MANIREDA Chairman mapuina Solar Power Off-Grid tawh kisai genkhawm

CCpur, Aug. 4 *(Nisin Thuhiltu)* : Manipur Renewable Energy Development Agency (MANIREDA) in Deen Dayal Upadhyaya Gram Jyoti Yojona - Decentralized Distributed Generation (DDUGJY-DDG) Scheme nuai in Churachandpur leh Pherzawl District sung ah electric tunlona khua te chu Solar mang ah meivak piakna ding in panlakna a nei zing hi. Zia chu tawh kitawn in tuni, August 4, 2018 nitaklam dak 1:00 in a kisaipi thuneitu te’n DC/CCpur Office Chamber in genkhawmna anei ui. Zia ah meeting chu MANIREDA Chairman, Ginsuanhau@GS Haupu, MLA 60 Singngat Assembly Constituency in amapui a, L. Manglem Singh, Director, MANIREDA, Shyam Lal Poonia, IAS, DC Churachandpur, Mannuamching, IAS, DC Pherzawl banah Churachandpur leh Pherzawl District ah SDO zosia banah MANIREDA staff bangzat a hem te’n le a uap ui. Meeting in Churachandpur leh Pherzawl District sung ah Electric tunlona thingtang khua ah Solar Power Off-Grid apat meivak piakdawna ding tah panlakna umta te leh Solar Power Unit piak ah um te a tunna ding a tun leh tunlo chungchang, Solar Power Unit piak ah um te dinmun tawh kisai genkhawmna a nei ui.

Meeting zaw in MANIREDA Chairman, GS Haupu mapuina nuai ah Khenjang ah 200 Kilowatt, Solar Power Plant kisiam etthakna a nei ui. Solar Power Plant tawh kisai GS Haupu’n a genna a chun, Solar Power Plant apat meivak lakdaw ah um te 33/11 Kilowatt Power Sub-Station ah piakdaw hiding, zia chun, Churachandpur ah electric meivak kimang dawk a kimkhat lam pedawk zo ding ti’n a gen hi. Unit khat ah Rs. 4.60 zel piakdaw thei hiding, zia chu electric matman kiamchuam thei ding ti thiltup hi’n a gen hi. MANIREDA Director, Manglem Singh in MANIREDA in a genna a chun, State Electricity Regulatory Commission in Dan apiak, Renewable Purchase Obligation (RPO) kiti tawh kituak ah panlakna um zing a hidan taklang kawm in, Manipur sung pumpi ah Solar Power Plan, 750 Kilowatt piakdaw theina ding ah project chiapina, Khenjang ah kisiam chum un kining ting a hi dungzui ah a lianpen ah kisiam in a gen hi. MANIREDA Chairman leh a team te’n Khenjang a phak zaw un, District Hospital ah MANIREDA etkawlna nuai ah Solar Power Plant kikawi etthakna nei in, Dr. VC Pau Tonsing, Medical Superintendent in Solar dinmun tawh kisai a hil a, Manglem Singh, Director, MANIREDA in Solar van mat sia te siamthak leh etthak hiding ti’n zia hun a chun a gen hi.

Tangmai Festival 2018 mang

CCpur, Aug. 4 *(Nisin Thuhiltu)* : YPA GHQ Hall, Hiangtam Lamka ah tuni, August 4, 2018, zingkallam dak 11:00 ah kipat in ah Young Paite Association (YPA), General Headquarter nuai ah Organizing Sub-Committee leh Paite Numei Pawl te mapuina Tangmai Festival 2018 mat in a um hi. K Suanthang, President, PTC GHQ in Tangmai Festival 2018 hawndawna nei in, V Vungzapau, Chairman, The First Tangmai Festival 2018 in tangmai festival mat ah a umna tawh kisai genlatna a nei hi. YPA Pearsonmun Unit apat Pupa chawndan suklatna a um a, Bukpi mi Kizomkhawm te apat special item chuamchuam um in, Pumshong Hangshing, Director Paite Cultural Society PCS apat thugenna a um a, Paite Numei Pawl PNP GHQ lawiupa te mapuina changmai nekkhawmna a um hi. Nitak hun ah T. Lawmpi leh Manngaihkim te mapuina nuai ah Festival mat in a um a, Upa Dr DK Mang, Vice President, PTC GHQ in hun patna nei in, Paite Zai-Awi Pawl leh YPA Vengnuam South Unit te apat special items suklatna a um hi. Zai ah hun matna chu Paite namsung ah MLA, MDC, Paite Tribe Council PTC GHQ, Paite Numei Pawl PNP GHQ, Thallouh Paite Literature Society PLS, Paite Cultural Society PCS, YPA GHQ, Siamsinpawlpi SSPP GHQ, Paite Zai-Awi Pawl PZP leh a dang dang te’n hun matna a uap ua, Shyam Lal Poonia, IAS DC CCpur, K Kabib, IPS Senior SP CCpur leh Tribe chuamchuam ah lawiupa te’n el a uap ui.

Vacation Bible School nei
CCpur, Aug. 4 *(Nisin Thuhiltu)* : Hope Baptist Academy, Bible Hill, Rengkai in Vacation Bible School 2018 a nei uh chu tuni, August 4, 2018 nitaklam in a zo thiang ui. Vacation Bible School ahileh achiata July 30, 2018 ni ah Rev. Dr. HC Stephen in a hawndawna a la nei a hia, Vacation Bible School nei sung in, Hope Baptist Academy a kai student 900 tuam te’n, Michigan, USA apat 7 te’n ziltilna chuamchuam a nei ua, School ah semtu mi 34 in a kithuapi ui. USA apat ziltiltu ah pang te chu, John Scally, Senior Pastor, Zach Scally, Matt Hatton, Child Pastor, Konrad Fleischmann, Josh Johns, Ryan Luna leh Karl Fleischmann te a hiu. Vacation Bible School hunsung in naupangte Group A, B leh C ah ki khen in, Group khat in Devotion a nei hun ua, Group dang pani te’n Bible Class leh kihelna hun a neisek ui.

Routine Immunization chiapi
CCpur, Aug. 4 *(Nisin Thuhiltu)* : District Family Welfare Officer (DFWO) Churachandpur in district sung mun chuamchuam in tuni, August 4, 2018 in Routine Immunization achiapi hi. Zia hun a chun, Numei nauvawp mi 4 te panna, Naupang kum 15 nuailam mi 145 te natna chi chuamchuam a pat kivenna ding in damdawi a kap ui. Hiatthei khat chu, DFWO/Churachandpur in Routine Immunization achiapina ding nil eh mun a suadaw dungzui ah Kiginni sin ah Neihsial Veng, Nazareth Veng, Khuga Christian Meitei leikai leh Nengthawng Avenue area te a ding ah zingkal dak 6:00 apat Neihsial Veng hausapa inn ah um ding, Go Cin Khup Veng area a ding ah zingkal dak 6:00 apat Aganwadi Centre, Go Cin Khup Veng ah, Bijang khopi leh Bijang B ASHA area ah zingkal dak 6:00 apat Bijang community hall ah um ding, Kamdou Veng, B Phaicham leh kim leh kiang a khua/veng ban ah Tedim Road Kamdou Veng apat peace ground tiang te a ding ah zingkal dak 6:00 apat Tuibuang 2 ASHA inn ah um ding, Tuinom khua a ding ah zingkal dak 6:00 apat in Tuinom hausapa inn ah um ding, Headquarter Veng ASHA A leh B te a ding ah zingkal dak 8:00 apat in Headquarter Veng Community Hall ah um ding ti a hi.

Performance Review Meeting nei
CCpur, Aug. 4 *(Nisin Thuhiltu)* : District Health Society (DHS), National Health Mission (NHM), Churachandpur in tuni, August 4, 2018 nitaklam dak 1:00 in DC/CCpur Office Chamber ah Performance Review Meeting a nei hi. Lalramsang Infimate, Additional DC Churachandpur in meeting amapui a, Zenngaihlun, District Program Manager, NHM, Health Sector, District Level Officer te leh NHM nuai ah Nodal Officer te zia meeting a chun a pang ui. Nodal Office te’n Report piakna nei in, district sung ah performance tawh kisai vel etkitna a nei ua, Janani Suraksha Yojana (JSY)/Janani-Shishu Suraksha Karyakram (JSSK) tawh kisai le genkhawmna a nei ui. Zia hun a chun, Deputy Commissioner dawidan tawh kituak ah hunlemchang khat ah District Hospital mun ah genkhawm thak ding in lemsakna a nei ui.

Indian Army contingent te mapui

CCpur , Aug. 4 *(Nisin Thuhiltu)* : Captain Roel Neihsial of Kumaon Regiment chu Royal Thai Army te tawh Indian Army ten MAITREE -2018 kiti ni 14 sung, Joint Military Exercise aneina ding ua, Indian Army contingent te mapui ding ah guat in a um hi. Zia chu tawh kitawn in Capt. Roel Neihsiel mapui Indian Army contingent ten Joint Military Exercise aneina ding mun uh Mueang, Chachoengsao Province, Thailand a zuan uh ti thu hiat a hi. Hiatthei khat chu, India sepai ten gam chuamchuam tawh Joint Military Exercise a nei zing sek uh himaleh Manipur apat thingtangmi sepai officer, Indian Army contigent te mapui tu ah pang a vâng mama nalai hi. Captain Roel Neihsial ahileh Gangpimual, Churachandpur a pat a hi.

Runner-up ah Zahawng FC pang

CCpur , Aug. 4 *(Nisin Thuhiltu)* : XI Delhi Hmar Premier League, (L) Fimlunghnem Memorial Trophy, 2018 in final match ah tuni, 4th August 2018 in Old JNU Campus, CRPF, SDG Ground ah Zahawng FC Delhi leh KRSUD FC te a kihel ua, ziana a chun KRSUD FC in 4-0 in gualzawna a chang hi. Zahawng FC Delhi chu runner-up in a pang hi. Zia kihelna a chun, Zahawng FC player Khaiminjon in Best Midfielder award a sâng hi. Zahawng FC Delhi ahileh Tv. Haothianlal Vaiphei in amin a puak, ama leh Tv. Minlun Vaiphei banah Tv. Dr. Haokam Vaiphei te’n ngun tak ah angai tua zaw nung ua, June 2018 ah kiphutdawk hi’n a kigen hi.

21st Manipur Integrity Day nit

Imphal, Aug. 4 *(Nisin Thuhiltu)* : All Manipur United Clubs Organisation (AMUCO) te mapuina nuai ah MDU Yaiskul, Imphal ah tuni’n 21st Manipur Integrity Day a kimang hi. Zia chu Manipur Integrity Day chu August 4, 1997 ah Manipur territorial integrity venbitna ding ah Mass Rally nei ah um hiat zingna ding ah kimang sek a hi. President Ph. Deven Sharma mapuina’ Mapal Kangjeibung ah Integrity Pillar kisiamna mun ah hun mat in a um a, MDU hall, Yaiskul Police lane ah main programme mat in a um hi. AMUCO President Ph. Devan in a thugenna a chun, NSCN- IM leh India Government in Frame Work agreement a neinau tawh kisai ah Parliamentary committee report dungzui ah Manipur dinmun dengdel tak ah a um laitak hi’n a gen a, ceasefire agreement a nei ua a pat Manipur territorial integrity buai zing ah um hi’n a genhi. Kuki organizations khenkhat in le Kuki Homeland demand bawl ah panlakna nei uh hin a gen hi. UCM President Karam Sunil in a thugenna a chun, NSCN-IM leh GoI talk tawh kisai ngaithak zing pawimaw leh kigingzing ah um ding a hidan gen in, Civil Society Organisation palai te’n Union Home Minister leh Indian government Interlocutor RN Ravi urging te kimupi ah Manipur’s territorial integrity siatlona ding ah panlakna nei ding ah memorandum piakna a la neidan uh taklatna le a nei hi. Chun, Meira paibi leaders, Kuki Inpi Manipur leh Civil Society Organisation chuamchuam ah leader te chu Manipur Integrity a siatlona ding ah kipumkhat ah pankhawm theina ding ah lunggel neichiat ding in chialna a bawl hi.

MU complex ah kiphinna mun chawn; police in MUSU member 1 man

Imphal, Aug. 4 *(Nisin Thuhiltu)* : Manipur University Community in Vice Chancellor AP Pandey paithak ding phutna a nei tawh kitawn ah University main gate, Chanchipur ah Hunger strike nei ah kiphinna a nei sekna mun uh chu police te’n a suksiat piak ua, zia chu tawh kitawn in University complex sung, bus stand in kiphinna mun a chawn ui. District administration in Section 2 of CrPC 144 a puan tawh kitawn ah kiphinna nei ah a neisekna buk uh suksiat piak a um a hi. Chun, police te’n MUSU member khat a matna chung ua Manipur University Students’ Union (MUSU) leh teachers’ community in kiphinna a kahuzaw sem ah chiapi gua a hidan uh gen in a um hi. Police te’n amat uh MUSU member chu Khagemba of Heirok a hia, tu leh tu adult education department ah class palai hi’n a kigen hi. Chuleh, Manipur University kiangnai ah inn lua ah um, zani 3rd August 2018 nitak dak 12:00 tuam ah police te’n amat uh hin le a kigen hi. Police te’n amatna ziak uh chu Imphal ah mun chuamchuam ah government demna thu leh lim zik ah a umna ziak hiding in muanmaw thu a kigen hi. General Secretary of MUSU , Kenedy in a genna a chun, kiphinna a neina sek uh suksiat piak ah a um tawh kitawn ah kiphinna nasazaw sem ah chiapi ding uh a hidan gen in, Chief Minister in MU buaina 95% sukven hita a ti chu, bang sukpitin a nei a hi em? ti’n dawtna a siam hi.

JCILPS Students’ Wing leh KSO in Illegal immigrant hiding ah muanmaw te check bawl
Imphal, Aug. 4 *(Nisin Thuhiltu)* : Assam National Register of Citizens (NRC) list suadaw ah a um tawh kitawn ah Illegal immigrant te Manipur state sung a lutkhak ding uh venna’ ah Manipur government in Moreh, Mao leh Jiribam ah security a sukkhau banah panlakna chuamchuam a nei zing nung in, JCILPS Students Wing leh Kuki Students’ Organisation (KSO) Jiribam in Jiribam Check post ah Illegal immigrant hiding ah muanmaw te check bawlna anei ui. Zia hun a chun, Manipur state sung lut ding gua, local mi hilo mi 9 te valid documents a neilo ziak un nungsawl kit in a um ui. Alangkhatlam ah Tengnoupal district Superintendent of Police Dr. S. Ibomcha in Officers 5 mapui teams khat siamdawk in Moreh ah Illegal immigrant hiding ah muanmaw te check bawlna a nei zing ua, alert tak ah panlakna nei zing un a kigen hi. Additional SP K. Robinson in Moreh Police Check Post, Sub-Divisional Police Officer Shandeep Gopal Das leh OC MOREH Police Letkhohao Vaiphei te’n Indo-Myanmar Friendship Gate No. 2 - Muslim Basti of Moreh ah Illegal immigrant te dinmun etzuina nei uh leh Deputy Superintendent of Police Thomas Thokchom in Indo-Myanmar Friendship Gate No. 2 to Friendship Bridge (Gate No. 1 ) etzuina nei in a kigen hi.

DG Assam Rifle in ICP Moreh entha

Imphal, Aug. 4 *(Nisin Thuhiltu)* : Director General of Assam Rifle Lt. General Sukhdeep Sangwan in Indo-Myanmar Friendship Gate No. 1 , 2 , Integrated Check Post leh Moreh ah 11 Assam Rifle post etthakna tuni’n a nei a, zia hun a chun, DGAR in Integrated Check Post dinmun kituptak ah etchianna nei in a kigen hi. Integrated Check Post chu Assam Rifle etkawlna nuai ah kawi ding ti a hi. A langkhatlam ah Director General of Assam Rifle in Moreh a phakna ziak chu suklat ahi puai.

July 13 Moreh attack thu ah TSA thip ding ah UKLF in hiatsak: TSA
Imphal, Aug. 4 *(Nisin Thuhiltu)* : Thadou Students’ Association (TSA) in thusua a bawlna a chun, UKLF member hi ah kigen pawl khat in July 13 Moreh terror attack thu ah TSA chu thip (silent) ding ah hiatsakna bawl un a taklang a, July 23 ah Kuki National Organisation/Kuki National Army (KNO/KNA) leh UKLF in CSOs chuamchuam te panna Moreh ah “peace banquet” a nei uh kipakpi kawm in, KNA leh UKLF in kichamna a siam uh tawh July 13 Moreh terrorist attack in kizawp matna neilo, attack bawltu te mat daw ding leh justice a um ding TSA demand a hidan a taklang hi. KNA leh UKLF peace banquet in TSA ahiloleh President TSA, Moreh Block, Thongminlun Haokip hiatphak ah neilo in le a taklang a, TSA leh TSA in a chiapi nasep thilbawl te chu militant groups, political parties ahiloleh civil organizations te dekna leh dodalna hilo, chamna leh muanna, mipi te masawnna ding, welfare a ding khualna hi’n a hilchian hi. Chuleh, July 13 ah Moreh TSA president, Thongminlun Haokip leh a insungmite tha ding gua, meithal mang ah attack a kibawlna chung ah TSA in justice a um theina ding ah panlakna umte militant groups leh civil organizations te’n dodallo ding in dawtna a siam hi. Chun, President TSA, Moreh Block, Thongminlun Haokip chung ah thil dawi umlo a tun kit ngeingei leh government in a maw a puak ding ti’n a gen hi.