CM in SP Office, Cyber Crime Station leh Community Policing hawng
Official kua hitaleh political influence a chiapi lo ding uh pawimaw: CM N Biren

Imphal, June 24 (Nisin Thuhiltu): Manipur Chief Minister N. Biren Singh in tuni’n City Police Station, MG Avenue, Imphal ah Superintendent of Police (SP) office (Traffic Police Control Wing) hawnna a nei a, CID Headquarters ah Cyber Crime police Station hawnna le a nei hi. Chun, the Banquet Hall , 1st Battalion, Manipur Rifles ah Community Policing hawnna le a nei hi. Hiathei khat chu State Cabinet in 100 days work programme nuai ah project chi chuam chuam 57 chiapi ding a ti te lak ah Traffic Police Control Wing le siamdaw thak ah um a hia, SP khat in Traffic Police Control Wing chu a etkawl ding ti a hi. Traffic Police Control Wing nuai a chu SP, additional SP, DSP, Inspector khat chiat banah Sub-Inspectors 7 leh Assistant Sub-Inspector 15 te panna personnel 118 umsak a hiu a, SP in-charge ding ah Khoisnam Sarma, MPS guat a hi. Cyber Crime Police Station ahileh CID (Crime Branch) complex ah umsak a hia, DSP (Cyber Crime) chu Officer-in-Charge ah guat a hi bak ah amau mawpuakna huapsung (jurisdiction ) chu state sung pumpi a hi. DSP chu Inspector 4, Sub-Inspectors 10, Assistant Sub-Inspectors 10, Constables 20 leh driver 5 te’n kithuapi ding a hiu. Community Policing a hileh police-community sung ah relationship hawitak a um ding tupna kihawng hi a hia, SP leh OC te chu Police Community Liaison Groups (PCLG) siamdawk ding ah mawpuakna piak a hiu, community chuam chuam a pat palai te panna, level pathum ah amau umna district leh police station chiat ah PCLG a siamdaw ding uh a hi. Chief Minister N. Biren Singh in a thugenna a chun, government ding ah police chu lim-et (mirror ) hin a gen a, kidawisak chuamna umsaklo ding, government employee te appointment leh transfer & posting tawh kisai ah official te’n political influence a chiapi lo ding uh pawimaw hin a gen hi. State sung ah mani kithuneisakna tawh gitlobawlna uang thak mama a hina chung ah Police Department chu kituptak ah enzui ding in chialna a bawl a, State Police in investigation leh charge sheet process a felzaw sem ding ah a chiapi ding pawimaw in a gen hi. Cyber crime tawh kisai ah a pet pet ah action lak ding pawimaw in a gen a, communal thil leh khat khat sukmualphona leh thil kilawm lo tak hak social networking site ah upload kibawl te a hun tak ah etzui ding pawimaw hin a gen hi. BJP mapui State Government in ni 100 sung ah thil tamtak semdawk a hidan le taklang kawm in N. Biren in projects leh schemes tamtak zawthian ah umta hin le a puang hi. Zia hun matna chu Publci Works & IPR Minister Th. Biswajit, Health Minister L. Jayantakumar, CAF & PD Minister Karam Shyam, Tribal & Hill Areas Development Minister N. Kayisii, Parliamentary Secretaries L. Susindro, L. Rameshwor, Dr Sapam Ranjan, N. Indrajit, K. Robindro, Additional Chief Secretary (Home) Dr. J. Suresh Babu a leh Advisor to Chief Minister Rajat Sethi te’n khuallian hina tawh hun matna a uap ua, Parliamentary Secretaries Khashim Vashum, K. Leishiyo leh Awangbou Newmai, top police officer te leh community leader te’n le a uap ui. Th. Biswajit in function hun ah a thugenna a chun, State Government thak in Chief Minister N. Biren Singh mapuina nuai ah State Assembly election ah thutiam kibawl te taksua zing a hidan a gen a, social networking site chuam chuam a pat complaint leh mipi te haksatna chuam chuam suklat ah a umzing sek chu government kipakna hin le a gen hi.

Zillai Meritorious Award 2017 hawpdawna nei
Lamka, June 24 (Nisin Thuhiltu): Zillai (Vaiphei Students’ Association) General Headquarters saina tuni sunma dak 11 a pat in Synod Hall, IB Road, Churachandpur ah Zillai Meritorious Awards 2017 hawpdawna a um hi. Zia hun chu P. Vaiphei, IAS, Principal Secretary, Cooperation, Economics and Statistics in chief guest hina tawh a uap a, Guest of Honour in D Khuala Vaiphei, Project Manager, NERCORMP, CCpur a pang hi. Chun, Functional President hina tawh Dr SL Lunzapau Vaiphei, Principal, Moreh College, Moreh cum Ex-President Zillai GHQ banah Moirangthem Angamba Meitei, President, Democratic Students Alliance of Manipur (DESAM) in special guest hina tawh a uap hi. Hun matna Chinlemkim Vaiphei in amapui a, Pro Pastor Laltawnvela Duhlian in hun patna nei in, Hauminthang Vaiphei, President, Zillai GHQ in Presidential welcome address bawl in, Zillai Education foundation a pat thugenna um in, S Kamminlun Vaiphei, Secretary, Education and Career Development, Zillai GHQ mapuina nuai ah Zillai Meritorious Awards 2017 hawpdaw in a um hi. Rev. Yangkhongam Baite, Moderator, EMP in award la te a ding in Pathian kiang ah malzawl dawt piakna a nei a, hun mat sung in Kuallian te a pat thugenna um in, Khailiansang, General Secretary, Zillai GHQ in vote of thanks gen in, Pro Pastor Ph Thianneilal Vaiphei in pauchapna tawh hun khakna a bawl hi. Zillai Meritorious Awards 2017 dawng te a hiu le - Class X (Manipur Board) ah Hoilunkim Vaiphei d/o (late) Lalmuankham of Saipum Village, CCpur in MIL (Vaiphei) ah khatna la’n Lalngaikim Vaiphei Memorial Zillai Meritorious Award a sang a, H. Johnson s/o H. L. Mawia of D. Phailian, CCpur in Class XII (MIL- Vaiphei) ah khatna la’n Suangkhawlal Vaiphei Memorial Zillai Meritorious Award a sang hi. Class XII ah Manipur Top 9th rank ah pang Lalgoubawi Vaiphei, Seiminhao Baite s/o Thenkholal Baite of Hmar Veng, CCpur te n le award dawng in Dimsonjem Vaiphei d/o Ginlalthuam Vaiphei of Mualngat Village, CCpur in MBOSE board examna ah Class XII (Arts & Commerce) ah topper hina a lua tawh kitawn in Somkholal Vaiphei Memorial Zillai Meritorious Award a sang a, Nemlian Vaiphei d/o Henkholal Vaiphei of Langol, Housing Complex in CBSE nuai a Class XII (Science) ah a thiampen hina a lak tawh kitawn in Khawlneikim Vaiphei Memorial Zillai Meritorious Award a sang hi. Dimsonjem Vaiphei d/o of Ginlalthuam Vaiphei of Mualngat Village in Soiminlian Lengen, MCS & Family in a sponsored William Khuptinlun Lengen, IPS Memorial Zillai Meritorious Award 2017 for Outstanding Achievement a sang hi. Dimsonjem ahihleh Meghalaya Board of Secondary Examination, 2017 ah Class XII (Arts) ah topper a hia, Award neitu (late) William Khuptinlun Lengen ahihleh Vaiphei nam sung a ding ah Indian Police Service (IPS) officer masapen a hi. Zillai Meritorious Award (1st Rank in Class X- CBSE & Others) - Lamgoulian Vaiphei s/o Kamsei Vaiphei of Leilon Village, Kangpokpi District; Paojalal Haokip s/o Onthang Haokip of P. Thianzawl, Kangpokpi District leh Tingmalsawm Azelia Vaiphei d/o Adon Vaiphei, Old Lambulane, Imphal te’n a sang ua, award ahihleh Zillai GHQ in a sponsored a hi. Chun, MPSC saina ah Manipur Police Service (MPS) muthak K. Lunlenmoi Vaiphei K. Lamkai Vaiphei of Leilon Khunou, Kangpokpi District kiang ah special felicitation in memento piak in a um a, Zillai Meritorious Award 2017 ah Class X first division ah mi 100 leh Class XII ah mi 80 vel kiang ah memento piak in a um hi. Chun, Award sang te kiang ah cash award Rs. 10,000/- chiat banah memento piak a hiu. Hun mat sung in khuallian-te’n lekha simna lam thil ah zillai te tilkhona a nei ui.

Unau Meet-cum-Inauguration of Malsawm Skill Development and Vocational Rehabilitation Unit

Lamka, June 24 (Nisin Thuhiltu): Centre for Community Initiative (CCI) in tuni sunma dak 11:00 in Malsawm Ability Resource Centre (MARC), Pearsonmun ah a 6-veina Unau Meet-cum-Inauguration of Malsawm Skill Development and Vocational Rehabilitation Unit (MSDVRU) kiti a nei ui. Zia hun chu Nemcha Kipgen, Minister (Social Welfare & Cooperation), Manipur leh V. Hangkhanlian, Minister (Agriculture, Veterinary & Animal Husbandry), Manipur te’n Chief Guest leh Functional President hina tawh a uap ua, hun matna Parnei Vaiphei, special Educator, TMI leh L Thangsuanlian, Deputy director Program and accounts CCI ten ama pui ui. N Ginsianlal, Chairman, Executive Committee, CCI in welcome address bawl in, Pauzagin Tonsing, Executive Director CCI in keynote address a bawl a, Chief Guest Nemcha Kipgen, Minister (Social Welfare & Cooperation), Manipur in Malsawm Skill Development and Vocational Rehabilitation Unit (MSDVRU) hawnna nei in, Rev Tunlal Haokip, KBC B Vengnuam in Pathian kiang ah pauchapna tawh a lan hi. Functional President V. Hangkhanlian, Minister (Agriculture, Veterinary & Animal Husbandry), Manipur a pat thugenna um in, Late Ginmalsawm Award hawpdaw na’n a zui a, Chief Guest a pat thugenna a um hi. T Vunglallian, Vice chairman, Executive Committee, CCI in in kipakthu genna nei in, Funcational President V. Hangkhanlian, Minister (Agriculture, Veterinary & Animal Husbandry), Manipur in a 6-veina unau meet hawnna nei in, TMI naupang te leh inkuan te kipawllimna pan incompetition chuam chuam a um hi. Hun mat sung ah Late Ginmalsawm Award hawpdaw ah a um tawh kitawn in Lianthangsang Tombing s/o PK Lian Tombing of St Paul’s Institute in Award a sang a, kipakpina’n Citation leh cash Rs 5000/- a sang hi. Functional President V Hangkhanlian a thugenna a chun, tulai khawvel ah taksa bukim leh bukim lo ti um talo a hidan gen in, kuama kimu niam chuam ding umlo a hidan a gen hi. Gualphalo ah kikawi sek te’n le mun hawitak tak lua theita a hidan uh a gen a, gualphalo te etkawl dan thiam ding leh lampi pha kawkmu ding pawimaw hin a gen hi. Chuleh, TMI ah um naupang 33 te kithuapina ding in Rs 33,000/- a pia, TMI panpina ding ah Fund um masa pen pen ah Rs 10 lakhs tuak dawk ding hin a gen hi. Chief Guest Nemcha Kipgen in gualphalo te enkawltu ding tasam tak ah a um lai ua, Pathian kituapina tawh TMI director Pauzagin te nupa’n in pian bukimlo naupang te etkawlna ding ah school a patdaw uh chu kipakpi mama hin a gen a, tu leh tu naupang te bawl piak thei neilo himaleh tunung ah a pan theina chan ah panlakpi ding leh kithuapina peding hin a gen a, pianbukimlo naupang te etkawlna ngaikhawk mama hin le a gen hi.

DC/CCpur in Electoral Special Revision chia dingdan taklatna nei

Lamka, June 24 (Nisin Thuhiltu): Shyam Lal Poonia, IAS, DC Churachandpur mapuina tuni, June 24, 2017 sunnung dak 3:00 in BRGF Resource Centre, DC Office, Tuibuang ah July 2017 sung ah Electoral Special Revision bawl a hina ding tawh kisai in Press Conference a ko a, Revision chiathak ding dan taklatna a nei hi. Shyam Lal in Election Commission of India in July 1, 2017 a pat July 31, 2017 sung ah Electoral Special Revision bawl ding ah thusua a bawl dungzui ah Churachandpur District ah le bawl hiding in a gen a, khangthak kum 18 a pat 21 kikal Electoral Roll ah min khumlut nailo a tam theipen in min a khum lut ding uh pawimaw a hidan gen in, January 1, 2018 tiang ah 18 hiding te’n le min khumlut thei ding uh hin a gen hi. Special Revision a hileh Booth Level Officer (BLO) te’n inn suan te chuan suak ah kum 18 ting thei ding mi te min a ziklut ding uh ti a hia, July 8 leh July 22, 2017 chu Special Campaign in a puang hi. Zia ni te a chu BLO-te Polling Station mun ah kichu ding, July thasung ah SDO Office zosia le min khumlut thei hiding a hidan a gen hi. Ziklawksa umlo himaleh Special Camp kiti District sung ah School chuam chuam te ah le Electoral Special Revision chiapi hiding leh Call Center le hawn hiding in Shyam Lal Poonia, IAS in a gen a, Call Center hawn a hitak leh Electoral Roll tawh kisai ah buaina neite’n Phone ah thuchian kanzui thei hiding in a gen hi. Zia press conference a chun, District sung Sub-Division chuam chuam a pat SDO- te le a pang ua, Official khat in Electoral Roll ah min a khumlutna ding ah SDO a pat Domicile Certificate pawimawlo ding, Government in a piak, Address ki zikna, Bank Passbook, Electric Bill, Telephone Bill leh a dang dang te le mat thei hiding in a gen hi. BLO te’n house-to-house visit a bawl hun ua “Form of Oath & Affirmation” kiti chawi ding a hidan uh le gen in, nu-le-pa khat zawk zawk in suai a kai uh ngai ding hin a gen hi.

Post Office ATM hawnna nei

Lamka, June 24 (Nisin Thuhiltu): Post Office, Tuibong ah tuni’n mipi matthei ding in Indian Post Office ATM hawnna a um hi. Post Office ATM a hileh Reserved Bank of India (RBI) nuai a um a hi ziak in India Post Office a account neite bep hilo in Bank dang ah account neite’n le Post Office ATM a pat sum ladawk thei ding a hiu a, Post Office account a hileh lekha pawimaw te leh lim chawi in Rs. 50 ah hawn thei ding a hi. Mohammed Nasir Ahmed, Sub Divisional Inspector of Post Office, Churachandpur in Post Office ATM tawh kisai a genna a chun, Manipur a Post Office 55 leh Headquarter Office umlak ah Post Office ATM 2 um pan a hi dan a taklang a, ningkum a khan Imphal ah 1 hawn a la hita in tuni tiang ah mipi matthei ding in ATM ah chun sum kawi hi zing hi’n a gen hi. Churachandpur ah Post Office ATM kikawi chu a mipi te a ding ah vangphatna hia h gen kawm in mipi’n a phachuam thei ding pen ah a mat ding uh dawisak thu le a phuang hi.

Praise & worship programme
Lamka, June 24 (Nisin Thuhiltu): Bungmual Baptist Youth Fellowship (BYF), EBCC saina nuai ah zani nitak in Young Paite Association (YPA) Hall, Bungmual ah Praise & worship programme nei in zia hun matna a chun Music department mapuina nuai ah Pathian pâkna a um a, G. Thangsanglian, Local Pastor, EBCC Bungmual in thu genna a nei hi. Praise and worship matna a chun mimal chuam chuam in lasakna hun a mang ua, Bungmual khawsung ah khanglai hunkhawp banah nu le pa khenkhat te’n a uap u’i.

I Day free medical camp
Lamka, June 24 (Nisin Thuhiltu): Superintendent of Police (SP), CCpur Office ah tuni’n One Day Fee Medical Test Camp for SP staff & Families kiti nei in a um hi. Medical Test Camp a chun natna chuam chuam - Hepatitis B, Hepatitis C, Blood Sugar, BP ti te test in a um a, zia hun a chun SP CCpur nuai ah police personel 55 kiang ah test bawl a um in amau lak ah personnel 2 te Hepatitis C positive hi ah mudaw a um in Blood Sugar sâng 8, BP sâng 8 banah sugar niam u a um u’i. One Day Fee Medical Test Camp a hileh Dr Liangoumuan panlakna nuai ah CIPLA Mulan Pharmaceutical te tawh kithua ah a sai uh a hi.

Zodawn tour nei di
Lamka, June 24 (Nisin Thuhiltu): A hung tung ding June 28 a pat June 30 sung Siamsinpawlpi General Headquarters saina nuai ah Siamsinpawlpi (SSPP) in thingtang lam (Zodawn) ah khua 6 (guk) vena nei ding a hia, zia hun a chun SSPP GHQ, SSPP Joint Headquarters Lamka leh a nuai ah SSPP branch te pang ding a hi uh ban in School chuam chuam a pat teacher hunkhawp le pang ding a hiu. Chun, zia hun a chun Siamsin Photo Contest 2017 a ding ah lim la ut zosia’n le zui thei ding a hi ban un khualgam a pat a inn lam hung pawt ah thiamzilna leh thingtang lam te khawtuana nei lehlunglut te le pang thei ding a hiu. Zia gual ah lunglutna nei te’n Event Manager Gouthiansiam, Secy HRD SSPP GHQ a hiloleh Siamsin Photo Contest 2017 Committee member khat pen pen kiang ah hiatsak thei ding a hi. Tour a chun Singngat, Tuivel, Suangdoh, Lungthul, Tuima leh Mualnuam ti te pha pha ding a hiu a, zia khua te a chun school ah sem tute school managing committee te tawh hun mang khawm ding a hiu.

Kipakpina leh siatbatna hun mang

Lamka, June 24 (Nisin Thuhiltu): Rayburn College, New Lamka ah tuni’n Songtal Siamsin Award Committee SSAC saina nuai in tukum ah Pawl X leh XII exam ah lawting te kipakpina leh a lawsam te siatbatna hun mat a hia, zia hun a chun Pastor N Vumsong local Pastor Khominthang, EBCC in student te a ding ah tilkhona leh pauchap piakna a nei hi. Hun mat sung in Class X leh XI ah lawting te kipakman piakdawna um in G Thiankholian, Chief of Songtal, Langkhanpau Guite MDC Tuivai Block, leh T. Kamchinthang President ZYA Songtal Unit te a pat thugenna hun le a um hi. Tukum ah Songtal khawsuak lak in CBSE nuai ah student 8 leh BSEM nuai ah student 12 a lawting ua, Class XII CBSE nuai in Arts Stream ah student 9, Science ah student 3 ban ah COHSEM nuai ah Arts ah student 5, Science student 1 leh commerce ah student 1 a lawting ui.

Tuilet leh nimchim thuak khate ithuapina ding dawl
Lamka, June 24 (Nisin Thuhiltu): Thalui ah Mizoram ah tuilet leh nimchim in a sukkhak innkuan te kithupina ding ti’n Young Paite Association (YPA) GHQ in YPA Block leh unit te kiang in amau area chiat ah panpina dawl ding in a hiatsak ihi. Zia tawh kitawn a chun Block leh Unit chuam chuam in kithuapina ding dawlna tuni’n a pan ngal in YPA nuai a um inn tin a lut in kithuapina ding chu a dawl ui.

Citywide Concert 2017 sai
Lamka, June 24 (Nisin Thuhiltu): Zogam Artists’ Association (ZAA) Headquarter inntekna nuai ah Joint Artist Association in a sai ‘Citywide Concert 2017’ kiti live concert chu tuni’n Lamka Public Gourd ah ‘Together We Can’ ti thupi mang ah nei in a um hi. Concert a hileh session 4 ah khen a hia, session masa a chun music band chuam chuam - Breaking the Silence, Endless Drive, Apostic, Lemon Juice, Steller, RAV, Akaxia, Inndongta, Semikah, Go Hau & Party, Suaka & Party (MZI) banah Saint Shimigami, Khupboi Chongloi, Mawii Guite leh TK Jack Naulak @ Kapis te’n lasakna a nei u’i. Session 2na hun ah Joint Artistes Fellowship (JAF) a pat Group song - Ei-leh-Ei, Chheih Chheih Chheih, Thinglhanggam, Ei Ram leh Ei Hnam ti lâ te ngaithak a hi ban in Lien Lhungdim, Jenny Thomte, Benny Khongsai, Mami Sinate, Eljay Ngaihte, Christy Vunggohching, Lawmnakim Hrangate, B.Muan Ngaihte, Ningmuanching, Lun Simte, leh Daniel Gangte te’n le lâ a sa’u. Session 3na hun ah The Six String, Angu, Pauginmuan, Elson leh Mwanlal Tunglut, Drummer Siamlian Hauzel banah Guitarist - Thanlian leh Sianboi te’n stage a lua ui. ‘Citywide Concert 2017’ hun ah Zomi Mother's Association (ZMA) in only grace home a um naupang te panpina ding ti’n donation box a kawi a, phachuam ngai mi hunkhawp te’n donation box a chun sum a khiau hi.

HSO President kithana nasatak ah demna bawl
Kangpokpi, June 24 (Nisin Thuhiltu) : Haokip Students’ Organization (HSO) President Palal Haokip kaplup ah a umna chung in tuni’n Langol ah civil society organizations chuam chuam te’n demna a bawl ua, Kuki Students’ Organization Sadar Hills in Brig. Thomas Ground, kiangnai National Highway ah candle vak in suunna a nei ui. Candle vak pum ah famta Letkholal@Palal Haokip, President HSO suunna hun matna chu Kuki Inpi Kangpokpi District leh Kangpokpi local body te panna civil society organizations te’n a uap ua, Rev. Y. Haokip chu Condolence Minister in a pang hi. Seikhomang Khongsai, President Kuki Inpi Kangpokpi District in a genna a chun, ziagual kithana chu nasatak ah dem a hidan taklang kawm in midawilawk te gamtatna hin a gen a, security te’n civil body leader te a venbitzawlona chung un security te panlakna tawh kisai in dawtna le a siam hi. Kukis, Kuki Inpi in a vaima theipen ah mipi te hiatthei ding ah tualthattu te leh a thana ziak uh suklat ding dawi a hidan le a gen a, suunthu le a puang bawk hi. KSO Sadar Hills President, Thangminlen Kipgen in a genna a chun HSO President kitha chu khawk a sakthu a gen a, a insungmi te suunpi thu puang kawm in zia kithana chu nasatak in demna a bawl hi. Thuhcian hiatdaw a hi masang sia morgue a pat thiluang lakdaw hilo ding in le a gen a, Manipur Government in dakkal 48 sung ah kithana tawh kisai ah victim leh a family te chung ah justice a tutlo ua leh kiphinna pan ding uh hin a gen hi. Kuki Inpi Kangpokpi District , Kangpokpi District ah CSO chuam chaum leh Kipgen Khangthah Kiloikhom (KKK) pawl in le HSO president kithana chu nasatak in demna a bawl ui.