MU issue sukvenna ding ah Govt in panla zing: CM
MU VC incharge ding ah Prof. W. Vishwanath Singh guat ah um

Imphal, Aug. 2 *(Nisin Thuhiltu)* : Manipur Chief Minister N. Biren Singh in Chief Minister’s Secretariat ah tuni’n Press Conference in Manipur University issue tawh kisai a genna a chun, State Government in Univesrity buaina tawh kisai sukvenna ding ah panlakna nei zing a hidan gen in, mipi te dawidan tawh kituak ah buaina sukven hiding ti’n agen hi. Kiphinna nei MUTA, MUSU, MUSA leh MU Community te chu kiphinna chawlsan ding ah chial in fact-finding enquiry committee in thil umdan khualna nei zing a hina chung ua kituptak ah khualna a chiathak theina ding ah fact finding committee kithuapi chiat ding in a chial bawk hi. Union Human Resource Development Minister Prakash Javadekar in MUTA, MUSU leh state mipi te demand ngaithakna nei ah panlakna a neina chung in a lungdam thu a taklang a, HRD Ministry in Professor Adya Prasad Pandey, Vice Chancellor of Manipur University chu ni 30 sung leave ah um ding ah hiatsakna a bawl banah zia ni 30 sung a chu Manipur University ah senior most Professor W. Vishwanath Singh chu Vice Chancellor of Manipur University mawpuakna tuk ding ah guat ah um hi’n a gen hi. A langkhatlam ah Professor W. Vishwanath Singh lekhathawt kimu’n a taklatna a chun, March 31, 2019 ah retired a hi tiang ah Manipur University ah ziagual mawpuakna chu lalo ding hin a taklang hi.

Manipur University chu Central University a hina chung ah state government thunei khum theina power nei bukimlo a hidan gen kawm in, fact finding committee kithuapi chiat ding a nawp thu a gen hi. Manipur University issue tawh kisai ah State Government in hun ah Centre thuhiat zing leh buaina sukven theina ding ah nawna bawl zing in a gen a, bandh leh blockade a umlo teina ding ah issue chuamchuam um te a vaima theilam ah sukven theina ding ah state government in panla zing ti’n le a gen hi.

NRC (National Register of Citizens), Assam thu ah diklotak ah state sung ah hung kipemlut a umlona ding ah State government in gamgi tuam ah migrant te dinmun etzuina kituptak nei zing in a gen hi.
Chuleh, illegal immigrants te dinmun etzuina thil ah State Level Monitoring Committee leh District Level Monitoring Committee siamdaw ah um a hidan taklatna nei in, zia Committees chun a pawimaw dungzui ah panlakna nei ding h ti’n a gen a, State Level Monitoring Committee chu Special Secretary (Home) in Chairman hina tawh mapui ding leh DC leh SP zosia member hiding, District Level Monitoring Committee ah DC chairman hiding, SP, SDOs, SDPOs, SDCs leh OC te chu member hiding uh hi’n agen hi. A pawimaw leh Committees member ding ah Civil Society Organisations palai te laklutbe hiding ti’n le a gen hi.

Zia ah Press Conference chu Deputy Chief Minister Y. Joykumar Singh, Minister for CAF&PD Karam Shyam, Chairman of Tourism Corporation of Manipur Limited Dr. Sapam Ranjan, Vice Chairman MIDA O. Lukhoi, MLA Th. Satyabrata, Chief Secretary Dr. Suresh Babu te’n le a uap ui.

Photojournalism course zilthei
Imphal, Aug. 2 *(Nisin Thuhiltu)* : State Institute of Journalism (SIJ), DIPR, Manipur in tha 3 sung Photojournalism course pan ding a hi. Zia ding a chu lunglutna neite’n DIPR, Moirangkhom office, Imphal ah form lak thei ding, 18th August, 2018 tiang ah piaklut kit thei ding a hi. Thuchian kimzaw, Course Coordinator of State Institute of Journalism, DIPR ah kanchian thei ding a hi. Photojournalism course ahileh mimal, students ahiloleh working media persons kua hitaleh Photojournalism lam ah lunglutna neite lim lakdan tawh kisai ah technique, mapping historical significance, analysing major issues ti te hiatthiam sak ding ti tupna kibawl a hi.

HRD in Manipur University HoDs te haina lekha mukhalo: MHRD

Imphal, Aug. 2 *(Nisin Thuhiltu)* : Rajya Sabha ah BJP Manipur Pradesh President leh Manipur a pat Member of Parliament K. Bhabananda Singh in Manipur University academic atmosphere hawilotak ah a umna tawh kisai ah Ministry of Human Resource Development in panlakna aneidan te leh Manipur University issue HRD Ministry in a hezui pek em? ti tawh kisai ah dawtna a siam, Minister of State in Ministry of Human Resource Development, Dr. Satya Pal Singh in a dawnhuna a chun, 32 Head of Departments of Manipur University leh Vice Chancellor office banah Registrar office apat Ministry of Human Resource Development resignation letter mukhalo a hidan a gen a, "Manipur University Students’ Union (MUSU) kiphinna tawh kisai ah Ministry of Human Resource Development in Meghalaya High Court ah acting Chief Justice lui mapui ding, Fact Finding Committee siamdawk ah thil umdan etzuina chiatha zing in a gen hi. Hiatthei khat chu Manipur University, Vice Chancellor Prof. A.P Pandey paithak ding phutna kiphinna tha 2 sung lam a um tak nung ah University nuai ah Head of Departments 32 in haina lekha pelut ua gen himaleh haina lekha pelut umlo a hidan Dr. Satya Pal Singh dawnhuna piakna a pat hiatthei in a um hi.

AIYF leh AISF in BP-81 issue ah Kiren Rijiju thugen nasatak ah demna bawl

Imphal, Aug. 2 *(Nisin Thuhiltu)* : All India Youth Federation (AIYF) leh All India Student Federation (AISF) Manipur State Council in tuni’n Union Minister of State, Home Affairs Kiren Rijiju in Parliament monsoon session ah Indo-Myanmar Border Pillar chungchang genbuai ah um maleh buaina bangma umlo, political groups leh mimal khenkhat in Border Pillar issue a sukso san maimai ua a gen chu nasatak in demna a bawl ui. Irawat Bhawan Imphal, Manipur ah AIYF President Moirangthem Sarajit in a genna a chun, Myanmar Government in India gamsung 3 km lam sunglut ah Border Pillar a chawn himaleh Union Minister in ziagual thugen a nei chu North East mi, a biktak ah Manipur mi te ngaikhawkna Centre Government in neilo a hidan kilang in a gen hi. AISF Manipur Council State Secretary Kh. Rameshor Singh in a genna a chun, BP-81 issue kituptak ah Centre Government in a hiat himaleh 25th July, 2018 ah central team resurveyed bawl te’n pillar position te hiatchian theina ding ah electronic device ahiloleh khut mat bangma a neilo uh chu state mipi te suasalna a hiti’n a gen a, a kisaipi thuneitu te’n kituptak ah BP-81 issue a sukven lo ua leh Government office te tiang khak ah kiphinna a khauzaw sem ah chiapi ding uh ti’n a gen hi. Chun, AIYF leh AISF in lung-awilo suklatna’n Irawat Bhavan Office mai in Union Minister of State, Home Affairs Kiren Rijiju limsiamkawm halna a nei bawk ui.

Parliament kiti BJP party office hilo: Trinamool Congress

New Delhi, Aug. 2 *(Nisin Thuhiltu)* : Lok Sabha ah Assam, National Register of Citizens (NRC) list thu ah kinial buaina piang in Opposition te’n nasatak ah kiphinna a nei zing ziak un, innpi vaihawmna kituptak ah chiatha theilo in a um zing hi. Assam ah gamdang a pat pemlut, Assam ahiloleh India mi-leh-sa hina diktak neilo te thitchilna ding ah National Register of Citizens (NRC) draft kibawl suadaw ah a umna a chun, applicant 3.29 crore umte lak ah 2.89 crore te min draft list ah chuansak in a um ua, a dang mi 40 lakhs te Assam ahiloleh India mi-leh-sa hina neilo ( illegal migrant) ah kawi a hiu. BJP President Amit Shah's in “kum 1985 ah Assam Accord suai kikai Rajiv Gandhi mapui government dawilawk ziak ah kituptak ah chiapi theilo ” ti ah a gen banah BJP member khenkhat in India gamsung pumpi National Register of Citizens (NRC) draft bawl hiding ti ah a gen ziak ua, Innpi vaihawmna ah Opposition te’n government panlakna chu demna bawl zing kawm ah kiphinna a nei uh a hi. Opposition Gulam Nabi Azad in a genna a chun, National Register of Citizens (NRC) draft thu ah kinialna chu human rights bawsiatna leh mi 40 lakh te pampai ah a um uh diktheilo ti’n a gen a hi. Tuni ah Union Home Minister Rajnath Singh leh BJP chief Amit Shah te’n thugenna a nei hun un, Trinamool Congress nasatak ah dem in, innpi vaihawmna chawkbuai uh ti’n ngawna a siam ui. Zia chu Trinamool Congress leader te’n Derek O'Brien in khautak ah dawnhuna siam in, Parliament chu BJP party office hilo a hina chung ah mizosia’n thugen theina ding ah thuneina nei in a gen hi.

ADC/Churachandpur dinmun tawh kisai taklang

CCpur, Aug. 2 *(Nisin Thuhiltu)* : Autonomous District Council (ADC), Churachandpur tawh kisai ah mipi’n bang dinmun ah um ahi em ti hezui theilo ah a umtakna chung un tuni, August 2, 2018 nitaklam dak 2:30 in Langkhanpau Guite, Ex-Chairman in a chenna inn, Dorcas Veng ah Press/Media te kimupi in thil umdan taklatna a nei hi. Langkhanpau Guite, Ex-Chairman in agenna a chun, ADC 3rd Amendment Act 2008 dungzui ah Executive Committee thuneina leh chiapi thei ding te taklat ah um ti’n a gen a, zia dungzui a chu Chairman, Vice Chairman leh Executive Member (EM) 5 guat thei, amau sia chu Executive Committee ah member ahi banua Chairman leh Vice Chairman chu elected post ahi ti’n a gen hi. Tuchung Council sungthu buai ziak ah Khaipao in Chairman dinmun a nutsia tawh kitawn ah Executive Member (EM) 5 te le Executive Member ahinau bei in a gen hi. Zia dungzui a chu, Executive Committee umsun, Vice Chairman Khaikhanmung a hi tawh kitawn ah ama’n Rule 9 dungzui ah Chairman in-charge mawpuakna tuk himaleh Major Decision lak ding um te mimal nawp thu ah latheilo ding hi’n agen hi. Chairman bei ah ADC ah kivaipuakna umtheilo a hi dungzui ah ADC Rule 3 tawh kituak ah Chairman telna a thak ah nei ding pawimaw in a gen hi. Chairman thak telna a chu ADC member lunglutna nei kua hitaleh Nomination File bawl thei ding uh, Chairman ding telna nei hun ah Presiding Officer ding ah Chairman post contest bawllo ding khat guat ding, Governor/Government khut ah piak ding leh Government in appointment a piak dungzui ah Chairman tel hun ding a nil eh tha guat ah Presiding Officer mapuina nei ah Chairman thak telna nei ding ti’n a gen hi.

Zia ding a chu ama mapui pawl in proposal pelut zo ta leh Government apat appointment ngak ah um ti’n le a taklang a, Council Property tawh kisai a hilchianna a chun, Khaipao in Chairman a hi hun sung ah Council Property a kawl zosia Chairman panmun a nutsia tawh kitawn ah a nung kawi kit ding, zia chu ahiloleh CEO in a va nunglak ding hi’n a gen hi.

ADC Churachandpur member te group kisua himaleu member te umdan et ah Communal thil ah lakthei thil hilo a hina chung ah kuama’n MDC te group 2 kisuana tawh kisai chu Communal thil ah genlo ding leh la lo ding in dawtna a siam hi. ADC Churachandpur buaina leh ADC Chandel buaina kibanglo a hi ziak ah Chandel ah Chairman kisan dan tawh Churachandpur a kibang ah chiatheilo ti’n le a gen hi.

ADC Churachandpur buaina chu Khaipao mimal ah huatna ziak hilo ah Policy thu ah chiapidan dawilo ziak ah kituaklona piang, zia kituaklona chu Council Sitting ahilo ziak; Trade Licence tamtak piakdawna, Education Policy ah Transfer & Posting, Council sum tamtak Court Order zuilo ah lakdawna, member pi te chung ah FIR file kibawlkhumna tit e a pat MDC te kal ah group 2 kisuana piang hi’n a gen hi.

Chuleh, Council sung buaina kuama’n Mimal leh Pau-le-Haam thu a kihuatna dan a lalo ding in athak in dawtna a siam a, meithal chawi leh pawl chuamchuam in le kivau, ki gikna bawllo ding in chialna leh dawtna a siam hi. Government in Presiding Officer ding Appointment abawl hunhun ah member kua hitaleh Chairman dinmun lunggul te’n Nomination File chiat ding in dawtna le a siam a, Council sungthu buaina a ven pai ding a nawpthu le a gen hi.

Chura-Sugnu lampi ah culvert kisiam thak siakit ta

CCpur, Aug. 2 *(Nisin Thuhiltu)* : Chura-Sugnu lampi siam thak ah a umna chung in mun banghem zat ah slab culvert le siamthak in a um a, zia lak a chun Saikot ITI kiangnai ah culvert kisiam thak chu kimang taktak nailo in a sia kittai. Kilometre 26 ah sau Chura-Sugnu Road siamna nasep ahileh April 12, 2017 ah Ginsuanhau Zou, MLA (Singngat A/C) & Chairman, MANIREA in Police Station (Zero-Point) ah hawndawna a nei tawh kitawn ah kipan ahia, PWD, Manipur implementing agency hina nuai ah Contractor M/S HVS Construction Materials Pvt. Ltd., Special Class Contractor Patsoi Lamkhai, N.C. Road Imphal leh local contractor chuamchuam ten a siam uh a hi. Zero-point a pat Sugnu Bridge tiang kilometre 26 ah sau chu total project cost Rs.47.96 crore bei ah siam hiding a hi. Total project cost Rs.47.96 crore lak ah1st instalment ah March 31, 2017 ni Rs. 23.98 crore sanction ah umta a hi. Lampi siamna nasep ahileh tha 24 sung Nov. 2019 tiang ah zaw thian ding ti a hi.

Ayushman Bharat Scheme tawh kisai genkhawmna nei

CCpur, Aug. 2 *(Nisin Thuhiltu)* : Ayushman Bharat Scheme, National Health Protection Mission nuai ah district sung ah CHC leh PHSC chuamchuam ah Health & Wellness Centre ding siamna nasepna chiatha zing dinmun tawh kisai tuni, August 2, 2018 zingkallam dak 11:00 in MS Conference Hall, District Hospital ah Steering Committee in Shyam Lal Poonia, IAS, DC Churachandpur uapna tawh meeting a nei hi. Zia hun a chun, Dr. VC Pau Tonsing, Medical Superintendent, District Hospital in meeting mapui in, Dr. Kim Simte, Chief Medical Officer, Churachandpur in Ayushman Bharat Scheme nuai a Health & Wellness Centre tawh kisai ah district panlakna a taklang a, Zenngaihlun, District Program Manager, NHM Churachandpur in district sung ah Ayushman Bharat Scheme chiapina ding ah district sung ah CHC/PHSC chuamchuam siamhawithakna tawh kisai in report piakna a nei hi.

Zia hun a chun, Shyam Lal in Health & Wellness Centre siamna tawh kisai chu fund ziak a lunglut hilo a, mipi’n scheme a phatchuampi theina ding ua panla chiat ding in SDO leh Medical Officer in-charge tte tilkhona anei a, mipi’n scheme chiadan a hiatthiam theina ding ua Awareness pawimaw in a gen hi. District sung ah PHSC 5 ah Health & Wellness Centre kisiam te chu hawndaw ah a um hunhun ah beneficiary te’n natna chi chuamchuam 12, a thawn ah ki etsak thei ding uh tin le a gen hi.

Hiatthei khat chu, India gamsung ah Health & Wellness Centre chuamchuam ah Ayushman Bharat scheme chiapina ding ah India Prime Minister in August 15, 2018, Indian Independence Day leh scheme hawnna nei ding a hia, Churachandpur district in August 12, 2018 ni leh hawndaw man ding ah target piak piak ah um ti a hi. India gamsung ah State leh UT chuamchuam ah scheme chiapina ding teldaw lak in Manipur ah Imphal West District, Chandel District, Thoubal District leh Churachandpur District teldaw in a um a, Churachandpur District apat Community Health Centre (CHC), Singngat leh Primary Health Sub Centre (PHSC) 5 teldaw a hi. PHSC 5 teldaw ah um te chu -Henglep PHC nuai a Charoikhullen PHSC, Saikot PHC nuai a Mission Compound PHSC leh Leisang PHSC, Sangang PHC nuai a Koirengtak PHSC banah Singngat PHC nuai a Suangdoh PHSC hi’n a kigen hi.

Zia ah Steering Committee in meeting a neizaw nung ua chun, Dr VC Pau Tonsing, Medical Superintendent MS District Hospital mapuina nuai ah Shyam Lal Poonia, IAS DC CCpur, Krishna Kumar IAS AC To DC, CCpur leh medical staff ten Hospital ah ward chuamchuam banah Operation Theater OT Room etthakna a nei ui.

Sendra en ah chia nungak khangthak 1 in thina tuak
CCpur, Aug. 2 *(Nisin Thuhiltu)* : Mizoram apat Churachandpur ah khualzin, nungak naupang kum 19 mi khat, tuni, August 2, 2018 ah Sendra (Moirang) en ah chia chu kuang (boat) ah a ki tawlnau ah khiatha kha’n thina a tuak hi. Zia ah thina tuak chu Lalrempuii (19) of Serchip Bazaar, Mizoram mi, a Unu’ pawsal, Seirotluanga-te’ inn, Selem Veng, CCpur ah hung khualzin a hi. Zia ah Lalrempuii tuaksiatna tawh kisai a chun, Moirang Police in Unnatural Death ti’n case a ziklut a, Postmortem bawl ding ah RIMS Morgue tut in a um hi. Alangkhatlam ah banggual ah ziagual tuaksiatna chu tung thei a hi em ti leh kuang (boat) apat banggual ah khiatha a hi em ti zia thu zik ahi tiang ah hiat a hi pua, Group YMA Manipur in zia thina tawh kisai chu delzui ah Postmortem bawlzaw a hitak leh CCpur ah a luang puak hiding, ziazaw chuleh a chenna khua Aizawl ah puak hiding in a kigen hi.

MDMSL in data lakna nei ding
CCpur, Aug. 2 *(Nisin Thuhiltu)* : Village Authority, Weavers leh Civil Society Organization chuamchuam hiat ding in Shyam Lal Poonia, IAS, DC Churachandpur in hiatsakna thusua a bawlna a chun, Hyderabad pansa, M/S Karvy Data Management Services Limited (MDMSL) in Department of Textiles, Commercy & Industry, Government of Manipur kithuapina tawh district sung ah a 4-veina ding ah National Handloom Census kiti February 2017 apat data lakhawm ah um a hidan taklang kawm in, a thak ah M/S Karvy Data Management Services Limited, Hyderabad in Directorate of Handloom & Textile, Manipur a official-te tawh data lakhawm thak ding a hi dungzui ua Village Authority leh pawl chuamchuam in kithuapina pechiat ding in chialna leh hiatsakna abawl hi.

Pherzawl District ah Independence Day Trophy
Pherzawl, Aug. 2 *(Nisin Thuhiltu)* : 72nd Indian Independence Day 2018 lawpna, August 15 ah um ding a hina chung in, Pherzawl District ah Independence Day Trophy kiti minvua ah District Level Open Football Tournament um ding a hi. Zia tournament chu Pherzawl district sport association PDSA in District Administration, Pherzawl district hiatpina tawh Pherzawl Public Ground ah nei ding a hiu a, August 9, 2018 leh tournament kipan ding a hi. August 15, India Independence Day lawp hun ah final match um ding a hi. Zia ding a chu, a pangnuam Football Team/Club te’n entry fee leh player photo tawh August 7, 2018 tiang ah piaklut thei ding a hi. Chun, champion in Rs. 50, 000, Trophy leh Cerficate sang ding Runners up in Rs. 30, 000, Trophy leh Cerficate, Fair play team in Rs 5, 000, best player in Rs 2, 000, best goalkeeper in Rs 2000 ban ah top scorer in Rs 2, 000 sang ding a hiu.

HSA GHQ in kipakthu puang kawm ah chialna bawl
CCpur, Aug. 2 *(Nisin Thuhiltu)* : Hmar Students’ Association (HSA) General Headquarter thusua in a taklatna a chun, HAS GHQ in July 16, 2018 ni a mipi khualna ziak ah Parbung SDO leh Vangai SDO te’n a Camp Office a nutsia ua, Sub Division Headquarter chiat ah office a kai ding ua phutna a nei uh tawh kitawn ah Manipur Chief Secretary tawh thil umdan genkhawm ah panlakna nei zing uh hi’n a taklang a, zia chungchang a chu panlakpi tut e, Nu-le-Pa ba ah Hmar Inpui General Headquarter, Hmar bial a khua chuamchuam a Village Authority, HSA Vangai Joint Headquarter leh HSA Hmarram Joint Headquarter te chung ah kipakthu puang kawm in thil phut lawtinna ding ah tawsawt zing ding in dawtna a siam hi.