Chief Minister N. Biren Singh in tuilet ziak ah haksatna tuak te entha
Imphal, June 17 *(Nisin Thuhiltu)* : Chief Minister N. Biren Singh in tuni’n Imphal East District, Maiba Khul leh Mongjam Village ah tui let ziak ah haksatna tuak te vena a nei in, Maiba Khul Primary School leh Mongjam Mamang Leikai Relief Camps ah um te holimpina a nei hi. Chief Minister thuthak lakhawm mite kiang ah a genna a chun, Union Home Minister Rajnath Singh kiang ah thil umdan tut ah a um tawh kitawn ah state sung ah tui let ziak ah haksatna tuak te Union Home Ministry in kithuapina piak ding ah lemsakna nei a hidan a gen a, a vaima theipen ah Centre in Flood Relief Fund a piak ding ah phutna bawl in a gen hi.
Union Home Minister in Home Secretary chu a vaima theilam ah kithuapina peding ah thupiak nei a hidan gen in, Maiba Khul leh Mongjam Village, Imphal East District ah chenna inn 22 te tui in susia leh mipi 120 te mun chuam ah kichawn dawk uh hi’n a gen hi. District Administration chu tui let ziak ah haksatna tuak te kituptak ah enkawl ding ah thupiak bawl in, tuiletna mun chuamchuam ah Medical teams te sawl ah um in le a gen hi.
A langkhatlam ah Deputy Secretary to the Govt. of India in Manipur Chief Minister lekha a thawtna a taklatna a chun, Ministry of Home Affairs in tuilet ziak ah haksatna tuak te kithuapina ding ah MSP derived price ah additional 2000 tons anchang piak ding ah lemsakna um a hidan taklang in, Manipur government chu annchang kihawpdaw dingdan leh bang hun ah hawpdaw ding a hi em ti, Chief Minister in Ministry of Home Affairs ah lekha a thawtna a taklatlona chung ah a vaima theilam ah annchang kihawpdaw dingdan leh a hun ding details hiatsak ding in hiatsakna a bawl hi. Chuleh, zia ah annchang kipiakbelap man ding leh a puakdawna ding tawh kisai chu ni 30 sung ah Govt. of Manipur in a sukfel ding, Utilization Certificate le a piaklut uh ngai ding hi’n a taklang hi.
NSCN (K) ambush ah Assam Rifles jawan 2 thi; 5 liam
Mon, June 17 *(Nisin Thuhiltu)* : Nagaland Mon District huapsung Aboi ah tuni, 17th June 2018 nitaklam dak 2:30 tuam tuikhai ding ah water tanker tawh kuan, 40th Assam Rifles te chu NSCN (Khaplang) hiding ah muanmaw thingnuaimi pawl khat in lamkal in ambush a bawl ua, ziana a chun Assam Rifles jawan 2 in thina a tuak ua, jawan 5 in liamna a tuak ui. Liamna tuak te lak ah jawan 3 te liamna serious mama in a kigen a, helicopter mang ah Jorhat, Assam tut ah um uh hi’n thudawna’n a gen hi. Mon district superintendent of police Vechipa Vise in a genna a chun, kikaptuana nitak lam dak 2:30 ah piang a hidan gen in, Assam Rifles te attack bawl chu NSCN (Khaplang) te hiding ah muanmaw hi’n a gen a, Assam Rifles jawans thina tuak leh liamna tuak te chu a tuikhai ah chia a hidan uh a gen hi. A langkhatlam ah thina tuak mi 2 te lak ah 1 chu hiatchian in a um a, Hav. Fateh Sigh Negi (213555) a hi. Liamna tuak te ahiuleh Nk.Sub. Cham Bahadur ( 2200714); 2. Rfn. Alam Hussain (154369); 3. Rfn. Sachin Kumar (5021444); 4. Rfn. Dilip Singh (164339) leh 5. Konyak Naga TA of Longchang Village te a hiu.
Hiatthei khat chu, May 2015 a khan le tuikhai ah chia, 23rd Assam Rifles te Changlangsu, Mon district, Nagaland ah attack bawl in a la um ua, jawan 8 te’n thina tuak in jawan 6 te’n liamna a la tuak ui. NSCN (K) ahileh Myanma pansa a hia, Centre tawh kum 15 sung ceasefire agreement a la chiapi himaleh achiata kum 3 masang a khah a la kizukdawk kit a hi.
PNP Tangnuam Unit hawng
CCpur, June 17 *(Nisin Thuhiltu)* : Paite Numei Pawl (PNP-GHQ) a kiphudaw nung ah a masapend ing in tuni’n Tangnuam khua ah PNP Tangnuam Unit hawn in a um hi. Zia hun a chun, T. Ginthianlal, Secretary, YPA Lanva Block in hun matna amapui a, S. Ginthiankham, Treasurer, YPA Lanva Block in pauchapna tawh hun matna hawng in, Vunzahoih, PNP-GHQ in unit thak hawnna a nei hi. PNP Tangnuam Unit lawiupa ding te kitiamsakna a um a, T. Paukhanmang, Local Pastor, EBCC Tangnuam lawiupa ding te pauchap piakna a nei hi. Hun mat sung in, Chin Ngaih Pau, Chairman, CWC-YPA GHQ; T. Khailianthang, President, YPA-GHQ banah PNP-GHQ, YPA Lanva Block, YPA Tangnuam Unit; President, PNP Tangnuam Unit te'n le thugenna a nei ui. PNP Tangnuam Unit ah lawiupa ding te ahiuleh - President – Chingzanem; Vice President – Chingngaihchiin; Secretary – Chhungi; Asst. Secretary - Muanpi; Finance Secretary - Ngaihoihching, Treasurer – Lunpar leh member - Vunghoihching, Kimhauniang, Mangngaihpar, Lamvung, Chingkhanlun, Ngaihlian, Thianching, Vungsuankim, Sonniang, Manchiin leh Lamnu te a hiu.
Yoga Awareness Camp bawl
CCpur, June 17 *(Nisin Thuhiltu)* : Khuga Battalion (6 Sikli Infantry) pawl in tuzingkal in Saipum khua ah Yoga Awareness Camp a bawl ua, zia hun a chun Yoga bawl ding dan tawh kisai in ziltilna a nei ui. Yoga Awareness Camp um hun in Yoga bawl dan ziltilna bep hilo in projector ah yoga bawl ziak ah mihing te a ding ah thilpha chuam um a hidan, taksa damtheina ding a hidan te suklat in a um a, yoga pamphlets and leaflet le a hawm ui.
Workshop on Electricity Consumers Awareness' um ding
CCpur, June 17 *(Nisin Thuhiltu)* : Joint Electricity Regulatory Commission (Manipur & Mizoram) leh Manipur State Power Distribution Company Limited saina’ June 20, 2018 in District Training Centre (DTC), Near DC Office, CCpur ah zingkallam dak 11:00 apat 'One Day Workshop on Electricity Consumers Awareness' kiti um ding a hi. Zia hun matna chu Er. Ngangom Sarat Singh, Chairperson, JERC (M& M) in mapui ding, Shyam Lal Poonia, IAS, DC/CCpur in thu agen ding banah, Er. Lalchharliana Pachuau, Chief Engineering, JERC (M&M) in Electricty Supply Code & Consumers Grievances Redressal Rulations tawh kisai taklatna nei ding, Er. H. Thanthianga, Asst. Chief Engineering, JERC (M & M) in Standard Performance tawh kisai taklang ding a hi. MSPCL akipat Power availability and sale of energy in Manipur including T & D Loss leh CCpur dinmun tawh kisai taklatna le um ding, Manipur ah General leh Transmission line project leh proposal banah on going work leh project um te suklatna le um ding a hi. MANIREDA akipat Renewable Energy Sources and it impact on RPO of MSPDCL tawh kisai le genlat hiding, Er. Thanthianga mapuina interaction session le um ding a hi.
First-Aid Training short-term course
CCpur, June 17 *(Nisin Thuhiltu)* : Hebron Veng, New Lamka pansa Phoebe Welfare Society in khawtang ah Numeite dawpkangna ding ah Doctor/Nurse umlona Inkuan khat in damlona a tuak hun ua, midang ngailo ah amau ki-etkawl theina ding ah kumsin leh First-Aid Training short-term course a sai uh chu chiapi zing in, tuchung in 17th Batch te a ding ah First-aid training Course pan kit ding a hiu. Zia ding a chu May 19, 2018 apat Application form hawmdawk in, Application form pelut te'n zing June 18, 2018 zingkal dak 10 leh EBCC Hebron, Sunday school Hall ah theory class pan ding a hiu, zia hun a chu kidawtna lekha pelut te pangkim chiat ding in Phoebe Welfare Society in hiatsakna bawl hi.
Thingno dawi te’n a thawn ah lakthei ding
CCpur, June 17 *(Nisin Thuhiltu)* : T. Thangchinlian, Divisional Forest Officer, Pherzawl District in thusua a awlna a chun, Vanmahotsava-2018 matna ding ah forest department in thingno a thawn ah hawmding hi’n a taklang hi. Zia ding a chu thingno phunuam - mimal, organisation, govt. office, bank, school & institution, chruch, security personnel te’n Thanlon Range Office (Thanlon Village), Parbung Range Officer (Pherzawl Village) leh Tipaimukh Range Office ( Tipaimukh Village) ah office kai hunsung ah application form fill-up ah dawtna lekha piaklut thei ding a hi.
Kidawtna lekha pelut te ding ah July 6, 2018 a kipat stock beima tiang ah range office-te ah thingno kihawm ding a hi. Vanmahotsava Nursery Centre 5 ah thingno chi 14 apat kung 253280 hawpdaw hiding, Thanlon Centre ah 53180, Bukpi ah 50,000, Lawibual ah 50100, Parbung ah 50,000 banah Tipaimukh ah 50,000 hawpdaw hiding ah guanggalna um in le Divisional Forest Officer, Pherzawl District in thusua a bawlna a chun a taklang hi.
Class X & XII exam ah lawtinna neite kipakpi ding
CCpur, June 17 *(Nisin Thuhiltu)* : Indo-Myanmar border ah um Ngaljang khawmi kipawlkhawmna saina’ a hung tung ding, June 23, 2018 sunma dak 11:00 leh Dorcas Hall Mini Auditorium ah tukum 2018 Class X & XII exam ah lawtinna neite kipakpina um ding a hi. Zia hun a chu, Ngaljang khawmi Manipur Board leh CBSE nuai ah Class X leh Class XII exam ah lawtinna nei te kipakpina nei hiding a hiu.
PTC-GHQ 69th Raising Day lawm ding
CCpur, June 17 *(Nisin Thuhiltu)* : Paite Tribe Council (PTC) General Headquarters mapuina nuai ah June 27, 2018 zingkallam dak 10:00 leh YPA-GHQ Hall, Hiangtam Lamka ah PTC-GHQ 69th Raising Day lawpna leh Nam Kipumkhatna ding ah Nampi pauchapkhawmna um ding a hi. Zia hun chu Thangzamuan Tombing, General Secretary, PTC-GHQ in mapui ding, K. Suanthang, President, PTC-GHQ in PTC puanlap (flag) kaipalna nei ding, Rev. S. Vung Minthang, General Secretary, EBC in “Nam Kipumkhat” ti thupi nei ah thugenna nei ding, Rev. K. Kamchinkhup mapuina mipi’n pauchapkhawmna nei ding, Thanglalmuan Hauzel, President, SSPP-GHQ; Khailianthang, President, YPA-GHQ; John K. Ngaihte, Chairman, Zomi Council leh V. Vungzathang, Chairman, CWC, PTC-GHQ te a pat thugenna um ding a hi. Zia hun matna chu Phungzathang Tonsing, Ex-Minister, Vungzagin Valte, MLA & Chairman, MTDC leh V. Hangkhanlian, Minister (Agri., Vety & AH) te’n le uap ding leh thugenna nei ding, Rev. Dr. Khen P. Tombing, Chief Coordinator, PCI (R) in ‘Nam a Dia Ka Lunggulh’ ti thupi nei ah thugenna nei ding a hi.
KCP (Noyon) active cadre 1 mat ah um
Imphal, June 17 *(Nisin Thuhiltu)* : Jwalamukhi Battalion, Senapati Brigade of Red Shield Division in Lungwiram village, Kangpokpi district in KCP (Noyon) cadre 1 a mandawk hi. Sekmai PS a pat police team khat tawh kithua ah Jwalamukhi Battalion in operation a bawl hun ua Luwangbo Bongmei (45) s/o Kaplei Bongmei, village- Lungwiram, Kangpokpi district amatdaw uh a hi. Mat ah um Luwangbo Bongmei (45) kipuandan ah ama chu KCP (Noyon) active cadre, kum 2001 ah KCP (Noyon) group a la zawm leh Leimakhong area ah sum demand bawlna kigawl sek hi ah hiat a hi. Sekmai Police Station case ziklut in a um a, mat ah um KCP (Noyon) cadre le Sekmai Police Station khut ah piakdaw in a um hi.
CM Relief Fund ding ah Rs 1,00,000 donate
Imphal, June 17 *(Nisin Thuhiltu)* : All Manipur Government Aided College Teachers’ Association in tuni’n Chief Minister’s Secretariat ah Chief Minister N. Biren Singh kimupi in, Manipur state sung ah tuilet ziak ah haksatna tuak te kithuapina ding in Rs 1,00,000 CM Relief Fund in donate a bawl ui. Zia hun a chun, Chief Minister in Aided College Teachers’ Association te panlakna pakcha mama kawm in, haksatna thuak te panpi pawimaw a hidan a gen hi.
Manipur Mahila Congress Chief ding Mutum Sarma Devi
New Delhi, June 17 *(Nisin Thuhiltu)* : Congress President Rahul Gandhi in Mutum Sarma Devi chu Manipur Mahila Congress President ding in a guat a, Sandhya Sawalakhe chu women wing’s secretary in-charge of Maharashtra ding in a guat hi. Gandhi in state 9 ah All India Mahila Congress national coordinators ding le guat a hidan party General Secretary Ashok Gehlot in a gen a, state 9 ah national coordinator ding ah Congress in a guat thak te chu - Kaminaba Bhupendrasinh Rathod, Lata J. Bhatia (Gujarat), Sunita Sherawat (Haryana), Kittu Grewal (Punjab), Anju Jaiswal (Madhya Pradesh), Akanksha Ola (Delhi), Nandita Hooda (Chandigarh), Jyoti Rautela (Uttarakhand) leh Chaman Farzana (Karnataka) te a hiu.
Barak Valley ah ni 4 sung Rail services chawl
Guwahati, June 17 *(Nisin Thuhiltu)* : Assam, Dima Hasao district, Barak Valley ah gua a zuk tam ziak in mun chuamchuam ah tuilet in nimchim a um a, zia ziak a chun, ni 4 sung rail services chawlsak in a um hi. Zia rail services kichawlsak ziak a chun, Tripura a pat gamsung mun chuamchuam rail ah kawmtua theilo in a um hi. Barak Valley leh mun khenkhat ah tui in kiamlam manaw tamleh Chachaar, Hailakandi leh Karimganj districts ah mi tamtak te inn neilo ah khawsa zing uh hi’n thudawnna’n a gen hi.
Meghalaya: District 7 ah mobile internet service khak a um
Shillong, June 17 *(Nisin Thuhiltu)* : Intelligence report dungzui ah law & order dinmun se thei ding hi ah hiat a hiziak ti suanlam ah nei in Meghalaya government in Khasi-Jaintia Hills region, district 7 huap sung in tuni’n mobile internet services suspend a bawl hi. State Home Secretary S Kharlyngdoh in ni 3 sung ngaina gual ah mobile internet services umsak a hinung ah suspend ah um a hidan taklang kawm in dakkal 48 sung mobile internet services suspend hiphawt ding hi’n a gen hi. Hiatthei khat chu, Meghalaya state capital Shillong, Punjabi Lane area ah Sikhs leh Khasis te kal ah kihiatthiamlona a um ziak ah May 31, 2018 ah pawl 2 kal ah buaina a pian tawh kitawn ah curfew puan ah a um banah mobile internet services te khak ah a la um a hia, mobile internet services mang ah thuzuau thezak ah a um ziak ah buaina sosang diak hi ah hiat a hi ziak ah mobile internet service khak ah um a hi.
UN, World Bank chiefs in Rohingya camps entha ding
Dhaka [Bangladesh], June 17 *(Nisin Thuhiltu)* : United Nations Secretary-General Antonio Guterres leh World Bank Group President Jim Yong Kim in Cox's Bazar, Bangladesh ah July 1, 2018 leh Rohingya refugee camps ni 2 sung vethakna nei ding a hiu. Zia hun chuleh Guterres leh Jim in Bangladeshi Prime Minister Sheikh Hasina leh Finance Minister AMA Muhithtawh Economic Relations Division (ERD) tawh kisai genkhawmna nei ding, World Bank in Rohingya refugee te a buaipina ding ah Bangladesh chu grant ah $200 million piathei ding hi’n a kigen hi. Rohingyas te ahiuleh Myanmar ah Muslim minority ethnic group ahiu a, illegal immigrants ah Myanmar in a kawi, Myanmar gamsung a pat nadaw, Bangladeshi refugee camps ah mi 700,000 tuam um a hiu.
Indonesia ah gulpi’n numei khat val
Jakarta [Indonesia], June 17 *(Nisin Thuhiltu)* :Indonesia ah numei kum 54 mi Wa Tiba kiti chu a chiata 15th June 2018 ni a khah gulpi (python) in a val hi. Muna Police chief Adj. Sr. Comr. Agung Ramos Paretongan Sinaga in a genna a chun, Wa Tiba chu a chiata 14th June 2018 ni kawlbu lei entha chia, inn tung kitlo, a tunna hiatlo ah um hi’n a gen a, a lo kim leh kiang a chu kawl, suangkawhawm, ti te hunkhawp um a hina chung ah gulpi um nuamna mun hi ah kihia hi’n a gen hi. The Jakarta Post in a genna a chun, inntung lo ah Mrs Wa Tiba a um tawh kitawn ah a suapi nu’n a lo mun ah a va hawlna, a kengnung, a chemchawi, a slippers, torchlight ti te a mutawh kitawn ah local mite kithuapina dawn ah Mrs Wa Tiba a hawl ua leh a lo kiang ua, gulpi feet 23 ah sau khat, tawizo lo khawp ah gil-va tak ah kizam khat mu’, zia gulpi chu local mi te’n that ah a sem ua leh gulpi sung ah Mrs Wa Tiba luang mudawk uh hi’n a gen hi.
Social media chuamchuam ah gulpi’n mi a val thu hiat ding thuzuau tamtak um zing sek himaleh zia ah thiltung chu Muna Police chief Adj. Sr. Comr. Agung Ramos Paretongan Sinaga in Indonesia ah gulpi’n 2 vei mihing a valna hita hi’n a gen hi.