Kipumkhatna ding ah gamneitu hina lunggel put chiat pawimaw: CM Biren Singh

Imphal, June 21: Directorate of AYUSH, Government of Manipur, National AYUSH Mission, Manipur leh Department of Youth Affairs and Sports, Manipur organised bawlna nuai in tuni’n Indoor Stadium, Khuman Lampak Sports Complex, Imphal ah International Day of Yoga mat in a um hi. Chief Minister N. Biren Singh in a thugenna a chun, kipumkhatna ding ah gam neitu hina lunggel nei chiat ding pawimaw a hidan taklang kawm in, state sung ah kipumkhatna leh khantona a um theina ding ah tu ah state government panlakna support chiat ding in mipi te chialna a bawl hi. State government in ngaidan leh dawidan, a phachuam ding ah demna welcome bawl zing a hidan genkawm in, khantona ding ah pankhawm chiat pawimaw in a gen hi. State sung ah khamthei thil ah sumkawl veina tawh kisai a genna chun, tu ah state government in khamthei thil himhim nasatak ah dodal zing ding a hidan gen in, mipi dawilo thil bawl te kithuapi hilo ding hi’n a gen hi. Mihing a ding ah damtheina pawimaw mama a hina chung ah taksa leh lungthim ah damtheina pawimaw in a gen a, Yoga chiapina a pat damtheina kibelap thei in a gen hi. Zia ah International Day of Yoga matna hun chu Minister for Health and Family Welfare L. Jayantakumar Singh, Chief Secretary Dr. J. Suresh Babu, Principal Secretary (Health and Family Welfare) Vumlunmang Vualnam, Secretary YAS Bobby Waikhom, OSD to Chief Minister Sumant Singh, Secretary to Chief Minister Ningthoujam Geoffrey, Director AYUSH Dr. A. Guneshwor Sharma te’n le auap ui. International Day of Yoga ahileh kum sin ah 21 June ah kimang sek a hia, United Nations General Assembly in 11th December, 2014 ah 21st June chu International Yoga Day” ah a puan a hi.

Tedim road ah One Way lakdaw hiding
CCpur, June 21: Manipur Governor Dr. Najma Heptulla in June 22, 2018 ah Churachandpur District pha ding leh Muolvaiphei Rural Health & Research Centre, Bethesda School/College of Nursing ah zingkallam dak 11:00 in 20th Batch GNM Graduation-cum-MRH &RC Hospital Inauguration Ceremony uap ding a hi. Sunnung dak 1:00 in Chief Guest hina tawh Lamka Public Ground ah Ropiang Foundation Trust leh CDSA saina’ Raja Goukhothang Guite Football Memoriam, 2018 football Final program uap ding a hi. Manipur Governor in Lamka Public Ground ah program a uap ding ziak in Tedim road-Nehru Marg leh IB road juction ah One Way kikawi chu lakdaw hiding a hi. Gari taitua zosia Tedim road ah asuk-ato ah tai thei ding a hiu a, Lamka Police Station sak, Tipaimukh road apat IB road-Tipaimukh road junction (CCpur College) mai kikal ah gari tailut theilo ding hi’n Traffic Control Police a pat hiat a hi.

International Day of Yoga mang

CCPur, June 21: Churachandpur District Administration leh Police Department saina’n Khuga Dam ah tuni zingkal in International Day of Yoga 4vaina mat in aum a, zia hun achun District ah DC, Shyam Lal Poonia leh SP Rakesh Balwal banah Sub-Divisional Officer-te leh department chuam chuam ah official te a pang u’i. Zialo chun, nursing school leh govt. school chuam chuam apat student leh teacher te banah youth volunteer-te le pang in, Khuga Battalion apat Yoga expert te'n minute 30 sung Yoga bawldan a ziltil ua, Yoga a kiziltil zaw un forest department mapuina’ thingno 50 tuam phu aum in zia nung a chun Khuga Dam kim leh kiang sukthianna ding ah cleanliness drive a nei u’i.

AMVDFWA in hilchian

CCPur, June 21: Village Defense Force (VDF) in media chuam chuam ah All Manipur VDF Welfare Association (AMVDFWA) in June 26, 2018 apat strike bawl ding ti ah kisua chu hiatpi khalo ahi dan a gen hi. AMVDFWA General Secretary, S. Laltingen Vaiphei in thuthak lakhawmte a kimupi hun a chun, VDF in thilphût chuam chuam a neite uh state govt in a ngaisak lo ziak ah cease-work tiang ala bawl in June 30, 2018 tiang huntawp ala pia uh a hi zing lai ah zani, June 30 ni’n Chief Minister N. Biren Singh in CM Secretariat ah VDF puitute ko in Work Minister Th. Bishwajit, DGP LM Khaute, Principal Secretary (Finance & Health) Vumlunmang Vualnam tite panna’ meeting a nei pi hi’n a gen a, meeting hun ah CM Biren in VDF te thalaw chu tawm ahidan hiatpi maleh ama mimal in ahi theilo ahina ah assembly session aum kit hun ah Cabinet in zia chung chang genkhawm ding banah a thalaw uh a pun teina ding ah panla ding hi ah tiam hi’n a gen hi. Zialo chun, Manipur ah VDF personnel 10050 um himaleh Centre in 2,000 bep hiatpi ahina ah zia chung chang chule Centre ah put-up to ding a le CM in a tiam ahina ah ceasework strike bawl ding ah thusua kibawl zosia hun chawm khat sung chawlsan phawt hiding ti’n puandawna a nei hi.
AMVDFWA General Secretary in a genbena ah June 18, 2018 ni’ Imphal base media chuam chuam ah VDF pawl in Manipur govt. kiang ah thil phût chuam chuam a neite uh - backlog honorarium piak ding, Service hunsung a damlo leh tuaksia te reimburse bawl ding, 13th Month thalaw piak ding leh Service Security to VDF tite Govt. lam apat June 24, 2018 tiang ah dawnhuna aumlo ahileh June 26, 2018 apat strike bawlding ti ama min ah kisua a chu suai kai khalo leh hiatpi khalo hi’n a gen a, assembly session um ding ah state Govt. in thupukna alak ding chu ngak phawt ding ah VDF personnel te kiang ah chial in zia tiang achu bangma thuthak aumlo ahileh kiphinna sutzawp hiding ti’n le hillawkna a nein gal hi.

ZCB in SP thâkna nei
CCPur, June 21: National Investigation Agency (NIA) ah Superintendent (SP) ding ah Churachandpur SP, Rakesh Balwal duputation chia ding ahitawh kitawn ah Zillai Churachandpur Block (ZCB) President HS Kaiminlun leh a Cabinet member te’n SP/CCpur office chamber ah a thâkna a nei u’i. Zia hun a chun, ZCB puitute’n SP thâkna’n Vaiphei Khhiangkawi puan khat silsak in, maban ah a lawting to zel ding banah deputation zawleh Manipur ah a hung posting kit ding dawisakthu a puang u’i. Holimna a nei hun ua SP Balwal in Zillai leh Churachandpur mipite ama theina tiang ah kithuapi zel ding hi’n a gen hi.

MRH & RC Hospital hawnna nei di
CCPur, June 21: Muolvaiphei Rural Health & Research Centre, Bethesda School/College of Nursing ah zing, June 22, 2018 zingkal lam dak 10:30 leh 20th Batch GNM Graduation -cum- MRH &RC Hospital Inauguration Ceremony um ding ahia, zia hun chu Manipur Governor, Dr. Najma Heptulla in Chief Guest hina tawp uap ding ahi. Hun matna ah Rev.Zathangsing Zote in graduation chang ding student-te a ding ah pauchapna nei piak ding banah Dr. Najma Heptulla in Hospital hawnna nei ding ahi.

Guchate’n laptop leh van khenkhat gumang
CCPur, June 21: CCpur police apat thutut kimu dungzui in a chiata June 19 zankhang lak tuam ah gucha pawl khat in Sielmat leibul a um ICI Secretariat Building Ground floor bulu in laptop pang in thil chuam chuam a gudawk u’i. Zia thu tawh kisai ah Supervising Officer, P-NGO, Sahei Foundation Khamlienthang Khongsai in CCpur Police ah June 20, 2018 ni’ report a bawl a, zia dungzui a chun guchate’n a bulu hun uh chu June 19 zankhang leh June 20 zingkal phalvakma hiding ah ginchat thu a taklang hi. Building sung ah almirah kamna suksiat ah um in a sung ah Lenovo Laptop leh a charger, mouse 1, leh Extension Cord 1 gukmang ah um ti’n report a ziklut hi. Thiltung tawh kisai ah police in FIR No. 60 (60) 2018 CCP-PS u/s 457/ 380 IPC ziklut in guchate matdawa theina ding ah suizuina a nei zing hi.

Tha ding ah mi vautu mat aum
CCPur, June 21: Tha ding ah mi vautu pawsal khat zani nitak lam ah mat aum hi’n Churachandpur police apat thutut a kidawng hi. Nengzalal Guite (40) s/o (L) Thongzakhop of Phailian
, Tipaimukh Road in police a report a bawl dungzui in, A chiata June 19, 2018 nitak dak 7 tuam a khan a chenna inn ah T. Lianzamuan (38) s/o (L) Thangkhenchin of Zion Veng, New Lamka va lut in thading in a vau a, nidang ale Lianzamuan in Nengzalal chenna inn lutna gate a khetging sek banah, suang a leng tamvei tak septa hi'n gen a, zia gual vauna a tuak chu ama leh a innsung mite a ding ah lau um ahina ah dân tawh kituak ah mivautu man ding in a dawn hi. Zia thu tawh kisai ah Police in FIR no. 61(6)2018 CCP-PS u/s 447/506 IPC ziklut in thil umdan a sui ua, zani nitak lam a khan mivautu Lianzamuan mandawk in tuni’ CJM Court ah dingsak ahi hun ah Court in Police custody ah aumding a phal piak hi.

Zillai CCpur District in cabinet keklian

CCpur, June 21: Zillai Churachandpur District in tuni, 21 June 2018 in Bethel Veng New Lamka ah um Zillai Office in Cabinet keklianna a nei hi. Zia hun a chun, Executive Member ding ah laklut thak ah um te President Kaithianjooy Vaiphei in kitiam sakna a nei a, MPCS Pro Pastor Aron Neihsial in Zillai CCpur District executive member thak te pauchap piakna a nei hi. Zillai CCpur District executive member te ahiuleh; President - Kaithianjoy; Vice President – Satzakap; General Secretary - Ginlaljoy; Asst. Secretary - Th LianVaiphei; Finance – Lalpui; Secy.Edn. Career & Development- Livia; Secretary Games & Sports – Malsawm; Secretary Statistics, Library & Records – Zolian; Secretary Organizational Affairs – Kapbawi; Secretary. Arts & Culture – Kamzamuang; Secretary Info. & Publicity – Soimalsawm & Soikhanding; Member - Lambawi & Rosie Neihsial te a hiu.

KZP GHQ in kipakpina nei ding
CCpur, June 21: Khangthah Zuun Pawl (KZP), General Headquarters in tukum 2018 ah Pawl X & XII- State leh Central Board Exam ah lawtinna neite kipakpina 1st July 2018 @1:30pm leh Simte Inn, Simveng nei ding a hi. Zia hun chu, David Kamlalmuan Zote, Jt Registrar, Manipur University; Dr Kim Simte, Chief Medical Officer,Ccpur leh T Mangkhanthang Simte @MKT Simte, Second-in-Command,STC/BSF, Mualkawi te’n khuallian hina tawh uap ding, T Lamminlal Simte,MCS, SDO/BDO Thanlon leh Th Jamchinthang Simte, MDC, 5-Thanlon AC te’n Special Guest leh Chief Host hina tawh uap ding, Special Invitees hina tawh STC GHQ, SYO GHQ, SLS leh KZP EF Donor te’n uap ding a hiu.

Numei police Inspector 7 te ding ah transfer posting order suak
CCpur, June 21: Home Department thusuak in Police Department ah Sub-Inspector numei 7 Inspector ah a kaisan uh tawh kitawn ah Florence N Lengen, Imphal West (i/c OC Women PS) in 9th IRB ah sem ding , Chinneihlam Gangte, CCP (i/c OC/Women PS) in 9th IRB (attached to CCP as OC, Women PS), Sandy L. Tonsing, CCP in 9th IRB (attached with the office of SP/CCP), E. Gita Devi, 9th IRB as SI (Female) (attached MPSC) in 9th IRB (attached MPSC), G. Geetanjali Devi, Imphal East (as i/c OC/Women PS) in 9th IRB (attached IE as OC, Women PS), N. Chaoba Devi, Thoubal (attached MPSC) in 9th IRB (attached MPSC) ban ah Ronita Meisnam, Prosecution Branch, IW in SI (Female) as Imphal West (as OC/Women PS) ah sem ding a hi.

MDC 14 in DC/CCpur hiatsakna bawl
CCpur, June 21: Lalhrillien, MDC, 19- Saiko; Pumtulthang MDC, 21- Sangaikot; Grace Zamneiching, MDC, 23-Muallum; Hausuanthang, MDC, 24-Singngat; Gouzamang, MDC, 17- New Lamka East; Chintwawhlian @ CT Lian, MDC, 15- New Lamka West; Thangkhosuanmung, MDC, 15- Hiangtam Lamka; Ngamhao Touthang, MDC, 14 - Tuibong; Khaikhomang, MDC, 12- Lanva; G Suanchinpau, MDC, 11- Lungthul; Langkhanpau Guite, MDC, 10- Tuivai; Lal Hossan, MDC, 7- Vangai; Th. Jamchinthang, MDC, 5-Thanlon leh Chungpa Kom, MDC, Nominated te'n tuni'n zikthaw in, DC/CCpur chu avaima theilam ah Autonomous District Council, ADC Churachandpur sung buaina suveng ding in a vel in hiatsakna a bawl ua, 24 June 2018 tiang ah panlakna a neilo ahileh DC/CCpur chung ah Legal Action lak hiding, kiphinna pan ding a hidan uh taklang kawm in kiphinna a nei hun ua thil dawi umlo a tun khak ahileh amaw ama (DC/Ccpur) in apuak ding hi'n le a taklang ui.

Childline Sub-Centre hawng ding
CCpur, June 21: Lailam Veng, CCpur ah SAS Gas Agency kiang ah um Action for Women and Child Advancement (AWCA)'s Office ah June 23, 2018 sunma dak 11 leh Nemcha Kipgen, Minister Social Wlefare & Corps, Govt of Manipur kipakpina leh AWCA in MSWDC panpina mang ah Free Tailoring Training Course a patna ding uh Childline Sub-Centre hawnna leh a latna um ding a h. Zia hun chu, Chief Guest hina tawh Nemcha Kipgen, Minister, Social Welfare & Corps in uap ding, Guest of Honour ah Jacintha Lazarus, IAS Director, Social Wlfare & Managing Director, MSWDC leh Functional President ah S. Satyabhama Devi, Chairperson Manipur State Women Development Corps (MSWDC) te pang ding a hiu a, Special Guest ah Dr. Soibamkumar Singh, Director Prof. Dept of Anthropology, MU, Director, Centre for South East Asian Studies & Educational Multi Media Research Centre MU leh N.Binod Singh, District Social Welfare Officer (DSWO), CCPUR te pang ding a hiu. Chun, Childline Sub-Centre hawndaw thak ah um chu Rev.Stephen Chinzathang, Sr Executive Secy, Zou Presbyterian Church Synod (ZPCS) in Pathian kiang ah a latna nei ding a hi.