Assam Rifles, Registration-cum-Awareness sai

Lamka, June 27 (Nisin Thuhiltu): Assam Rifles in khangthak sepna hawlte a ding ah Pre-Recruitment Training a piak uh tawh kisai ah lunglutna neite a ding in tuni’n District Training Centre (DTC), Tuibong ah Registration-cum-Awareness a um hi. Zia hun a chun, V. Hangkhanlian, Minister, Agriculture, Veterinary & Animal Husbandry in BJP sawlkal in ‘Sab Ka Saad, Sab Ka Vikas’ ti chiapi leh a hau-a zawng khenchuam umlo in gamsung ah khantona a tungna ding ah panla hi’n a gen a, zia lak a chu Pradhan Mantri Ujala Yojana (PMUY) kiti BPL innkuan a pat numei te a ding LPG Gas Connection a thawn ah piak suak ding a ti chu mi tamtak in a phatchuampi ding dawi hi’n a gen hi. Scheme tawh kisai a genna a chun, thing ah anhuan chu mihing damtheina ding ah hawilo bep hilo in thingphuk kiphuk te chun gam keu sak in boruak a ding ah hawilo a hina ah zia scheme chu patdaw a um hi’n a gen hi. Chun, 2020 tiang ah Manipur a pat thaichi piang te a le 2 ah a punna ding ah Manipur Chief Minister N. Biren in scheme thak hawng ding hi ah gen kawm in sawlkal in scheme chuam chuam a pat daw te chu District mipi’n a phatchuampi theina ding ua District Administrator tawh pangkhawm ah panla ding hi’n a gen hi. Hun matna a chun, Brigadier Ajay Kumar, Commander, 27 Sector Assam Rifles, Khaipao Haokip, Chairman, Autonomous District Council, Churachandpur, CT Lian Guite, MDC, Thangkhosuanmung Guite, MDC, Shyam Lal Poonia, lAS, DC Churachandpur, Colonel Sanjay Kumar, Commandant, 25 Assam Rifles, Rakesh Balwal, IPS, SP, Churachandpur ban ah District sung ah Senior Military officials, District Administration, Churachandpur, Social Leaders, NCC Cadets leh pawl chuam chuam a pat lawi upa tamtak in uap ua, Government Department khenkhat in Stall chuam chuam ah amau khutsuakte kawidawk in, Assam Rifles in le Free Medical Camp nei in scheme chuam chuam ah a lunglutte le Registration a bawl piak ui. Awareness Camp a hileh 27 Sector Assam Rifles nuai a um, Headquarter Veng pansan, 25 Assam Rifles l in July 1, 2017 a pat SSC saina nuai ah exam chuam chuam pia dng ah kisai khangthak te Free Coaching piak ding a guat tawh kisai banah Government scheme chuam chuam - Jan Dhan Yojana, MGNREGA, Swachh Bharat Abhiyan, NRHM, Beti Bachao Beti Padhao, Sarv Shiksha Abhiyan leh a dang dang te mipi hiatthiam sak ding tupna ah nei a hi.

ZCB in Marathon ah 1na la te kipakpina nei

Lamka, June 27 (Nisin Thuhiltu): Zillai Churachandpur Block (ZCB) saina nuai in VPC Complex, Bethel Veng, New Lamka ah Churachandpur Marathon, 2017 ah prize dawng Zillai memberte kipakpina nei in a um a, zia hun chu M. Kumarjit Singh, Addl. SP (Ops), Ccpur; VPC General Headquarter President,Khatkhotong Baite; Zillai General Headquarter ah Education & Career Development Secretary, S. Kamminlun, Zillai Kangvai Block Secretary, Haulallawm; Kuki Student Organisation (KSO) Churachandpur leh Siamsinpawlpi (SSPP) Joint Headquarters a pat President leh Secretary te chiat ban ah nu leh pa khenkhat in a uap u’i. District Administration leh District Police kithua ah a sai, Churachandpur Marathon, 2017 ah Zillai member 2 - Chest Number F-533, Mercy Chongchanhoi d/o Khamlunlam of Buallian Village leh Chest Number F-431, Paulemthang s/o Thangngailian of Mission Veng, Hiangtam Lamka te’n Senior Girls leh Senior Boys ah 1na la gel in a dang 6 in consolation prize a sâng ua, Upa L.Sanga, Jt. Secy, VPC GHQ in amau a ding in malzawl dawt piakna a nei hi. Hun matna a chun, Khatkhotong Baite, President, VPC GHQ; M. Kumarjit Singh, Addl. SP (Ops), Ccpur banah student leader chuam chuam chiakhawm te’n khamthei dodalna tawh kisai thugenna a nei u’i.

Vaiphei Vawnchawi in kipawllimna nei
S.Phaiza, June 27(Nisin Thuhiltu): Vaiphei Vawnchawi (VV) facebook group saina’n a chia ta June 26 a khan Singngat Sub-Division huapsung a um S. Phaiza khua ah ki melhiattuana leh ki pawllimna nei in a la um a, zia na’ chun khua chuam chuam a pat Hausa, Village Authority leh youth club te chia khawm in hun a mang khawm u’i. Unau kimelhiatuana programme chu nam khat bep huap sak hilo in Singngat area ah thingtangmi chêng zosia te tawh ki unauna a um ah, nawpni-dani ah ki del tua thei na ding ah sai a hi ban in education lam ah masawn ding dan gel khawkna zal ah sai a um hi’n VV administrator te’n a gen ui. Hun matna chu mi 150 tuam in a uap ua, nitak lam ah hepina ankuang sawk khawmna le a nei u’i.

Lampi siat ziak ah Imphal-Pherzawl Express tung zolo: PDDC
Pherzawl, June 27(Nisin Thuhiltu): Pherzawl District Development Committee (PDDC) in tuni thusua a bawlna a chun lampi siat ziak ah Imphal-Pherzawl Express in a tung na ding mun, Pherzawl a tung zawlo chu lungkiat um sak thu a phuang hi. Imphal-Pherzawl Express in a tai masak pen na ding in zani khan Imphal a pat Pherzawl zuan maleh National Highway - 2 a um Bukpi leh Pherzawl kikal lampi a siat takluat ziak in maban sawn thei talo in bus chu ki nung le kit in zia chu passenger te leh mipi te a ding ah puaknat um mama hi’n a gen hi. Lampi hawilo ziak in Pherzawl a pat km 25 ah gam la, Zochung khua ah passenger te zan a giak law ua, amau lak a chun Pherzawl District Deputy Commissioner A Tombikanta Singh leh a team te le a pang u’i. June 27 zingkal ah Pherzawl zuan ding ah kipandawk thak maleu Bukpi khel ah lampi siat takluat ziak in a ban sawn thei talo in bus chu a kinung le kit mai a, Pherzawl mipi te’n bus chu a la lamtua ding ah kisingsakna hawi tak a la nei in kinem tak in a la ngak maleu amau a ding ah a kinepna uh a thawn mai tai. Zia tawh kisai a chun, Pherzawl District Development Committee in state government kiang ah a kintheilam a lampi siam pha ding in a dawn a, Pherzawl chan mai hilo ah Ruonglevaisuo (Tipaimukh) leh Senvon tiang ah lampi hawi tak tunsak ding in le a dawn hi.

Kithuapina hunkhawp lutta
Lamka, June 27 (Nisin Thuhiltu): Young Paite Association (YPA) GHQ in tuma lam ah Mizoram state ah tuilian leh nimchim ziak ah thuak te panpina ding dawlkhawm ding ah Block leh Unit te thu a la piak dungzui in YPA Block leh unit te tamzaw’n panpina a kaikhawm teu YPA GHQ khut in a piadawk ta’u. YPA New Lamka Block huapsung a um unit 12 te’n a dawldaw teu chu tuni’n YPA New Lamka Block President S Manlian in YPA GHQ khut ah piakdawna a nei hi. Panpina a kaikhawm teu a hileh anchang bag 101, a sum ah Rs 45,500 ban ah sil leh chen puan bag 2 a hi. Chun, Lanva block leh Lamka Block a pat panpina ding ah anchang bag 34 leh a sum ah Rs. 17,055 a lut hi.

MO te a ding training kipan
Lamka, June 27 (Nisin Thuhiltu): District Family Welfare Officer (DFWO), Churachandpur saina nuai ah ni 5 um ding ‘Training on IUCD Insertion for Medical Officers 2016-2017’ chu tuni’n DFWO Conference Hall, District Hospital ah a kipan a, zia hun a chun District sung ah Primary Health Center (PHC) 6 - Thanlon PHC, Singngat PHC, Behiang PHC, Parbung PHC, Senvon CHC leh Sinzawl PHC a pat Medical Officer in-charge-te a pang ua, VC Pau Tonsing, DFWO, Churachandpur leh Nalini Devi, District Public Health Nursing Officer (DPHNO), Churachandpur te’n ziltilna pia in July 1, 2017 leh training zothiang ding a hiu.

Addl. Director in damlo te entha

Lamka, June 27 (Nisin Thuhiltu): Natna hiatlo hîlêng a pat damlo, District Hospital ah etkawl a um Henglep Sub-Division sung Hengkom khua mi te chu tuni’n Dr. Sashee Kumar, Additional Director, IDSP, Imphal in etthâkna a nei a, zia hun a chun Dr. Kimngaihching Simte, Chief Medical Officer, Churachandpur malatna’n Dr. J. Son Goukham Samte, Medical Superintendent, District Hospital leh staff te’n kithua pina a pia’u hi. Natna hîlêng tawh kisai meeting a um hun a chun, Shyam Lal Poonia, IAS, DC Churachandpur in Medical Team sawl ding hi ah gen maleh Dr. Sashee in tuhun ah Medical Team sawl, a phatchuamna umlo hi’n a gen a, tuinek leh damlote’ thisan etthâkna result ngakphawt hawi a sak thu taklang kawm in natna chu huaisia leh lauthawng um hi’n a gen hi.

PTC in 68th Rising Day mang

Lamka, June 27 (Nisin Thuhiltu): Paite Tribe Council (PTC) GHQ leh Block te’n tuni’n mun chuam chuam ah 68th PTC Rising Day a mang ui. PTC GHQ malatna nuai ah tuni zingkal lam in PTC GHQ Office, Hiangtam Lamka ah Rising Day matna um in PTC puanlap kaipalna leh puitu liamsa te sûnna a um hi. Zia hun chu PTC Central Executive Committee (CEC) ah Executive member te, PTC vaipaw lui te ban ah MDC, EX-Minister te’n a uap ua, PTC GHQ President L Pumlianpau PTC puanlap a kaipal in LT Juan Tonsing, Central Working Committee, PTC GHQ in puitu liamsa innkuan te a ding banah Paite nampi a ding in pauchapna a nei hi. Zia tawh kizawi tawn a chun, Block chuam chuam in le amu level chiat in Rising Day a sai u’i.

District Badminton Championship 2017 hawnna nei

Lamka, June 27 (Nisin Thuhiltu): Churachandpur District Badminton Association (CDBA) saina’ CDBA Indoor Stadium, Hiangtam Lamka ah 17th District Badminton Championship 2017 um ding chu tuni’n Rev E Paukhanlian, Divisional Superintendent, Lamka North Division EBC in pauchapna tawh a hawng hi. Zia hun chu CDBA ah Patron leh Chief Patron member te’n special guest hina tawh a uap ua, patron leh Chief Patron khenkhat te a pat thugenna a um hi. 17th District Badminton Championship 2017 a chun Under 14 Boys single ah mi 10 leh double ah 4, Under 17 boys single ah mi 6 leh double ah 6, under 19 boys single ah mi 11 leh double ah 5, open men’s single ah mi 20 leh double ah 23, women open single ah mi 5 leh double ah 4, kum 35 chunglam single ah mi 10 leh double ah 15, kum 40 chunglam single ah mi 4 leh double ah 9, kum 45 chunglam single ah mi 4 leh double ah 4, kum 50 chunglam double ah 4, kum 50 chunglam men’s veteran single ah mi 5 leh double ah 4 a um u’i. Championship 2017 a kipakman ding te a hileh Yonex Company in a sponsor ding hi’n a kigen hi.

State maban ding Agriculture Sector ah ki-nga: N. Biren Singh

Imphal, June 27 (Nisin Thuhiltu): Department of Agriculture, Government of Manipur guanggalna nuai ah tuni’n Hotel Classic Grande, Imphal ah Chief Minister N. Biren Singh in “Strengthening of Lab to Land Module” workshop leh action plan - “Doubling of Farmers’ income by 2022 in Manipur” hawnna a nei hi. A ma’n a thugenna a chun, State maban ding Agriculture leh Tourism Sector ah ki-nga a hidan gen in government thak in zia sector 2 te chu extra focus bawl ding hin a gen hi. Chief Minister in state sung ah agriculture sector siamhawina ding ah systematic marketing chiapi pawimaw in a gen a, double cropping a um theina ding ah gua tui (rain water) kining ting ahiloleh ground water harvesting a um ding pawimaw in a gen hi. Lobawlna ding haksatna deu deu a hidan te gen in, lobawlna gam te venbit ding pawimaw in le a gen a, government in DC leh a kisaipi Authority te chu lobawlna gam dinmun te kituptak ah enzui ding ah hiatsakna bawl in a gen hi. Chuleh, state khantona ding ah chiapi dan kituptak neikawm a, a hun tak leh discipline neitak ah panlakna pawimaw pen in a gen hi. Zia hun matna chu Minister for Agriculture and Veterinary and Animal Husbandry, V. Hangkhalian, Parliamentary Secretary (Home), Shri L. Susindro Meitei, Chief Secretary, O. Nabakishore Singh, Addl. Chief Secretary Dr. Suhel Akhtar,VC, CAU, Dr. M. Premjit Singh, Director, Agriculture, Ph. Rajendra Singh te’n le hun matna a uap ui.

CM in free Wi-Fi , Jeevan Praman scheme leh Advanced Ambulance hawng

Imphal, June 27 (Nisin Thuhiltu): Chief Minister N. Biren Singh in tuni’n government thak 100 days programme ah pang - free Wi-Fi , Jeevan Praman scheme leh Advanced Ambulance 2 hawnna, JNIMS Conference Hall, Imphal in a nei hi. Chief Minister in a thugenna a chun, government in system san ding dawi a hidan taklang kawm in, zia kisanna (change) chu mimal ah kinga hin a gen a, government thak thil tup chu a hithei chan ah mipi te ding ah kipumpiak ding leh society dawpsanna ding ah panlak ding hin a gen hi. IT department panlakna Jeevan Pramaan scheme hawn thei ah a um chu kipak mama a hidan genkawm in pensioner te thasin pension sum (monthly pension) la ding ah bank mai ah queue sau tak tak ah a din uh ngaitalo ding in a gen a, Jeevan Pramaan in pensioner te nasatak ah dawn zangkhai chuam ding hin a gen hi. Hawn thak ah um Advanced Ambulance 2 te chu a phat chuam thei ding pen ah mat a hi ding kinem a hidan le a gen a, migenthei leh insung haksa damlona tuak te kithuapina ding ah advanced ambulance kihawng a hidan taklang in state sung ah hills leh valley ah um te’n a mat ding ua kihawng in a gen hi. Chun, government in zia advance ambulance chu e district hospitals zosia umsakna ding ah panlakna nei zing in a gen hi. A langkhat lam ah free Wi-Fi kihawng thak chu JNIMS complex, Old & New Secretariat, Thangal Bazaar leh Paona Bazaar te ah data limit 300 MB per user per day ah mat thei ding ah hawn a hi. Zia hun matna a chun Chief Minister N. Biren Singh in Directorate of Health & National Health Mission banah Department of Information Technology te’n ni 100 sung ah a panlaknau tawh kisai kizikna booklets hawnna le a nei hi. Hun matna chu Minister for Health and Family Welfare, L. Jayantakumar Singh, Minister for PHE, Losii Dikho, Parliamentary Secretary (IT) Dr. Sapam Ranjan, Parliamentary Secretary (Health and Family Welfare) S. Subashchandra, Parliamentary Secretary(Home) L. Susindro Meitei, Parliamentary Secretary(RD & PR) Shri H. Dingo, Parliamentary Secretary(Education) K. Robindro, Parliamentary Secretary(Planning) Khasim Vashum, Commissioner Health and Family Welfare and IT Sumant Singh, Director, JNIMS Dr. Deben Laishram te’n le a uap ui.

CM in public welfare schemes chuam chuam hawng

Imphal, June 27 (Nisin Thuhiltu): Chief Minister N. Biren Singh in tuni’n Panchayat Bhawan complex, Porompat ah State Panchayat Resource Centre (SPRC) leh District Panchayat Resource District (DPRC), banah 100 days programme nuai ah public welfare schemes chuam chuam hawnna a nei hi. Zia public welfare schemes te chu Rural Development & Panchayati Raj (RDPR) nuai ah hawn a hi. Welfare schemes kihawng thak te chu Online ah Births leh Deaths certificates lak theina ding e-Panchayat, MGNREGS nuai ah a hun tak ah sepman mutheina ding e-FMS (Electronic Fund Management System) te a hi. Zialo a chun, Zilla Parishad (SPRC), Imphal East office hawnna le a nei hi. Chief Minister in a thugenna a chun, Minister leh MLA diklo tak ah nasem thil bawl leh nekguk chiing a um leh gawtna piak hiding in a gen a, top level a pat suthian a hi masang sia corruption kiti sukbei thei hilo ding in a gen hi.
Panchayat Bhawan complex, Porompat ah hun matzaw in Chief Minister N. Biren Singh in Law and Legislative Affairs Department saina’n Court Complex, Lamphelpat ah numei te a ding bik in Court of Additional Sessions Judge (Fast Track Court) hawnna a nei a, A. Noutuneshwori Devi, MJS Grade-I chu Judge ding ah guat in a um hi. Chief Minister in a thugenna a chun, Judiciary in numei chung ah gamtatna kilawmlo um te a umlona ding ah dan thak a puakdaw ding dawi in a gen a, fast track Court in kituptak leh thiangtho tak ah panlakna a nei ding pawimaw in a gen hi.

GST nuai ah tax kidawldawk hawi zaw di: Deputy CM

Imphal, June 27 (Nisin Thuhiltu): State Government panlakna nuai ah Goods and Service Tax (GST) Bill tawh kisai ah dealer, businessmen, stakeholder leh mipi te lak ah awareness a um theina ding tup in tuni’n Classic Hotel, North AOC ah GST chung chang ah one day interactive programme nei a la hi’. Commissioner of Central Excise & Service Tax, Shillong, Govt. of India in Commissioner of Taxes, Department of Taxes, Govt. of Manipur kithuapina tawh programme chu a sai a hia, zia hun chu Manipur Deputy Chief Minister leh in-charge Finance, Taxation & Excise, Y. Joykumar Singh in chief guest hina tawh a uap a, Chief Secretary O. Nabakishore Singh in President banah Commissioner of Central Excise & Service Tax, Shillong, Gaigongdin Panmei (IRS) leh Commissioner (Finance), Govt. of Manipur Vivek Kumar Dewangan te’n Guests of Honour hina tawh uap in GST bill tawh kisai ah a phatchuam dan le tax piak ding dan genlatna a um hi. Taxation Commissioner, Govt. of Manipur Hrishikesh Modak in power- point presentation tawh kithua in GST ah basic concept, salient feature leh a phatchuamna te genlatna a nei a, GST in 8 Central tax 8 leh State tax 9 gawmkhawm ding hi ah gen kawm in GST Council thupukna dungzui ah GST tax structure chu tier 5 - 0%,5%,12%,18% leh 28% ah khen a um a hi dan a hilchian hi. Chief Secretary O. Nabakishore Singh in GST a pat mipi leh state in phatchuamna tamtak dawng ding a hi dan genchian kawm in tax rate chu niam deu ding a hina ah van man le kiam ding leh economy le hawi zaw ding hi’n a gen hi. Chun, "Make in India" programme le hung hat diak in GDP leh 1-2% kikal tuam khangbe zo ding ah gingchat um hi’n a gen hi. Chief Guest Y. Joykumar in GST chu ham khat ah tax khat a um na ding tup ah kibawl a hi dan genlang kawm in tax kisel dawk sukbeina ding ah kalbi hawi tak hi’n a gen a, tax chuam chuam gawm khawm ding a hina ah tax kidawl dawk hawi zaw ding banah resource mobilisation leh economy siam hawi tu hi ding ti’n le a gen hi. GST ziak ah van man khang ding ti thuthang um tawh kisai a hilchianna a chun, zia thu chu thulêm hi’n a gen a, GST nuai ah van man chu a kiamlo tâk lehle ni dang tawh kibang tho ding hi’n a gen hi. DGP lui, Y Joykumar in a genbe na a chun, GST chu chi 3 - Central, State leh Integrated um hi’n a taklang a, IGST chung chang ah tax chu Centre leh a zuak tu state te a kim hawp ding uh a hi dan le a taklang hi.

Rashtriya Indian Military College ah Admission
Imphal, June 27 (Nisin Thuhiltu) : Rashtriya Indian Military College, Dehradun ah Admission a ding Qualifying Examination chu a hung tung ding December 1 tawh 2, 2017 leh Ram Lal Paul Hr. Sec. School, Imphal ah um ding a hia, zia chu July 2, 2005 leh January 1, 2007 kikal a piang Class VII simlai a hiloleh a zosa te’n bawl thei ding a hiu. Session a hileh July 2018 ah kipan ding a hi. Admission tawh kisai ah thuchian hiatne nuam te’n OSD/Exam, Directorate of Education (S), Lamphelpat a hiloleh Education Department official website: www.manipureducation.gov.in ah khan chian thei ding a hi.