Central Senior Officials team in Kwatha Khunou ah Border Pillar entha

Imphal, July 25 *(Nisin Thuhiltu)* : Ministry of Home Affairs (MHA), Ministry of External Affairs (MEA) leh Surveyor General of India apat Senior Officials team member pathum in tuni’n Tengnoupal District, Kwatha Khunou ah Border Pillar No. 81 dinmun etthakna a nei ui. Senior Officials team member te chu Surveyor General of India, Lt. General Girish Kumar; Joint Secretary (BM)/MEA, Sripriya Ranganathan leh Joint Secretary (NE)/MHA, A.V. Dharma Reddy te a hiu a, Kwatha Khunou a phak hun un, local mite kiholimpi in, Manipur ah Civil Society Organizations chuamchuam ah palai te leh political party chuamchuam ah palai te thil umdan a genpiu hi. Border Pillar no. 81 etthakna nei official team in, Border Pillar dinmun chu serious tak ah etzui hiding in a gen ui. Hiatthei khat chu, India-Myanmar boundary ah Border Pillar no. 80 – 82, a biktak ah Border Pillar no. 81 kikawi chawn ah gen ah a um nung ah mipi’n thil umdan etthakna nei ding ah government nawna a bawl zing nung ah Chief Minister, N. Biren Singh in Centre government kiang ah thil umdan a tut tawh kitawn ah Centre government in Senior Officials team te Border Pillar dinmun etthakna nei ding ah a sawl a hi.

Total Shutdown in hindan ngaina chawkbuai

CCpur, July 25 *(Nisin Thuhiltu)* : Kuki Students Organization (KSO), Churachandpur in lung-awilona chuamchuam anei ziak ah tuni, July 25, 2018 ah Churachandpur District sung Total Shutdown a puan ziak un, mun chuamchuam ah security tawh kinawk tuana a um a, ziana a chun mi 4 in liamna a tuak ui. A kihiatdan in, Total Shutdown support bawl te’n Tedim Road mun chuamchuam ah khaktan in, dan leh thupiak (law & order) dengdel thei ding dinmun ah um hi ah hiat a hi tawh kitawn ah State Capital Imphal apat Security Force ko be ah um, Security Force team kolutbe ah um te chu Kailun, IPS, DIG Zone - II leh Achin Haokip, IPS, DIG – Zone-III (Law & Order) te’n mapui ah bandh supporter te nawzakna ding ah panlakna um in a kigen hi. Total Shutdown supporter te’n Sielmat Lei ah Gari sia te lamlian khaktanna mang ah, tyre a hal uh tawh kitawn ah District Magistrate in thiltung in siatlam anawt ding lauhthawng ziak in Kangvai leh Mata kikal, Tedim Road dung ah 144 Cr.P.C puang in, kuama hiamhei chawi ah vak vel phal hilo, mi 5 sang a tamzaw umkhawm le phal hilo a hi. Imphal apat security force hungbe te chu K. Salbung ah a lampi ding uh khaktan piak ah a um hun ua, shutdown supporter te tawh kinawktuana piang ah mi 4 in liamna tuak uh ti a hi. Zia ah kinawktuana a chun, Security force te’n mipi te delzakna ding in, Tear Gas tamtak a kapdawk ua, ziana a chu Tongkhohao 2 vei a awm kap khak ah um, midang 2 in le liamna tuak uh ti a hi. Liamna tuakte pawdawk ding ah kisa, Kamthang Haokip, President, KKL GHQ le Tear Gas 4 kapkhum ah a um tawh kitawn ah a mun ah khua helo ah um, zia phat a chu kintak ah Hospital zawtpi in a um hi.

Sielmat Lei ah le shutdown supporter te police in Magistrate Order pansa’n kikhen zak ding in sawl maleu a kikhenzak a umlo ziak un, Thangboi Gangte, MCS, SDO Churachandpur in minute 30 sung ah kihenzak ding ah thupuan bawl in, hunpiak sung a mipi te a kikhindawlo ua leh District Magistrate Order dungzui ah police thagum hatna matkhum hiding un a tangko a, hun piak sung ah Minlal Gangte, Secretary, Information & Publicity, KSO Churachandpur in, mipi te kikhen zak ding ah hiatsakna a bawl tawh kitawn in mipi te a umna mun chiat uh a nusia ui. Shutdown supporter te a kikhindaw uh tawh kitawn in police leh IRB personnel te’n lamlian khaktanna ding ah kimang gari siate suthiang in, lamlian ah suang kitiang te le a kawidawk ui.

144 Cr.Pc. puan ah a umna tawh kisai Shyam Lal Poonia, IAS, District Magistrate in a genna a chun, Dan leh Thupiak dengdel thei dinmun ah um a hidan Senior SP, Churachandpur apat report a um dungzui ah puan ah um a hidan taklang in, district sung bouruak hawizaw ta ah hiat a hi hunhun ah lakdaw kit hiding ti’n le a gen hi.

DC/CCpur mapuina’ADCC buaina thu ah meeting hun ding chawn

CCpur, July 25 *(Nisin Thuhiltu)* : Autonomous District Council (ADC), Churachandpur ah Chairman san ding ah MDC te lak ah phutna a um zingna tawh kisai in tuni, July 25, 2018 zingkallam dak 11:30 ah District Council Meeting Hall ah District Council a member zosia’n Deputy Commissioner mapuina genkhawm ding uh leh floor Test nei ding ti himaleh KSO, Churachandpur in total shutdown a puan ziak in, dan leh thupiak (law & order) dinmun hawilo ti’n Shyam Lal Poonia, IAS, DC Churachandpur in 28 July 2018 zingkallam dak 11:30 zawk ah umta ding in meeting hun ding postpone a bawl hi.

Meeting hun ding chawn ah a umtak tawh kitawn in Langkhanpau Guite, Ex. Chairman in District sung ah Local Self Governance kinei, Autonomous District Council ah Chairman, Khaipao Haokip chung ah ADC member te’n muan ngamna a neizaw taklo ziak ua Chairman san ding ah High Court ah thil umdan a tut a hidan a gen a, zia nung a chu Chairman thak telna ding ah Notice sua ah um himaleh tuni tiang ah bangma kisanna um diallo in a gen hi. Khaipao Haokip in Chairman panmun a tuk sung ah Trade License tamtak kawl-le-vaite lak ah piak ah a um thu, Education Policy leh a dangdang tawh kisai Policy Matter ahi ziak ah Meeting ko ding ah dawtna bawl maleu a dawtnau pawmpiak hilo, Khaipao Haokip in Chairman panmun lua theilo ding tina hizawlo ah member tamzaw te’n a dawi ua leh Chairman panmun a tuk zing ding khawksalo, ama chu Chirman post kichupi hizawlo in a gen hi. KSO/Churachandpur in total shutdown a bawl ziak ah MDC te’n member a neitheilo uh khawksa mama a hidan le gen in, July 28, 2018 ni ah meeting neizawk tak ding ah a hun bithiat thak ah um chu lawting tak ah a chiathak ding a nawp thu a gen hi. Grace Zamnu, MDC in in le iza hun a chu, Floor Test nei ding ti ah amau pawl, Member 14 te’n hun sawttak a ngak uh hita himaleh tuni tiang buaina sukvenlo ah a um chu a ziak hiatchian nuam a hidan gen in, ADC Churachandpur le BJP nuai ah um himaleh a buainau State BJP in bangziak ah tuni tiang ah suveng lo ahi em ti’n le dawtna a siam hi. Chuleh, district dangte buaina sukven pai hisek maleh ADC/Churachandpur sungthu buaina sukvenlo ah a um chu, Hill district ahi ziak a hi em ti’n dawtna a siam hi.

Agenzawm zelna a chun, lung-awilo nei kua hitaleh Democratic vai ah kiphinna neithei himaleh kiphinna ah numei-naupang kuama khutmat ah neilo ding a hi ti’n a gen a, ADC vai tawh kisai ah le a hatzaw ki-etna hun hawitak siampiak ding ah dawtna siam in, District Administrator leh Security te’n le dawisak chuam neilo ah July 28, 2018 ni ah hawitak ah ADCC buaina sukven theina ding ah panlakna nei chiat ding in chialna a bawl hi.

Evangelistic Week 2018 hawng
CCpur, July 25 *(Nisin Thuhiltu)* : Moral & Religious Department mapuina nuai ah Ebenezer Academy ah kai naupang te’n “Fight the Good Fight” ti thupi nei ah Evangelistic Week 2018 a nei ding uh tuni, July 25, 2018 sunma dak 9:00 in a school mun ua hawndaw in a um hi. Zia hun a chun, Upa Ricky Vanlallawm Guite, Chairman, School Managing Committee in Evangelistic Week hawndawna a nei hi. Evangelistic Week ahileh July 27, 2018 tiang ah um ding, zia hun sung a chu Pathian’ thu leh laa ah naupang te’n kidemna chi chuamchuam nei ding a hiu. Upa Lianding Guite, Evangelist in Pathian thugenna nei ding, July 27, 2018 nitaklam dak 2:30 ah Pastor V. Zelkhokai, Local Pastor, EBCC Hebron in a khakna nei ding a hi.

WeDance Academy Grand Showcase (WeDAS) event
CCpur, July 25 *(Nisin Thuhiltu)* : Lamka Film Academy saina a WeDance Academy Grand Showcase (WeDAS) kiti a neina ding tawh kisai in tuni, July 25, 2018 nitaklam dak 2:00 in Lamka Film Academy ah Press Briefing bawlna a um hi. Zia hun a chun, George AK Neihsial CEO, Director- Lamka Film Academy in July 27, 2018 ni ah Lamka Film Academy in YPA GHQ Hall, Hiangtam Lamka ah WeDance Academy Grand Showcase (WeDAS) event matna ding tawh kisai taklatna neikawm in, zia hun subuai thei ding a chu bandh leh thil chuamchuam bawllo ding in dawtna a siam hi. Zia event a chu, Mizo Dance Camp, Mizoram apat banah khawtual laa thiam chuamchuam - Jenny Thomte, Steven Emthang leh Christina Shakum leh a dangdang in item chuamchuam show bawlna leh perform bawl ding uh hi’n a gen hi. Zia hun chu atam theipen in ticket lachiat ding leh uap ding in le mipi te chialna a bawl hi. Alan Rinoma, Creative Director, We Dance Academy in WeDAS Event bawl a guat uh chu Churachandpur District a ding ah amasapen hinalai ding a hidan gen in, hun matna television (TV) Show dan ah chiapi hiding, khuallian leh mi dangdang te a pat thugenna umlo ding, Performing Arts, Laamna, Laasakna leh Commercial Advertisement tite thupi bawl hiding in a gen hi. Event hun sung a chu Lamka Film Academy in WeDance Academy apat Level-1 Dance Course zo dawk thak student-te Certificate piakdawna nei ding, July 21, 2018 ni ah Scholarship Audition um ding, Scholarship apat We Dance Academy ah lam chi chuamchuam zil thei ding ti a hi.

Assistant Commandant zikdawk

CCpur, July 25 *(Nisin Thuhiltu)* : Deeperjoy s/o Retd. Pastor Genkhohen Vaiphei, tu leh tu Sub Inspector CISF a sem zing lai in LD/CE exam in Assistant Commandant a zikdawk thak hi. Ama ahileh tu leh tu Delhi Airport ah posting a hi.

Dist. Hospital ah Operation Theatre Boyle's Apparatus sia
CCpur, July 25 *(Nisin Thuhiltu)* : Dr.Vumchinpau Tonsing, Medical Superintendent, District Hospital, Ccpur in mipi te hiat ding ah thusua a bawlna a chun, Churachandpur District Damlo-inn (Hospital) ah Operation Theatre Boyle's Apparatus function theilo ah a um ziak ah operation (emergency & routine) chiapi theilo ah um in a taklang hi. Zia chu tawh kitawn ah thil umdan thuneitu te kiang tut ah um, Operation Theatre Boyle's Apparatus siamhawi kit ahimasia, tuni 25th July 2018 apat ngaina gual ah operation (emergency & routine) chiapi theilo hiphawt ding hi’n le a taklang hi.

VDF personnel te remuneration Rs.7,730 hita ding
CCpur, July 25 *(Nisin Thuhiltu)* : Pautinlam Gangte, Under Secretary (Home), Government of Manipur in Governor min ah thusua a bawlna a chun, 16th July 2018 a pat VDF personnel te remuneration Rs.7,730 hita ding leh zia chu ration money per head per month Rs.1000/- tawh kigawm hiding in a taklang hi. Zia order chu Finance Department (PIC) vide U.O. No.4-/2018-2019/FD (7-P/2) dated 13.7.2018 tawh kituak ah sua ah um hi’n le a taklang hi.

MPC in Computer Set latna nei
CCpur, July 25 *(Nisin Thuhiltu)* : Mizo People Convention (MPC) Sub Headquarter, Manipur in tuni, July 25, 2018 in amau office ah apawimaw dungzui ah mat ding ah a chawk thak uh Computer Set Pathian kiang in a latna a nei ui. Zia hun a chun, VL Sanga, Executive President, MPC Sub Headquarter in hun patna nei in, Pastor Samuel in chawkdaw thak ah um Computer Set Pathian kiang in a latna a nei a, huntawp ah Upa Dr. LS Gangte, Advisor, MPC Sub Headquarter in kipakthu genna nei in, Upa Paukap in pauchapna tawh hun khakna anei hi. Computer set lat ah um ahileh July 14, 2018 ni ah MPC Sub Headquarter puaktung ah um, MPC Sub Headquarter in tukum year plan ah anei tawh kitawn ah Rs 40, 800 vel man ah a chawk uh hi’n a kigen hi.

ZSF in demna bawl
CCpur, July 25 *(Nisin Thuhiltu)* : Zomi Students' Federation(ZSF), GHQ, Information & Publicity Wing in tuni, 25th July 2018 ah thusua a bawlna a chun, Kuki Students Organisation (KSO), Churachandpur in total shutdown a bawl ziak ah dan leh thupiak (law & order) dinmun hawilo ti suanlam ah Churachandpur District Administration in Autonomous District Council, Churachandpur buaina tawh kisai genkhawmna ding ah huntiam a bawlsa zuilo ah a chawn kit chu nasatak in demna a bawl hi. KSO, Churachandpur in total shutdown a bawl ziak ah ADC buaina thu ah meeting buaina ding bangma umlo a hidan taklang in, a pawimaw leh meeting kituptak ah a chiathak theina ding ah District Administration in full poof security arrangement bawl thei in a gen a, District Administration in ahiding gual tak ah nasep thilbawl a chiapi theilo chu demna sangpen ah dem a hidan a taklang hi. Tu ah July 28th, 2018 ah ADC buaina thu ah meeting nei ding ah a hun tepchawn a hi dungzui ah District Administration in zia hun a chu alotheilo ah meeting a neipi ding, banghemti ah meeting neipilo ah a um kit ahileh Zomi Students' Federation(ZSF) in kiphinna nasatak ah bawl ding in vauna a bawl hi.

Singhat Battalion AR leh SAFA saina Independence Day Tournament kipan

CCpur, July 25 *(Nisin Thuhiltu)* : Singngat Area Football Association (SAFA) in kumsin leh Independence Day matna ding tawh kisai ah Singgngat Play Ground ah Independence Day Tournament a nei sek tawh kiawn in tukum 2018 a ding in 27 Sector Assam Rifles, Churachandpur nuai ah Singhat Battalion Assam Rifles tawh kithua in Tournament a sai ua, zia chu July 23, 2018 in a kipan hi. Zia tournament a chu football club/team 27 a pang ua, amau chu Group 8 ah khen in a um ui. Independence Day Tournament hawndawna hun chu Col Lokendra Singh, Commandant Singhat Battalion Assam Rifles in chief guest hina tawh a uap in, tournament hawndawna a nei hi. Singhat Battalion Assam Rifles in tournament organized bawl ah a umna ziak ataklatna a chun, region ah chamna leh muanna a hawizawk semna ding, khangthak te sports lam ah amasawn theina ding uh tupna hi’n a taklang a, sport lam ah talent khangthak te’n career ah sports a neitheina ding uh hi’n le a taklang hi. SAFA leh khua mipi te’n Assam Rifles in tournament organised bawlna ding ah kithuapina a piakna chung un kipakthu a taklang ui.

Confluence hun matna ah Nursing Officer & mipi chiakhawmte’ sharing apat tepte leh het dinga pha lakkhawm points poimawte zia gual hih ahi:-

*(Nisin Thuhiltu)*

1. OPD 1:00PM chan a kihong sek a, Lab. 12:30PM chan a kihong sek hi. Zia nung ah investigation /test poimawte chuh private ah kisawl sek ahiu.
2. Doctor-te’ details confidential himaleh Nurse-te kiang ah vadong teitei sek mikhenkhat a um sek ui. Amau tawh kisai a het dingdawl cheng duty roster ah kitaklang sek ahi.
3. Doctor in mun dang ah damlo a refer phat leh kanchet um masa lo in “a ngaisak peilo man” tia ngaw paipai mi khenkhat a um sek ui.
4. Doctorte a duty hun ua Hospital tung man um sek maleu, a hun uh huam zoulou le a um sek ui.
5. Damlote’ dinmun nurse te kiang a vadong zingziang khenkhat a umzing ui. Nasep ding a hau bek phat ua leh Nurse ten le a dawng seng sek puau.
6. Nurse, mani sepna Dist. Hospital a um lo a athasang a midang sepsak ziang a um ui, ziate hi khawk a kisa mama hi.
7. Nurse-te’n vel tamtak gatekeeper tawh a thua sek ua, a buai thei mama sek ui.
8. Doctor-te’ round/duty sung bep hilou in 24hours in Security a um a poimaw mama hi.
9. Mipi, damdawi-inn dan-le-dun he thiamlo a tam mama nalai hi. Damlo ve hun bithiak zui lo leh damlo dangte ading ah nawngkaina vatut zel sek visitor a um zing hi.
10. Damdawi-inn thianthona hih kuamasap in ngaih poimaw ding ahi. Chilsiat, dumzial chep, leh thawm ngai talua' umlo ding ahi. Pindan sunga mobile phone hamat tuakluat ding kisum a poimaw hi.
11. Nurse-te chu gilo leh thada dinga koih ziang mi khenkhat a um sek ui. Nurse tamzawte ziagual chuh hilo ahiu.
12. Nurse khenkhat ten mi’ dotna (query) a ngaisak sek puau a , patient (leh attendant) mawl taktak enkawl ahilam uh a hedawk khalo paipai sek ui.
13. Khawtang puitu, leh a mimatteu khenkhat kithuneisak taka “kei ei hekha lo maw?” vati sek le a kal-lak cheng in a um sek hi.
14. Damlou enkawltu (attendant) tampipi a um sausau sek ua, a kitheng zingzing sek bawk ua, nurse & doctorte ading in a buaium zaw sek hi.
15. Damlou enkawltu kichian umlo in, a chanauteu chuamchuam a hung kithakthaw sek ua, ‘gensa’ ti le um theilo in, gen thakthak a ngai sek ui.
16. A damlo etkawl pen ngaisak lo a, khamthei leh thildang buaipi zaw damlo enkawltu le a um zeuzeu sek hi.
17. Nurse kidai zolo, damlo 30 enkawl ding ah regular nurse 1 vel bep (per shift a) um hamham ahiziak in, Leave la a um phat ua leh a kibuaizak vangvang sek hi.
18. Van matchak supply a kiting zopua, chip tak ah i mat nung inle a kidai zo mama puai.
District Hospital, Lamka (CCpur) leh District pumpi sung a damtheina lam (health care) nasataka siamphat ahitheina ding in kuamasap in pan la chiat hitiu. District hawi leh nuam bawldawk di’n LALPA’N ei panpi ta hen! *(Nisin Thuhiltu)*

Meeyamgi Numit leh Hill Leaders Days ah CM in complaint 439 ngaithakna nei

Imphal, July 25 *(Nisin Thuhiltu)* : Durbar Hall, Chief Minister Secretariat, Imphal ah tuni, July 25, 2018 zingkallam dak 8:45 apat nitaklam dak 2:30 kikal in Meeyamgi Numit leh Hill Leaders Days mat in a um hi. Zia hun sung a chun, Chief Minister N Biren Singh in ama kimupi nuam leh ama kiang ah haksatna tut nuam te kimupi in, ama mimal tak ah Complaint 439 ngaithakna nei in, mi 1500 val akimupi hi. Meeyamgi Numit leh Hill Leaders Days ah haksatna chuamchuam nei te Chief Minister in a kimupi hun a chun, Chief Minister Secretariat a sem staff te banah Government department chuamchuam ah social welfare, health services, JNIMS, Education (S), Bank, Police, DIPR banah Government Staff chuamchuam in mipi-te a kithuapiu a, medical emergency um ding venna in medical team khat le ambulance tawh duty bawlsak in a um hi. Zia hun sung a chun, Chief Minister in differently-abled numei- Kompeimi Raikhan (30) d/o Chihaningam Raikhan of Mapao Khullen (Chirik) village of Senapati District chu wheel-chair present a bawl a, pension Rs. 1500 per month piak hiding in a puang hi. Chief Minister-gi Sotharabasing-gi Tengbang (CMST) nuai ah panpina piak hiding ti’n a gen hi.

Bishnupur District a ding website hawng

Bishnupur, July 25 *(Nisin Thuhiltu)* : Chief Secretary Dr. J. Suresh Babu in tuni’n Bishnupur District a ding website (http://bishnupur.nic.in) kiti Chief Secretary’s office in a hawng hi. Zia website chu DIO/ NIC, Bishnupur in S3WAAS platform ah designed a bawl bilingual (English & Manipuri) website a hi. Zia website a chu Government scheme leh panlakna chuamchuam um te taklat hiding, district administration in apanlakna um te suklatna nei zing ding ti a hi. Website hawnna hun chu, Additional Chief Secretary Letkhogin Haokip, DGP LM Khaute, Bishnupur Deputy Commissioner Pawan Yadav, Assistant Commissioners, Sub-Divisional Officers leh DIO/NIC staff te’n a uap ui.

Khamthei tawh police commando personnel 4 kiman

Imphal, July 25 *(Nisin Thuhiltu)*: Jiribam Police station attached ah um Manipur state police commando personnel 4 te chu Jirighat area ah Assam police te’n khamthei (narcotic drugs ) tamtak tawh July 22, 2018 in amandawk ui. Mat ah um te chung a chu, Jirighat Police Station, Assam ah case ziklut in a um a, himaleh Manipur Home department police commando personnel 4 te case tawh kisai a chu panlakna a nei leh neilo uh hiatchian ahinai puai. Silchar based Bangali vernacular daily “Prantojyoti” in a taklatna a chun, Manipur Police commando persoonel 4 te chu July 22, ni ah Assam Police te’n Jirighat Check post ah amat uh a hidan gen in, Gypsy Vehicle bearing registration No. MN- 01W- 3491 tawh matkhawm ah um hin a gen hi. Commando personnel te’n sawl vel ah amat uh mi khat, Kartik Deb of Jirighat kiti’n report a bawl dungzui ah police commando te official Gypsy chu Lalpani area of Cachar district Assam ah kham ah um, check a bawl hun ua, bag vawm ah kichun khamthei a mudaw uh hin a kigen hi. Mat ah um commando personnel 4 te chu - Arun Singh (37), Constable No. 090891 of Kakching District; Havaldar Rajiv Singh (32) of Kakching District; S. Basanta Singh (29) Rifleman No. 0770090 of Thoubal District; Y. Nanda Kumar Singh (34), Constable No. 0908399 of Thoubal District te ahiu a, bail ah thasuak phawt ah um uh ti a hi.