) in 1st September 2018 zingkallam dak 11:00 leh Senatapi District Headquarter ah Deputy Commissioner Office ah Political Level Tripartite Talks nei ding a hi. Zia hun a chu Government of Manipur palai hina tawh V. Hangkhanlian. Minister Agriculture, Veterinary & Animal Husbandry; N. Kayisii, Minister Tribal & Hill Affairs Development, Fisheries; Thokchom Radheshyam Singh, Minister Education, Labour & Employment; Athem Muivah, IAS, Secretary (TA & Hills), Govt. of Manipur leh T. Ranjit Singh, IAS, Secretary (revenue/CAF & PD), Govt. of Manipur te’n Political Level Tripartite Talks uap ding a hiu.

Lallunthang luang vuiliam hita

CCpur, Aug. 31 *(Nisin Thuhiltu)* : Damlona ziak ah sepna mun ah thina tuak Lallunthang s/o Upa Gentinthang of S. Munnuam, CCpur luang chu tuni’n a chenna khua S. Munnuam tut in a um a, sepai te’n zana sangtak pia kawm in, S. Munnuam thamual ah a luang vuiliam in a um hi. Kum 38 mi, Lallunthang ahileh Assam Regiment ah sem, Arunachal ah posting a hia, damlona ziak ah Army Base Hospital, Jorhat,Assam ah hapta thum lam etkawl ah a um nung ah 29th August 2018 nitaklam dak 3:30 ah mualliam a hi. Post mortem leh bangkim sukfel ah a um nung ah tuni, 31st August 2018 nitaklam dak 1:00 tuam ah a luang, a chenna khua, S. Munnuam tut ah um a hi.

Manipur Blessing Prayer
CCpur, Aug. 31 *(Nisin Thuhiltu)* : EOC Central Church, Hill Town ah ah 1st September 2018, zingkallam dak 11:00 a pat nitaklam dak 1:00 sung ah “Your Sorrow Shall Turn into Joy" ti thupi nei ah Manipur Blessing Prayer kiti um ding a hi. Zia hun matna chu Rev. Th. Khuala in mapui ding, Rev. Nengzatun in hunpat pauchapna nei ding leh Rev. L. Khupboi Vaiphei in vaidawn thugenna nei ding a hi. Bro. Sathrack Billgraham in keynote address bawl ding, GFI vibrant te apat special No. um ding, Bro. Kh. Ginlal Chung in Messge genn nei ding, interaction hun um ding leh huntawpna pen ah Pastor LS Paul Hangmi in pauchapna tawh hunmatna khak ding a hi.

Governor Dr. Najma Heptulla in Tengnoupal district ve’na nei;
District Civil Society Organisation te’n thupi tak ah vaidawn

Imphal, Aug. 31 *(Nisin Thuhiltu)* : Manipur Governor Dr. Najma Heptulla in tuni’n Tengnoupal district ve’na nei in, District Administration, Tengnoupal organised bawlna Tengnoupal Community Hall ah hun matpi in a um hi. Governor chu thupi tak ah vaidawn in a um a, mipi te lak ah a thugenna a chun, Civil Society Organisations’ te’n administration leh development thil ah pending um te sukvenna ding ah memorandum a piak teu chu bawzui ding leh a vaima theilam ah sukven hiding in a gen a, memorandums 8 piak ah um hin a gen hi. Manipur ah tribes/sub-tribes 34 um te lak ah major tribes pathum te hiakhen theita a hidan gen in, tribes/sub-tribes chuamchuam tamtak chenkhawmna himaleh kihiatthiamna leh kipumkhatna ngai pawimaw chiat ding a nawp thu gen in, education leh health services te siamhawi thak ding leh ngaikhawk ding a nawp thu a gen hi. Manipur Governor mawpuakna a tuk lim ah Prime Minister tawh thil umdan a genkhawm hun ua, health services, communication leh lampi/lamlian te ngaikhawk pen ah nei a hidan gen in, ‘Flying doctor’ umsak ding ah phutna a nei dungzui ah North Eastern Council in ‘Flying doctor’ umsakna ding ah Rs 25 crores release bawlta leh road leh communication tawh kisai chu Home Ministry for Highway Patrol service leh Minister of Communication kiang tut ah lampi accident tuak,lamkal ah gari sia te enzui ding ah National Highway ah security duty kituptak ah kawi ding, Home Ministry chu chawlngakna mun, lampi kiang tuam ah toilet facility kawi ding ti te genpi ta hin a gen hi.
Zia ah hun matna a chun, Mate Cultural troupe leh Cultural troupe of Tengnoupal Youth Club te’n cultural dance suklatna a nei ua, Kuki Chief Association leh Kuki Students Organisation, Tengnoupal, Tengnoupal Village Authority, Meitei Council Moreh leh Chief of Khudengthabi te panna Civil Society Organisation chuamchuam in memorandum piakna nei in a haksatnau a tut ui. Hun matna ahileh Tengnoupal Deputy Commissioner A. Tombikanta, Superintendent of Police Dr. S. Ibomcha Singh te’n le a uap ui.

CM in full-fledged member ah ASI Manipur State Chapter a pan ding dawi

Imphal, Aug. 31 *(Nisin Thuhiltu)* : Imperial Hall, Classic Grande,Imphal ah tuni’n Chief Minister N. Biren Singh in Associations of Surgeons of India (ASI), Executive Council Meet hawnna a nei a, inaugural session ah a thugenna a chun, ASI chu Manipur apat surgeons ten National level tiang memver kiningting tak tawh panmun a neitheina ding ua panlakna a nei ding a nawpthu gen in, ASI Manipur State Chapter chu Executive Council of ASI ah full-fledged member hilo a hidan gen in, full-fledged member hitheina ding ah Manipur apat member in titlo kiti chu association in etthakna a nei ding a nawpthu a gen hi. ASI in members 20,000 tuam nei a hina chung ah organisation in mawpuakna liantak nei ti’n le Chief Minister in a gen a, ASI Manipur State Chapter in kiptuptak ah panlakna nei a hidan hiatthei ah a umna chung ah kipakpi in a gen hi. Association of Minimal Access Surgeons of India tawh kithua ah Tamenglong ah free surgery camp bawl ah um, key-hole surgeries panna mi 53 te operations kibawl a hidan taklang in, ASI in gamsung ah healthcare masawnna ding tup ah panlakna a nei zing chu thil dawi um hi’n a gen hi.

Mun chuamchuam a pat ASI Executive Council Meet uap tute chu Manipur ah tourist mun te leh Indo-Myanmar border town Moreh etthakna nei ding in chialna a bawl a, tunaicha kihawng thak Indo-Myanmar border gate ah Visa stamped thei hiding, Myanmar gamsung 16 km tiang ah kua hitaleh lutthei ding, zia mun a chu hapta 2 sung cham thei ding uh ti’n a gen hi. Chuleh, November 2018 leh um ding, Manipur Sangai Festival uap ding in ASI Executive Council Meet uap tute a chial a, Princess of Thailand in tukum ah Manipur Sangai Festival uap ding ah guanggalna um in a gen hi.

Zia ah ASI Executive Council Meet, inaugural session Chief Secretary Dr. J. Suresh Babu leh ASI president Dr. Dilip Gode te’n guest of honour leh functional president hina tawh a uap ui.

Education Minister in Ukhrul ah school entha

Imphal, Aug. 31 *(Nisin Thuhiltu)* : Manipur Education Minister Thokchom Radheshyam in tuni’n Ukhrul District ah Sirarakhong Government High School leh Tongu High School dinmun etthakna a nei a, thuthak lakhawm mite kiang ah a genna a chun, tanggam ah cheng te’n private school ah chate kaisak ding haksa sa a hina chung ah government school infrastructure hawina ding ah panlakna nei hiding ti’n a gen a, teacher taksapna tawh kisai ah reservation policy dungzui ah valley ah population a tam dungzui ah recruitment ah valley ah sem ding teacher tamzaw kilak ziak leh tanggam ah posting lemchanglo ding numei tamtak teacher ah a kilak ziak ah teacher lam ah lemchanlona um hin a gen hi. Manipur ah dialects 34 val umte ziak ah student leh teacher te kal ah haksatna tung in agen a, zia gual buaina chu sukven theina ding ah Government district ahiloleh sub -division wise ah recruitment chiapina ding lampi ngaitua in a gen hi.Chun, school infrastructure leh approach road te repaired bawl hiding in a gen hi.