BJP Manipur, spokesperson Okram Joy in party apat haina siam

Imphal, July 30 *(Nisin Thuhiltu)* : Manipur Legislative Assembly ah 5 vei MLA ding ah Langthabal Assembly Constituency apat teltin ah umta leh BJP Manipur Pradesh ah spokesperson Okram Joy Singh in tuni’n BJP party apat in haina a siam hi. Okram Joy Singh in party a pat haina a siam tawh kitawn in, BJP Langthabal Mandal le phiat ah umta ahidan, BJP Langthabal Mandal, General Secretary H. Somorendra in Mandal President H. Brajamani uapna’n thuthak lakhawm mite kiang in a puandawna a nei a, zani ah meeting a nei hun ua thupukna a siam dungzui ua party apat haina siam uh hi’n le ataklang hi. Kakwa ah MLA Okram Joy Singh in thuthak lakhawm mite kiang ah party a pat haina a siamna tawh kisai a genna a chun, Manipur a ding ah BJP in thilpha a puakdaw ding kinepna liantak neikawm ah BJP zawm (join) himaleh BJP chu Manipur ah buaina tamtak piansak leh gal (war) gual dinmun tunsak tu a hizawk ziak ah party apat haina siam hi’n a gen hi. Prime Minister lui Atal Bihari Vajpayee hun ah BJP tawh tuhun ah BJP kibanglo, tuhun ah Narendra Modi leh Amid Shah mapui BJP chu developmental works sang ah sakhua thu ngaikhawkzaw, sakhua ah hun petamzaw hi’n a gen hi. Indian Constitution, Article 370 tawh kituak ah BJP leader Sharma Prasad in Jammu and Kashmir a ding ah special status demand bawl ah kiphinna a nei ziak ah jail ah khum ah a la um himaleh tuni ah BJP in Article 370 (A) panchak ah North Eastern states, Nagas inhabited ah special status umsak a guat chu hiatthiam haksa sa hi’n le a gen hi. Frame Work agreement tawh kisai a genna a chun, British te’n India chu nusia ding himaleu zalenna taktak umlo ding ah a la genlawk uh guitung zing hi’n a gen hi. Manipur University buaina ziak ah academic activity zosia tha 2 sung chiatha theilo ah umta himaleh bang ziak ah government in ni 48 nung ah Manipur University tangko pan a hi em ti’n dawtna a siam a, Manipur University chu central university himaleh Manipur Government nuai ah state sung ah colleges umzosia University tawh affiliate, student tamtak te career susia a hidan mizosian a hiat hi’n a gen hi.
Chief Minister N. Biren Singh mapuina’ 35 member delegates te’n Centre ah thil umdan tutna a nei hun ua, bang ziak ah state sung sosang tak ah um ah investigation bawl ding ah phutna a nei uh a hi em ti ah dawtna siam in, state sung ah student te sang ah VC pawimaw zaw a hi em ti’n dawtna a siam a, mipi te sang ah chief Minister pawimaw zaw a hi em ti’n dawtna a siam hi. Chuleh, mipi te sang ah BJP pawimaw zaw a hi em ti ah le dawtna siam in, ama’n BJP sang ah mipi te pawimaw zaw a kawi ziak ah party nusia a hi’n a gen hi.

Ropiang Foundation Trust in Scholarship piakdawna nei

CCpur, July 30 *(Nisin Thuhiltu)* : Ropiang Foundation Trust (RFT) in tuni, July 30, 2018 nitaklam dak 3:30 in RFT Office, Mission Road, Hiangtam Lamka ah Raja Goukhothang Guite Student Scholarship 2018 hawpdawna anei hi. Zia hun chu Mannuamching, IAS, DC Pherzawl in Chief Guest hina tawh uap in, Ginsianlal Naulak, Advocate in Guest of Honor hina tawh a uap a, Chinglun, Advocate, Trustee, RFT in hun matna amapui ui. Dr. Thangchinkhup Guite, Chairman, Ropiang Foundation Trust apat Ropiang Foundation tup-le-dawi, a sepdaw chuamchuam um te genlatna a um a, Guest-te apat thugenna um in, Jammuanlal Guite, Assistant Secretary, RFT mapuina nuai ah Scholarship Award piakdawna Guest te’n nei in, Dr. Chinggoumaan, Trustee, RFT in huntawp ah kipakthu henna nei in, Mangkhenpau in pauchapna tawh hun khakna a siam hi.
Guest of Honor Ginsianlal in a thugenna a chun, Ropiang Foundation Trust kiti a kiphudawna kum 1 vel hipan maleh district sung ah NGO kum tamtak ums ate sang ah a sepdaw tamzaw hi’n a gen a, a thil tup uh leh a dawi teu chu hawisa leh kipakpi mama in a gen hi. Chief Guest Mannuamching in a thugenna a chun, mimawl lawkna ding mai hawl hizawlo ah Ropiang Foundation Trust in panpi ngaite panpina a piak sek uh chu ettawn tâk a hidan gen a, Ropiang Foundation Trust panlakna kipakpi mama a hidan gen in, maban ah thilpha bawl chimchaklo ah panlakna a neizawm zel ding uh a nawp thu a gen hi.

Ropiang Foundation Trust (RFT) in Scholarship a piakteu ahileh nu leh pa neitalo, inchen haksa te lak ah a haksa diak, taksa bukimlo panpi ngai student te a hiu a, kidawtna lekha pelut mi 21 umte School tuition fee kum kimkhat ding hisap, Rs. 5,000 chiat piak a hiu. Raja Goukhothang Guite Student Scholarship a ding in Ropiang Foundation Trust in Raja Goukhothang Guite Memoriam Tournament a bawl hun ua CDSU tawh a kikim hawp uh Entry Fee apat Ropiang Foundation Trust in a chankhak te chu Scholarship ah a nei uh ti a hi.

Scholarship piak ah um te ahiuleh - Lianthanmang, Kammingou Singson, David Khupsuanmung, Ginlunmang, Semgoulun Taitom, Pau Robinson, L. Goubiaksang Ngaihte, Khuplamthang Thutmun, Mangthankhum, Ngamsanglen Haokip, Khupkhanmuan, T. Thangtanlian, Ngaibiaksiam, Chinglianniang, Paukhansiam, Thangmuansang, Lundingpui, Lorrain lalrindika, Lalchinsang, Khaikhanlam leh Paukholuahchin te a hiu.

Childline 1098, Churachandpur hawnna nei

CCpur, July 30 *(Nisin Thuhiltu)* : Childline 1098, Churachandpur kiti hawndawna tuni, July 30, 2018 zingkallam dak 11:00 in District Training Centre, M. Songgel in a um hi. Zia hun chu Shyam Lal Poonia, IAS, DC Churachandpur in Chief Guest hina tawh uap in, Kabib K, IPS, Senior SP Churachandpur in Guest of Honor hina tawh a uap a, Jangminthang leh Nancy Tingneihoih te’n hun matna amapui ui. Holkhomang Haokip, Secretary, RAS in Childline 1098 Churachandpur tawh kisai genlatna a nei a, K. Esther Vaiphei, President, SHARE in Guest-te thilpiak piakna hun mapui in, Childline 1098 Churachandpur Official ah hawndawna Chief Guest leh Guest of Honor in Candle Lighting tawh thua in a nei ui. Chief Guest Shyam Lal in District sung ah Agency chuamchuam panlakna ziak ah Childline 1098 Churachandpur hawn ah a um chu kipakpi mama in a gen a, District Administration in a pawimaw dungzui ah kithuapi zing ding hi’n a gen hi. Manipur Hill district ah amasapen hiding, zia gual panlakna chu kiletsakpi mama in le a gen a, Childline hawndaw ah um lawtinna ding ah lawiupa chuamchuam in kithuapi chiat ding pawimaw in a gen hi.

Childline 1098 Churachandpur ahileh Toll Free Number a hia, official ah hawndaw ah umta himaleh Churachandpur district a ding ah activate ngailo ahiziak ah mun dang ah um te’n call lading (received) bawl ding, district ah mawpuakna neite khut ah piaksawn hiding ti a hi. Childline 1098 Churachandpur ahileh Childline India Foundation nuai ah um a hi. Childline 1098 Churachandpur enkawl ding a chu, Child Advisory Board (CAB) kiti phudaw hiding, August thasung ngei ah matthei ding ah panlakna um in le a gen hi. Thuchian kimzaw, contact number 7085-537-695 / 7005-291-478 leh 8790-427-477 ah kan thei ding a hi.

District Hospital ah gari parking tawh kisai genkhawm

CCpur, July 30 *(Nisin Thuhiltu)* : District Hospital ah gari parking ding dan tawh kisai in tuni July 30, 2018 zingkallam dak 11 in Medical Superintendent MS Conference Hall, District Hospital ah Hospital Administration, Police Department, District Administration banah Press leh media ten meeting a nei ui. . Meeting hun ah District Hospital apat Dr VC Pau Tonsing, Medical Superintendent, Dr Thangchinkhup Guite, Senior Consultant ., HPolice Department apat Lunkhomang Khongsai, MPS, Additional SP Law & Order, T Lunzangmung, MCS Additional SP Operation, Lianthansang, SI, OC Traffic Police, Jamliankhup, SI, Incharge Police Team, District Hospital leh District Administration apat S Khaikhopau Ngaihte, MCS, AC To DC ban ah Lamka khawpi sung ah Press leh media-te a pang ua, Dr VC Pau Tonsing, MS District Hospital in meeting hun mapui in, a chikhawm te’n District Hospital a gari parking dan tawh kisai ah panlak ding dan genkhawmna a nei ui. Zia hun a chun, District Hospital a damlo admit, damlo ve ding, ki-etsak ding banah damtheihna lam tawh kisai ah bawl ding chuamchuam neiban ah district mipi-te khualna ah gari parking ding dan tawh kisai a sik a sep in genkhawmna a nei ua, pariking tawh kisai ah District Hospital mai IB Road, CCpur Government College apat DC Quarter dung ah gari parking bawl ding ti himaleh, tul-le-tu dinmun a thakhat thu a parking bawl thei ahilo ziak ah district hospital ah etkawlna hawitak tawh parking bawl ding in lemsakna a nei ui. Zia chu tawh kitawn in August 1, 2018 apat in District Hospital sung ah gari parking dan san hiding, hospital huangsung ah parking fee lak hitalo ding, Traffic Police ten parking tawh kisai enzui ding a hiu. Tuni ah meeting hun ah a chiakhawm ten district mipi khualna’ District Hospital leh parking chiadan a kitupzawkna ding ah thupukna a siam uh a hia, zia chu August 1, 2018 apat chiapi pat hiding, Traffic Police-te tina mun ah gari parking chiat ding ti a hi.

NIA in raid bawl

Imphal, July 30 *(Nisin Thuhiltu)* : National Investigation Agency (NIA) in tuni, 30 July 2018 zan ah Mantripukhri ah Congress MLA Jamthong Haokip chen inn raid bawl a hidan uh taklat in a um hi. Zia raid chu Second Manipur Rifles Battalion apat pistols a guk ah kizuakdawk te hawlna kibawl in a kigen hi.

DHPLah Zahawng FC final kai

Delhi, July 30 *(Nisin Thuhiltu)* : Delhi Hmar Premier League-DHPL (Fimlunghnem Memorial Tournament) 2018 ah July 29-7-2018, (Saturday) Semi-final match ah Zahawng FC leh Muvanlai FC a kihel ua, zia hun a chun fulltime tiang ah 1-1 ah kidraw in, penalty pek sak a hiu. Penalty ah Zahawng FC in 9-8 in gualzawna a chang a, final a kai hi. Delhi Hmar Premier League-DHPL final match ahileh Vasant Kunj ground Delhi ah 4th August 2018 leh um ding zia hun a chu Zahawng FC leh KRSUD (KOMREM) FC kal ah champion kichuna um ding a hi. Zahawng FC coach ahileh Dr. Haokam & Assistant CoachTv. Minlun Vaiphei te a hiu.

NERCORMP in Excellent Achievements & Best Display Award sâng

CCpur, July 30 *(Nisin Thuhiltu)* : Pragati Maidan, Mathura Road, Railway Colony, New Delhi, Delhi ah 27th- 29th July 2018 sung ah um Govt Achievements & Schemes Expo 2018 ah North Eastern Region Community Resource Management Project(NERCORMP) in Rural Innovation & Promotion Category in “Excellent Achievements & Best Display Award ” a sang hi. NERCORMP ahileh Govt Achievements & Schemes Expo 2017 ah second position a la lua, ISRO tawh a pan lakkhawmna te ziak ah Technology section ah 1st prize a la dawng le hita a hi.

Pre-Recruitment Rally tawh kisai ah Awareness leh Registration bawl
CCpur, July 30 *(Nisin Thuhiltu)* : Churachandpur ah October tha leh Army Recruitment Rally a umna ding tawh kisai in Sixth Sikh Light Infantry (Khuga Battalion) saina nuai ah Pre-Recruitment Rally a ding ah min pelut zosia te Khuga Battalion in July 29, 2018 nitaklam dak 1:00 in YPA Hall, New Lamka ah Mobile Interactive Terminal for Rural Area (MITRA) in Awareness leh Registration a neipi hi. Major Kumar Singh Rana in Indian Army lakna ding tawh kisai in Awareness Campaign bawlna a nei a, sepai lunglut khangthak mi 147 in lekha pawimaw chuamchuam piaklutna a nei ui.

Churachandpur ah Army Recruitment Rally ahileh 15- 23 October, 2018 sung ah Peace Ground Tuibong, Churachandpur ah um ding, Soldier GD, Trademan, Technical, Nursing Asst., Clerk, Store Keeper ti te lak hiding a hi. General Duty a ding ah kum 17 leh tha 5 apat kum 21 kikal mi hingai ding, Trademan, Technical, Nursing Asst., Clerk, Store Keeper ahileh kum 23 tiang hithei ding a hi. Soldier GD a ding ah din sang dan (height) 160 cm hingai ding, Soldier Clerk/Store Keeper - 160 cm., Soldier Technical - 157 cm., Soldier Trademan - 160 cm leh Nursing Asst. a ding ah 157 cm hingai ding a hi. Chun thiamna lam ah a niampen ah Class 8 leh class XII tiang zo te a hiu ngai ding a hi.

Tangmai Festival 2018 ding tawh kisai genkhawm

CCpur, July 30 *(Nisin Thuhiltu)* : YPA GHQ Hall, Hiangtam Lamka ah August 4, 2018 leh Tangmai Festival 2018 mat hiding a hi. Zia ding tawh kisai a chun, tuni July 30, 2018 nitaklam dak 3:00 in YPA GHQ Office, Hiangtam Lamka ah The Frist Tangmai Festival 2018 organizing committee mapuina nuai in meeting a um hi. Meeting chu Paite sung ah pawl chuamchuam Paite Tribe Concil PTC, Young Paite Association YPA, Siamsinpawlpi SSPP, Paite Numei Pawl PNP banah Paite Zai-Awi Pawl PZP-lawiupa te’n a uap ua, Tangmai Festival 2018 lawting tak ah mat ahitheina ding tawh kisai genkhawmna a nei ui. Tangmai Festival 2018 ahileh August 4, 2018 zingkallam dak 11:00 leh K Suanthang, President, PTC GHQ in a hawndawna nei ding, V Vungzapau, Chairman, The First Tangmai Festival 2018 in tangmai festival mat ah a umna tawh kisai genlatna nei ding, YPA Pearsonmun Unit apat Pupa chawndan suklatna um ding, Bukpi mi Kizomkhawm te apat special item um ding, Pumshong Hangshing, Director Paite Cultural Society PCS apat thugenna um ding, Paite Numei Pawl PNP GHQ lawiupa te mapuina changmai nekkhawmna um ding a hi. Nitak hun ah T Lawmpi leh Manngaihkim hun matna mapui ding, Upa Dr DK MAng, vice president, PTC GHQ in hun patna nei ding, Paite Zai-Awi Pawl leh YPA Vengnuam South Unit te apat special items suklatna um ding a hi.

Khuga Battalion in thisan hawm
CCpur, July 30 *(Nisin Thuhiltu)* : Damlo thisan pawimaw khat tuni, July 30, 2018 zingkallam dak 11:00 in Blood Bank, District Hospital ah Khuga Battalion in thisan Unit 4 a hawm hi. Zia ah damlo thisan hawp ah um chu, a kipuk ziak ah hospital ah ki enkawl, Ginkhongai (68) w/o Chinthong of Vengnuam, New Lamka a hi. Thisan hawm Khuga Battalion a pat jawan te ahiuleh Havildar Dharam Singh, Niak Sukhwinder Singh, Sepoy Navdeep Singh leh Sepoy Jagjit Singh te a hiu a, damlo insung mite’n kipak etsakna’n thisan hawmtu te mapuitu Major Kumar Singh Rana puan a silsak ui.

Assam NRC thu ah Manipur in illegal migrants te enzui ding: CM Biren
Imphal, Jul. 30 *(Nisin Thuhiltu)* : Assam ah National Register of Citizens (NRC) final draft list suadaw ah a um tawh kitawn in Manipur state sung ah diklo tak ah hung kipemlut a um khak ding lauthawn um ah hiat a hi tawh kitawn in, Manipur Chief Minister Biren Singh in diklo tak ah state sung ah hung kipemlut a umlona ding ah security khautak ah kikawi leh Jiribam District Police in gamgi tuam ah kituptak ah panlakna nei a hidan a gen hi. National Register of Citizens (NRC) final draft list ahileh tuni ah suadaw ah um a hia, ziana a chun, total 3.29 crore applicants umte lak ah 2.9 crore te application pawm piak in a um a, 40.07 lakh applicants te pawmpiaklo in a um hi. Zia ah Assam mi hilo ah kawi ah um te chu Manipur state sung ah a hung lut ua, a cheng den khak ding uh venna Jiribam ah 4th IRB leh 7th MR company 1 gel kawibe in a um ua, waterways, Kutcha Bamboo Bridge leh land routes zosia ah duty bawl ding uh ti a hi.Chuleh, bordering area ah Central Paramilitary Force (CRPF) te banah Railways in le security lam ah kithuapina peding hi’n Chief Minister in a gen hi.

Assam Rifles in Kani 32.700 kg mandawk

Imphal, July 29 *(Nisin Thuhiltu)* : HQ IGAR (South) nuai ah 10 Sector Assam Rifles, Somsai Battalion in Check Post, Lambui, Ukhrul district ah Mahindra Bolero GLX silver colour bearing registration number MN 02B 4368 ah kipua Kani 32.700 kg amandawk ui. Zia ah Kani pawtu chu Thangkhohao Haokip s/o Douthang Haokip of TA – S Gamnomjang, Churachandpur district a hi. Assam Rifles thusuak in a taklatna a chun,zia ah khamthei kiman chu gari sung ah kituptak ah kiselgu himaleh kituptak ah gari check (expert search )bawl nung ah matdaw ah um in a gen a, mat ah um khamthei leh a pawtu chu Shangshak Police station ah piaklut ah um hin a taklang hi.

Lok Sabha ah Criminal Law Bill pass

New Delhi, July 30 *(Nisin Thuhiltu)* : Numei kum 12 nuailam pawngsual te gawtna khau thei pen piak theina ding ah siam thak aum, Criminal Law (Amendment) Bill 2018 chu Lok Sabha ah tuni’n passed in aum hi. Bill puaklut ahi nung ah genkhawmna a um hun ah Minister of State (MoS) for Home Affairs Kiren Rijiju in, rape case trial neina court chu numei judge khat in thu atan ding banah statement zosia chu numei police officer khat in record a bawl ding ti provision thak kawi aum hi’n a gen hi.
All India Majlis-e-Ittehadul Muslimeen (AIMIM) President Asaduddin Owaisi in, naupang pawngsualna kibelap zing chung chang genlatna nei in, dân in naupang pawngsualna kham zolo ding ahina ah pawsal te lungput theng zawk pawimaw hi’n a gen hi.
Bill hi pass ahi zaw phat leh, Protection of Children from Sexual Offences (POCSO) Act suk khau diak theina ding ah April 22 ni’ President Ram Nath Kovind in lemtina suai ala kai, Criminal Law Ordinance thasang ah mat hiding ahi. Naupang kum tinglo pawngsualna a kibelap zing ziak ah Union Cabinet in April 21 a khan POCSO Act ah gawtna te suk khau diak theina ding ah ordinance chu a la puakdaw ahia, zia dungzui a chun kum numei 12 nuailam pawngsual te thitiang gawtna piak ding banah numei kum 16 nuailam pawngsual te gawtna khau thei pen piak hiding ti ahi. Numei piting pawngsual ziak ah gawtna chu a tawm pen ah kum 7 suangkul tang ding ti chu kum 10 hisak aum in zia chu damsung tiang hisak thei ding ahi. Chun, kum 16 nuailam pawngsual te suangkul tâng ding hun a tawm pen ah kum 10 ah ala um chu kum 20 hisak ahi banah zia chule damsung tiang ah tâng thei ding ua thutan khum thei hiding ahiu. Zia lo chun, pawngsualna case him him chu tha 6 sung ah zawthiang hiding ti’n le dân thak a chun huntiam piak in aum hi.

Assam: NRC final draft suadaw ah um; mi 40 lakh min chuang lo

Guwahati, July 30 *(Nisin Thuhiltu)* : National Register of Citizens (NRC) draft list tawpna pen tuni’n suaw daw in aum a, Assam ah khawsa mi 40 lakh lam te min a chuang puai. Bangladesh apat illegal immigrant te hiatdaw ahi theina ding ah siam aum NRC ahileh 1951 nung ah citizen te list suadaw ahi kit masakna pen ahi. Final draft list suadawna a nei hun ah State NRC coordinator Prateek Hajela in, application pelut 3.29 crore lak ah 2.89 crore te min chuansak thei hi ah mudaw aum hi’n a gen a, a min chuang khalo te chu sawldaw ahilo leh mat hilo ding leh claims & objections a file theina ding ua hun piak hiding uh ti’n a gen hi.
NRC final list bangtik suadaw hiding ahi em ti thudawtna a dawnhuna a chun, press conference ah pang, Ministry of Home Affairs ah Joint Secretary (NE), Satyendra Garg in, claims & Objections file mi bangzat hiding ahi hiatchian ahi nailo ziak ah final list suadaw ding hun gen lawk thei hinailo ti’n a gen hi. NRC final draft suadawna a chun Registrar General Sailesh le a pang hi.

A langkhat lam NRC final draft suadawna chu Congress President Rahul Gandhi in vaigei a sak thu a puang a, Centre leh state ah BJP government in zia chung chang ah pan a lakdan sit um hi’n a gen hi. 1985 Assam Accord ah kitepna neite suk pitinna ding ah Manmohan Singh PM hilai ah United Progressive Alliance (UPA) in National Register of Citizens (NRC) chu ala patdaw hi’n a gen a, Rs. 1,200 crore lam maleh Centre leh State ah BJP government panlak dan chanchum sak thu puang in mun chuam chuam ah min chuang khalo hi ah phun nawi leh lauthawng tam mama ahina ah zia buaina chu sukvenna ding ah government in kintak ah pan alak ngai hi’n le a gen hi. Assam Chief Minister lui, Tarun Gogoi in NRC final draft chu Congress government in ala patdaw hi ah taklang in, a min uh chuang khalo mi 40 lakhs te lungthuai ziang lo ding leh a ki gen lut theina ding ua hun lemchang mu ding uh ti’n a gen a, voter list ah a min a chuang nak uh ahileh India mi leh sa hi ah pawm hi uh ti’n mipite a thamuan hi.