Govt leh SoO group te Political Talk ah interlocutor AB Mathur in CCpur pha; Stakeholder te tawh interaction nei

CCpur, June 27 *(Nisin Thuhiltu)* : United Peoples’ Front (UPF) leh Kuki National Organization (KNO) tawh Manipur leh Central Government tawh Political Talk a neinau ah Interlocutor, AB Mathur, IPS (Retd.) in Churachandpur pha in UPF nuai ah Stakeholder te tawh tuni, June 27, 2018 sunnung dak 1:00 in Lamka College Conference Hall, New Lamka in interaction a nei ui. Interaction a pat masang un, UPF nuai ah ‘Territorial Council’ demand Drafting Committee te’n Interlocutor, AB Mathur tawh interaction nei masa’n, ‘Territorial Council’ demand bawlna tawh kisai genkhawm uh hi’n a kigen hi. Zia zaw a chun, stakeholder a chiakhawm te tawh thil umdan leh maban ah kihona chiapi ding dan genkhawmna a nei ui. Zia ah kiholimna hun chu Romeo Hmar in amapui a, John K. Ngaihte, Chairman, Zomi Council in thilpiak piakna hun mapui in, Thadou Innpi, Aimol Tribe Council, Hmar Inpui, Paite Tribe Council, Tedim Chin Union, Simte Tribe Council, Mate Tribe Council, Thangkhal Tribe Council, Kom Union, Gangte Tribe Council leh Vaiphei Peoples’ Council a pat lawiupa te’n Interlocutor Mathur thilpiak piakna a nei ui. Zomi Mothers Assn, Hmar Women Association in puansilhsakna nei in, Zomi Chief Association,Joint Innpi ccpur, Zomi Students Federation, Zomi Youth Assn, Zomi Council, Zomi Language and Literature Society leh Zomi Human Right Foundation apat in le thilpiak piakna a um hi.

Thilpiak piakna a neizaw un, a chiakhawm lawiupa chuamchuam te lak ah Tripartite Political Dialogue tawh kisai ah dawtnuam nei te’n thil chuamchuam dawtna a nei ua, lawiupa khenkhat in, Political Dialogue tawh kisai ah Political Solution a kin thei lam a zaw ahi ding a nawp thu gen in, midangte kihona gual ah hun sawtpi dia hiding a hi em, Tripartite talks ahina ziak ah State Solkal panglo ah UPF, KNO leh India solkal bep in Bilateral Talks nei theilo ding a hi em ti te panna thil chuamchuam dawtna le a nei bawk ui.

AB Mathur in a gendan in, Churachandpur khawpi ah kum 40 chiata ah umkha a hidan gen in, Lamka mipite dawi leh thil chiadan hia mama ahidan genkawm in, kihona chiatha zing tawh kisai ah kuama in kimuanlana bangma neilo ah, Doubt bangmah neilo ding in chialna a bawl a, Phualpi solkal leh state solkal in demand um te taksua ahitheina ding ah kihona chiapi hiding a hina chung ah kihona pang, UPF/KNO, Phualpi Solkal leh state solkal in a mawpuakna chiat uh hawitak ah a tuk det ding uh, amau level ah a sepdaw ding teu a sepdaw chiat ding uh pawimaw in a gen hi. Bilateral talks hitheilo ding a hi em ti dawtna a dawnhuna a chun, achiatha zing kihona stake holder pathum- Phualpi solkal, State solkal leh nang uh (UPF /KNO) lahina chung ua paithak thei chuam ding umlo in a gen a, India solkal in pawl dang NSCN leh a dangdang te tawh kihona a neidan tawh UPF /KNO tawh kihona kibanglo ding, issue chuamchuam a hi dungzui ah kihona chiapi dan chuam ding, UPF /KNO tawh kihona chu mipi zosia dawi leh detdo ding kidawi a hi ziak ah, kihouna gasua hun ding thutiam theilo himaleh ama hitheina tiang ah panla ding, Political Solution mupai theina ding ah kihona chiapi hiding ti’n a gen hi.

Chun, Political Solution chu mizosia pawmthei ding pawimaw a hina chung ah kithutuakna pawimaw mama in a gen hi. Shyam Lal Poonia, IAS, DC/Churachandpur leh K. Kabib, IPS SP/CCpur te’n le zia interection hun chu a uap ui. AB Mathur, IPS (retd) ahileh December 17, 1979- February 9, 1983 kikal ah CCpur District ah Sperintendent of Police (SP) mawpuakna a la tuk ngai a hi.

ADC/Ccpur Chairman in hilchian
CCpur, June 27 *(Nisin Thuhiltu)* : Imphal pansa nisin chanchinbu Sangai Express (English edition) in Langkhanpau Guite, Ex-Chairman ADCC in DC/Ccpur kiang ah Democracy Norms dung zui ah "strength show" nei ding ah ADC Act dungzui ah Notice 3 vei a piak nawl piak ah umta a hidan leh dawtna a siamzaw nung ni 30 tin tiang ah le ngaisak hidiaklo ti ah a suadawna tawh kisai in, Khaipao Haokip, Chairman ADCC in tuni nitaklam in hilchianna a bawl hi. Khaipao Haokip, Chairman ADCC in clarification a bawl kimu in a taklat dan in, Court thupiak dungzui ah no confidence motion neisak ding ti tawh kisai ah khakna bangma neikhalo a hidan gen in, No confidence Motion tawh kisai ah Lalhrillien in Court ah writ petition W.P.(C) No. 462 of 2018 a filed tuni tiang ah pending ah um nalai a hidan gen in, writ petition chu July 18, 2018 ah gen hipan ding, Confidence motion puaklut leh puaklut lo ding Court khut ah um a hina chung ah DC/CCpur thutan thei le hilo, DC/CCpur in Court thupiak a zabawllona le um chuamlo in a gen hi.

Hiangtam V ah Go To Village Camp bawl

CCpur, June 27 *(Nisin Thuhiltu)* : Singngat Sub-Division huapsung ah um khua 5, Hiangtam V, Hiangtam B, Songjang, Sohngaljang leh Tuinuam a ding in tuni, June 27, 2018 sunma dak 11 apat in Hiangtam V ah District Administration, CCpur saina nuai ah Go To Village Camp a um hi. Zia hun a chun, khua 5 apat khawsung lawiupa te panna mipi tamtak a chiakhawm ua, Ginsuanhau@GS Haupu Zou, Chairman, MANIREDA, MLA Singngat in chief guest hina tawh camp uap in, Jameson Sehlal Hangshing, MCS, SDO Singngat in functional president hina tawh a uap hi. M Johny, Mandal, SDC Singngat in hunmatna mapui in, Functional President Jameson Sehlal Hangshing, MCS, SDO Singngat in presentation leh introduction hun a nei a, Chief Guest Ginsuanhau@GS Haupu Zou, Chairman, MANIREDA, MLA Singngat ban ah Dr Steve, PHC Behiang in thugenna saulo nei in, hun tawp ah Irungbam Julius Singh SDC Singngat in kipakthu genna nei in hun a mangzo ui. Go To Village Camp hun sung a chun, government department chuamchuam in beneficiary-te kiang ah thil piakdawna a nei ui. Chief Guest GS Haupu in a thugenna a chun, India government in india gamsung smokeless village suaksak ding thiltup ah neizing a hina chung ah Gas mang nailo te Pradhan Mantri Ujjwala Yojoana PMUY nuai ah a thawn aha gas connection piak a hidan uh a gen a, tuni ah gas connection bawlna ding tawh kisai ah application pelut thei te’n SDO Singgat tawh kithuhiat ah a vaima theilam ah lekha pawimaw te pelut ding in chialna a bawl hi. Go To Village Camp a chun, PHC Behiang in Free medical camp a bawl a, Measles & Rubella MR banah Japatese encephalitis JE tawh kisai ah damdawi kapna nei in, Birth Certificate leh death certificate hawpdawna le a um hi. Chuleh, mipi haksatna nei te’n a haksatna chi chuamchuam uh a tut bawk ui.

PTC GHQ in 69th Raising Day mang

CCpur, June 27 *(Nisin Thuhiltu)* : Paite Tribe Council (PTC) General Headquarters mapuina’ tuni zingkallam dak 10:00 akipat in Hiangtam Lamka a YPA-GHQ Hall ah PTC-GHQ 69th Raising Day matna leh Nam Kipumkhatna ding in Nampi pauchapkhawmna a um hi. Thangzamuan Tombing, General Secretary, PTC-GHQ in hun matna amapui a, K. Suanthang, President, PTC-GHQ in nampi puanlap (flag) kaipalna nei in, hun matsung in Rev. S. Vung Minthang, General Secretary, EBC in “Nam Kipumkhat” ti thupi ah nei in thugenna a nei hi. Rev. K. Kamchinkhup mapuina’ ‘Nam Thupha Tawina’ ti thupi ah neikawm in nam a ding in pauchapkhawmna a um a, Rev. Dr. Khen P. Tombing, Chief Coordinator, PCI (R) in ‘Nam a Dia Ka Lunggul’ ti thupi nei in thugenna a nei hi. H. Pauthianmuang in ‘Nam Kipakthu Genna’ pauchapkhawmna a um hi. Khailianthang, President, YPA-GHQ; John K. Ngaihte, Chairman, Zomi Council leh V. Vungzathang, Chairman, CWC, PTC-GHQ; K. Suanthang, President, PTC-GHQ leh Langkhanpau Guite, MDC banah PTC-GHQ ah Ex-President leh Ex- General Secretary-te a pat in thugenna a um a, Vungzagin Valte, MLA & Chairman, MTDC leh V. Hangkhanlian, Minister (Agri., Vety & AH) te a pat le thugenna um in, Dr. DK Mang, Vice President, PTC GHQ in kipakthu genna nei in, Upa N. Vialkhanthang, Secretary (Finance), PTC-GHQ in pauchapna tawh hunkhakna a siam hi.

CDTOA in thusua bawl
CCpur, June 27 *(Nisin Thuhiltu)* : Churachandpur District Tractor Owners’ Association (CDTOA) in hiatsakna thusua a bawlna a chun, a chiata October 20, 2017 thusua a bawl dungzui ua, Association member hilo kua hitaleh nasem ah sum kilaw te chung ah action lak hiding ti himaleh khenkhat in zuilo a hina chung ua a nasepna mun ua driver ahi em, tractor chung ah thil tung dawi umlo a tun leh CDTOA in maw pawlo ding hi’n Rinawma, Chairman leh Tonglal, Secretary te’n a thak in hiatsakna a bawl ui.

Singngat MLA in Behiang khua ah nasepna chuamchuam entha

CCpur, June 27 *(Nisin Thuhiltu)* : Singngat MLA Ginsuanhau@ GS Haupu in tuni’n Behiang khua ah scheme chuamchuam chiapi ah um te dinmun etthakna a nei hi. Zia hun a chun, bialtu MLA in MPHC apat Romedy EE, Ajit AE leh Buhdi JE te tawh Behiang khua ah Manipur police housing cooperation MPHC nuai ah police station building kisa zinglai etthakna nei in, Behiang police station sakna ding ah ground level kibawl leh tui kiningting tak piakdaw theina ding ah tube well ding vina te etthakna a nei ua, zia nung a chun, Tribal development nuai ah Schedule tribe and schedule caste nuai ah Boys and Girls hostel bawl kisa zinglai etthakna a nei hi. Chun, PHC Behiang ah National health mission NHM nuai ah staff quarter ding Toilet leh kitchen panna room 6 kisa zinglai le etthakna a nei hi. Zialo a chun, Behiang khua a tuinek kiningting piakdawna ding ah Overhead tanky kisiam le etthakna a nei hi.

Rev. Zamlal Vaiphei English School building & Staff Quarter hawng

Dhemaji, June 27 *(Nisin Thuhiltu)* : Evangelical Organizaton Church (EOC) in Assam Mission Fields, Gali Mechaki, Dhemaji mun ah tuni, June 27/06/2018 in Rev. Zamlal Vaiphei English School building & Staff Quarter hawnna a nei hi. Zia hun a chun, School building hawnna Rev. Dr Th. Lamboi Vaiphei in a nei a, Rev. Dr. Kh. Khaizakham in Pathian kiang in a latna a nei hi. Rev. Dr. S.Lalpi Vaiphei, Executive Chairman, EOC in, Staff Quarter hawnna nei in, Rev. Dr. Harry Muanlal, Executive Director, EOC in Pathian kiang in a latna a nei hi. Hun mat sung in Special Guest hina tawh hun matna uap te'n thugenna nei in, Gerizim English School, Selle, Miss Caroline, Onward christian Soldier te'n Special Item/lasakna nei in Rev. Dr. Kh. Khaizakham message genna a nei hi. Huntawp ah Upa Luttinthang in pauchpna tawh hunkhakna a nei hi. Zia ah School building & Staff Quarter hawnna hun chu, Rev. Thangzasiam, Assam Field Superintendent, EBCC, Dhemaji leh a seppi missionary pathum te’n le a uap ua, Rev. Dr. Robert H. Vaiphei, Missions Director, EOC in le a uap hi.

TSP in student lawtinna neite kipakpi

CCpur, June 27 *(Nisin Thuhiltu)* : Thangkhal Sinlai Pawl (TSP) in tuni zingkallam dak 11:00 in IB Road ah um KKL GHQ Complex in tukum 2018 ah Class-X leh Class-XII exam ah lawtinna neite kipakpina leh career guidance a nei hi. Zia hun chu, Thangkhal Youth Organisation, Thangkhal Tribe Council apat lawiupa te banah student-te leh nu-le-pa’ te’n le a uap ui. Vungzagin Valte, MLA & Chairman, MTDC in Chief Guest hina tawh a uap a, Thangsuanhang, President, TBC (ABA) in Guest of honour hina tawh uap in, Functional President in T. Khaikhanhau, President, Thangkhal Tribe Council-GHQ a pang hi. Chief Guest in kukalna tawh thiamzilna chiapi ding in student te tilkhona a nei a, sepna muna ding a pawimaw pen sum hizawlo ah Pathian apat gualzawna bep ah lawtinna kinga hi’n a gen hi. Porgramme zatsung in Pastor Hangmuanlian in lawtinna nei student te pauchap piakna a nei a, TSP Tuibong Unit-te apat Choreography suklatna um in, career counselling hun ah Hausuanthang, Advance Coaching for Medical and Engineering (ACME) in student te maban panlakna ding tawh kisai in tilkhona a nei hi. Hiatthei khat chu, Thangkhal Sinlai Pawl (TSP) nuai ah Class X student 20 te tukum exam in a lawting ua, Class XII ah student 15 a lawting ui.

Youth Leaders' Retreat- 2018 nei ding
CCpur, June 27 *(Nisin Thuhiltu)* : Evangelical Organizaton Church (EOC) saina’ June 29, 2018 akipat July 1, 2018 sung in S. Molnom, Kangpokpi District ah 'Kingdom-Minded Youth' ti thupi nei ah Youth Leaders' Retreat- 2018 um ding a hi. Zia hun sung a chu thugentu ah Rev. Dr. Kh. Khaizakham pang ding a hi. Chun, resource person ah pang te’n Christian Youth and Indian Politics with Special Reference to Hindutva Movement, Christian Youth and Social Media, Christian Youth in a Modern World, Dynamic Christian Youth Leadership, Youth and Missions Opportunities leh Self-Esteem and Mental Health ti thupi nei ah khanglai te ziltilna nei ding a hiu.

Orientation training bawl
CCpur, June 27 *(Nisin Thuhiltu)* : AHANA Project leh National Health Mission, CCpur saina’ tuni'n CMO Conferece Hall ah Compulsary HIV & Syphilis Testing tawh kisai in one day orientation training programme a um a, District Data Management Unit, DPM, BPM, ANM/GNM kigawm mi 30 te’n hun matna a uap ui. Training ah pang te chu HIV test bawl ding dan leh Numei gailai HIV veite etkawl dingdan tawh kisai ziltil in a um ua, training thiltup ahileh kum 2020 tiang ah Numei gailai HIV vei a umlona ding ti a hi. Training hunsung in Saroj, Project Manager, AHANA panna mi chuamchuam in ziltilna hun a nei ui.

VDF Welfare central committee in lung-awilo thu taklang
CCpur, June 27 *(Nisin Thuhiltu)* : S. Laltingen Vaiphei, General Secretary, All Manipur VDF Welfare Association in a gendan in, VDF Welfare central committee in state government kiang ah nodal officer, ex-gratia, medical reimbursement panna demand chuamchuam a nei uh government in sukpitin piak ding ah thupukna siam maleh state cabinet in VDF-te honorarium Rs. 730 bep ah punsak ding ah thupukna alak lungawilona chung ah central executive committee in thi lumdan genkhawmna nei in a taklang hi. Zia chu tawh kitawn ah VDF te’n demand abawl uh, police personnel tawh duty kibang a bawlkhawm a hi ziak ua police personnel te honorarium 70% tiang bek VDF personnel te’n a mu ding ua phutna a nei uh hizaw hi’n a gen hi. Chun, honorarium Rs. 730 bep punsak ding ah state cabinet in lemsakna a nei chu VDF te’n pawm theilo a hina chung ua,state government in VDF-te haksatna hiatpi kawm ah July 10, 2018 tiang ah a demand uh a sukpitin piak ding phutna siam in, state government in VDF-te demand a a limsaklo ahileh kiphinna sosang tak chiapi ding uh hi’n a gen hi.

Psychometric Career Testing bawl theina “Lamka Care” kiti hawng

CCpur, June 27 *(Nisin Thuhiltu)* : Lamka khawpi sung ah amasapen hiding in tuni, zingkal dak 7 in Room No. 9, Israel Hnambo Run Building Teddim Road, Lailam Veng, Lamka ah “Lamka Care” kiti Psychometric Career Testing bawl theina ding hawndawna a um hi. Zia hun a chun, H Ginsuanlian, Founder & Lead Counsellor, Lamka care, MA in “Lamka Care” kipatdaw dan genna nei in Rev. S. Ginmalsawm, Director, Social and Development, EBC in tilkhona thu gen in, Lamka Care hawnna leh Pathian kiang ah a latna a nei hi. Zia Lamka Care a chu a kingaisia leh lungkhamna neite couselling hawitak piak hiding, Career guidance le thua hiding in a kigen hi. Psychometric Career Testing tawh kisai ah test online/computerized ah bawl hiding , Edumilestones, Bangalore tawh kithua bawl hiding in le a kigen hi.

Lenlai Summer Cup 2018
CCpur, June 27 *(Nisin Thuhiltu)* : Lenlai Club saina’ July 2 apat July 7, 2018 sung Vision Academy Ground, Muollum, Rengkai ah Lenlai Summer Cup 2018, District Level Under 15 Tournament kiti um ding a hi. Tournament ahileh Player 6, Entry Fee Rs. 800 leh Security Deposit Rs. 200 leh Registration Form 50 hiding a, Prize ahileh 1st, Trophy, Certificate leh Rs. 10,000, 2nd in Trophy, Certificate leh Rs. 6,000, 3rd in Trophy, Certificate leh Rs. 3,000 sang ding a hiu. Individual ah Best Player, Top Scorer, Safe Hands leh Most Promising Player title um ding a hi. Lunglutna nei Team te’n Registration Form la’n, June 20, 2018 nitaklam dak 5:00 tiang ah Vision Academy ah Entry Fee leh Security Deposit tawh piaklut thei ding, June 30, 2018 zingkal dak 8:00 leh Managers’ Meeting Vision Academy ah um ding a hi.

CM Relief Fund ding rs 7 lakhs donate

Imphal, June 27 *(Nisin Thuhiltu)* : Manipur ahh tuilet ziak ah haksatna tuak te kithuapina ding in tuni’n Jain Samaj, Agarwal Samaj, Punjabi Samaj & Sharma Samaj te’n Chief Minister’s Relief Fund (CMRF) ding in Rs. 6,00,000 donate a bawl ua, JNIMS staff te’n Rs. 1,00,000 donate a bawl ui. Zia ah sum chu Chief Minister N. Biren Singh khut in MLA Lamlai A/C Ksh. Biren Singh uapna’n a pedawk ui. Tuni tiang ah CMRF ding ah Rs. 16,88,250 donate kibawlta ti a hi.