SOCIAL WELFARE MINISTER IN NUMEI TE DING AH 24/7 TOLL FREE HELPLINE NUMBER ‘181’ HAWNG

Imphal, June 23 (Nisin Thuhiltu): Social Welfare & Cooperation Minister Nemcha Kipgen in tuni’n numei haksatna tuak te a ding in 24/7 toll free helpline number ‘181’ a hawng hi. Zia number a hi mimal ah haksatna nei, ahiloleh public ah engbawlna tuak numei te’n panpina dawn thei ding a hiu. Kuranga Nayani Hall. D.C. office Complex, Imphal West ah Manipur State Commission for Women (MSCW) leh Department of Social Welfare, Manipur in Ministry of Women & Child Development, Government of India sponsored bawlna numei haksatna tuak te kithuapina ding ah panlakna a nei uh tawh kitawn ah haksatna tuak numei te kithuapina ding ah 24/7 toll free helpline number ‘181’ kihawng a hi. Minister Nemcha Kipgen in a thugenna a chun, “Women Helpline” chu numei chung ah gamtatna kilawmlo tak tak um sek te dodalna ding hin a gen a, helpline number ah panpina dawn te a vaima theipen ah delzui hiding leh medical assistance - PCR Van, ambulance, police, legal aid leh one stop centre ah professional counselling ti te a pawimaw dungzui ua neipi hiding in a gen hi. Chun, mipi te ziagual panlakna chu support ding leh kithuapi ding in chialna a bawl a, tu leh tu ah staff 7- 1 Helpline Manager, 1 Senior Call Responder, 4 Call Responders, 1 IT Staff, 1 Multipurpose Helper te’n Imphal West Police station tawh kithua ah panlakna nei zing un a gen hi. Hiatthei khat chu Ministry of Women & Child Development, Government of India in 181 helpline number hi kum 2013 ah a la hawn a hia, December 2012 ah Nirbhaya gang-rape a pat numei te bitzawk semna ding ah panlakna a hi. Chairperson, MSCW Dr. K. Sobita Devi, Principal Secretary, Social Welfare Manipur Shri JC Ramthanga, IAS, Director Social Welfare, Manipur Jacintha Lazarus, IAS, DC Imphal West Shri N. Geoffrey, IAS te’n le 24/7 toll free helpline number ‘181’ hawnna hun chu a uap ui.

HSO PRESIDENT KAPLUP AH UM

Imphal, June 23 (Nisin Thuhiltu): Palal Haokip, President, Haokip Students' Organisation (HSO) General Headquarters chu tunitak lam in a chenna Game Village, Zone -I ah melhiatlo pawl khat in a inn gate a tun tak in meithal in a kap ua, RIMS hospital tut himaleh damzo lo in a mualliam hi. A kigendan ah Palal Haokip hi mimal thil ah pawt, inn zuan ah a ki le kitlam ah a inn gate uh a tun ah a car a pat kumtha nailo ah Maruti blue colour car ah tai pawsal thum in a kap uh a hi. A kaptu te chu kintak a taimang uh hin le a kigen a, a car mat uh number tepte man kuama umlo ua hiat a hi. Palal Haokip a hileh Haokip Students' Organisation (HSO), GHQ President a hibak ah Teacher le hi a hi. Chun, a taksa chung ah meithal chang 3 a lut hi. A langkhatlam in zia thu zik a hi tiang ah kua te’n bang ziak ah a kaplup uh a hi em ti hiat a hi nai pua, kaplup ah a umna ziak leh a kaplum tute hiatdaw a hi masangsia thiluang lak hilo ding in le a kigen hi.

STATE MONITORING TEAM IN NASEP ENTHA
Lamka, June 23 (Nisin Thuhiltu): State Monitoring Team khat in tuni’n District Hospital ah District Level Intensified Diarrhea Control Fortnight (IDCF) 2017 nasep etthâkna a nei u’i. State Health Society a pat Monitoring Team a chun Dr. Somorendro, State Monitor, Churachandpur District leh Satyajit Kangujam te a pang ua ua, ama un District Hospital ah Children Ward leh Neonatal Ward etthâkna nei in naupang leh nausen sungkhaw tawh kisai in Ward a duty doctor umte a kihopi ui. IDCF a hileh a chiata June 12, 2017 a khan Kangvai Higher Secondary School ah hawn in a la um hi.

LIMLAK KIDEMNA UM DI
Lamka, June 23 (Nisin Thuhiltu): Siamsinpawpi (SSPP) General Headquarter in ‘Siamsinna Mah Awle’ ti thupi chiapi kawm in Siamsin Photo kidemna sai ding a hi. Kidemna a chun “Zodawn Education” ti thupi mang ah limlâk piakkhawm kidem hiding a hia, limlak a hileh This email address is being protected from spambots. You need JavaScript enabled to view it. a thawt thei a hi banah Secretary, Public Relations, SSPP Complex, Siloam Veng, Bungmual kiang in khut ah va piaklut thei ding a hi. Kidemna a pang Zodawn a pat kipan te’n a umna uh SSPP Headquarter/Joint Headquarter/ Block/ Branch/ Unit te through ah piathei ding a hiu. Kidemna tawh kisai ah lunglutna nei te’n August 1, 2017 a pat September 23, 2017 sung ah limlâk pialut thei ding a hiu a, result a hileh Siamsinpawlpi Flag Day 2017 ni leh puandaw hi ding a hi. Zia kidemna a chun 1na a hileh Rs. 10,000 leh Citation hi ding a hia, a dang 10 te kiang ah Rs. 500 leh citation piak hi ding a hi.

HOSPITAL AH INDICATOR KAWIBE A UM
Lamka, June 23 (Nisin Thuhiltu): Churachandpur District Hospital ah damlona tawh kisai leh pawimaw chuam chuam ziak ah chiate panpitu ding in Hospital Block chuam chuam ah lamhiltu ding Indicator kawibe in a um hi. Hospital Administration panlakna nuai ah hun bangchan a h’em a pat nasepna pat a la hita, Hospital Block chuam chuam Ground Floor te a chun Block sung ah Department um zosia banah Room Number tite tâkdaw in a um a, corridor a le Department chuam chuam zawtna ding lamhiltu ding tâk a hi ban ah Visiting Hours leh Hospital sung ah hi ding ah kilawm te kizikna a kitâk hi. Indicator ki tâk thak te chu Hospital ah ki etsak ding leh damlo vê a chia te banah lekha pawimaw ngaitua nuam te a ding ah phachuam mama ding ah gingchat a hi.

OVERDOSE TE ETKAWL DING DAN TAWH KISAI TRAINING NEI
Lamka, June 23 (Nisin Thuhiltu): Project Sunrise, FHi360, SHALOM leh DAPCU te kithua ah Overdose Response & Management training chu tuni’n khak in a um hi. JJ Plaza, Rengkai Road a um zia training chu zani kipan in zia hun a chun Paukhansang, District Mentor, FHI in Overdose tawh kisai ziltilna a la pia in SHALOM a pat Esther in damdawi khamthei tawh kisai leh Manthianching, Project Manager, LRRC in Overdose te kawlding dan tawh kisai ziltilna a la piau hi. Betty Lalumpui in tuni’n ziltil piaksa a um te etthakkitna hun nei pi in Dr. Romeo, DACO Churachandpur in damdawi khamthei hi zawngsak ah haisan nuamte a ding ah kimang “Naloxone” damdawi tawh kisai ziltilna a pia, Anthony, ORW, SHALOM in Overdose te tuakkhak hun ah panpi ding dan tawh kisai a ziltil hi. Paukhansang, District Mentor, FHI in khamthei hi zawngsak ah haisan nuamte kithuapi ding dan leh khawitak kawkmu ding tite a ziltil a, Benjamin, Supervisor, DAPCU in damdawi khamthei overdose a pat kivêng ding dan leh overdose etkawl ding dan a hil hi.

DMO IN MALARIA TAWH KISAI AH HIATSAK
Lamka, June 23 (Nisin Thuhiltu): District Malaria Officer/District Nodal Officer, National Vector Borne Diseases Control Program (NVBDCP), Churachandpur in District sung ah khuahausa, Village Health Sanitation & Nutrition Committee (VHSNC) a member, Kochuam leh khawtang puitu te banah mipi zosia hiat ding ah Malaria leh Dengue natna tawh kisai hiatsakna a bawlna a chun, Manipur ah January 16, 2017 a pat Malaria leh Dengue natna mudaw a hi a pat sukdam thei natna ah puan hi’n a gen a, June 13, 2016 ah Deputy Commissioner, Churachandpur in Malaria natna dodalna ding ah panlakna a la hawng hi ah taklang kawm in tuni tiang ah District a pat Malaria, Dengue leh Japanese Encephalitis um nalai a hi chetna um hi’n a gen hi. Zia natnate a pat kivenna ding ah innkiang leh khawsung sukthiang ding, thokang tui thak theina ding leh gan vâkna mun te hethiang ding, thokang kipe saklo ding, khosik ziak ah damlou leh Malaria, Dengue leh Japanese Encephalitis ding ah ki gingmaw te’n kitak a mani chenna tawh kinai a um, Health Worker leh ASHA a hi loleh kizen theina naipen nai ah Free Blood Test, Free Diagnosis leh Free Treatment mu thei ding hi’n a gen hi.

CITYWIDE CONCERT NEI DI
Lamka, June 23 (Nisin Thuhiltu): Zogam Artists’ Association (ZAA) saina nuai ah zing, June 24 leh um ding Citywide Concert a ding ah kisaklawkna a tamzaw zawthiang hita hi’n a kigen hi. Concert hun ah lasa tiam Band minthang taktak leh local artist hunkhawp in lasakna nei ding a hi ban un Delhi a pat Sound Engineer in Sound lam mawpuakna la in Manipur ah a hawipen a kigen Sound System mat hiding a hi. Sound System leh Light Fitting te chu aleng ah tuni’n zawthiang hita, District sung ah Military Personnel um te’n le tuni nasepna kithuapi in Concert ente’ chutna ding Carnet a matsak ui. Concert a hileh sunnung dak 3:00 leh kipan ding a hia, Delhi a pat Traffic Jam leh Lamka a pat The Six Strings, Breaking the Silence, Endless Drive, Apostic, Lemon Juice, Steller, RAV, Akaxia, The Inndongta, Semika, Go Hau & Party leh Suaka (MZI) ban ah mimal lasa thiam chuam chuam te’n lasakna nei ding a hiu.

INTERNATIONAL DAY AGAINST DRUG ABUSE MANG DI
Lamka, June 23 (Nisin Thuhiltu): District Social Welfare, Churachandpur leh GINGODAP IRCA, Churachandpur kithua in a hung tung ding June 26, 2017 sunma dak 11:30 leh Synod Hall, IB Road ah International Day against Drug Abuse and Illicit Trafficking kiti mat hiding a hia, zia hun a chun Ministry of Social Justice and Empowerment, Government of India sponsored na nuai ah etkawl a um District sung ah Integrated Rehabilitation Centre for Addicts palaite chiakhawm in thugenna nei ding a hiu.

SILVER MEDALLIST VAIDAWNNA NEI
Lamka, June 23 (Nisin Thuhiltu): YPA Vengnuam South Unit malatna’ tuni’n Manipur State level Boxing 2017ah silver medal lâ, Grace Chingngaihlian d/o (L) Chinsong of New Lamka Vengnuam vaidawnna nei a hi. YPA Vengnuam South Unit malatna’n Kangvai khau ah Grace Chingngaihlian vaidawnna um in YPA GHQ, YPA block leh unit chuam chuam a pat puitu te’n pâkkhi awsakna a nei u’i. Zia hun matna a chun, puitu chuam chuam te ban ah Grace Chingngaihlian a pat thugenna um in K Pumsungthang, Local Pastor, EBCC Pathuel in Grace a ding in pauchapna a nei piak hi. State Level Boxing ki elna ah Silver medal leh best looser award lâ Grace Chingngaihlian a hileh January 18, 1997 ah piang a hia, suapi numei 5 leh pasal 1 nei in a unau lak ua a thumna a hi ban in Don Bosco School ah Class 9 a zaw nung in SAI, Imphal ah a lut in 2015 kum in NIOS nuai ah Class X a zo hi.

UKB IN ELECTION NEI

Lamka, June 23 (Nisin Thuhiltu): Churachandpur District sung ah football club min chia mama te lak ah khat - United Khawzim Brother (UKB) tuni, 23 June 2017 nitaklam dak 2:00 in VPC Complex, Bethel Veng in kum 2017- 2019 sung ah vaipaw thak ding - President leh Vice President telna (election) a nei ua, zia hun a chun, President ding ah Mr H Sangpi of Compound Veng teltin in a um a,Vice President ding ah Mr Lian Thangvung of Leisang Village tel tin in a um hi. Teltin ah um President leh Vice President in ni 10 sung ah cabinet a a keklian ding uh leh a sukfel ding uh hin a kigen a, 25th June 2017 leh vaipaw lui leh teltin thak ah um te’n kikhutna nei ding uh hin le a kigen hi.

MINORITY TE DINMUN DAWPKANG MASANG SIA GAMSUNG KHANTO THEILO DI: SHYAMKUMAR

Imphal, June 23 (Nisin Thuhiltu): Manipur State Film Development Society (MSFDS), Palace Compound, Imphal ah tuni’n Ministry of Minorities Affairs, Government of India, National Institute of Public Cooperation & Child Development (NIPCCD), Ministry of Women and Child Development, Government of India te saina Manipur ah student te ding bik in “sensitization and career counselling workshop” a um a, zia hun chu MAHUD Minister Thounaojam Shyamkumar in Chief Guest hina tawh a uap hi. Ama’n a thugenna a chun, minority te leh a zawngkhal diak mi te dinmun dawpsan a hi masang sia India gamsung pumpi khantona bukim theilo ding a hidan a gen a, election term 3 teltin a hitak nung ah Ministry of Minorities Affairs, Government of India vaisaina programme ah thugen thei ah a um chu kipak mama a hidan a a taklang hi. Minister Shyamkumar in election ah teltin a hi masakpen hun ah a thil ngaikhawk pen chu minority leh a zawngkhal diak mite lak ah education dinmun siamhawi ding ti a hidan taklang in Union Ministry of Minorities Affairs in minority te ding ah scheme chuam chuam a puakdaw kipakpi mama a hidan a gen hi. Forests & Environment, Horticulture & Soil Conservation & Town Planning Minsiter le hi Shyamkumar in a genbelapna a chun, ama bial - Andro Assembly Constituency ah Azad Higher Secondary School, Yairipok leh Poiroukhongjil High School, Yairipok te Ministry in infrastructure a puaphatna chung ah kipak mama hin le a gen a, ama constituency chu Government School ah student tamna pen ah pangpha a hidan le a gen hi. Zia hun matna a chun, Ameising Luikham, Secretary, Ministry of Minority Affairs, Government of India leh Niva Singh, Joint Secretary, Ministry of Minority Affairs, Government of India; Dr. J. Suresh Babu, Additional Chief Secretary; officials of MOBC & NIPCDD te’n le thugenna a nei ua, Workshop in student 500 a pang ui.

SPORST IN KHAT LEH KHAT EI KANKHAWM: LETPAO HAOKIP

Imphal, June 23 (Nisin Thuhiltu): ‘Run for Peace and Friendship’ ti thupi nei ah Manipur Olympic Association in Youth Affairs and Sports Department tawh kithua ah organised a bawl Olympic Day Run-2017 flag-off bawlna tuni’n Youth Affairs and Sports Minister Letpao Haokip in Main Stadium, Khuman Lampak Sports Complex in a nei a, ama’n a thugenna a chun, sports in khat leh khat ei kankhawm leh ki unauna banah kipumkhatna suhat a hidan gen in chamna a um theina ding ah sports in panmun pawimaw tak nei a hidan taklang kawm in sports chu mi kankhawmtu khat hin a gen hi. Sports in taksa dam theina, ngaituana pha leh chamna eipe thei a hidan le a gen a, zia chu tawh kitawn ah State Government sportsperson te dinmun dawpsanna ding ah panlakna nei zing hin a gen hi. Olympic Day Run-2017 a chun official leh player 1000 val te a pang ua, flag-off bawlna hun chu I. Hemochandra Singh, President, Manipur Olympic Association; Prof. Adya Prasad Pandey, Vice-Chancellor of Manipur University leh H. Deleep Singh, IAS, Commissioner (YAS & Higher Education) te’n le a uap ui.

GUA ZUK HUN HIMALEH HIGHWAY REPAIRING WORKS CHIATHA ZING : MINISTER TH.BISWAJIT

Imphal, June 23 (Nisin Thuhiltu): State government in national highways ah nasepna ngaikhawk mama a hidan Public Works Minister Thongam Biswajit Singh in New Secretariat conference hall, Imphal ah press conference in a gen a, weather condition panna haksatna zat chuam chuam um maleh government in state ki-ngakna highways te a kitup thei ding pen ah siam ding tup zing hin a gen hi. Tulak gua zuk ziak ah highway ah nasepna chuam chuam a diak ah Imphal-Mao highway ah nasepna kituptak ah chiatha theilo hin a gen a, himaleh nasepna chawllo a hidan a gen hi. Chief Minister thupiak dungzui ah present BJP-led government in a diak ah hill district te lampi dinmun siamhawina ding ah panlakna nei zing in le a gen a, panlakna um zosia te chu short term policy bep hilo, long term policy le hin a gen hi. Mao-Maram highway vena a nei hun ah lampi kuakna mun te hukdim leh siamhawi hiding ah thutiam a bawl dungzui ah nasep kipanta a hidan gen in, Kuki Taphou - Maramand ; Maram – Mao kikal lampi te sia diak ah mu a hidan a gen hi. Lampi siamphatna pat ah um himaleh gua zuk hun ah black topping bawl thei hilo in le a gen a, gua (rain) tui in lampi kua kihukna te susia a hidan le a taklang hi. Gua zuk hun (season) a bei tak leh a vaima theipen ah highway black topping pat hiding in a gen a, nasepna kituptak ah maban sutzawm theilo a hi ziak ah Motbung, Henbung, Kangpokpi, Khongnem lampi te sia zing a hidan gen in, Minister Biswajit in mipi te kithuapina a dawn hi. T Khullen leh Kuki Taphou ah nasepna chiatha zing a hidan taklang kawm in Imphal-Dimapur Highway chu state ding ah lifeline pawimaw mama a hina chung ah lampi siamphatna nasep sutzawm hizing in a gen hi. Minister Biswajit in a gen belapna a chun, nimchim (landslide) in lampi a suksiatna mun te ah additional chief engineer sawl ah um leh JCB tawh lampi siamthak ah um a hidan te a gen a, mipi te chu department haksatna hiatthiampi ding ah chialna bawl in a lemchan hun hun ah lampi siamhawi hiding in a gen hi.Chuleh, overloaded truck te ziak ah lampi sia nuam mama in a gen a, Chief Minister tawh kithuhiat ah truck te weight limit umsak ding dan ngaitua hiding a hidan genkawm in, Imphal-Jiribam Highway dinmun masang sang ah hawi chuam mama ta a hidan a gen hi. Zia press conference a chun, Minister banah chief engineer Ch.Tiken leh additional chief engineer N.Noren te le a pang ui.

GAM-SA LEH VACHA VENBITNA DING AH AIR GUNS KHAP PAWIMAW: MINISTER SHYAMKUMAR

Imphal, June 23 (Nisin Thuhiltu): Forest Department, Manipur and Wildlife Institute of India, Dehradun te saina’ tuni’n Imperial Hall, Classic Grande, Chingmeirong ah State Level Stakeholder Workshop for ‘Management Planning of Keibul Lamjao National Park and Conservation of Sangai’ ti a um a, forests and Environment Minister Thounaojam Shyamkumar in a thugenna a chun, state sung ah vacha leh gam-sa/gan hing te venbit theina ding ah air gun leh barrel gun mat phal taklo ding lemsa a hidan a gen a, next Cabinet meeting hun ah proposal bawl ding hin a gen hi. Chun, air gun leh barrel gun mangtu te’n smaller firearm a mat uh hawizaw ding in le a gen hi. State Government in Keibul Lamjao chu eco-tourism park ah siamdaw ding ah guanggalna nei a hidan le a gen a, National Park kiangnai tuam ah um te Keibul Lamjao National Park leh Sangai venbit a pawimawna tawh kisai ah awareness, training piak pawimaw a sak thu le a gen hi. Sambhu Singh, Additional Chief Secretary (Forests & Environment), State Forest Department official te, Wildlife Institute of India, Dehradun official leh scientist te’n le zia workshop chu a uap ui.

MUN CHUAM GEL AH THI LUANG 2 KIMU
Imphal, June 23 (Nisin Thuhiltu): Tengnoupal District ah Marchi Police Station huap sung ah um Khabi keithel leh Parentong Village kikal ah kaplupsa T Angsin (36) so/o T Selmon of Biyang Village, Khoibu Centre luang mudaw in a um hi. A luang mudaw a hi tawh kitawn ah Forensic Sciene Expert te tawh Police team in vala dawk in JNIMS morgue, Imphal a tut ui.Mit ah mute gendan ah Angson chu a veilam luchang a pat meithal ah kikap, a changlam pang luchang ah meichang pawt in a gen ui. Himaleh kua te'n bang ziak ah a kaplup uh a hi em ti hiat a hi puai. Chun, Tiny TotsUnique School Dewlahland, Imphal kiangnai ah tuni nitak lam dak 5:30 in numei kum 40 mi khat a thisa mudaw in a um a, mudaw ah um thiluang chu Begum hi ah hiat a hi. Himaleh a thina ziak hiat a hipuai.

TWILANG AREA AH GANCHA 100 IN FMD ZIAK AH THINA TUAK
Kangpokpi, June 23 (Nisin Thuhiltu): Foot-and-Mouth Disease (FMD) or hoof-and-mouth disease (Aphthae epizooticae) ziak ah Kangpokpi District, Twilang area ah gancha a 100 ah sim ten thina tuakta a hidan uh taklat in a um a, Veterinary Department official te’n diklo tak report a piak uh demna bawl in Twilang area leader te’n Executive Member of ADC Sadar Hills leh Veterinary official te kimupi in thil umdan a tut ui A langkhatlam ah Kangpokpi DHQ ah BP Vikas Basnet, Executive Member (Vety), ADC-SH in press conference ah a genna a chun, mipi’n haksatna nasatak a tuak laitak ua, a mun ah thil umdan dik tak helo ah Veterinary Department official, thil umdan entha ding ah kisawl te’n report a piak uh chu demna a bawl in, mipi te haksatna sukvenna ding ah panla ding hin a gen hi. Chuleh, bawng (cow) 88 leh kelcha (goat) 2 te’n Foot-and-Mouth Disease (FMD) ziak ah thina tuakta a hidan uh le a gen a, gancha thina tuak zat kituptak ah khualna nei ding pawimaw in a gen hi.

DRUG AWARENESS CAMPAIGN
Imphal, June 23 (Nisin Thuhiltu): Khamthei dodalna chiapi a hi zing tawh kitawn in tuni’n HQ IGAR (South) nuai ah 11 Assam Rifles of 26 Sector Assam Rifles in Chavangphai village, Tengnoupal District ah drug awareness campaign bawlna a nei a, zia hun a chun khangthak leh student te lak in khamthei ziak ah hinkhua siatdan leh a phatlo dan te suklat in a um hi.

MANIPUR AH HOME GUARD TE KIPHIN
Imphal, June 23 (Nisin Thuhiltu): Home Guard personnel te duty allowance pungsak ding ah Supreme Court in thupiak a nei tawh kisai ah Manipur government in tu tiang ah a sai fel nailo ziak in personnel te’n tuni’n huntiam umlo kiphinna a pan u’i. Manipur Home Guards’ Welfare Organisation (MHGWO) in state government kiang ah a chiata March 11, 2015 ah Supreme Court thupiak dungzui ah duty allowance chu police constable te a tawh kibatsak ding leh a kin theilam ah zia thu chu sai fel ding in le a dawn u’i. Supreme Court in state government kiang ah home guard te duty allowance chu police personnel te a tawh kibatsak ding in thu a pia, zia thupiak chu tha 3 sung ngei ah mat pat hi hen ti’n le a hiatsak hi. Manipur High Court in le tukum January 12 a khan tha 3 dung ngei ah Court sangpen thupiak chu zui ding in state government a hiatsak hi. Manipur Home Guard Employees Welfare Association (MHGEWA) nuai ah kikhaikhawm home guard personnel te’n state government in court 2 te thupiak zui lo hi ah gen kawm in tuni a pat nasep chawlsan ding ti’n a thupuk ui. Amau un SC thupiak chu zui pat hi hen ti’n a chiata April 8, 2015 a pat khan kiphinna a la nei pan tau hi. Cease-work strike bawl uh a hi dan suklatna ding ah tuni’n home guard personnel te’n lamzawtna nei in Keishampat Junction, Imphal ah sit-in protest le a nei ua, a phût uh government in a limsak lo a hileh kiphinna dang chuam chuam le chiapi ding ti’n le a genlawk u’i. Tu dinmun in Manipur ah Home Guard personnel 2158 a um hi.