Imphal-Jiribam lampi siatna ngaina gual ah siamhawi kit hita: CM
Pawl chuamchuam in Chief Minister’s Relief Fund ding ah sum donate bawl

Imphal, June 19 *(Nisin Thuhiltu)* : Manipur ah toilet ziak ah haksatnat tuak te kithuapina ding in tuni’n pawl 2 in Chief Minister’s Relief Fund ding Rs. 1,62,250 donate a bawl ui. Rs. 1,62,250 lak ah Rs. 1,42,250 chu College of Agriculture, Central Agricultural University, Iroisemba in donate a bawl a hia, Rs. 20,000 ahileh Institute of Driver Training and Research Centre, Manipur in donate a bawl uh a hi. Zia ah sum chu mimal tak in Chief Minister N. Biren Singh kiang in a piadawk ui. Chief minister in pawl 2 te panlakna chu pakcha mama in a gen hi.
A langkhatlam in Indian Oil Corporation Ltd. in le All Manipur Indane Distributors’ Association (AMIDA) tawh kithua in Rs. 6.82 lakh man ding Free Trade LPG cylinders 500, Chief Minister’s Relief Fund ding in donate a bawl ua, Chief Minister N. Biren in State Government in kipak mama a hidan taklang kawm in, Central Government kiang ah Manipur toilet ziak ah haksatna tung te dinmun preliminary report thawtzo ta hi’n a gen hi.
Tuchung tuilet ziak ah mitamtak te’n haksatna tuak a hidan uh gen in, haksatna tuak te panpina ding ah sum leh thil ah Chief Minister’s Relief Fund leh Governor’s Relief Fund a ding ah mi kiphal tak tak te’n donate bawl uh chu pankhawmna hi’n a gen hi.
State sung ah tuiletna dinmun tawh kisai chu high level meeting ah Ministers leh MLAs te uapna tawh reviewed bawl ah um mi 20 - 30 ah Rs. 1.5 lakh chiat tawh inn sakthakna nasep patngal ah um in a gen hi. Assembly Constituency zosia local area development funds mang ah a kisaipi MLAs te’n Centre a pat additional funds ngaklo ah haksatna tuak te khawsak theina ding ngaitua piak uh hi’n a gen a, nimchim leh tuilet ziak ah NH-37 (Imphal-Jiribam road) ah lampi siatna te le ngaina gual ah siamhawi kit hita hi’n a gen hi.
Indian Oil Corporation Ltd. in Corporate Social Responsibility programme nuai ah community ponds kiangnai mun chuamchuam ah women’s washrooms sakna ding ah Rs. 50 lakhs tiang donate bawl ding ah lemsakna a nei chu kipak um mama hi ah puang in, rescue leh relief works ah panla zosia te pakchat thu a gen hi. Zia ah hun matna chu CAF & PD Minister Karam Shyam, Manipur Legislative Assembly Deputy Speaker K. Robindro, MLAs H. Dingo, L. Rameshwor and Th. Satyabrata, DGP L.M. Khaute, Chief General Manager of IOCL (Assam Oil Division), Guwahati, Uttiya Bhattacharya, IOCL high ranking officials leh All Manipur Indane Distributors’ Association palai te’n le a ua ui.
VLS in lekhabu tuak ding a chial, kithuapi nuamte a ding ah kawt hawng
Ccpur, June 19 *(Nisin Thuhiltu)* : Vaiphei Literature Society (VLS) in VLS library ah kawi ding Vaiphei pau ah ki zik lekhabu, a diak ah School zil ding ah ki zik lekhabu masate, Zillaite panpitu ding ah zikte, Chanchinpha pansan ah a lah kibzik lekhabute, Bible masa pen Chanchinpha Johan zik bu leh la bu, tuanthubu, Guallui la bu, hanla, dawi la, khangthu bu leh nam a ding ah pawimaw lekhabute nei ah tuak nuamte'n tuak ding in chialna a bawl u'i. VLS vaipaw thak te'n tumadeu a khan meeting a nei ua, kintak ah library siamdaw ding ah thupukna a siam uh bawzuina a bawlu a hi. Hiatthei khat chu, VLS vaipawthakte'n maban nasepna masawn zel theina ding dawina ah member pakhat in Rs 2000 zel a tuak khawm ua, chuleh, VLS nasepna phungvuk nuamte'n le bangtik lai ah le mani ngam zat kithuapina piak thei ti dungzui in Dr Alice Khawlsonkim inle VLS zangvukna dingin sum kithuapina a pia'i tithu hiat a hi.

Khuga Battalion in Yoga Week chiapi zing
CCpur, June 19 *(Nisin Thuhiltu)* : Khuga Battalion (6 Sikli Infantry) in June 16-21, 2018 sung ah International Yoga Week matna dan ah Yoga Week amat chu chiapi zing in, mun chuamchuam ah mipite Yoga chiapi dingdan tawh kisai ziltilna a nei zing hi. Tuni'n le Khuga Dam kiang ah um Sehken khua ah International Yoga Week mang in, Sehken khawmite a ding in, ‘Tele Yoga Medication Seminar’ le a bawl ua, Sehken khua ah damlona ziak ah haksatna nei te Telephone ah mun chuamchuam ah um sepai doctor te’n holimpina a nei ui. Khuga Battalion in tuni ah Tele Medication a nei hun un, Yoga Specialist chuamchuam Dr Samarjeet Kaur, MBBS, MD, Deptt of Community Medicine GSVM Medical College, Kanpur leh Seeresh Chandra Singh, PG(Yoga), Yoga Instructor, DSVV, Haridwar te’n kiholimpina phone in a nei ua, Yoga Expert te'n taksa upa lam leh numei-naupang te panna mi chuamchuam te kiang ah Yoga chiapi thilsia hilo a hidan a gen ui.
NERCORMP, CCpur saina’ Health and Sanitation tawh kisai ah training

CCpur, June 19 *(Nisin Thuhiltu)* : NERCORMP, CCpur saina’ tuni sunma dak 10:30 apat Synod Hall, IB Road ah NERCORMP Project Villages te’n Health and Sanitation tawh kisai in training a nei ui. Training hun in NERCORMP Project Villages nuai ah Block chuamchuam - Henglep, Samulamlan, Sangaikot leh Tuibuang apat Natural resource management group NARM-G leh Self Help Group SHG-te apang ui. Zia hun a chun, Khuala Vaiphei, District Project Director, NERCORMP Churachandpur in vaidawnna ban ah health and sanitation training nei ah a umna ziak genna a nei a, training hun ah Resource person Dr Jire Pudiate, Nodal Officer, CMHT, National program for prevention and control of deafness in khosung/vengsung ban ah mima damtheina ding leh ki etkawl thiantho ding tawh kisai in ziltilna a nei hi. Health & Sanitation tawh kisai ah ziltilna a nei banah Manipur Chief Minister N Biren Singh in state sung ah inchen haksa te a ding ah damlo haksat tuak te kithuapina ding ah scheme a chiapi Chief Minisergi Hakselgi Tengbang CMHT tawh kisai leh a muthei ding dawl te genlatna a nei hi.

‘Tuailai Hotdamna Camp’ bawl
CCpur, June 19 *(Nisin Thuhiltu)* : BYF Pethuel, Vengnuam South, New Lamka in tukum project ding in ‘Tuailai Hotdamna Camp’ kiti a nei ding chu tuni, June 19, 2018 nitak in a kipan a, June 23, 2018 tiang ah Gilead Tlang, Kawnpui ah nei ding a hiu. Zia camp hunsung a chu “La Pianthak Ngeingei ding ahi” ti thupi nei ah Pastor T.Daikhankhup, Local Pastor, EBCC Sinzawl in Pathian thu gen ding, counsellor ah Evan Upa T.Khupzatun pang ding a hi. Hotdamna Camp a chun, khangthak 132 vel in min a khumlut ui.

Workshop on German, Korean & foreign Language’ kiti um ding
CCpur, June 19 *(Nisin Thuhiltu)* : Siamsinpawlpi Joint Headquarters, Lamka leh Geothe Institute/Max Mueller Bhawan, Kolkata saina, zing June 20, 2018 zingkallam dak 10:00 leh YPA GHQ Hall, Hiangtam Lamka ah ‘One day workshop on German, Korean & other foreign Language’ kiti um ding a hi. Zia hun a chu tukum 2018 ah Class- X & XII zothak te pang ding a hiu a, chial chuam ah um school-te le pang ding a hiu. Workshop resource person ah Mercy Vungthianmuang Guite, Assistant Professor (Centre of German Studies, School of Language, Literature & Cultural studies), Jawahalal Nehru University, Delhi; Anita Mitra, Education Coorporation Officer (Goethe-Institute/ Max Mueller Bhawan, Kolkata) leh Vungsuanlal Kullai, Instructor (Assistant Professor), Department of Foreign Language (Korean), Manipur University te pang ding a hiu.

Salpha-te statue tundin vek hita
CCpur, June 19 *(Nisin Thuhiltu)* : Joint Action Committee against Anti-Tribal Bills (JAC-AATB) in Mata Dam ah Tribal Martyrs Park ah salpha-te kivuina mun ah martyr-te statue tungdawk in, April 10, 2018 in Khaijamang Touthang panna Salpha mi 9-te statue tundaw in a umvekta a hi. Tribal Martyrs Park bawlna nasep ahileh Feb. 12, 2018 akipan hita a hia, salpha-te thanmun feet 44 asau leh feet 31 ah lian ah step 4 siam ah um, than lailung tak ah a statue uh tundawna ding ah pedestal kibawl le zothiang vangta uh ti a hi.
June 2018 sung ah nasepna zawthian thei hiding ah ginchat um in a kigen bawk hi. Salpha-te lim kisiam (statue) tundawna ding (pedestal) ahileh feet 10 in a sang a, feet 28 ah sau in, a letdan ahileh feet 8 a hi. Salpha-te statue ahileh Universal India, Gurgaon ah JAC-AATB in Rs. 40 lakh val bei ah a siam a hi.
Hiatthei khat chu, JAC-AATB leh Manipur govt. in May 10, 2017 ah kinawptuana a nei dungzui ah Salpha-te luang Khuga Dam, Tribal Martyrs Park ah May 24, 2017 ni vuiliam a la hi’i.

“Sintung Bu” hawnna nei ding
CCpur, June 19 *(Nisin Thuhiltu)* : Paite Organization for Literary Research and Development (POLRD) in “Sintung Bu” a siam chu June 24, 2018 sunnung dak 1:00 in Hiangtam Lamka, YPA-GHQ hall ah hawn hiding a hi. Zia hun chuleh, Capt. V.Dongzathang, IRS (Retd) in Singtung Bu hawng ding, Pastor V. Haupi, EBCC New Lane in a latna nei ding a hi. Programme matsung ah PTC-GHQ, YPA-GHQ, SSPP-GHQ lawiupa te a pat thugenna um ding, Royal H. Thuamkhopau in thu genna nei ding a hi.

Vengnuam South VA ding guatna nei
CCpur, June 19 *(Nisin Thuhiltu)* : Sub-Divisional Magistrate, CCpur in March 28, 2018 ah order a sua dungzui in Vengnuam South chuVengnuam Village Authority a ding ah machete khat hiding in a taklang a, zia dungzui a chun, Vengnuam South in Village Authortiy lawiupa ding telna a nei hi. Vengnuam Village Authority leh Vengnuam South (Machete) in aggreement siam in, jobcard list leh area map a a siam uh Lianmuanthang Valte, Chairman, Vengnuam V/A in Chairman, Vengnuam South kiang ah piakdawna a nei a, SDM/CCpur in March 28, 2018 ni ah machete order a suadaw tawh kitawn ah, gamgi ding le sukfel ngal ah um ti a hi. Vengnuam Village leh Vengnuam South (Machete) ahileh a kigamgit dingdan - Awnsuak Road, Thangchinzam Road, Amzathang Road, Khupzavel Street, Sports Complex Road hiding, ZMA Road-II akipat Approach CBA Church leh BDO Office tiang hiding a hi. Gamgi kisiam chun, Kochuam leh YPA huamkhalo ding a hi. Vengnuam South (Machete) ahileh Jobcard holder 275 umna a hia, VA Chairman ding ah S, Kamkhankhup, Secretary - H. Sanglian, Asst. Secretary- S. Kamkhanmuan, Finance Secretary - Muansang Ngaihte, Treasurer - D. Lalminthang banah Member - Khamminthang, L. Roumawi, G. Paumuanthang, Thanga Tonsing, KK Sut, Thangkhangou, Khaikhanthang, P. Nengkhanchin leh T. Chinzathang te a hiu. Hun mat sung in, K. Pumsuanthang, Local Pastor, Pethuel EBCC in Vengnuam V/A leh Vengnuam South V/A lawiupa te pauchappiakna le a nei hi.

ZSP in Assembly -cum- Award 2018 hawpdawna nei ding
CCpur, June 19 *(Nisin Thuhiltu)* : Zou Sangnaupang Pawlpi, General Headquarters in June 22, 2018 zingkallam dak 11:00 in Singtom Vangkua, Chandel District ah Special Assembly -cum- Felicitation & ZSP Foundation Trust Award 2018 hawpdawna nei ding a hi. Zia hun chu Letpao Haokip, Minister (Water Resources & Youth Affairs & Sport); M. Seshei Zou, Chairman, ADC/Chandel ; Krishna Kumar, DC/ Chandel te’n Chief Guest, Functional President leh Guest of Honour hina tawh uap ding, Special Guest hina tawh Manglianthang Zou, Ex-President, UZO-GHQ; Michael M. Ginzasuan, Ex-President, ZSP Conference Singtom; Samuel P. Khammuonlian, Asst. Postal/Sorting Assistant te’n uap ding a hiu. Chun, Chief host ah Ngamlal, ADC/Sugnu Hill Area pang ding a hi.

Kipakpina nei ding
CCpur, June 19 *(Nisin Thuhiltu)* : Indo-Myanmar border ah um Ngaljang khawmi kipawlkhawm te’n June 23, 2018 sunma dak 11 leh Dorcas Hall Mini Auditorium ah tukum 2018 ah Ngaljang khawmi Manipur Board leh CBSE nuai ah Class X leh Class XII exam ah lawtinna neite kipakpina nei ding a hi.

Governor in Lamka Football Ground ah final match uap ding
CCpur, June 19 *(Nisin Thuhiltu)* : Ropiang Foundation Trust saina’ Lamka Football Ground ah Raja Goukhothang Guite Football Memoriam-2018 chiatha zing in, tuni sunnung dak 2 in Semi-final match masa a um a, United Chikim Federation in New Lamka Youth Club chu 2-0 ah zo in, Final a lut hi. Zing, June 20, 2018 ah second semi-final match ah HSC leh Muvanlai Athletics kihel ding a hiu a, June 22 leh Final match leh closing ceremony um ding, Manipur Governor Dr. Najma A. Heptullah; V. Hangkhanlian, Minister Agriculture, Horticulture & Veterinary; J.C. Ramthanga IAS, Add. Chief Secretary, Government of Manipur te’n Chief Guest, Guest of Honour leh Functional President hina tawh uap ding a hiu. Programme Chair ah Shyam Lal Poonia IAS, District Magistrate & Chairman, Public Ground Management Committee pang ding, Chief of Security ah Rakesh Balwal, IPS, Superintendent of Police pang ding leh Chief Host ah Dr. Thangchinkhup Guite, District Hospital Consultant & Chairman, Ropiang Foundation Trust pang ding, Christy Gogo, Muan Hangzo & Team, Choreography Team leh Vaiphei Cultural Troupe apat special no. Um ding, Special Invitees ah Title sponsor tu CISCO, Ongc, IOCl, Bajaj, Elets, B3B, SDO leh DLO zosia, Tribe lawiupa te, CSO leh Student lawiupa te banah khua-hausa te pang ding a hiu.

Kisawisakna thu kiholem
CCpur, June 19 *(Nisin Thuhiltu)* : Thangkhosuanmung Guite, MDC leh Chief of Hiangtam Lamka malakna leh CT Lian Guite, MDC panlakna nuai in tuni, June 19, 2018 in Letkhogin Lhanghal s/o Thongkhohem Lhanghal of K. Patlen kivawkna tawh kisai in kilemna a siam ui. A kihiatdan ah Thangkhosuanmung leh CT Lian te’n Koite Lui Area Youth Association (KAYA) leh Koite Lui Area Chief Association (KACA) te kihopi ah a lung-awilonau a genkhawm nung ua, KAYA leh KACA dawidan zil ah tuni sunnung ah KAYA Office, ST Chullouphai ah khuttha lam innkuan mite panna kilemna siam uh ti a hi. Zia hun a chu, Thangboi Baite, Chairman, KACA in Kuki Customary chiapi ding hileh khutha kiti kihona neina ding ah salam sat masak uh ngai ding himaleh Unau ngawn hina chung ah customary zuilo a, Pu-le-pate chiapidan zui ah kihona nei ah um, thingpi dawnkhawm ah Pathian’ min ah ngaidan leh thunung-thuma umlo ding ah Pastor Henthong, Secretary, Koite Lui Area Chief Association in pauchapna nei ah kiholemna siam uh ti a hi.

Khawlvel ah Zawng kum upa pen ah kihia thita

Canberra, June 19 *(Nisin Thuhiltu)* : Australian zoo ah kikawi, khawvel ah zawng chikhat kum tampen ah tepte ah um “ Sumatran orangutan” kiti chu kum 62 a hi in tuni’n a mualliam hi. Zia ah zawng chu kum 1968 a pat umta a hi a hia, officially tak ah Guinness World Records ah zawng a dam nalai te lak ah kum upa pen ah tepte ah um a hi. Sumatran orangutan chu Sumatra, Indonesia, Puan gammang lak ah piang hiding ah ginchat a hia, nou 11 neita leh US, Europe leh mun chuamchuam ah suan leh pak 54 neita hi ah hiat a hi.

Japan leh Colombia midfielder Carlos Sanchez in record thak siam

Saransk, June 19 *(Nisin Thuhiltu)* : World Cup ah Japan in player 10 Colombia chu 2-1 in a zo a, World Cup khangthu Asian gam a pat South American gam te World Cup ah a zo masapen in a pang hi. Chun, Colombia midfielder Carlos Sanchez in 2018 World Cup ah red card mu masapen in record a siam a, World Cup khangthu minute 3 kihel nung ah kihelna a pat kinawdawk ah tepte in a um bawk hi. Hiatthei khat chu, 1986 World Cup ah Uruguay's Jose Batista chu seconds 55 sung kihel nung ah red card piak in a la um hi.
Golden Boot Award muthei ding te lak ah Cristiano Ronaldo in 1na lua

Moscow, June 19 *(Nisin Thuhiltu)* : Portugal's Cristiano Ronaldo chu FIFA World Cup 2018 ah Golden Boot Award muthei ding te lak ah amapui tu’n a pang a, FIFA World Cup 2018 first round of group matches a kichai tak tawh kitawn in, tuchung ah World Cup ah hat-trick muzo ama bep a hinalai hi. Ama ban in, Russia's Denis Cheryshev, Spain's Diego Costa, England's Harry Kane leh Belgium's Romelu Lukaku te goal 2 chiat tawh a um ui.
Hiatthei khat chu, FIFA World Cup khangthu tuni tiang in, Fontaine of France chu single World Cup ah goal khumdawk tampen ah record in a um zing nalai a, ama’n 1958 edition, Sweden zintun World Cup ah goal 13 a la khum a, ama banin 1954 World Cup ah goal 11 khum Hungary's Sandor Kocsis leh goal 10 khum Germany's (then West Germany) Gerd Muller in second leh third spot a lua ui.
FIFA World Cups ah Golden Boot winners luite ahiuleh a nuai ah gual a hi.
2014: James Rodríguez (Colombia) 6 Goals
2010: Thomas Muller (Germany) 5 Goals
2006: Miroslav Klose (Germany) 5 Goals
2002: Ronaldo (Brazil) 8 Goals
1998: Davor Suker (Croatia) 6 Goals
1994: Hristo Stoichkov (Bulgaria), Oleg Salenko (Russia) 6 Goals Each
1990: Salvatore Schillaci (Italy) 6 Goals
1986: Gary Lineker (England) 6 Goals
1982: Paolo Rossi (Italy) 6 Goals
1978: Mario Kempes (Argentina) 6 Goals
1974: Grzegorz Lato (Poland) 7 Goals
1970: Gerd Muller (Germany) 10 Goals
1966: Eusebio (Portugal) 9 Goals
1962: Florian Albert (Hungary), Valentin Ivanov (Soviet Union), Drazen Jerkovic (Yugoslavia), Leonel Sanchez (Chile), Vava (Brazil), Garrincha (Brazil) 4 Goals Each
1958: Just Fontaine (France) 13 Goals
1954: Sandor Kocsis (Hungary) 11 Goals
1950: Ademir (Brazil) 9 Goals
1938: Leonidas (Brazil) 8 Goals
1934: Oldrich Nejedly (Czechoslovakia), Edmund Conen (Germany), Angelo Schiavio (Italy) 4 Goals Each
1930: Guillermo Stabile (Argentina) 8 Goals

J&K CM Mehbooba Mufti in Governor kiang ah haina lekha pia

Srinagar, June 19 *(Nisin Thuhiltu)* : Jammu and Kashmir Chief Minister Mehbooba Mufti in Jammu and Kashmir Governor NN Vohra kiang in haina lekha a pelut hi. Coalition partner BJP a kizukdaw tawh kitawn ah Mehbooba Mufti party People’s Democratic Party (PDP) in majority hina a chanzawlo nung ah Chief Minister Mehbooba Mufti in haina a siam a hi. Chief Minister Mehbooba Mufti in haina a siam tawh kitawn in Governor’s rule kawi ding in Jammu and Kashmir Governor NN Vohra in ministry of home affairs ah recommendation lekha a pelut a, zia chu Europe leh Latin America gam ah khualzin President Ram Nath Kovind, lemsakna kinga ding a hi. MHA spokesperson in Governor NN Vohra lekha thawt chu Home ministry kiang tung in confirm a bawl hi. A langkhatlam ah Jammu and Kashmir ah politic dinmun a kisan dungzui in, Centre in kum 2008 a pat J&K Governor’s office a la luata, N.N. Vohra chu Governor panmun a pat paitha thei ding in a kigen hi. Mr. Vohra (82) ahileh 1959-batch IAS officer, Punjab cadre, Union Home Secretary hina tawh kum 1994 ah a sepna apat retired a hi. Chun, Principal Secretary to Prime Minister, I.K. Gujral ding ah kum 1997 a khah guat in a um a, internal security leh defence committee chuamchuam ah ala pang, hiatna sangtak nei mi a hi bawk hi. Ama governor panmun apat paithak ding chu mitamtak in itchak um a sakthu’u a gen ui.