CCpur ah Mid Day Meal kichiapi dan banggual?

CCpur, Aug. 30 *(Nisin Thuhiltu)* : India government in government school ah kai school naupang te ding ah a chiapi, Midday Meal Scheme kiti Manipur ah le chiapi in a um hi. Churachandpur ah SSA nuai ah government school leh District council nuai ah school a kigawm ah 462 (Primary students 19319 leh Upper 4732) ah Midday Meal Scheme chiapi a hi. Midday Meal Scheme phatchuampi thei ding te ahiu leh Class I-VIII student te a hiu a, Quarterly ah school te Midday Meal piak a hisek hi.
Tukum 2018 ah First quarter - (April May June) - April ah ni 21, May ah ni 5, June ah 24; Second quarter (July, August, September) July ah ni 24, August ah ni 23 leh September ah ni 18 ah school naupang te kiang ah school thuneitu te’n Midday Meal a piak ding uh a hi. Second quarter a ding tiang ah school thuneitu te Midday Meal piakdaw hita a hiu. School naupang khat in, nisin ah Primary student 100 grams, Upper 150 grams a mu ding uh a hi.

Midday Meal anchang te ahileh Block wise ah kihawmdawk, school DI/AI te khut ah piakdaw hiding, Headmaster te kiang ah a piakdaw sawn ding uh, Midday Meal a kihawp leh kihawplona DI, AI te’n amau amawpuakna huapsung ah a etzui ding uh a hi. Transportation lam thil ahileh Deputy Commissioner in appoint a bawl contractor in Godown apat a tunna ding mun chiat ah a thak tung ding a hi. Atangpi’n Churachandpur District a ding in quarter sin in mid day meal anchang a tangpin bag 900- 1300 tuam a tung sek hi.
Chun, a chuam in, me (curry) man ding leh ann huanpiak te nikhuatha-man ding sum school thuneitu te piak a hi sek ua, School naupang khat in, nisin ah Primary student Rs 2.80/-, Upper Rs 3.60/- me man ding a mu ding a hi.
Midday Meal Scheme chiapina chung ah District khat ah Chairman ahileh Deputy Commissioner ahia, ama nuai ah Zonal Education Officer (ZEO), DI/AI leh Headmaster te’n kituptak ah scheme chiapina ding in mawpuakna a nei ui. Zia ah kigen gual ah Govt school ah Mid Day meal hawp ahilo a chun, dan zui diklo, sum leh annchang kai hekna um hiding a hi. Alangkhatlam ah khua-hausa te’n Mid Day meal leh school kivaipuakna chung ah thuneina aneitheina ding uh umlo himaleh khua hausa khenkhat school headmaster tawh rank kibang gual ah um pawl umsek in a kigen hi.

Special Summary Revision 2019 ding ah training nei

CCpur, Aug. 30 *(Nisin Thuhiltu)* : District training centre, Tuibong ah tuni zingkallam dak 11 in CCpur district leh Pherzawl District sung ah Assembly Constituency 6 apat ERO, AERO, BLO supervisors leh BLO te'n, Special Summary Revision 2019 ding tawh kisai in kisaklawkna Training a nei ui. Training in Constituency 6 apat Booth Level Officer (BLO) hunkhawp te a pang ua, Electoral roll ah min umkha lo te umsak dingdan, min diklo sukdik dingdan, deletion ngaite paithak dingdan tawh kisai in training a nei ui.S Thienlaljoy Gangte Addl DC/Pherzawl District in ziltilna nei in, Addl DC S Khaikhopau Ngaihte in hun matna amapui hi. Training hun ah Mannuamching DC/Pherzawl in a gendan in, a diak ah CCpur leh Pherzawl district sung ah cheng te chiapi khat, sepna taphawt ah thasang ah midang sawl ti chu a mun taktak ah thil hithei seklo a hidan gen in, training ah panglo ah a hun tak ah sepna mun luatu ah a pan tak ua leh thil chiadan dik theilo tin a gen hi.

Tuchung, Special summary Revision ah a kisaipi te pilvang mama ding leh a biktak ah complaint tamna pen deletion tawh kisai ah kituptak ah panlakna a nei ding uh a nawp thu a gen hi.

Shyam Lal Poonia DC/CCpur in a thugenna a chun, Special Summary Revision 2019 ah District dangte sang a percentage i sangsak zawkding uh a hi tin a gen a, tuchung a bawl hawipen BLO kiang ah Rs 5000 piak hiding, second leh third in Rs 3000 leh Rs 2000 sang ding uh tin a gen hi. Special Summary Revision 2019 ahileh September 1, 2018 ah draft electoral roll sudaw ah um ding, sukdik ding um te sukdikna ding ah claims & objection hun September 1 apat October 31 kikal hiding, November 30, 2018 tiang ah claims & Objection um te sukfel ding, January 3, 2019 ma ngei ah Khumlut thak a um leh Data update ngaite zawthian ding, Electoral Roll nanung pen leh latest pen ahileh January 4, 2019 ah suadaw ah um ding a hi. Special Summary Revision tawh kisai in Form 6 ahileh kum 18 chunglam India khua leh tui hina nei te a ding, Form 6 mang ah, electoral Roll a kikhum lut ding taphawt nu leh pa vote neisa himaleh, khumlut thak ah um ding ten Residential proof a lak teitei uh ngai in a kigen a, Age proof na ding ah Birth Certificate, Educational Certificate leh umna kochuam ah Baptisma channa certificate le matthei ding, zia te chu a umlo ahileh a nu leh pan a taktak ma ahi kiti ah kitiamna Oath of Affirmation bawl thei ding uh hin a kigen hi. Form 7 ahileh a thitasa te leh mun 2 ah vote neikha khatzawk zawk paithak ngai ding te a ding, Form 8 kimatna ahileh umna mun diklo, lim hawilo, min diklo leh Pa min diklo ti te sukdikna ding, zia a ding a chu kum, min, address leh detail diklo sukdikna ding a hi. Form 8A ahileh Transposition kiti polling station khat apat polling station dang kichawn ding ten amat ding uh, polling station kichawn ding ten BLO te a thuhiat ding uh ti a hi.

Disable Organisation in kiphinna nei

CCpur, Aug. 30 *(Nisin Thuhiltu)* : Manipur state sung ah pianken ah gualphalo Disable Organisation chuamchuam in tuni in state solkal kiang ah a thil dawt uh sukpitin ahilona chung in kiphinna a nei ua, Imphal ah North AOC apat State Social Welfare Department office zuan in lamlian zuina leh sit in protest a nei ui.State Platform of Disabled Peoples’ Organisation ahileh state sung ah District chuamchuam a Disable pawlpi chuamchuam CCpur District Disable Union te panna a kikhaikhawmnau a hi. Imphal khawpi ah tuni, kiphinna a nei hun un, Social Welfare department tiang lut ding guan kisingsakna a nei ua, Social Welfare Office mai in kiphinna a nei ui. Disabled Peoples’ Organisation President Yunus Khan in a gendan in, State Platform of Disabled Peoples’ Organisation in July 25, 2018 ni ah Manipur Chief Minister kiang ah Memorandum khat pelut ah Right to Persons with Disabilities Act nuai ah Dan dungzui ah Disabilities-te a ding ah Directorate chuam a um ding, Rights of Persons with Disabilities Act 2016 hawitak ah mat ding, Person With Disabilities-te a ding ah 2015, 2016, 2017 apat tuni tiang ah Old Age Pension sum piaklo ah um te piakdaw ding, skill development programme nei ding, Right to Persons with Disabilities Act 2016 nuai ah Section 40 & 46 dungzui ah mun poimawna zosia Disabilities te a lut theina ding ua system kawi ding, disable game and sports le state budget Policy ah kawi ding, Manipur State Paralympics Committee siamthak ding ti te a demand uh himaleh tuni tiang ah government in panlakna bangma neilo tin a gen hi. Zia ah kiphinna a nei tiang ua, govermment in a demand uh a limsak diaklo ahileh pianken a mi pangai te tawh kibang ah Bandh leh Blockade pan thei tho ding uh ti’n a gen hi.

CCC in EE/MSPDCL kimupi
CCpur, Aug. 30 *(Nisin Thuhiltu)* : Mipi a pat district sung ah Online recharge bawl theina ding dawtna a um tawh kisai ah tuni'n Churachandpur Consumers' Club in EE/MSPDCL va kimupi in, mani in chiat ah Electrict recharge kibawl theina ding ah Online recharge bawl ding tawh kisai dawtna a nei ui. EE in a genna a chun, Imphal lam ah online recharge bawl thei maleh Lamka lam hi meter box chuam a hiziak in zia facility chu bawl thei hinailo in a gen a, intin in online recharge kibawl thei leh mi zosia a ding ah bailam ma ma dingin a gen hi. Maleh, a mau level ah bawl theilo ziak in Managing Director, Imphal kianga dawn ding leh zia chu a pawimaw dungzui ah CCC kithuapi ding hi'n a gen hi.

USRA in hilchianna bawl
CCpur, Aug. 30*(Nisin Thuhiltu)* : United Socialist Revolutionary Army (USRA), Department of Publicity and information in tuni ah hilchianna thusua a bawlna a chun, Imphal East district Police in Imphal-Pangei Road ah 29th August 2018 ni ah USRA Chief (L) Lalminthang Vaiphei kithana kigawl Thanglenlal Misao (32) s/o Seiboi Misao of Saikul, S. Khunou leh Thangpi Vaiphei (29) s/o Ginkhopau Vaiphei of T. Gangphai village mandawk ah thudawtna a nei hun ua, USRA Deputy Chief tawh CCpur lam ah khualzin khawm, zia chu Deputy Chief pa'n meithal pia, Thanglenlal in USRA Chief (L) Lalminthang Vaiphei akap ti ah newspaper khenkhat ah kisua chu thudiklo a hidan gen in, USRA kivaipuakna “Deputy Chief” kiti umkha ngai himhim lo in a taklang hi. Chun, ziagual thudiklo chu mipi te leh a kisaipi government in mat ah um mi 2 te thugen chu taksanglo ding in hilchianna a bawl hi.

National Lok Adalat leh Traffic Mobile Court um ding
CCpur, Aug. 30 *(Nisin Thuhiltu)* : District Legal Services Authority, Churachandpur in September 8, 2018 zingkallam dak 10:30 leh Chief Judicial Magistrate Court, Police Station leh New Lamka ah National Lok Adalat leh Traffic Mobile Court kiti bawl ding a hi. Zia hun a chu innkuan sungthu tawh kisai banah case chuamchuam nei te’n September 4, 2018 sun dak 12:00 tiang ah Chairperson/Secretary, District Legal Services Authority, Churachandpur kiang ah a buaina thu uh tawh kisai zikthaw ah pelut thei ding uh tin Letkho Kipgen, Secretary, District Legal Services Authority, Churachandpur in news mang in hiatsakna a bawl hi.

Bethany Kochuam Biakinn hawng

CCpur, Aug. 30 *(Nisin Thuhiltu)* : Presbyterian Church of India, Mizoram Synod, Manipur Area nuai a Phailian Pastor Bial huapsung ah um Bethany Kochuam Biakinn, Gochinkhup Veng, New Lamka ah tuni, August 30, 2018 nitaklam dak 2:00 ah a hawndawna leh a latna a um hi. Rev. C. Zorammawia, Administrative Secretary, Manipur Area in Biakinn hawnna nei in, Rev. Joseph Lalnunmawia, Moderator, Lamka South Presbytery in biak-inn Pathian kiang ah a latna a nei hi. D. Phailian Pastor Bial Lapawl apat laa pawl sakna um in, Tual Upa Khailienthang, Kochuam Secretary apat Report piakna um in, Rev. C. Zorammawia, Administrative Secretary, Manipur Area in Pathian’ thutak genna a nei a, Rev. T. Zuanlal, Saptuam Chairman in hunkhakna siam in hun amang zo ui. Bethany Kochuam Biak-inn ahileh January 21, 2013 ni ah sakpat ah um, kum 5 leh tha 8 sung ah kisa, Rs. 85,60,732 bei hi’n a kigen hi. Bethany kochuam ahileh Jubilee Church, Compound Veng in 2012 kum ah Upa Bial Nih apat innkuan 29 a inchuan, tu leh tu kochuam innkuan 56 apat milip 261 um ti a hi.

Hmuia Veng, Tedim Road siatna siam zawm

CCpur, Aug. 30 *(Nisin Thuhiltu)* : Special Contractor Tinkholal@T. Lala Vaiphei in tuni, August 30, 2018 in Hmuia Veng, Tedim Road siatna a siam zawm hi. T. Lala in a chiata August 27, 2018 ni ah tipper 7, Road Roller leh Grader Machine mang ah lamlian level suksanna ding ah leisai a sunthak a hi. Tuni’n Suang leh Leisan sung in, Suang leh Leisan sunna, Water Bound Macadam (WBM) ah suang 40 mm Tipper 6 leh a kim a sung hi. Sung sun ah um te, tipper khat a Rs. 15,000 manzo hi’n le a kigen hi. A langkhatlam ah lamlian sia zingziang ah um detdo tak ah siamhawi thakna ding ah panlakna a um zing lai ah social media khenkhat ah contractor dem ah a um chu, Contractor in nuamlo a sakthu gen in, blacktopping tiang bawl hinalai ding a hina chung ah nasepna zaw masang ah kidem ti chu nasem te ding ah thil nuam hilo tin le a gen hi. Zia kawmkal a chun, Lamlian siatna mun, lamsak lampang ah tuilawng kek, tui chia hatna mama khat um, zia chu a kisaipi thuneitu ten a siam hawilo ua leh lamlian hawitak ah kisiam lehle sawt panglo ding tin mitamtak in a gen ui.

Traffic Control Police in helmet drive

CCpur, Aug. 30 *(Nisin Thuhiltu)* : CCpur district sung ah gari tai tua te enkawltu, Traffic Control Police TCP, CCpur in Police Team te kithuapina tawh tuni, August 30, 2018 in hundang ah anei sek gual in khawpi sung ah helmet Drive bawlna a nei a, traffic rules tawh kituaklo ah gari neu a tai helmet kikhuklo, gari lekha leh driving licence pawlo-te traffic control police office, Police Station ah tailut sak in, sum a liausak ua, dan bawtsia gari neu 73 mandawk in, a sum in Rs 9, 000 mun in District Transport Office in a submit ui.

Ropiang Foundation in Lamka Bamboo Fair bawl ding

CCpur, Aug. 30 *(Nisin Thuhiltu)* : Dr.Thangchinkhup Guite, Chairman, Ropiang Foundation Trust in tuni, August 30, 2018 nitaklam dak 3:30 in a office, Mission Road, Hiangtam Lamka ah thuthak lakhawm mite kimupi in, Ropiang Foundation Trust nasep daw te leh maban ah guanggalna a nei te taklatna a nei hi. Zia hun a chun, Dr. Thangchinkhup in Ropiang Foundation Trust nasepna chiato zel ah, DTC ah Literary & Civil Service Workshop lawting tak ah nei a um, Jaipur a Intensive Training ding ah mi banghem zat sawl ah um te lak ah a tamzaw’n placement ah sepna muta, Football Tournament le lawting tak ah bawl zo, Town Area ah school 10 a Eye Screening leh Ophthalmic Camp nei ah a um nung ah student 210 kiang a mitbel piak himaleh office ah panpina dawn te piakbe a hina chung ua student 220 val mitbel piak ah um in a gen a, Cloth Foundation apat, Branded Jacket leh T-shirt February tha apat hawpdaw ah umta ti’n a gen hi.
Maban ah Gawtuai apat siamdaw thei thil chi chuamchuam Expert-te mapuina’ Ropiang Foundation Trust in training sai ding in a gen a, van hawpdaw ding 280 vel um nalai te, tanggam ah khua-hausa chuamchuam thuhiat ah, khawsung ah van pawiaw diak te kiang ah piak hiding, Kiginni leh Pathianni ah Guite kual ah van hawm ah chia ding uh tin a gen hi.
Ropiang Foundation Trust in tup-leh-dawi chuamchuam Education, Healthcare, Environment, Art & Culture leh a dangdang anei lak ah nek-chak hawlna a phachuam thei ding tupna October 24 apat October 26, 2018 kikal sung ah Lamka Bamboo Fair kiti Ropiang Foundation Trust in organize bawl ding, zia hun a chu, Exhibition, Auction ti te stall chuamchuam ah nei hiding leh, National level a Gua lam ah thiamna nei chuamchuam in ziltilna nei ding, amun ding ahileh sukfel chet hinailo in a gen hi. Lamka Bamboo Fair ding tawh kisai ma ah Plantation nei hiding, zia ding a chu Sialbu gam ah Gua, kung 500 apat 1,000 kikal tukum ah tu hiding a hih ti’n a gen hi. Lamka Bamboo Fair ding tawh kisai ah Oil and Natural Gas Corporation (ONGC) chu Chief Partner hiding, sponsor dangte Rural Electrification Corporation,YES Bank leh North-Eastern Tourism Development Council hiding uh tin a gen hi. Lamka Bamboo Fair um hun takleh Local mi, khutthiam chuamchuam, a khutsuak uh sulang leh zuakdawk nuam te’n a vaima theilam ah Ropiang Foundation Trust thuhiat ding in chialna a bawl hi.

Tribal Martyrs Memorial Park hawng ding

CCpur, Aug. 30 *(Nisin Thuhiltu)* : Joint Action Committee Against Anti Tribal Bill JAC AATB in Manipur Assembly in a pass Bill dawilo ziak ah kiphinna thina tuak salpha 9-te kivuina mun Tribal Martyrs Park, Mata Dam ah Tribal Martyrs Memorial a siam chu August 31, 2018 leh a hawndawna nei ding a hi. Zia ding a chun, Tribal Martyrs Park mun ah kisaklawkna a nei zing a, kisaklawkna zawthian vang hita hin a kigen hi. Tribal Martyrs Park lutna ding kawtpi,Main Gate siamna nasep a chiatha zing a, August 31 ni ah program matna ding tawh kisai ah kisaklawkna ahileh felvekta ti a hi.

Khuga dam ah um, Sixth Sikh Li Infantry Khuga Battalion in tuni’n, Park mun etthakna nei in, Special Invitees-te chutna ding mun ah Tent suangna ding mun etthakna a nei ui. Tribal Martyrs Park hawnna ahileh August 31, sun dak 12 apat progam kipan ding, Zothanga leh Zenngaihniang ten hun matna mapui ding, Rev Khamkhosiam Hangnung, President, Baptist Partnership Ministry NTBCA in hun patna nei ding leh K. Suanthang President, Paite Tribe Council PTC GHQ in Tribal Martyrs Park main gate hawnna nei ding, Vanlalrinliana, President, Mizo People Convention MPC in left pavement hawng ding, H Pauzacin, President Tedim Chin Unit TCU in Right pavement leh T. Khailianthang, President, Young Paite Association YPA GHQ in middle pavement banah Chinlunthang, President, United Zou Organization UZO in left pond leh B. Dongzalian Simte, President, Simte Tribe Council STC in right pond hawng ding a hi. H Mangchinkhup Chief Convenor JAC AATB in MOU Memorial hawng ding leh, vaidawnna leh keynote address bawl ding, R Sangkawia, President, Zo Re Unification Organization ZORO GHQ in salpha 9-te kivuina leh Tribal Martyrs Memorial hawng ding, salpha-te zana piakna hun um ding, traditional gun salute in zui ding a hi. Rev Father Emmanuel Kholi, Parish Priest, Good Shepherd Parish, Lamka in Tribal Martyrs memorial Pathian kiang ah a latna nei ding, Rayburn College NCC Cadets mapuina’ Martyrs families, special invitees, tribal leaders banah host organization JAC AATB ten salpha-te zana pakcha piakna nei ding, R Sangkawia, President, Zo Re Unification Organization ZORO GHQ apat thugenna um ding, Joints Choirs, Chin Baptist Association, Evangelical Baptist Convention, Presbyterian Church of India, Tuithaphai Presbytery, New Testament Baptist Church leh Zou Presbyterian Church Synod mapuina’ Ni Tla Ngailo, Zion khawmpui ti laa sakhawm ah, Rev Dr Kamkhanthang Mangte, Former Principal Grace Bible College GBC Lamka in hun khak pauchapna nei ding a hi.