Start-Up scheme muthei ding te CM mapuina interview bawl

Imphal, June 12 *(Nisin Thuhiltu)* : Start-Up scheme muthei ding te Chief Minister N. Biren Singh mapui high level committee in tuni’n interview bawlna a nei a, committee member a chun, CAF & PD and Revenue Minister Karam Shyam, Manipur Legislative Assembly Deputy Speaker K. Robindro, Manipur Infrastructure Development Agency (MIDA) Vice-Chairman and MLA O. Lukhoi, MLAs H. Dingo, L. Susindro, Th. Satyabrata leh L. Rameshwor, Administrative Secretaries & Heads of Departments te a pang ui. N. Biren in a thugenna a chun, Start-Up scheme chu khanthak talent hawi taktak nei te financial assistance piak hiding leh self employment leh entrepreneurship dawpkangna ding hi’n a gen a, zia a ding a chu Rs. 35 crore bithiak ah um in a gen hi. Online registration ah applications form pelut mi 700 um in a taklang hi.

Dealer-te kiang ah S.K. Oil quota lakthei
Lamka, June 12 *(Nisin Thuhiltu)* : CCpur & Pherzawl District a S.K Oil Sub-Dealer/Fair Price Shop Agent-te’n Identity card chawi ah SK Oil Dealer-te kiang ah June 2018 monthly S.K. Oil quota la ding in DSO (CAF &PD) in hiatsakna a bawl hi. Zia dungzui a chu 55-Tipaimukh A/C (Parbung) leh 56-Thanlon A/C te’n M/S Pudaite Traders ah lathei ding, 57-Henglep A/C te’n M/S B.B & Co. ah lak ngai ding, 58-CCpur A/C te’n M/S S.Paite ah lak thei ding, 59-Saikot A/C te’n M/S Z.T. & Co. ah lathei ding a hiu. 60-Singngat A/C te’n M/S JHK Agency ah a lak uh ngai ding hi’n Sh.Jogen Singh, Dist. Supply Officer, (CAF & PD), CCpur & Pherzawl district in a taklang hi.

RBI in Town hall meeting sai ding
Lamka, June 12 *(Nisin Thuhiltu)* : Reserve Bank of India (RBI) in June 15th 2018, zingkallam dak 11:00 leh Synod hall, IB Road ah Reserve Bank of India, Financial Inclusion and Development Deptt./Imphal saina ‘Town Hall meeting on Micro, Small & Medium Enterprises (MSME)’ um ding a hi. Zia hun a chu bank account nei, bank lam tawh kisai ah thupawimaw chuamchuam gen khawmna um ding, meeting ah pang te TA/DA piak hiding a hi. Lunglutna nei te’n June 14 tiang ah contact number 8974-225-922 ah register bawl thei ding a hiu. ‘Town Hall meeting um hun chuleh Ms. Mary L.Tangpua, GM & RBI/Imphal te’n Inaugural address bawl ding, P.Vaiphei, IAS, Principal Secretary, Commerce & Industry, Govt of Manipur in thugenna nei ding, Mangta Shoute, Manager (PP)/RBI, Imphal in MSME tawh kisai Survey presentation nei ding, Siamnunlian Valte, President, Manipur Hill Area Chamber of Commerce & Industries (MAHICCI) leh President LATSEA te’n MSME Sector: Sharing of experience & success story pansa thugenna nei ding a hiu. Chun, Timmy Gangte, Chief Manager, SBI/CCpur Branch in Ease of banking-single window facility ti thupi nei ah thugenna nei ding, CM Samuel, AGM, RBI/Imphal in kipakthu genna nei ding a hi.

CDPSA in CCpur District Topper leh School Topper Awards piakdawna nei

Lamka, June 12 *(Nisin Thuhiltu)* : Churachandpur District Private Schools' Association (CDPSA) in tuni sunnung dak 2:00 in IB Road, Synod Hall ah Board of Secondary Education Manipur (BSEM), Council of Higher Secondary Education, Manipur (CoHSEM) leh Centre Board of Secondary Education (CBSE) Examination 2018 ah lawttinna nei te lak ah a chungchuang diak te ding in CCpur District Topper leh School Topper Awards kiti hawpdawna a nei hi. Zia hun a chun, Fr. Kholi Emmanuel, Principal, Don Bosco Hr. Sec. School in award sang student-te pauchap piakna nei in, Robin S. Pukhram, Secretary, CDPSA in report piakna a nei hi.

Hiatthei khat chu, CDPSA nuai in private school 59 a um a, Zone 4-North Zone (Tuibong Area), Central Zone, South Zone leh East Zone ah kikhen in, student 45 te kiang ah award piak in a um hi. Salt Brook School a pat Thanglenlal Haokip in 90.17 percent mu in district topper hina a chang a, Rs. 10,000/- banah Oxford Dictionay leh Certificate piak in a um hi. Private School Association in school topper ah award a piakte lak un, Manipur Baord (BSEM) nuai ah Sunshine English School apat Ngamminlun Haokip, Siamsinpawlpi Residential School apat Mangjohnson, The Dawn School apat Tawnlalhruai Kullai, Bethany Christian Hr. Sec. School apat Suansiansang Buansing, St. Mary's High School apat L. Lhunhaomang Haokip, Mount Olive School, Kangvai apat Rohit Chanambam; Manipur Boarding School apat Puremba Moirangthem, Assemblies of God High School apat Priscilla Haorokcham, Salt Brook School apat Thanglenlal Haokip, Children's Training High School apat Harsh Sharma, Saviour's Public School apat Niangngaihlian, St. Stephen School apat Henlensat Touthang, Sielmat Christian High School apat Paominthang Haokip, St. Peter's School apat Ginlalsiam, Chinkham Modern High School apat Lamngainou, Blue Star Academy apat Jenny Lian Rem Mawi, Emmanuel English School apat Hoineijem, Hermon English School apat Chingsaanvung, Rostad Memorial High School apat Amos Thongminlun, Lalpuithluaii Foundation School apat Lianchinkhup Vualnam, Young Learners School apat Christina Lamneiphal, Douglas Memorial High School apat Lalhmangaisang Pangamte, Greenwood Academy apat Jangzemin Haokip, Hope Baptist Academy apat Lhingneihoi Kipgen, Ebenezer Academy apat Chiingaihsang, St. John School apat Jangkholun Haokip, Stephen High School apat Ramchungnung, E.L. Scism High School apat Lamminthang Hangzo, Don Bosco High School apat Apatba Khuman, H.M. English School apat Songoulun, Grace Academy apat M. Stephen Thangchinsuan Zou, Covenant School apat Paulianjohn Dousel leh Royal Academy apat Lalsiammawi te a hiu a, Centre Board (CBSE) nuai ah St. Paul's Institute apat Rahul Kar, Rayburn High School apat Pauthianmuang te a hiu. Council of Higher Secondary Educaiton, Manipur nuai ah Class-XII (Arts Stream) ah VK Tawna College apat Angeli Chongneu, Bethany Christian Hr. Sec. School apat Siankhawzam Buansing, Legacy Faith apat Lamneihoi Baite, Young Pillar apat Mary Hatneikim leh Rayburn College apat Paominsei Haokip hi uh a, Science Streama ah Sielmat Christian Hr. Sec. School apat Ruby Hatneihoi, Ebenezer Academy apat Khailianmang, Don Bosco Hr. Sec. School apat Chawnglemmawi Khaute te a hiu a, award mu te chu Oxford Dictorary banah Certificate khat chiat piak a hiu.

CCpur Dist. Toppers' Award 2018 hawpdawna nei ding
Lamka, June 12 *(Nisin Thuhiltu)* : Joint Students' Body in 13th June, 2018 (Wednesday) leh Synod Hall, IB Road, CCpur ah “Churachandpur District Toppers' Award 2018” piakdawna nei ding a hi. Zia hun chu, Chief Guest hina tawh Radheshyam, Minister, (Education, Labour & Employment), Govt of Manipur hina tawh uap ding, Functional President ah V. Hangkhanlian, Minister (Agriculture, Vety. & AH.) pang ding a hi. Chun, Guest of Honour hina tawh TN. Haokip, President, MPCC; T. Thangzalam Haokip, MLA, Henglep AC & Chairman, HAC, Vungzagin Valte, MLA Thanlon AC & Chairman, MTDC;Ginsuanhau Zou, MLA Singngat AC & Chairman, MANIREDA leh Dr. Chaltonlien Amo, MLA/55-Tipaimukh A/C te’n uap ding, Chief Host hina tawh Khaipao Haokip, Chairman, ADC/ Churachandpur in uap ding a hi. Chuleh, Special Guest hina tawh Shyam Lal Poonia, IAS, DC/ Churachandpur leh Rakesh Balwal, IPS, SP/Churachandpur in uap ding, Special Invitees hina tawh Executive Members ADC zosia leh MDCs Churachandpur District banah Churachandpur District ah DLOs zosia’n uap ding a hiu. Zia hun matna chu atam theipen in uap ding in Joint Students' Body in chialna a bawl hi.

ASHA Facilitator te ziltilna nei
Lamka, June 12 *(Nisin Thuhiltu)* : Ministry of Health & Family Welfare, Govt of India leh State Health Society, Manipur dawidan zil in, District Health Society(DHS), National Health Mission ( NHM)/CCpur saina tuni in CMO Conference hall ah Reproductive Child Health (RCH) Register tawh kisai in ASHA Facilitator-te a ding in Sensitization meeting a um a, Seiboi Mate, District Data Manager/NHM CCpur in ziltilna a nei hi. Zia hun a chun, Rigister min khumdan leh ziklut dan tawh kisai in kiziltilna a nei ua, RCH programme nuai ah Maternal Mortality Ratio, Infant Mortality Rate leh Total Fertility Rate sukniamna ding tawh kisai ah panlak dingdan le genkhawmna a nei ui.

Niangzen Service Centre hawng
Lamka, June 12 *(Nisin Thuhiltu)* : Thanlon MLA, Vungzagin Valte, Chairman, MTDC in a pianna nu, Niangzen hiatzingna ding ah thansuang hawnna leh Niangzen Service Centre hawnna tuni’n a nei hi. Niangzen hiatzingna suangdaw ahileh tuni zingkal dak 8 in New Lamka YPA Thanmual ah hawn in a um a, Pastor D Kamchinmang, Local Pastor, EBCC Dorcas Veng in thansuang hawng in a laan hi. Sunma dak 11 in Lamlian Veng, Bungmual ah Niangzen Service Centre hawnna a um a, zia hun a chu Rev S Vung Minthang, General Secretary, EBC in Niangzen Service Centre hawng in, Rev Dr. Khen P Tombing, Chief Coordinator, PCI (R) in a latna a nei hi. Hun mat sung in company official-te ban ah David Mangboi, Managing Director, Niangzen Service Centre apat thugenna a um hi. Niangzen Service Centre chu, Mahindra first choice servicing centre hi’n a kigen a,, Gari siamtu Company chuamchuam 12 - Hyundai, Honda, Mahindra,Tata, Ford, Renault, Fiat, Maruti Suzuki, Volkswagen, Skoda, Toyota, Nissan ti te siamsak thei hiding, hapta kit a pat offier um ding, shampoo panglo ah car wash bawlman 99+18 percent GST hiding, Shampoo pang ah gari sawpman 230+18 percent GST hiding leh interior and exterior car wash manding 300 + 18 percent GST hiding a hi.

MU Vice Chancellor in Governor kimupi

Imphal, June 11 *(Nisin Thuhiltu)* : Manipur University ah Vice Chancellor Prof. Adya Prasad Pandey in tuni’n Imphal Raj Bhavan ah Manipur Governor Dr. Najma Heptulla kimupi in Manipur University dinmun tawh kisai leh issue chuamchuam tawh kisai in holimna a neipi hi.

DoNER Ministry apat Tamenglong in Rs. 90 crores mu ding
Imphal, June 11 *(Nisin Thuhiltu)* : Ministry of Development of North Eastern Region, North East India in Topographical Need Based Budgeting (TNBB) dungzui ah Tamenglong District leh Noney (pre revised district delineation) huap ah Hill Area Development Programme (HADP) nuai ah additional fund Rs. 90 crores approve bawl in a gen hi. Zia programme chu pilot basis ah kum 2 sung i.e. 2018-19 & 2019-20 ah chiapi hiding, physical infrastructure - Multi- Purpose Community Structures, water supply, etc banah roads/bridges, major production centres, tourism sites, health facilities, sports grounds upgradation,Technological Facilitation Centres (TFC) saimdawna ding leh lam chuamchuam ah masawnna a um theina ding ah fund mat hiding in a gen hi. Chief Minister, Manipur in Prime Minister of India kiang ah a chiata 26th May, 2017 ni ah Manipur, Tripura& Assam a ding HADP nuai ah fund dawtna a siam hi’n a kigen hi.

Lt. Vijaya Devi in CM kimupi

Imphal, June 11 *(Nisin Thuhiltu)* : Northeast a pat numei sailor masapen Lt. Shougrakpam Vijaya Devi in tuni’n Manipur Chief Minister N. Biren Singh a kimupi hi. Kum 28 ah upa, Lt. ShougrakpamVijaya Devi ahileh Kwakta village, Bishnupur district ah cheng Shougrakpam Kunjakishore leh Bina Devi te gochan 5 te lak ah a palina a hi. MA (English) a zaw nung ah Navy ah lut a hia, Northeast a pat numei Navy sailor masapen ah kihia a hi. September 10, 2017 ah India in INSV Tarini lawng mang ah khawvel pumpi fangsuak ding ah expedition ‘Navika Sagar Parikrama” ti a chiapi hun ah six-member crew te lak ah khat a hia, 30,000 nautical miles val lawng hek ah pang hita le a hi. Expedition ‘Navika Sagar Parikrama” chiazo ah suty mang ah a chenna khua pha a hia, tu Kiginni a khah Imphal tung, Airport ah ama ngainatu te’n thupi tak in vaidawnna a la nei ui.

State Govt. in Climate Change ngaikhawk: CM

Imphal, June 11 *(Nisin Thuhiltu)* : Manipur Forum for Sustainable Mountain Development (MFSMD) leh State Chapter, Integrated Mountain Initiatives & State Climate Change Cell, Directorate of Environment, Government of Manipur organised bawlna nuai in, tuni’n Hotel Classic Grande, Chingmeirong, Imphal East District ah tuni’n “two days State Level Workshop on Understanding Mountain People’s Approaches and Practices for Climate Change Adaptation” kiti a kipan hi. Zia hun chu Chief Minister N. Biren Singh in Chief Guest hina tawh a uap in Workshop a hawng a, ama’n a thugenna a chun, state government in Climate Change leh Environment lam thil ngaikhawk mama in a gen hi. State Government in tunung sawtlo ah state sung ah Agar thing 10 lakh phuding a hidan taklang kawm in, Forest Minister Th. Shyamkumar in Agar thingno phuna ding ah Moreh ah ni 3 sung tour nei a hidan a gen hi. Tamenglong District ah water supply plant a ding ah Rs. 45 crore sanctioned hita a hidan le a gen hi.
Directorate of Environment Director Dr. Y. Nabachandra, Integrated Mountain Initiative president Sushil Ramola leh Executive Director of Sustainable Development Forum, Nagaland, Amba Jamir te’n le zia hun matna chu zinguun hina tawh a uap ui.

CM in Hill Leaders’ Day And Meeyamgi Numit ah complaints 400 tuam ngaitha

Imphal, June 11 *(Nisin Thuhiltu)* : Manipur Chief Minister in thasin leh achiapi sek, Hill Leaders’ Day leh Meeyamgi Numit tuni’n CM’s Secretariat ah matkawp in a um hi. Chief Minister in zingkallam dak 8:30 a pat mi 1500 tuam te kimupi in, complaints 400 ngaithakna a nei hi. Mipi te a kimupi zaw ah Chief Minister in thuthak lakhawm mite kiang ah a genna a chun, tu ah government in good governance ngaikhawk amma a hidan genkawm in, “Go to Village” mission chiapi kawm ah mipi te haksatna grassroot level ah kanzui ah um a hidan a gen hi. Go to Village camps ah mipi’n haksatna a tut teu chu category 2 ah kikhen, category khat ah a hun hun ah sukfel thei haksatna kikawi, category dang ah haksatna extra budget tawh sukfel thei te kikawi in a gen hi. Next Assembly Session ah State sung ah indigenous mite venbitna ding ah Bill luidaw hiding, zia Bill chu community chuamchuam ah palai te tawh genkhawm masak hiding, tunung sawtlo ah genkhawmna um ding hi’n a gen hi. Entrepreneurship lam dawpsanna ding ah bank te kithuapina tawh soft loans piak hiding, education system siamhawi hiding in a gen hi.

Chun, akisaipi official te chu CMHT card, CMST etc nuai ah monthly stipend Rs. 1500 te a vaima theilam ah hawmdawk ding ah hiatsak a hidan gen in, state sung ah working journalists te ding ah monthly pension Rs. 4000 piak hisek chu a vaima theilam ah Rs. 6000 ah sukpun hiding, working journalists te pay tawh kisai ahileh Labour Department tawh genkhawm ding uh hi’n a gen hi. 16th June 2018 ah Chief Minister in New Delhi ah NITI Aayog a uap ding ziak ah tu tha June a ding ah Hill Leader’s Day leh Meeyamgi Numit joint ah nei a hi.

Gold Medal dawngtu, Kuber Mairembam vaidawn

Lamka, June 11 *(Nisin Thuhiltu)* : Churachandpur Meitei Leikai Youth Club (CMLYC) mapuina’n tunitak dak 3:00 in Gold Medal dawngtu, Kuber Mairembam vaidawnna hun Koite Thanmual ah nei in a um hi. Ama hin Sky Restro, Banquet & Health Club, Kathmandu, Nepal ah June 5-6, 2018 sung ah First South Asian Kung-fu Championship 2018-2019 kihelna ah Gold Medal a dawng ahi. Kuber Mairembam hi Khumujamba Meitei Leikai apat ahia, ziagual ah International Level tiang ah Gold Medal dawngpha, Lamka apat Meitei Community sung ah a um kipakpina leh chawihawina etsakna ah a bawl uh hi’n a kigen hi. Ama hi bantamweight (51 Kg) category ah kihel ahia, hun chiasa ah National Level ah Gold Medal le dawngkhata hi’n le a kigen hi.

Solar Street Light pia
Lamka, June 11 *(Nisin Thuhiltu)* : Vengnuam South huapsung ah mat ding V. Hangkhanlian, Minister, Agriculture, Veterinary & Animal Husbandry, Manipur in Solar Street Light a piakna chung ah Vengnuam South Village Authority in media mangcha in kipakthu a gen hi. Solar Street Light ahileh za’ni, June 10, 2018 khan Village Authority office ah a latna hun mat in a um a, zia hun a chun, S. Kamkhankhup, Chairman, Village Authority in Solar Street Light a hung umdaw dan tawh kisai genna nei in, Pastor K. Puamsuanthang, Local Pastor, EBCC Pethuel in latna nei hi’n a kigen hi.

Election-cum-Farewell program mang

Lamka, June 11 *(Nisin Thuhiltu)* : Siamsinpawlpi (SSPP) CCpur Government College Branch in tunitak dak 12 apat in SSPP Complex, Siloam Veng, Bungmual ah Election-cum-Farewell program a mang ui. Dak 12 apat nitaklam dak 1 kikal in SSPP JHQ mapuina’n SSPP, CCpur Government College Branch ah 2018-2019 sung ah mapuitu ding kitelna a nei ua, nitaklam dak 1 apat in farewell program mat ah um in, Thiauzakhup, IRS retired in Special Guest hina tawh a uap hi. Special Guest in a genna ah, zillai hi hunsung ah tup kichian nei ah Pathian lau leh dawng kawm ah kalsuan ding ahi ti’n a gen a, chuleh gamsung siamhawina ding leh thiamzilna ah masawnna ding ah kalsuan khawm pawimaw hi’n a gen hi. Thanglalmuan Hauzel President, SSPP GHQ in a genna ah, tulai ah Facebook, Whatsapp ah kidem leh kigensiatna a tam mama a, zillaite ziagual thil ah kibuallo ah, thiamzilna hawitak ah buaipi ding in a thuhil hi.

KAYA in kisawisakna chung ah huntiam pia

Lamka, June 11 *(Nisin Thuhiltu)* : Koite Lui Area Youth Association (KAYA) leh Koite Lui Area Chief Association (KACA) in melhiatlo pawl khat in mi pakhat a vawk utawh kisai in tunitak dak 2:00 in amau office, ST Chullouphai ah Press Conference bawl in hilchianna a nei ui. Zia hun a chun, Khaitinthang Haokip, President, KAYA in a gendan in, a chiata June 9, 2018 ni ah Lamka Public Ground ah SYMROPIA leh LSC kihelna en, Letkhogin Lhanghal s/o Thongkhohem Lhanghal of K. Patlen chu kihel chai ah melhiatlo mi 10 vel in nasatak ah vua, hospital ah etkawl ngai hial dinmun ah a um tawh kisai ah a vawtute thiamlo a chan thu gen in, police ah FIR bawl ahi dungzui ah June 12, 2018 tiang ah police ah kipedawk ding in hiatsakna a bawl hi. Huntiam sung ah a kipiakdawlo uleh Koite Lui Area Youth Association in kiphinna pan ding hi’n a gen hi. Chun, mivawtute mu leh hekha a um chun, police ahiloleh KAYA President, contact no. 8974-710-739 a thuhiat ding in dawtna a bawl a, thu pesawntu’ hina venbit hiding hi’n le a gen hi.

NERCOMP nuai ah Ujungmakhong common facility centre hawng
Lamka, June 12 *(Nisin Thuhiltu)* : Ujungmakhong village ah zani, 11 June 2018, zingkal dak 8 in NERCOMP III CCPUR nuai ah kisiam Common Facility Centre (semi pucca) hawndawna a um hi. Zia hun chu Chief Guest hina tawh T Thangzalam Haokip MLA Henglep & Hill Areas Committee Chairman in a uap a, Guest of Honour in D Khuala Vaiphei, Project Director NERCOMP-III CCpur District a pang a, Chief host in P. Simte, Chief Functionary Rural Development Services a pang hi. Chief guest in Common Facility Centre hawndawna a neizaaw in hall sung ah hun matna a kipan a, Chungkholal Gangte, Head Deacon GBA Church Ujungmakhong village in Common Facility Centre Pathian kiang ah a latna a nei hi. Lamkholal Sitlhou in a thugenna a chun, NERCOMP nuai ah Ujungmakhong NaRM-G in thil chuamchuam ah sepdaw ah umta leh mipi’n phatchuampina chuamchuam neita a hidan uh gen in, livelihood ah Dairy, Fishery, piggery leh a dangdang ah phatchuampina neita uh hi’n a gen a, nek hawlna lam ah dawnzangkhai chuam mama in a gen hi. NERCOMP panpina ziak ah Ujungmakhong NaRM-G in Samaina, carpet, chair, backrope leh a dandang neita leh zia te chu Moirang sang ah a rate tawmzaw a bawl ziak ua, Khousabung lamte tiang khel ah sum muna mang uh hi‘n a gen hi.
Aman a genzelna a chun, NERCOMP panpina khawsung ah tuinek ding lakna ding ah borewell feet 100 val a thuk cho a, loktak tui neta uh hi’n a gen hi. Juice & Squash tawh kisai ah Ujungmakhong in juice extractor le muta, theitui fresh tak ah bawldaw thei leh zuakdawk thei ah umta uh hi’n a gen a, hawndaw thak ah um common facility centre chu 25x25 a lian hin a gen hi. Hun mat sung in khuallian te’n thugenna nei in, NERCOMP panlakna leh nasep thilbawl te mipi’n phatchuampi zing thei a hidan a taklang ui. Chun, Kim Gangte Ex-MP in kipakthu genna nei in, Upa Lamkholet Gangte in pauchapna tawh hunkhakna a siam hi. A kihawng thak Ujungmakhong village common facility centre ahileh NERCOMP project nuai ah Rs 3.64 lakhs sanctioned bawlna chung ah khawsung mipi’n a tuakkhawm uh Rs 76,255 tawh a kigawm ah Rs 4,40,255 bei ah kisadawk a hi.

FIR bawl
Lamka, June 12 *(Nisin Thuhiltu)* : Thanglienlal Gangte(24) s/o Sholun Gangte of K Patlien village in Police a report a bawldan in, a chiata Kiginni June 9, 2018 nitaklam dak 4:30 vel ah Lamka public ground, Hiangtam Lamka ah LSC supporter te hiding ah muanmaw mi 10 vel in a pu (grandfather) Letkhogin (35) s/o H Thangkhohem of K Patlien village a lawipa tawh football kihelna enzo, Lamka public ground a pawtsan nung ua, sawisak ah a um ziak ah a pu Letkhogin veilam mit chung liam, a chalki, a neh leh a naak ah ah thisan pawt, Zion clinic, Tuibong ah ah um zing a hidan a gen hi. Zia thu tawh kisai a chun, Police in FIR no. 52(6)2018 CCP-PS U/S 352/325/34 IPC in case a ziklut hi.

Sairang ah tui let

Aizawl, June 12 *(Nisin Thuhiltu)* : Aizawl district huapsung ah um Sairang ah zani, 11 June 2018, sun dak 11:00 tuam in, tui a let nasa mama a, inkuan 10 te mun bitzaw puidaw in a um ua, minute 3 danah 2 inch ah tui pung zo in a kigen hi. Zia ah tuiletna mun a chun, VC leh NGO'S te tui ziak ah buaina tuakkha a um ding venna duty bawl un thudawnna’n a gen hi. Zia gualma a chu, Zawlpui area ah le tui tam mama in inn kuan 10 te mun chuam in a kichawn dawk ua, innkuan 30 lam te inn ah um ngamlo in a um ui. Zia area a chu YMA lawiupa te’n thil umdan enzui zing un a kigen hi.