YOGA DAY KIMANG
Lamka, June 21 (Nisin Thuhiltu): District Administration mapuina nuai ah tuni’n Peace Ground Auditorium, Tuibong ah International Yoga Day matna a um a, zia hun a chun Shyam Lal Poonia, IAS, DC Churachandpur leh Rakesh Balwal, IPS, SP Churachandpur te panna’n District Level Officer, top ranking police official banah student tamtak a pang ua, Patanjali Yoga kiziltilna a um hi. Yoga Day mat hun a chun Widows Women Association, Asia nuai a Women Self Help Group chuam chuam te’n khutthiam thil chuam chuam suklatna le a nei u’i. Assam Rifles saina nuai in Headquarter Veng a le Yoga Day matna a um a, zia hun chu pawl chuam chuam a pat puitu hunkhawp te’n le a uap ban un Sangga Muon Inn, Bijang a pat naupang te le a pang u’i. Chun, STC BSF, Mualkoi ban ah Khuga Battalion saina in le Yoga Day matna a um a, zia hunt e a chun Yoga ziltilna leh posture chuam chuam te suklatna a um hi.
ZONET TEAM IN LAMKA AH NAM LAWI UPATE KIMUPI
Lamka, June 21 (Nisin Thuhiltu): Mizoram leh Manipur ah cable minthang leh mite’ ngainat mama, ZONET in tuni zingkal in P. Kamkholal Vaiphei, EM/ADCC chenna inn ah Vaiphei People’s Council (VPC) GHQtrs, Young Vaiphei Association (YVA) GHQtrs leh Zillai Churachandpur Block (ZCB) lawi upate kimupina a nei hi. ZONET ai-aw in Director Vanneihtluanga; Editor, Lengzem leh a zi Lalawmpuii ban ah ZONET Presenter/Reporter K Lalhruaitluanga te chu a chiata June 18 a khan Aizawl nusia in Lamka hung a hiu a, June 23 leh Aizawl zuan kit ding a hiu. VPC, YVA leh Zillai lawi upate tawh kihona a nei hun un pawl chuam chuam te panlak dan leh Vaiphei nam tawh kisai thu chuam chuam dawng in hun chawm khat a mang khawm ua, ki unauna lam ha gen pi pen uh hi’na kigen hi. Zia hun a chun, ZONET palai te’n interview na hun le nei in tunung sawtlo ah zia chu suadaw hi ding in a gen u’i. 1997-98 lai ah inn leh lo nusia ah Mizoram ah pemlut mi hunkhawp te chu a gem neite’n hawi tak ah a la lamtua in tu tiang ah a gam mi gual ah a cheng den sak ziak ua ZONET mangcha’n YVA lawiuapte’n kipakthu phuandawna le a nei u’i. Hun matna zaw in P. Kamkholal Vaiphei, EM/ADCC in ZONET palai te leh lawi upate annek khawmpina le a nei hi. Chun, sun lam in ZONET team in nam chuam chuam ah lawi upate le kimupi in holimna le interview a nei pi u’i.
MALARIA VEI MI 2 MUDAWK
Lamka, June 21 (Nisin Thuhiltu): Malaria Department, CCpur in June 15, 2016 tiang in clinic leh testing centre chuamchuam ah malaria vei ding a ginmaw mi 826 thisan sample a test lak na ua malaria vei mi 2 mudaw ah um hi’n department in record a bawl in a taklang a, positive mudawte lak ah Falciparum (PF) umlo hi’nle a taklang hi.
OIL PUMP TE HIATSAK
Lamka, June 21 (Nisin Thuhiltu): DC/CCpur Shyam Lal Poonia, IAS khawpi sung ah oil pump 3 - M/S Tuibong Service Station, M/S Suakhnun & Sons leh M/S Lamka Filling Station te hiat ding ah thusua a bawl na a chun, June 10, 2017 ah DC order umsa dungzui in oil pump te’n zingkal dak 7:00 a pat nitak dak 7:00 tiang hawng ding ti himaleh hun kipia zuilo oil pump khenkhat in um a hi hiatdaw hi’n a taklang a, hun kipia zuilo Oil pump a um kit a hileh a chung ua action khautak lak hiding in gen hi.
PIPE LEAK
Lamka, June 21 (Nisin Thuhiltu): Public Health Engineering Department (PHED), CCpur etkawlna nuai a um, Zone_III (Khuga Dam) in a supply Bijang area tui piakna ding ah pipe kithun chu Bata Store mai Teddim Road ah a leaked ziak in a thawn ah tui tamtak a luang mang hi. Thiltung tawh kisai ah department te thu hiatthei a hilo ban un pipe leaked na kiang ah reliance company te’n fibre a vuina ding ua lei khuat uh hi’n a kigen a, bang ziak ah tui put thei a hi hiat chian a hi nai puai.
MTDC IN 38TH FOUNDATION DAY MANG
Imphal, June 21 (Nisin Thuhiltu): Lamphelpat, Imphal ah MTDC Office Complex in tuni’n Manipur Tribal Development Corporation Ltd. (MTDC), 38th Foundation Day matna a um a, zia hun chu N. Kayisii, Minister, Tribal Affairs & Hills in Chief Guest hina tawh uap in thugenna a nei hi. Kayisii in MTDC chu tanggam ah khantona a um theina ding ah panlakna chuam chuam nei leh panmun pawimawtak lua hi’n a gen a, tribal welfare masawnna ding ah nasatak ah MTDC panlakpi ding hin a gen hi. Parliamentary Secretary, Planning & Transport, Khashim Vashum in a thugenna a chun, MTDC chu gamsung ah corporations hawipen hin a gen a, MTDC ah semtu te panlak hawi ziak ah MTDC masawn zing hin a gen hi. Chun, contractor leh engineer te banah staff te chu kituptak ah nasem ding in chialna a bawl hi. Functional President hina tawh hun matna uap Vungzagin Valte, Chairman, MTDC in a thugenna a chun, Manipur Tribal Development Corporation Ltd. (MTDC) chu hills leh valley kankhawmtu khat a hidan taklang kawm in, state sung ah tribal leh scheduled caste te phatchuampi thei ding ah kisiam dawk hin a gen a, engineer leh staff te panlakna kipakpi mama in a gen hi. Chuleh, sepding bakkhai tamtak um nalai in a gen hi. Foundation Day matna hun chu Commissioner (TAH) & Managing Director, MTDC T. Pamei, IAS, Deputy Commissioner, Pherzawl A. Tombikanta, IAS, Director (TAH), Jt. Director (TAH), General Manager, MTDC, MTDC engineers leh staff te banah TAH Department officer leh staff te leh Bank Managers leh ADC Members te’n le hun matna a uap ui. Manipur Tribal Development Corporation Ltd. (MTDC) ahileh autonomous body khat a hia, 21st June, 1979 a la kihawng, State Government in Tribal Affairs, Hills & Scheduled Castes te masawn theina ding ah a ma latu ding ah a matchak Department a hi.
MANIPUR CHIEF MINISTER’S DASHBOARD
Imphal, June 21 (Nisin Thuhiltu): Manipur khangthu amasapen ding in Chief Minister's dashboard - “Dial a DC” kiti Video Conferencing ah kiho mat theina ding hawn in a um a, zia chu mang ah Hill Deputy Commissioner te tawh hun sin ah Chief Minister a ki ho mat theina ding ua kisiam “Dial a DC” kiti hawnna Union MHRD Minister Prakash Javadekar umna’n Chief Minister in tuni;n a nei a, zia chu tawh kitawn in DC Ukhrul Pradeep Chandren tawh Video Conference in kihona a nei ngal ui. Union Minister MHRD in Ukhrul District ah Kendriya Vidyala leh Jawahar Navodya dinmun tawh kisai in DC Ukhrul a kihopi hi. Manipur CM Dashboard ahileh single page aggregated view i) Secretariat Attendance ii) Power Outage iii) Secretariat lui leh thak te CCTV coverage bawl ding, iv) DARPAN v) Cases reported & Anti Corruption Cell vi) Food Safety Report vii) Jeevan Pramaan viii) Miyamgi Numit ti te tawh kisai ah a hun hun ah suklat leh kiho mat theina a hi.
FULL-FLEDGED AUTONOMOUS CENTRAL UNIVERSITY AH IGNTU-RCM UPGRADE HIDI
Imphal, June 21 (Nisin Thuhiltu): Ministry of Human Resource Development in Indira Gandhi National Tribal University- Regional Campus Manipur (IGNTU-RCM) chu full-fledged autonomous Central University ah upgrade bawl ding in lemsakna a sulang hi. Zia lemsakna chu Union Minister, Prakash Javadekar in ATSUM, IGNTU Students’ Union leh student body chuam chuam te tawh tuni state Capital ah meeting a nei hun ua a gen lat a hi. Seiboi Haokip, General Secretary, ATSUM in a genna a chun, Union Minister in a vaima theipen ah Indira Gandhi National Tribal University- Regional Campus Manipur (IGNTU-RCM) chu full-fledged autonomous Central University upgrade bawl ding ah thutiam bawl in a gen a, Manipur University ah reservation chungchang leh regular faculty appointments tawh kisai le Union Minister tawh genkhawm uh hin a taklang hi.
ARMY TEN MUN CHUAM CHUAM AH YOGA DAY MANG
Imphal, June 21 (Nisin Thuhiltu): IGAR (South) Units lehRed Shield Division in tuni’n mun chuam chuam - Mantripukhri, Kakching, Thoubal, Keithelmanbi, Somsai, Pallel, Churachandpur, Senapati, Bishnupur, Leimakhong, Khuga, Tamei, Tamenglong, Manipur University leh Khuman Lampak Stadium ah 3rd International Yoga Day a mang ua, zia hun matna chu CRPF, BSF leh CISF te’n le a uap ui.
KNF CADRE TE THASUAK DING PHUTNA KIPHINNA NEI
Kangpokpi, June21 (Nisin Thuhiltu): Kangpokpi ah Kuki Inpi leh Civil Society Organisation chuam chuam in tuni’n Natheljang ah a chiata June 15 ni ah Senapati Brigade nuai ah 38 Assam Rifles leh State Police kithua te’n SoO suai kai leh Tripartite Political Dialogue chiapi KNF te designated camp ah operation a nei bakua KNF cadre 26 a mat uh chu nasatak in demna a bawl ua, a vai theipen ah mat ah um cadre 26 te thasuak ding leh a chung ua FIR ziklut ah um te withdraw bawl ding phutna a nei ui. “UPF / KNOs chu JIHADDIS a hi puau” thutawn kizikna placard chuam chuam chawi kawm in, KNF te chung ah ngawna kibawl chu thudik hilo in a gen ui.
CM MAPUINA’ GOVT. 100 DAYS PROGRAMME TAWH KISAI REVIEW MEETING NEI
Imphal, (Nisin Thuhiltu): Manipur ah BJP-led coalition government vaihawmna ni 100 ting paita ding a hina chung in tuni’n Chief Minister N. Biren Singh mapuina government in status leh developmental project chuam chuam dinmun tawh kisai in review meeting a nei hi. Chief Minister in Minister leh Commissioner te panlakna kipakpi mama hin a gen a, project tamtak sepdaw ah umta leh hawn thei ding thil hunkhawp umta hin a gen hi. Chief Minister N. Biren Singh in a banah a first 100 day project te etthakna a nei a, a kisaipi official te tawh hawn thei ding leh nasep zawthian nailo ah um te dinmun etpina a nei hi. Tunai cha state government sepdaw hiat thei khenkhat te chu - Manipur State Transport nuai ah public transport -ISBT, Dewlaland kihawng thak, Paona Bazar, Thangal Bazar, JNIMS complex, Old Secretariat leh New Secretariat etc ah free internet Wi-Fi service kikawi, Rural Mobile Health Care Units 2 hawn daw ah um, welfare benefit kihawm dawk ti te chu government in nitamlo sung ah a sepdaw hiat thei khenkhat a hi. Chief Minister in a kisaipi Department te chu Government’s 100 days programme nuai ah nesepna um te tawh kisai ah a chuam chiat ah booklets siam ding leh zia booklet a chu nasepna details chuansak ding in hiatsakna a bawl hi. Manipur Journalists’ Welfare Fund, SSA leh RMSA nuai ah schools 50 kihawng thak leh SSA nuai ah classrooms 64 kisakbe, private schools leh private tuition centre te chiadan etzuina ding ah dan thak siam ding, transparent transfer & posting policy chiapi ding, Education & Health and Family Welfare Department nuai ah Mission Indradanush tawh kituak ah Ukhrul, Tamenglong, Churachandpur leh Chandel ah special immunization drive nei ding leh naupang kum 0-2 kikal mi 3000 te full immunization bawl ding, college 40 ah vocational course hawn ding, classroom 46 siamthak ding, 645 bed hostel 8 hawn ding, 4 132/33 KV power sub-stations, Sendra hillock ah tourist resort, Takmu leh Andro Tourist Park ah water sports complex umsak ding, toll free Women Helpline hawn ah um te chu projects pawimaw chuam chuam Government’s 100 days programme nuai ah taksua um ding lak ah pang a hi. Zia meeting chu Health and Family Welfare, Law & Legislative Affairs, Art & Culture and CADA Minister L. Jayantakumar, CAF and PD, Weights and Measures, Revenue, Relief & Disaster Management Minister Karam Shyam, MAHUD, Town Planning, Forest and Environment, Horticulture and Soil Conservation Minister Th. Shyamkumar, IFCD & Youth Affairs and Sports Minister Letpao Haokip, PHED & Printing and Stationery Minister Losii Dikho, Social Welfare and Co-operation Minister Nemcha Kipgen te leh Administrative Secretary te banah Departments chuam chuam a pat Director te’n meeting a uap ui.
UNION MINISTER IN YOGA DAY MATNA MAPUI
Imphal, (Nisin Thuhiltu): Directorate of AYUSH, National Health Mission, Manipur leh Department of Youth Affairs and Sports, Manipur te saina’n tuni’n Indoor Stadium, Khuman Lampak, Imphal ah 3rd International Day of Yoga, 2017 mat in a um a, zia hun matna chu Chief Minister N. Biren Singh leh Union Human Resource Development Minister Prakash Javadekar in Yoga practitioner mitamtak te a mapui ui. Minister for Health and Family Welfare L. Jayantakumar Singh, Minister for Social Welfare and Co-operation Nemcha Kipgen, Minister for Forest and Environment Th. Shyamkumar Singh, Minister for Youth Affairs and Sports Letpao Haokip, Parliamentary Secretary (Home) L. Susindro Meitei, Parliamentary Secretary (Tourism) Dr. Sapam Ranjan Singh, Parliamentary Secretary (RD&PR) H. Dingo Singh, Chief Secretary, DGP leh top civil leh police official ten le hun matna a uap ui. Union Human Resource Development Minister Prakash Javadekar in a thugenna a chun, International Day of Yoga chu India gamsung mun (venue) 1 Lakh ah kimang a hidan a taklang a, Yoga chiapina a pat taksa leh lunggel damtheina pia a hidan gen in Yoga chu thil pawimaw mama khat hin a gen hi. Khawvel gam chuam chuam 190 ah Yoga chiapi ah um in le a gen hi.Chief Minister N. Biren Singh in a thugenna a chun, Prime Minister Narendra Modi in Yoga minthanna ding ah panlakna a neina chung ah khawvel ah chamna leh muanna message tut a hidan a gen a, Yoga chiapi tam a hitheina ding ah khat leh khat kitil kho tua ding pawimaw in a gen hi. Chief Minister N. Biren Singh leh Union Human Resource Development Minister Prakash Javadekar in zia hun matna a chun, Run for Yoga flagged off bawlna le a nei ui.