Manipur Startup Conclave 2018; bandhs/ blockades culture chawlsan chiat ding pawimaw: CM
Imphal, Aug. 8 *(Nisin Thuhiltu)* : City Convention Centre, Imphal ah tuni’n Manipur Startup Conclave 2018 a um hi. Zia hun chu Chief Minister N. Biren Singh in Chief Guest hina tawh a uap a, Functional President hina tawh Deputy Chief Minister Y. Joykumar Singh in a uap hi. Chief Minister N. Biren Singh in a thugenna a chun, tu ah state government in dinmun sangzaw Manipur a kawi theina ding ah state government chu nasep sak ding leh panlakna neisak ding in mipi te chialna a bawl a, kiphinna leh bandh/shutdown a um mun takluat ziak ah state government in dawigual tak ah panlakna neitheilo in a gen hi. Tu ah state government in chamna leh muanna state sung ah umsak ding thiltup ah nei a hidan gen in, bandh ahiloleh kiphinna neithei ahinai ti ah community, club, leikai tin in ningtin ah bandh a bawl mai sek uh chu khawk a sakthu gen in, state sung ah bandhs/ blockades culture chawlsan chiat ding in mipi te a chial hi. Tuban kum 5-10 zaw ah Manipur chu dinmun sang kawi ding a hidan gen in, Supreme Court of India in ‘unconstitutional’ ah bandhs/ blockades a puan a hitakna chung ah bandhs/ blockades culture chawlsanlo te chung ah legal action khautak ah lak hiding ti’n le a gen a, state sung ah bandhs/ blockades a um mun takluat ziak ah Company tamtak in Manipur ah business bawl ah investment bawl ding ngamlo uh a hidan taklang in, mizosia’n democratic leh systematic ah kiphinna leh lung-awilo suklatna neitheina ding ah thuneina nei maleh zia kiphinna leh lung-awilo suklatna chun micham (ordinary) te a sukbuailo ding ti’n a gen hi. Manipur Start-Up Policy sukpiting thei ding ah state government a umna chung ah lungdam mama a hidan gen in, tuban kum 5 sung (i.e. 2017-2022) ah Rs. 150 crores tawh Start-ups leh Entrepreneurs te promote bawlna ding ah Manipur Start-Up scheme chiapi hiding, zia chun state sung ah nasatak ah entrepreneurs a dawpkang ding kinem in a gen hi. Deputy Chief Minister Y. Joykumar Singh in a thugenna a chun, khantona ding ah secondary sector siamhawi masak ding pawimaw a hidan taklang in, maban state economy chu state Entrepreneurs te khut ah kinga hi’n a gen hi.
Hiatthei khat chu, Start-up/beneficiaries ding ah total 334 select in a um ua, zia lak a chun, mi 26 te Revenue Stage Start-Up ah teldaw in a um ua, Idea Stage ah mi 200 leh Entrepreneur Support Scheme category ah mi 105 teldaw in a um ui. Manipur Startup Conclave 2018 chu Cabinet Ministers, Chairman Manipur Pollution Control Board L. Radhakishore, Deputy Chairman Manipur Planning Board S. Rajen Singh, MLAs, Chief Secretary, HODs of various Departments, Bank of Baroda official te’n a uap ui.
Tuithalui ah khialut a thisa kimudawk
CCpur, Aug. 8 *(Nisin Thuhiltu)* : Tuithalui ah khialut, Lalcha Pulamte (15) of Canan Veng chu mitam ngai mimal leh pawl chuamchuam in a hawl nung un, tuni, 8th August zan dak 10 tuam ah Ebenezer kiangnai lei nuai ah a thisa a luang mudaw in a um hi. A kigendan ah Lalcha Pulamte chu Kamdou Veng kiang ah tuitha lui ah ngakuai khai ah um, tui ah khialut kha hi’n a kigen hi.
Cleanliness Drive bawl
CCpur, Aug. 8 *(Nisin Thuhiltu)* : Indian Independence Day 2018 matna ding tawh kisai ah kisaklawkna chiatha zing in, District Administration lemsakna dungzui in government institution leh office chuamchuam ah Cleanliness Drive bawl in a um hi. Zia chu Swachh Bharat Mission sukpitinna hikawm ti in, tuni August 8, 2018 in Phase III na Cleanliness Drive a um hi. Lanva lei leh Bethel kikal Tedim Road dung ah Village Authority leh Government Department chuamchuam te’n lamlian kim leh kiang sukthianna a nei ua, Police Department, PWD, Employment, DIO (NIC) te’n Bethel leh Forest Gate kikal lampi dung suthiang in, DC Office, ADC Office leh NYK Volunteer te’n Forest Gate leh Sielmat Lei kikal a suthiang ui. Education, Horticulture leh Treasury te’n Sielmat Lei apat Police Station kikal suthiang in, Agriculture, PHED, Wealth & Family Welfare leh ITI Saikot te’n Police Station apat Red Cross Road Junction tiang a suthiang ui. MSPDCL, Fisheries, Transport, DYASO, Social Welfare leh DSO te’n Red Cross Road apat Hmuia Veng tiang suthiang in, Forest, Veterinary, Cooperative leh Sericulture department a sem te’n Hmuia Veng apat Dorcas Hall kikal suthiang in, Handloom panama, DIC, IFCD, DIO, DIPR leh DeGS staff te’n Dorcas Hall apat Lanva Lei kikal a suthiang ui.
DC/CCpur chawndaw ding ah KIM in phutna nei
CCpur, Aug. 8 *(Nisin Thuhiltu)* : Kum 1992 apat Naga thingnuaimi, NSCN-IM in Kuki mi leh sa mawna neilo, numei-naupang panna mi 900 val a thah banua khua 360 val a halmang nung ua mi lakh khat val belding neilo ah galtai ahilai ua India Government in tuni tiang ah bangma gen-le-sak neilo, Kuki-te maban ding ngaitualo a, Naga-te tawh Framework Agreement nei ah panlakna a nei zing lung-awilo suklatna Kuki Inpi Manipur (KIM) in August 8, 2018 zingkal dak 6:00 apat August 9, 2018 zingkal dak 6:00 kikal sung Kuki-te chenna zosia ah total shutdown puan hun tawh kituak ah Churachandpur District Administration in Cleanliness Drive chiapina chung in, KIM in Deputy Commissioner, Shyam Lal Poonia chung ah lung awilo thu taklang in, thuneitu te’n kintak ah District apat a lakdaw, transfer ding un phutna a nei hi. Kuki Inpi Manipur thusua in a taklatna a chun, Deputy Commissioner in khenchuam nei ah vaihawm a hidan taklang in, Kuki mite thawkgimna zalo in a taklang a, zia chu KIM in pawm theilo in a gen hi. Chuleh, DC mizia chu district piting Churachandpur ah vaihawmtu ding ah titna neilo ti’n le a taklang a, a kintheilam ah mundang ah a kisaipi thuneitu te’n a chawndaw ding uh pawimaw in a gen hi.
Kuki Inpi Manipur bandh in hindan ngaina chawkbuai
CCpur, Aug. 8 *(Nisin Thuhiltu)* : Kuki Inpi Manipur (KIM) in Manipur ah Kuki-te chenna zosia huap ah August 8, 2018 zingkal dak 6 apat August 9, 2018 zingkal dak 6, dakkal 24 sung Total Shutdown a puan tawh kitawn in, hindan ngaina a buai a, Imphal leh Hill District kawmtuana lampi te kikhak in, State capital tawh kikawmtuana um theilo in a um hi. Kum 1992 apat Naga thingnuaimi, NSCN-IM in Kuki mi leh sa mawna neilo, numei-naupang panna mi 900 val a thah banua khua 360 val a halmang nung ua mi lakh khat val belding neilo ah galtai ahilai ua India Government in tuni tiang ah bangma gen-le-sak neilo, Kuki-te maban ding ngaitualo a, Naga-te tawh Framework Agreement nei ah panlakna a nei zing lung-awilo suklatna Kuki Inpi Manipur (KIM) in shutdown a puan hi a hia, Churachandpur ah KSO/Churachandpur leh TKSU General Headquarter in support bawl in, total shutdown hun sung ah Press/Media, damlona nei ahiloleh Airport chia ding te tilo gari taisaklo in a um hi. Kuki Inpi Manipur (KIM) bandh/shutdown bawlna chung a chun, volunteer pawlkhat in Thingkangphai ah lampi a khak uh dawilo in pawl khat in a nang ua, kinawktuana a um tawh kitawn ah Lunzamung, MPS, Additional SP (Operation) leh Johnny Sharma, MPS, SDPO Churachandpur te’n a mun del in pawl 2 kinawktua te a sukveng ua, Sielmat Lei kim leh kiang ah le kinawktuana sosang thei ding ah hiat a hi ziak in, Border Security Force BSF, India Reserve Battalion IRB leh Assam Riffle-te’n panlakna nei in, zia thu zik a hi tiang ah bangma buaina thupi talua umlo ah hiat a hi.
Ui pe damdawi bei
CCpur, Aug. 8 *(Nisin Thuhiltu)* : District Hospital ah Ui pe damdawi kikapna tawh kisai in, Dog Bite Cell ah tu dinmun in Anti Rabies Vaccine damdawi a bei hi. Medical Superintendent, District Hospital apat a kihiatdan in, Dog Bite Cell ah Ui pe damdawi, Anti Rabies Vaccine chu State apat July 17, 2018 ah Vile 30 tung, July 28, 2018 ah kikap bei ti a hi. State apat Ui pe damdawi, Anti Rabies Vaccine July 28, 2018 apat supply a umlo ziak ah tasam ah um in a kigen hi. State ah le Anti Rabies Vaccine umlo in a kigen a, District Hospital in Anti Rabies Vaccine a neitheina ding tawh kisai ah zing August 9, 2018 a Imphal ah damdawi kanthakna nei ding ti’n Superintendent, District Hospital in a gen hi.
ZSF GHQ in bandh support bawllo ding
CCpur, Aug. 8 *(Nisin Thuhiltu)* : Zomi Students’ Federation (ZSF) General Headquarter in thusua a bawlna a chun, Manipur University (MU) ah Vice Chancellor paithâk ding phutna ni 70 val kiphinna a um ziak ah student te thiam zilna maban sawn theilo ah a um zing tawh kitawn ah All Tribal Students’ Union, Manipur (ATSUM), All Naga Students’ Association, Manipur (ANSAM) leh Kuku Students’ Organization (KSO) General Headquarter in August 10, 2018 zingkal apat August 11, 2018 zankim tiang dakkal 24 sung Total Shutdown a puan uh chu thil dawi um himaleh ZSF General Headquarter in August 6, 2018 ni ah Peaceful Rally nei ah ngaina gual ah Manipur University (MU) a umkit ding phutna a neitak banah tulak bandh leh shutdown um zing ziak ah mipi te’n haksatna a tuak zing sek uh khualna ziak ah All Tribal Students’ Union, Manipur (ATSUM), All Naga Students’ Association, Manipur (ANSAM) leh Kuku Students’ Organization (KSO) General Headquarter bandh puan support bawllo ding, ZSF thuneina huapsung ah bandh umlo ding ti’n a taklang hi.
India-Myanmar kal ah International entry-exit checkpoints hawn ah um
Moreh, Aug. 8 *(Nisin Thuhiltu)* : Indo-Myanmar bilateral relations hawizawk sem ding tupna’n, tuni’n gam 2 te kal ah international entry-exit checkpoints hawn iin a um hi. Zia ah checkpoints kihawng te chu Manipur leh Sagaing Division Tamu- Moreh Border leh Mizoram leh Chin State kikal ah Rihkhawdar-Zokhawthar border a hi. Indo-Myanmar kal ah International entry-exit checkpoints te chu official tak ah hawn ah umta a hidan, Indian Ambassador to Myanmar Vikram Misri in a gen a, August 8 chu gam 2 te a ding ah khangthu tepte kham hi’n a gen hi. Moreh-Tamu border ah International entry-exit checkpoint hawnna chu, Tamu Immigration office kiang ah nei in a um a, Myanmar leh India te’n zia hun chu a uap ui.
Consul General of India to Myanmar, Nandan Singh Bhaisora in international entry-exit checkpoint kihawng chu gam 2 te a ding ah thil thupitak a hidan gen in, Integrated Check Post, Moreh ah official te’n hun mangkhawm ngal uh hin a gen hi. Zia ah hun matna chu Permanent Secretary, Ministry of Labour, Immigration and Population, Government of Myanmar, Mr. U Aya Lwin; Deputy Commissioner of Tamu District, Mr. Myint Thein Aung; Director, Immigration, Saigang Region, Mr. Khin Htwe and other officials attended the conference representing Myanmar. The Indian delegates was represented by Dr Suhel Akhtar, Additional Chief Secretary, Kh. Raghumani, Special Secretary (Home), RK Shivachandra, Convenor, Act East Policy, Manipur, Brigadier AS Chauhan, Commander 26 Sector Assam Rifles leh government officials chuamchuam te’n le a uap ui.
DI- Pipe sia siamthak
CCpur, Aug. 8 *(Nisin Thuhiltu)* : Lamka khawpi sung ah tuinek laklutna Zone II, Lanva Lui a intake point leh Reservoir (Tanky) kikal a Ductile Iron (DI) Pipe bangzat a hem te leichim in a suksiat ziak in tuni, August 8, 2018 in PHED staff leh mi phachuam ngai pawl te’n JCB khat mang in a siam ui. DI Pipe 13, Feet 100 ding chu lei chim in a suksiat ziak ah Lanva Lui ah khialut in a kigen a, zia te chu line department leh mi phachuam ngai te’n luidung a pat ladawk ah siam thak ah um a hi. Nianglian in PHED Water Supply, Zone-II Bungmual area, kum 30 vel etkawllo ah um, water treatment bangma umlo in a gen a, pipeline leh intake point te sia mun mama a hidan taklang kawm in tu ah a siam thak uh le sawt pangzo ding ah ginchatna neilo in a gen hi. Zia chu a kisaipi thuneitu sangzaw, Manipur Government ahilo tawp ah District Administration in a etzui ding a nawp thu gen in EE, PHED in tuma thil umdan etthakna nei ah department in theitawpsua ah panlakna nei zing maleh a hiding gual tak ah tuinek piakdawna pipe line hawi thei taktaklo ti’n a gen hi.
Eviction drive bawl
CCpur, Aug. 8 *(Nisin Thuhiltu)* : Shyam Lal Poonia, IAS DC CCPur, Thangboi Gangte, MCS SDO CCpur leh T Kammuanlal Simte, Chief Executive Officer, ADC CCpur mapuina nuai ah Civil Police leh Women Police ten New Bazar kiim leh kiang in Eviction drive bawlna a nei ui. JCB mang in New Bazar Bus Waiting Shed a susiau a, phalna bei ah dawr ding ah kisa inn te le a suksiat piak ui. Bus waiting Shed suksiat hun a chun, New Bazar area Tedim Road lamsak lam banah Red Cross Road leh Thangzam Road to ah Footpath pel ah lampi pam ah van chi chuamchuam zuak te le nawdaw in a um ua, mehzuakna van-te chu Police Station ah kawi in a um hi. Lampi awngthawl ding khualna ziak ah eviction bawlna mun a chu meh leh van chuamchuam zawk ding phal hitalo ti a hi.