Kuva chang sia leh van hun beisa tamtak man dawk

CCpur, Aug. 6 *(Nisin Thuhiltu)* : Food Safety Department, CCpur leh Police team khat in tuni nitaklam dak 12:30 apat in Teddim Road, New Bazar kîm-le-kiang ah dawr chuamchuam ah Food Safety Drive nei in, kuva chang hawilo banah nekthei hun beisa tampi a mandawk ui. Zia hun a chun, Food Safety Department, CCpur apat K. Sunita Devi, Food Safety Designated Officer mapuina’n food safety department apat staff banah Police Team lam apat T. Lunzamung, MPS, Additional SP Operation, AJ Khongsai, MPS SDPO, Thanlon, Johny Sharma, MPS, SDPO CCpur leh Women Police apat Chiinneilam, Inspector, OC Women Police mapuina’n police team te’n Tedim Road dung ah dawr chuamchuam a diak in van supply a taivel kawlte dawr check bawlna a nei ua, kuva chang sia leh chips banah van hun beisa tamtak a man dawk ui. Drive nei hun ah Bimal Das Dawr apat kuva changsia Cement bag 9 val matdaw in a um a, a dawr khakpiak in, Food Safety Office ah ki-report ding in a hiatsak ui. Chuleh, dawr chuamchuam - Subash Store apat dummuam Saajan, Baba Zarda, Biscuit hun beisa a sum ah Rs 1200 vel ding man a mandawk ua, Udit Narayan Gupta Store apat Saajan banah Masala hun beisa packet 6, a sum a Rs 600 vel man ding a mandaw ui. Rohit Variety Store apat Golden Tobacco Khaini Box 9, a sum a Rs 300, Chandesh War Variety Store apat Burma nekthei Mr Bean, Dried Fish a sum ah Rs 150, Sanjay Variety Store apat Golden Tobacco khaini box 2 banah dawr chuamchuam apat nekthei hun beisa chi chuamchuam Rs 2000 val man ding a mandaw ui. Tuni ah matdaw a um Kuva changsiate chu Delhi lam ah tobacco product chuamchuam ah mat ding ah a khawlkhawm uh hi’n a kigen hi.

Joint Student Bodies, CCpur in Peaceful Protest Rally nei

CCpur, Aug. 6 *(Nisin Thuhiltu)* : Zomi Students’ Federation (ZSF) mapuina nuai ah Joint Student Bodies of Churachandpur in tuni, August 6, 2018 in Manipur University ah Vice Chancellor, AK Pandey chung ah ngawna chuamchuam ziak ah Academic Session chiatha theilo ah um zing chu dawilo suklatna’n district sung ah College student te’n Peaceful Protest Rally a nei ui. Rally ah pang ding te chu, Public Ground, Hiangtam Lamka ah kingakkhawm in, Thangbiaklian, Hangzo, Convener in Rally nei ah a umna ziak genlatna nei in, DC Office tiang lampi zuina nei in, DC Office ah Minlun, ZSF member in Memorandum simdawna nei in, Vanlallian Khaute, President, ZSF in Manipur Chief Minister kiang tung ding, Memorandum khat, S. Khaikhopau Ngaihte, Assistant Commission to DC khut ah piakdawna a nei hi.
Zia Rally a chun, Placard a thu chuamchuam kizik chawi in, lampi zuina a nei ua, district sung ah institution chuamchuam apat college student tamtak a chiakhawm ui. Memorandum in a piak un a taklatna a chun, University khak ah um chu student-te basic right leh thiamzilna hiatna amu ding uh daltu a hidantaklang in, university khak ahi ziak ah zillai tamtak maban ding subuai in a gen ua, zia chu tunung ah, mimal, khawtang leh gamsung a ding ah manna liantak hi’n a taklang ui. Chuleh, Vice Chancellor in-charge ding ah mawpuakna piak ah um in thawveng tak ah panlakna anei theina ding ah thawveng tak ah panlakna neisak ding a nawpthu’u taklang kawm in, University buaina tawh kisai chu political party kuama mun neisaklo ding a nawpthu a taklang ui.

NHM Official khat in Dist. Hospital entha

CCpur, Aug. 6*(Nisin Thuhiltu)* : State Health Society, National Health Mission apat Official khat in tuni, August 6, 2018 in District Hospital etthakna a nei a, siamthak ngai thil chuamchuam te dinmun etthakna a nei hi. Hospital etthakna nei chu, Rajeev Irengbam, State Program Manager a hia, Zenngaihlun, District Program Manager leh Dr. VC Pau Tonsing, Medical Superintendent, District Hospital te’n kithuapi in, hospital building leh van mat chi chuamchuam te a etpi ui.District Hospital ah building leh van mat chuamchuam etthakna a neizaw in, Mission Compound leh Suangdoh zuan in, Rajeev Irengbam, State Program Manager a kipandawk a, National Health Mission nuai ah Ayushman Bharat Scheme nuai ah Health & Wellness Centre ding bawlna nasep chiatha zing te etthakna a nei hi.

N. Neihsial in a sepna thak join ta

CCpur, Aug, 6 *(Nisin Thuhiltu)* : Member of Central Administrative Tribunal Government of India ding ah guat ah um Nekkhomang Neihsial @ N. Neihsial, IDAS officer & Retd. ex-DGDA, Govt. of India in July 30, 2018 ni a khan Central Administrative Tribunal, Guwahati ah a sepna thak a join hi. Member of Central Administrative Tribunal kiti chu Secretary to the govt.of India rank tawh kibang ah gen a hi. Ama’n kum 3 leh tha 6 sung zia mawpuakna chu tuk thei ding hi’n a kigen a, Northeast bial ah Tribunal thil tawh kisai ama mawpuakna nuai ah um ding in le a kigen hi. N. Neihsial ahileh N. Neihsial 1981 batch IDAS (Indian Defence Accounts Department ) cadre, 47thController General of Defence Accounts CGDA, Ministry of Defence, of the Republic of India hina tawh February 28, 2017 ah retd a hi. Masang in Principal controller (Northern Command) Jammu and Principal Financial Advisor to Indian Navy in le a la sem hi. Mithu dik, a sepna taphawt ah gin-um tak leh kukal tak ah nasem mi a hi ziak ah India gamsung ah tu ah mawpuakna kipia tuk thei ding mi 15 um te lak ah ama dawisakna piak ah um ti a hi. “Khawvel hausakna sang ah ka tup leh ngaikhawk pen chu Van gam ah go khawlkhawm a hi"

World Indigenous Day mang ding
CCpur, Aug. 6 *(Nisin Thuhiltu)* : Zomi Human Right Forum (ZHRF) GHQ in August 9, 2018 zingkallam dak 11 :00 leh Synod Hall, IB Road ah Indigenous People Right to Land ti thupi nei ah World Indigenous Day mang ding a hi. Zia hun chuleh Siamzading Valte Chairman, ZHRF GHQ in vaidawnna thu gen ding, Dalsianpau, Secretary, ZOLLS mapuina’ tribe tin ah puitu te’n World Indigenous Day matna’ candle vakna nei ding a hiu. Chun, Thangbiaklian Hangzou in thugenna nei ding, John K Ngaihte Chairman, Zomi Council, Joshed Lalrothang President, Hmar Innpui leh Vanlalrinliana, President, MPC Manipur te’n thugenna nei ding ahiu. Chuleh, Dr. R. Sang in The Right of Land, Suanmoi Guite, Secretary ZHRF, GHQ in Post Card Singnature Campaign Against Oil Exploration hun mapui ding a hi.

Football uniform set hawnna nei
CCpur, Aug. 6 *(Nisin Thuhiltu)* : Obdiyah School, Bethel Veng, New Lamka in tukum 2018 ah State Level Inter School Sport, Under 17 numei football team-te mat ding football uniform set hawndawna leh Pathian kiang ah latna a nei ui. Zia hun a chun, K Ngulkhanthang, Retired Additional Director of Horticulture, Manipur in football uniform set hawndawna a nei a, Pastor D Kamchinmang, Local Pastor, EBCC, Dorcas Veng in uniform set latna leh player-te pauchap piakna a nei hi. State Level Inter School Sport 2018 ahileh Khuman Lampak Main Stadium, Imphal ah um ding, Obdiyah School apat Under 17 numei Football Team-te pang ding a hiu.

Singngat Battalion in Behiang Football Ground siamhawi

CCpur, Aug. 6 *(Nisin Thuhiltu)* : 27 Sector, Assam Rifle nuai a um, Singngat Battalion in Behiang khua ah Community Service Drive nei in Behiang Football Ground siamhawina nasep a pan ui. Zia nasepna chu August 12, 2018 tiang ah zawman hiding ban ah, August chawlkal thumna vel ah a neisek uh, Football Tournament a ding ah phachuam ding hi’n le a kigen hi. Singngat Battalion in khawsung mite tawh kituak leh kinaizawksemna ding tupna ziak ah Community Service Drive a bawl uh hi’n a kigen hi. A langkhatlam ah Singhat Assam Rifles Battalion in Singhat Area Football Association (SAFA)tawh kithua ah Independence Day 2018 matna ding kawm ah Singhat Football Tournament 2018 a sai uh chu chiatha zing in football team/club 27 te’n gualchuang chuang ding kichuna a nei zing ui. Quarter final phase leh semi finals round ahileh 11 Aug - 13 Aug 2018 sung ah um ding, Final Match ahileh 15 Aug 2018 ah Independence Day ah um ding a hi. Khangthak talent hawitak tak neite’n career ah sports a nei theina ding uh leh sports lam ah khangthak te tilkhona zia tournament chu organize kibawl a hi.

4th National Handloom Day mang ding
CCpur, Aug. 6 *(Nisin Thuhiltu)* : District Handloomom & Textiles, Churachandpur in 7th August 2018 zingkallam dak 10:30 leh 4th National Handloom Day mang ding a hi. Zia hun chu T. Joseph Lungdim , MCS, SDO/Henglep; Vanlallian Vaiphei, President ZSF GHQ leh L. Thiankham Tombing, Churachandpur Depot Operator Handloom Delivery Scheme te’n Chief Guest, Guest of Honour leh Functional President hina tawh hun matna uap ding a hiu. Zia hun matna chu NemRoslyn in mapui ding, Ginzamang Haokip in vaidawn thugenna nei ding leh khuallian tea pat thugenna um ding, District sung ah puankhawng mi tamtak te’n uap ding a hiu.

Third Batch Induction Meeting on Bridge Program
CCpur, Aug. 6 *(Nisin Thuhiltu)* : MS Conference Hall, District Hospital ah tuni, August 6, 2018 zingkallam dak 11:30 in Third Batch Induction Meeting on Bridge Program of Certificate Course in Community Health for Nurses (BPCCHN) kiti a kipan hi. Zia hun a chun, Dr. M. Shimray, Assistant Regional Director, IGNOU, Imphal leh Dr Johnson, Regional Director, IGNOU ban ah Dr Kim Simte, CMO, CCpur leh District Hospital apat Dr VC Pau Tonsing, Medical Superintendent mapuina’n doctor-te a pang ui. Zia hun chu, Dr. Biakdiki in a mapui a, Dr VC Pau Tonsing, Medical Superintendent in vaidawnna thu leh Community Health tawh kisai ah Certificate Course a ziltîltu dingte kimelhiatsakna nei in, Dr. M. Shimray, Assistant Regional Director, IGNOU, Dr Johnson Regional Director, IGNOU ban ah Dr Kim Simte CMO CCpur, District Hospital in thugenna a nei ui. Dr. M. Shimray leh Dr Johnson te’n Course chiadan tawh kisai a genna ua, tha 6 Certificate Course himaleh course zolote’n NHM chiadan dungzui in kum 2 sung a exam 2-vei piak ah zawthei hi’n a gen ua, Study Material leh bangkim IGNOU in pevek ding a hi ziak ua trainee te’n tha 6 sung pawimaw ngai a, damtheina lam tawh kisai ah mipite a ding ah nasem ding hilam kihia, kukal leh titak tak ah pang di’n tilkhona a nei ui. Study Centre ah Academic Counselor ding te ahiu leh; Dr. VC Pau Tonsing, Medical Superintendent District Hospital, Zenngaihlun, DPM, Dr. Biakdiki, PIC Physician, Dr Senni, Pharmacologist, Deputy PIC, Dr Chanrajit, Senior Obstetrician & Gynecologist, Dr Nirpendra, Oncologist, Dr Ngahneikim Community Medicine, Dr Tongjakai, Pediatrician, Dr Amarjit, Physician, Dr M Nando Singh, Orthopedician, Dr Seikolet ENT Surgeon, Dr Nengkhanmang Deputy Medical Superintendent, Dr Zuii, Senior Obstetrician & Gynecologist, Dr N Thangginmang, Dental Surgeon, Dr Matouleibi leh Dr Seanbawi ,Surgeon-te ahiu. Zia course zilthei ding ah teldaw ah um GNM leh B. Sc Nursing 30 te training ah pang ding a hiu.

Famta T. Dongzakai Gangte vuiliam hita
CCpur, Aug. 6 *(Nisin Thuhiltu)* : CCpur District khantona ding ah panlatu ban ah thingtangmite a ding ah kisuanpi um mama, Chief of Hill Town, T. Dongzakai Gangte chu tuni’n Chiengkawnpang thanmual ah vuiliam in a um hi. T. Dongzakai Gangte ahileh hun sawttak apat blood cancer natna ziak ah etkawl ah um ahia, zani August 5, 2018 nitak 7:35 in a mualliam a, tuni ama sûnna leh zana etsakna ama khua hausakna huapsung in dawr/dukan te a kikhak hi. T. Dongzakai Gangte ahileh famta Thangzam Gangte leh Darneichong chapa ahia, May 13, 1937 in Old Churachand Mission Compound in a piang a, 1967 kum in famta Pastor Vangzadal Gangte khut ah Boboi Gangte tawh kochuam dan in a kicheng ui. Thiamzilna lam ah Intermediate of Commerce, Cooperative Society Accounting Trainee banah BA chan zil in, a damsung in kochuam leh khawtang ah chanmun pawimaw taktak 22 val a tu’i.

Ama hin pianpi unau 10, cha 10 ban ah tu 10 chuleh nau min 20 val ala phuak hi. CCpur khangthu a ding ah a masapen Cinema Hall a bawldaw ban ah sa lane tihaw a pandawk hi. Khangthu suttheina ding ah khanglui vanmatchak chichuamchuam kawitupna ding ti’n Tribal Museum le a chenna huangsung in a siam a, naupante kihelna ding thil chuamchuam le a bawl hi. Zia museum chu mipite etthei ding ah kawi in, thiamzilna lam ah a diak ah research bawlte a ding ah mun pawimaw tak a suak hi. Famta T. Dongzakai Gangte sûnna hun ama ngaina tu mitamtak te’n a uap ua, mi mal, pawl chuamchuam leh khaw-hausa banah mi pawimaw tamtak in suun thu puang in, Flag tiang ah a luang tuam in a um hi.

TAVAU in election nei ding
CCpur, Aug. 6: Tipaimukh Area Village Authority Union (TAVAU) Office Bearer te a hun uh a beitak tawh kitawn in ah a hung tung ding August 14, 2018 zingkal lam dak 11:00 leh District Headquarter, Pherzawl ah election nei ding a hiu. Zia na ding a chun, TAVAU nuai a um khawtin Village Authority member zosia pangkim chiat ding in Convener, Ramsangthang Infimate, Chief of Pherzawl in hiatsakna a bawl hi.

Int’l Trade Expo & Youngster Hunt chiapi dan taklang
CCpur, Aug. 6 *(Nisin Thuhiltu)* : Tuibong Peace Ground, CCpur ah achiatha zing, International Trade Expo & The Second Youngster Hunt tawh kisai ah tuni, August 6, 2018 nitaklam dak 3:00 in Organizer te’n Press Conference ko in thil chiadan hilchianna a bawl ui. Ell Simte in zia hun a chun, Indoor Stadium, Peace Ground ah nei a um International Trade Expo ah international company chuam chuam - Pakistan, Bangladesh leh Thailand a pat van chuam chuam tung in ziate chu stall 80 val ah kizuak in, nisin leh zingkal dak 9:00 apat zanlam dak 8:30 kikal kihawng sek hi’n a gen hi. Trade Expo a lutman ticket Rs. 20 ah kizuak, zia ticket chu Trade Expo tawpni leh Lucky Draw bawl hiding, Lucky Winner in Refrigerator man ding hi ah gen in, Trade Expo ah innsung van leh nekthei chi chuam chuam zuak a um ti’n a gen hi.

Kimneihoi, Secretary, Kuki Women Union in Youngster Talent Hunt nei ah a umna tawh kisai a genna a chun, Competitor 26 in kidemna neizing a hidan uh gen in, lunglutna nei a um leh August 10, 2018 tiang ah min piaklut thei nalai ding ti’n a gen hi. Kidemna pang te chu, Audition Round neisak ah um, Elimination pat ah umta hi’n a gen a, Christian gam ahi dungzui ah Pathianni kidemna umlo in a gen a, lunglutna nei kua hitaleh nitak dak 5:00 apat dak 8:00 kikal sung ah etthei zing in a gen hi.

Minlal Gangte, Secretary, Information & Publicity, KSO Churachandpur in Kevi Society, Kohima tawh kithua ah KSO Churachandpur in International Trade Expo leh Talent Hunt a bawl uh lawting to zel a hidan gen in, Khangthak te’n sum hawlna lam thil a hiatthiam ding uh dawina ziak ah ziagual thil chu organize bawl uh hi’n le a gen a, International Trade Expo leh Youngster Talent Hunt ahileh August 24, 2018 tiang aum um ding ti’n a gen hi. District Police leh KSO Churachandpur in Volunteer a kawite kithuapi ah thawveng tak ah International Trade Expo & The Second Youngster Hunt chiatha zing in a gen hi.
Indoor Stadium, Peace Ground ah International Trade Expo leh The Second Youngster Hunt ahileh August 3, 2018 ni ah Shyam Lal Poonia, IAS, DC Churachandpur leh Kabib K, IPS, Senior SP Churachandpur in khuallian hina tawh a hawndawna a la nei uh a hi.

Tui in lei tawktha

Ukhrul, Aug. 6 *(Nisin Thuhiltu)* : Ukhrul district, Sadar Hills ah um Bungpi Area ah gua nasatak ah a zuk ziak in tui a let a, Khongtah tawh Nomjang kikawmtuana lei(bridge) tui in a chup nung in a chim hi. Local mite’n a gendan un, zia ah lei chu tukum 2018 ah kisiamzo pan hi’n a gen ua, quality neilo tak ah lei kisiam hiding ti’n a gen uii. Chun, zia ah lei chipthak ziak a chu kikawmtuana haksa leh a biktak ah school kai naupang te ding ah lemchanlona liantak tung in a gen ui.

MSJWS nuai ah ah journalist 3 te kiang ah panpina pia

Imphal, Aug. 6 *(Nisin Thuhiltu)* : Manipur State Journalists Welfare Scheme (MSJWS) nuai ah damlona tuak hospital ah ki-enkawl leh thina a la tuak Journalist pathum te kiang ah Information & Public Relations Minister Thongam Biswajit in tuni, 6th August 2018 in H. Balkrisna Singh, Director, IPR, Tenshubam Sangeeta, APO (Press), DIPR leh staffs te uapna’n ama office chamber ah panpina sum piakdawna nei hi. Mi pathum te ahiuleh - (Late) Shri G. Muanthang, Senior Correspondent, Churachandpur, Information Service Television Network (one time ex-gratia amounting to Rs. 2,00,000/-), Shri Nepram Tombi Meitei, Ex-Staff reporter, Sangai Express (medical assistance amounting to Rs. 1,00,000/-) and Shri Th. Thangzalian, Editor/Publisher, Lamka Post((medical assistance amounting to Rs. 1,00,000/-) te a hiu. Manipur State Journalists Welfare Scheme (MSJWS), ahileh Manipur Chief Minister in 30th June, 2017 ah City Convention Centre, Imphal a la hawn a hi. Zia scheme chiapina ding a hi’n govt in Rs. 10,00,00,000/- (Rupees ten Crores) budget a bithiak hi.

SSA/RMSA nuai ah Language Graduate Teacher muthak

Imphal, Aug. 5 *(Nisin Thuhiltu)* : Education Department Manipur nuai ah Rashtriya Madhyamik Shiksha Abhiyan (RMSA) ah Language Graduate Teacher (RMSA) Recruitment 2016 results a suak hun ah waiting list ah um mi 5 te ding in tunaicha a khan appointment order a suak hi. Ziana a chun, Language Graduate Teacher (LGT) Vaiphei ding in Sangnei Vaiphei d/o Upa Henzagen Vaiphei of Imphal in a lawtin na a chang hi. Ama ahileh Zillai (Vaiphei Students’ Association) General Headquarter ah Joint Secretary Finance panmun lua zing lai a hi. Chuleh, Vaiphei Literature Society a ding ah contribution nei zing mi le a hi. Chun, Language Graduate Teacher (LGT) Zou ding ah Lidia Nengneikim leh Language Graduate Teacher (LGT) Kom ding ah Meena Telen te le a lawting ui.

Mu buaina sukvenna ding ah panlakna kithuapi ding ah Dy. CM in chialna bawl

Imphal, Aug. 5 *(Nisin Thuhiltu)* : Manipur Deputy Chief Minister Yumnam Joykumar in tuni’n ama secretariat ah Minister for consumer affairs, food and public distribution, Karam Shyam, Education Minister Th. Radheshyam, Minister for Water Resource Development Letpao Haokip, Minister for PHED, Losii Dikho te uapna tawh thuthak lakhawm mite kimupi in, Manipur University community chu HRD ministry kithuapi ding leh State Government in ngaina gual ah University a um kit theina ding ah panlakna a nei chu kithuapi ding in chialna a bawl hi. Education Minister Th. Radheshyam in a genna a chun, colleges 93 ah post graduates student te khualna leh 6 Semester’s examination results puandaw theilo ah a umna chung ah Manipur University buaina a vaima theilam ah sukven ding pawimaw in a gen hi. All Tribal Students’ Union Manipur, Kuki Students’ Organisation leh All Naga Students’ Association te le state mipi te interest ah a thupuknau enthak ding leh August 6 apat buaina sukvenlo ahileh kiphinna nasatak neiding a tiu chu lunglian keng pum ah zangai nalai ding in chialna a bawl hi.

Boder Gate, Moreh ah Visa on Arrival
Imphal, Aug 6 *(Nisin Thuhiltu)* : Myanmar Immigration Officer in Indo Myanmar -Border gate ah Mayanmar Government in Visa on arrival facility umsak ding ah lemsakna nei a hidan gen in, August 8 ah Border gate hawn hiding in a gen hi. Chuleh, tunung ah eVisa facility le kawi hiding ti’n a gen hi. August 8 ah Indo-Myanmar Border, Moreh ah Integrated Check Post le hawn hiding a hi.

Rajya Sabha in Criminal Law (Amendment) Bill, 2018 pass; Numei naupang pawngsual te thi tiang gawtna piak hiding;9th August, 2018 ah Rajya Sabha Deputy Chairman election

New Delhi, Aug. 6 *(Nisin Thuhiltu)* : Rajya Sabha ah tuni’n Criminal Law (Amendment) Bill, 2018 genkhawmna a um a, hun chawmkhat sung Bill tawh kisai ah debate a um nung in pass in a um hi. Criminal Law (Amendment) Bill, 2018 provision dungzui ah numei naupang pawngsualtu te thi tiang ah gawtna piak hiding a hi. Bill tawh kisai ah ngaidan leh dawidan genkhawmna chung ah kinialna um maleh Bill dodalna nei ah kiphinna umlo ah Bill pass thei ah a umna chung in Innpi vaihawmna Criminal Law (Amendment) Bill, 2018 pawdawktu Union Minister of State for Home Affairs of India Kiren Rijiju in member te chung in kipakthu a gen hi.

Criminal Law (Amendment) Bill, 2018 ahileh Lok Sabha in a la pass hita a hia, zia dungzui a chu numei naupang kum 12 nuailam pawngsualtu te gawtna sangpen, thi tiang gawtna (khailup) hiding a hi. Zia Bill chu Jammu and Kashmir, Kathua ah numei kum tinglo pawngsualna leh Unnao, Uttar Pradesh rape case thu’n India gamsung pumpi a chawling hial ziak ah Law (Amendment) Ordinance thasang thei ding ah pawngsualna tawh kisai ah dan (law) kisiam thak a hi. Chun, Bill ki pass thak in, IPC, CrPC leh POCSO Act nuai ah Sections khenkhat le siamthak ding a hi. Criminal Law (Amendment) Bill 2018 dungzui ah naupang kum tinglo pawngsualtu te ding ah gawtna niampen kum 20 sung jail ah kawi ti a hia, zia chu dan (law) umsa ah kum 10 a la hisek maleh kum 10 ah kibelap a hi. Gawtna sangpen ahileh thitiang gawtna piak hiding, numei naupang kum 12 nuailam gangrape case ahileh gawtna a niampen ah damsung jail tang ding, a sangpen ah thi tiang gawtna piak ding a hi. Numei naupang kum 12 leh 16 kikal mite pawngsualna case ah thiamlo chan ah um te hun dang ah gawtna a niampen ah kum 10 sung kipe sek himaleh tu ah kum 20 hita ding, gawtna sangpen ah damsung jail tang ding ti a hi. Kum 16 leh18 kikal mite pawngsualna case ah thiamlo chang te ahiuleh gawtna a niampen ah kum 10 sung jail tang ding, a sangpen ah damsung jail tang ding ti a hi. A vel ah pawngsualna case neite ahiuleh damsung jail ahiloleh thi tiang gawtna piak hiding a hi.

Chun, zia gual pawngsualna case tawh kisai khualna ding a chun hun tiam a ki umsak a, tha 2 sung teitei ah case khualna zawthian ding, fast track court ah case lel hiding, thitiang gawtna piak ding ah thutan khum ah um te gawtna sukniam theina ding ah dawtna (appeal) a um leh tha 6 sung ah case zawthian ding ti a hi. Chuleh, kum 16-18 nuailam te pawngsualna tawh kisai ah ngaw ah um ahiloleh thiamlo chang te anticipatory bail piak hilo ding a hi. Rajya Sabha in National Commission of Backward Classes le penal ah a pan theina ding, Constitution (123rd Amendment) Bill, 2017 le pass a bawl a, Lok Sabha in chedule Caste & The Schedule Tribes (Prevention of Atrocities) Amendment Bill, 2018 a pass hi.

A langkhatlam ah 9th August, 2018 zingkallam dak 11:00 leh Rajya Sabha, Deputy Chairman telna (election) um ding in, Chairman M Venkaiah Naidu in a puang a, August 8, sun tiang ah ah nomination papers filed hiding a hi. Rajya Sabha Deputy Chairman post ahileh UPA government's hun ah teltin ah um P J Kurien a retire nung ah a awng ah um a hi. P J Kurien ahileh June 2018 ah retired hita a hi.