UNAU 2 TE LUANG VUILIAM HITA; THILUANG HAWLNA TAWH KISAI AH YPA IN KIPAKTHU GEN
Lamka, June 6 (Nisin Thuhiltu): A chiata June 1, 2017 nitak lam dak 2 tuam ah Lanva Lui in a taw unau 2 te - K Lianlunmang (5) leh Baby Kimngaihsiam (3) te luang tuni’n EBC Lanva inntekna nuai in Lanva thânmual ah vuiliam a hi. Sunna hun mat sung in pawl chuam chuam leh mimal in puankhuna a nei ban ua V Hangkhanlian, Minister, Agriculture Vety & Husbandry malatna’n DC Shyamlal Poonia, IAS, SP Rakesh Balwal, IPS te’n Manipur government thasik in zani nitaklam ah a luang mudaw a um, Baby Kimngiahsiam galna leh zangna dawpna’n a innsung mite kiang ah Rs. 4 lakh piakdawna a nei u’i. Unau 2 te a hiuleh khawkhuk khat ah vuikhawm in a um u’i. K. Lalthanlian leh Chiimnuanching te gil a gah gochan masapen ding in October 13, 2012 a khan Mualnuam khua ah K Lianlunmang a la piang a, Rayburn High School ah Preparatory a pat kaito in tukum ah Class-A simlai a hi. A nau Baby Kimngaihsiam a hileh 16 May 2014 a khan Lamka District Hospital ah piang a hia, tukum ah school kaipan himaleh vangsiat um tak in kumkhat le kaitung manlo in a la mualliam ta mai hi. Unau 2 te tui ah a kiak uh tawh kisai ah a kaina uh, Rayburn High School a pat student leh staff te’n Baby luang hawlna’n nasatak ah pan la in class le dawi gual in a la sun zawm thei ta puau. School in tuni thusua a bawlna’ chun, lusûn innkuan te thuakpi mama a hi dan thu phuang dawk kawm in Baby luang hawldaw na ding ah pan la te zosia chung in le kipakthu a gen hi. Chun, staff leh student te kiang a le hiatsakna bawl in zing, June 7 leh a ngaina gual ah class kipan kit tading ti’n le a gen hi. Thiluang hawlna tawh kisai in, Young Paite Association (YPA), New Lamka Block in Baby Kimngiahsiam luang hawlna ah kawng chuam chuam ah pan lakpi te chung ah kipakthu a phuang a, luang hawlna ah gari matsak, B Ginmuanlal, Hebron PCO (pick up), V Hangkhanlian Minister (bolero), T Paukhanlian, EM (bolero), Buanga, HLB Brick field (JCB) ban ah mipi gilkial dangchakte dawn ding thingpi bawl piak - Hebron Unit, Dorcas Veng Unit leh Zion Veng Unit te ban ah Block huapsung a um sun leh zan ah tha leh zung, sum leh pai seng ah panlatu mipi te kiang ah kipakthu a gen hi.
HILL DISTRICT 80 AH 'HILL AREA DEVELOPMENT PROGRAMME' CHIAPI HIDING; MANIPUR HILL LEH VALLEY DISTRICT AH KHANTONA KIKHIA MAMA: UNION DONER MINISTER
Imphal, June 6 (Nisin Thuhiltu) : Ni 2 sung Manipur vena nei Union Minister of State (Independent Charge) for Development of North Eastern Region (DoNER), Dr Jitendra Singh in tuni Imphal ah BJP Prime Minister Narendra Modi mapui Centre government in kum 3 sung ah a sepdaw te taklatna, BJP “Sabka Saath Sabka Vikas” programme hun ah a thugenna a chun, tunung sawtlo ah 'Hill Area Development Programme' (HADP)’ hawn ding hin a gen a, zia chu Northeastern region hill districts 80 cover sak hi ding in a gen hi. Zia programme thak chu pilot basis ah Manipur hill district pathum- Tamenglong, Chandel leh Churachandpur ah chiapi hiding in le a gen hi. Zia District pathum te chu composite district infrastructure index, ranking dungzui ah a niampen a hidan uh le a taklang hi. Manipur, Tripura leh Assam ah hilly areas te chu geo-physical entity chuambik nei a hidan uh le a gen a, zia ziak a chu socio-economic development lam ah masawn tak tak theilo a hidan a gen hi. Hill leh valley district te ah infrastructure, lampi quality, health leh education, etc lam ah a kikhiakna liantak um in le a gen a, Manipur ah valley area tawh etkak ah hill areas ah khantona tasam diak in a gen hi. Northeast chu a gam hawi tak himaleh a hawina kisulang zo lo hin le a gen a, Congress government vaihawmna saang ah BJP-led NDA government nuai ah Northeast state te ah khantona umzaw a hidan Union Minister in a gen hi. Manipur ah Congress government in Centre ah Narendra Modi government schemes khat le a la chiapilo hin le a gen a, kum 3 sung ah Northeast budget 25% kisupung a hidan gen in, Northeast Road Development Scheme nuai ah Rs.40,000 crore piakdaw ah um hita hin a gen hi. Hun matna uap Manipur chief minister N Biren Singh in a thugenna a chun, Centre ah Narendra Modi mapui BJP-led NDA government nuai ah khantona chi chuam chuam um te taklatna anei a, state sung ahBJP-led coalition government in elections hun ah mipi te ding ah thutiam a bawl teu sukpitinna ding ah theitawp sua panlakna nei zing a hidan genkawm in state sung ah issue chuam chuam sukven ah umta a hidan a gen hi. Zia hun matna chu Minister, MLAs leh Rajya Sabha member elected state BJP president Ksh Bhabananda ten le a uap ui.
FIRST CLASS AH LL.M. ZO
Lamka, June 6: Miss Angela Khaute d/o LM Khaute, IPS & Mimi Vaiphei of Old Lambulane, Imphal in tunaicha a khan Amity Law School, Noida ah First Class in LL.M. (Master of Laws) a zo hi. Miss Angela Khaute ahileh, Little Flower School, Imphal ah Class X a la zo, Laxman Public School, Hauz Khas Enclave, New Delhi ah Class XII zo a hi. Chuleh, Amity Law School, Noida ah 5-year integrated LL.B (H) programme a zaw nung ah, LL.M. (Master of Laws) zo kit hi a hi.
ZCB SECRETARY KISANG
Lamka, June 6: Zillai Churachandpur Block, General Secretary Mr. Hauchung Vaiphei in mun dang ah zilna a sutzawm tawh kitawn ah Zillai Churachandpur Block, General Secretary panmun tuk zawm thei talo a hina chung in Block President mapuina Cabinet Meeting lemsakna dungzui ah Cabinet Member ma Mr. Ginlaljoy chu Zillai Churachandpur Block, General Secretary thak ding ah guat a hidan ZCB lawiupa te a pat hiat a hi.
NEC FINANCIAL ADVISOR IN NERCORMP OFFICE VENA NEI
Lamka, June 6: North Eastern Council ah Financial Advisor, GK Chin IP&TAFS leh Core Committee Members, NERCORMP, Shillong in tuni nitaklam dak 3:30 in NERCORMP Churachandpur Office vena a nei a, Staffs te tawh ki thua khawpna hun a mang ui. GK Chin IP&TAFS ahileh Imphal a pat Mr. M. Babu, Research Assistant, Planning Dept. Govt of Manipur in a zui hi. Zia kithua khawpna hun a chun, D Khuala Vaiphei, Project Manager, NERCORMP Churachandpur in project implementation tawh kisai taklatna a nei hi. Vena nei GK Chin IP&TAFS in a a holimna a chun, NERCORMP hi NEC, Govt of India Flagship project a hidan taklangkawm in, kituptak ah project implement a bawl bak ah amasawn zelna chung ah NEC in ki letsapi mama hin a gen hi. Chuleh, semtuten le mani naa gual ah gelzing kawm ah, district dangte sang nasem hawipen ah pangua chiat ding in tilkhona a nei a, NERCORMP Phase IV ding buaipi hizing a hidan gen in, Govt of India in a vaima theilam ah approval a piak ding kinepthu a gen hi. Chun, Project Manager D. Khuala Vaiphei in Manipur Govt kiang ah office mun ding gam a dawt uh allotment mu paiding ahi takna chung ua , NERCORMP Office_ RESOURCE CENTRE kum kit ah sak pai a hi theina ding ah request a bawl chu priority list ah pansak ding a hidan le a taklang hi. NERCORMP Churachandpur Office vena a neizaw in NEC Financial Advisor, GK Chin IP&TAFS in Imphal a zuan a, zing leh New Delhi ah meeting uap ding hin a kigen hi.
ONE DAY AWARENESS PROGRAMME NEI
Lamka, June 6: District Handloom and Textiles saina’ tuni, 6th June 2017 in One Day Awareness Programme a um hi. Awareness Programme chu Kawmpui Handloom Cluster, Rengkai Handloom Cluster leh Zingsol Handloom Cluster mun te ah nei a hia, puankhawng mi te tawh kithuakhawmna nei in, scheme leh thil dang dang puangkhawng mite ding ah benefit um te genlat in a um hi. Zia hun matna chu Th. Ibohal Singh, Assistant Director (w) WSC, Porompat, Imphal, Th. Ibemcha Devi, Project Manager (H/L) Handloom & Textile, Churachandpur leh T Thongkhopau Haokip, Social Worker, Churachandpur te’n khuallian hina tawh a uap ui. Chun, zia Awareness Programme chu a hung tung ding 9th June 2017 leh Handloom Cluster chuam chuam ah sutzawm ding ah guanggalna um hin a kigen hi.
NEC TEAM IN PUBLIC GROUND AH NASEPNA ENTHA
Lamka, June 6 (Nisin Thuhiltu): North Eastern Council (NEC) Fund mang ah kisiam thak, Public Ground, Hiangtam Lamka ah nasepna NEC team in NEC Financial adviser Ginkhanchin @ GK Chin mapuina’n etthakna a nei ui. Public Ground siamthakna a hileh Vungkhum Guite @ V. Guite, Special Contractor etsuina nuai ah a chiata July 16, 2016 a pat nasep pat a hia, mi 1,300 leh 1,500 kikal chut theina ding Gallery, VIP Gallery, player te changing room, office leh toilet hawitak um ding leh gualphalote a ding ah le ramp kawi hi ding a hia, nasep patna ding ah NEC in Rs. 4.25 lakhs sanctioned masa hi’n a kigen hi. NEC a pat Ginkhanchin @ GK Chin, Financial Adviser in tuni’n Contractor te mapuina nuai ah a mun mama in nasepna a va entha’i. Public ground siamphatna a hileh tha 18 sung ah zaw ding ti a hia, tu hin nasep sung kum 1 ting nailo himaleh 70% tuam zaw hita a hi. GK Chin in Lamka a phak tawh kitawn in Anti-Erosion Scheme nuai a kibawl, Chiengkawn Lui leh Sielmat Lui kisuktuana, Tuitha Lui pang ah Protection Wall kibawl etthâkna a nei hi.
LAMKA COLLEGE KUM 41 TINNA LAWM
Lamka, June 6 (Nisin Thuhiltu): College Road, New Lamka a um Lamka College kiphudaw nung kum 41 tin lawpna tuni’n Lamka College Hall ah nei in a um a, zia hun chu V Hangkhanlian, Minister Agriculture Vety & Husbandry in Chief Guest leh Dr M Lokendra, Principal in Functional President hina tawh a uap gel u’i. Hun matna a chun, K. Touthang, Department of History malatna’n College kum 41 tin hiatzingna ding in telchuam mi 41 te’n dakpi satna a nei u’i. Awnzagen, Secretary, Founding Day Celebration Committee in Lamka College khangthu sutna a nei a, teldaw mi 13 te kiang ah Human Rights Certificate piakdawna le a um hi. Chief Guest V Hangkhanlian, Minister Agriculture Vety & Husbandry in Lamka College student lui a hina ah Chief Guest ding ah chial a hi na chung ah kipakthu a gen a, ama uh hunlai sang a College in masawm chuam mama hi’n a gen hi. College khanto diakna ding ah subject 3 - geography, sociology leh Commerce kawina ding ah Manipur Chief Minister N. Biren Singh kiang ah tut in CM in le kawi hi ding ah thutiam a bawl ziak ah kimkit academic session a pat a um tak ding kinep um hi’n le a gen hi. Subject 3 te lak ah geography a hileh laboratory leh van mat chuam chuam pawimaw ding a hina ah geography subject a hileh vaigei deu ding hi’n le a gen hi. Manipur state sung ah college te ah staff kawi be ding ti ah a la kigen chu chu suk pitin hileh ccpur district in le thiamzilna lam ah phatchuampi mama ding hi’n le a gen hi. District khantona ding ah nâ chuam chuam sep ding tampi a um a, zia te lak ah tulaitak a hin lampi puathakna nei a hizing a, tunung ah khawpi sung ah tuinek kining ting a um theina ding, minautang khawsakna haksa diak te a ding ah dam theina tawh kisai ah medical facility hawitak bawl daw ding ban ah thiamzilna lam le nasatak ah puaphat ding a hi dan le a gen hi. Aban a genna a chun, tutha June sung ah district mipi’n Manipur Chief minister N Biren Singh vaidawnna nei ding a hi na ah college student te le a tam thei pen pang ding in chialna bawl in zia hun a chun CM kiang ah district sung ah thiamzilna mun te ban ah gamsung khantona ding ah thildawt nei hi ding hi’n le a gen a, college khantona ding ah kithu hiattua ah nân sem khawm ding in le college ah student leh staff te chialna a bawl hi. Hun mat sung in, Chistina Sakum, Manipur Idol 2017 runner up in lasakna a nei ban ah Zenhang Lamka Cultural Troupe in namlam suklatna a nei hi. Lamka college ah tu dinmun a hin teaching staff 18 etkawlna nuai ah student 200 val a um hi.
MO LEH BPM TE’N TRAINING NEI
Lamka, June 6 (Nisin Thuhiltu): District Health Society (DHS), Churachandpur saina nuai ah tuni’n CMO Mini-Conference Hall, CMO Complex ah Training 2 a kizawm in a um hi. Health Management Information System (HMIS)/ Mother and Child Tracking System (MCTS) tawh kisai Training hun a chun, P. Ibomcha, State Data Manager leh Seiboi Mate, District Data Manager te’n HMIS leh MCTS tawh kisai Form chuam chuam ziklut ding dan a hil ui. Zia zaw a chun, Zenngaihlun, District Program Manager malatna’n Intensified Diarrhoea Control Fortnight (IDCF) tawh kisai training a um a, Dr. Kimngaihching Simte, CMO Churachandpur in Training ding toh kisai genna a nei zaw in Dr. Tongjakai, Paediatrician, Churachandpur District Hospital in sungkhaw a pat kiveng ding dan leh damlo zen ding dan a hil hi. Training a chun District sung ah PHC, CHC leh PHSC a Medical Officer in-charge zosia ban ah, District sung ah Block Program Manager te zosia le a pang u’i.
DISTRICT IN-CHARGE MINISTER IN T.NATJANG KHAWMITE PANPINA PIA
Lamka, June 6 (Nisin Thuhiltu): Galvan chawi pawl te lau ziak ah S. Muolcham khua bel a zâm, T. Natjang khawmite tuni’n District Incharge Minister, V. Hangkhanlian, Minister (Agriculture, Veterinary & AH) in vena a nei hi. Minister in Ukhrul District a pat Churachandpur District bel a hung zam, T. Natjang khawmite chanchin a hiat tawh kitawn ah S. Muolcham khua del in Relief Fund mang in Annchang bag 6, Allu bag 1, Dal bag 1 ban ah chi leh thau a piak ban ah ama mimal sum in panpina Rs. 20,000 a pia’i. SoO Group a umlo, Kuki Tribal Union (KTU/NSCN-IM) leh Kuki National Front (N) kal ah kihiat thiamlona um in KTU C-in-C Khaipao Haokip in thina a la tuak hi. Zia tawh kisai a chun T. Natjang khawmipi’n vauna tuak in khaw hausa Ngamkhokhai malatna’n khawsung mipi a puansil uh tawh hung zâm in S. Muolcham a bel u’i. Minister V. Hangkhanlian in zia tak mun a chun kuama’n ngâwllo ding leh damlo-hitang a tuak uh lehle Medical Team hiatsak pai ding in a gen a, a khuau ua a kilekit pai theina ding ua panla ding hi’n le a gen hi. Minister in ngaikhawk tak ah khutchawi pum ah a hung zam T. Natjang khawmi te a hung vena chung ah Daniel Gangte, President, KIC leh Kamthang Haokip, President, KKL CCPur te’n kipakthu a gen u’i. T. Natjang a hileh inn 42 umna khua a hia, milip 241 um hi’n Village Authority in a gen hi.
TOBACCO PRODUCT HUNKHAWP KIMAN
Lamka, June 6 (Nisin Thuhiltu) : District Police leh Food Safety & Standards Wing, Churachandpur kithua in tuni’n khawpi sung mun chuam chuam ah dum a pat kibawl (Tobacco Product) kizuak te a man u’i. Zia hun a chun, New Bazaar Area a dawr bawl Rajban Shah (45), Saroj Kumar (30) leh Andand Gupta (31) a pat Tobacco Product tamkhawp mandawk in Police Station ah Press/Media mai a suklat a hi zaw ah Food Safety & Standards Wing, Churachandpur khut ah piakdaw a hi. Mat a um van te a hileh Anand Gupta a pat Baba Zarda packet 20, Baba (Black) packet 300, Baba (gram 200) packet 6, Balmiki Safara packet 6 leh Sajan packet 186 a hia, Saroj Kumar a pat Baba 160 Box 90, Golden Tobacco (Khaini) piece 240, Lacto piece 100 leh Sajan packet 125 ban ah Rajban Shah a pat Talab packet 142, Baba 120 piece 130 leh Talab Ragal packet 53 a hia, a leng ah a chun a sum ah Rs. 60,000 val zo ding hi’n a kigen hi. W. Kumarjit, MPS, Addition SP (Operation) in raid chu DGP thupiak dungzui ah bawl a um hi’n a gen a, thupiak dungzui in state sung ah zu, tobacco leh a dangdang zuakna kiamsak ding ti a hina ah maban a le sutzawp hi ding ti’n le a gen hi. K. Sunita Devi, Designated Food Safety Officer, Churachandpur in Food Safety & Standard Act pansan a khawpi sung mun chuam chuam a pat Tobacco Product chuam chuam mat a um hi’n a gen a, tuni ah raid chu a patna a hitawh kitawn ah maban a le a pawimaw dan zil ah sutzawp to hi ding ti’n le a gen hi.
CM IN100 DAYS PROGRAMME NUAI AH DEVELOPMENTAL WORK DINMUN REVIEW BAWL
Imphal, June 6 (Nisin Thuhiltu): CM Secretariat, Imphal ah tuni’n Chief Minister N. Biren Singh mapuina’ 100 days action plan programme nuai ah government department chuam chuam in developmental project a chiapi teu tawh kisai in review meeting a um hi. Meeting hun in developmental project dinmun 9 (status) leh masawnna (progress) dinmun te genkhawm leh etthak in a um a, Chief Minister N. Biren Singh in developmental work chiapi ah um te chu a hun tak ah zo thiang ding in a kisaipi official te hiatsakna a bawl hi. Administrative Secretary te leh Head of Department te chu CM office ah progress report daily basis ah pelut ding in le hiatsakna a bawl hi. State Government thak 100 days action plan programme nuai a chun, public areas ah free wi-fi umsak ding, State Wide Area Network (SWAN) nuai ah District Headquarter zosia video conferencing facility kawi ding leh connection bawl ding, Jeewan Praman for Pensioners, Manipur Journalist Board hawn ding, State sung ah Journalist te a ding ah medical insurance schemes hawn ding ti te le pansak in a um hi. 100 days action plan programme dinmun tawh kisai ah review meeting zaw in "State Mission on Employment, Drinking Water and Housing for All by 2022" nuai ah action plan ding tawh kisai in le review meeting a um hi. Zia review meeting chu Cabinet Ministers - Y. Joykumar Singh, Th. Biswajit, L. Jayantakumar Singh, Th. Radheshyam, Smt. Nemcha Kipgen, Th. Shyamkumar, N. Kayasii, Addl. Chief Secretary Shambhu Singh, Addl. Chief Secretary Suresh Babu, Addl. Chief Secretary Dr. Suhel Aktar te banah department chuam chuam ah Secretaries, Commissioners leh Head of Department te a pang ui.
IPR KITI DEPARTMENT PAWIMAW A HI: MINISTER BISWAJIT
Imphal, June 6 (Nisin Thuhiltu):IPR Minister Thongam Biswajit Singh in Department of Information and Public Relations official te ama Conference Hall, New Secretariat office mun in first monthly review meeting a neipi hi. Zia hun a chun, IPR Minister in Information and Public Relations chu department pawitak a hidan taklang kawm in, programme leh policy tawh kisai awareness thezaktu mai hilo ah government developmental schemes chuam chuam leh welfare scheme te mipi lak ah thezak tu a hidan a gen a, a kisaipi official a diak ah District Information Officer (DIO) te chu district information office te kituptak ah a function theina ding ah panla chiat ding in chialna a bawl hi. District Information oFfice te’n development programme leh scheme chuam chuam te mipi a hiatthiamsak ding uh pawimaw in le a gen a, government thupi (motto) community chuam chuam te kal ah gap sukbei ding ti mai hizawlo ah
government official te kal ah gap umte le a umlona ding ah panlak ding chu ama thupi (motto) hin a gen hi. Semkhawm leh khangto khawm ding ah panlakhawm chiat ding in le official te chialna a bawl a, gin-um tak leh kukal tak ah panla chiat ding in chialna a bawl hi. Chun, Official te’n a haksatna chuam chuam teu genlatna a nei ua, Deputy Director Lalrongbawl Hmar, i/c DIO Churachandpur in staff kining ting tak banah gari (vehicle) kituptak DIO office te’n mamaw a hidan uh a gen a, DIO office te puaphat leh sukhat ding pawimaw in a gen hi. Director Meghachandra Kongbam, Deputy Secretary Ch. Sachi, Deputy Director Ch. Noyon, Assistant Publicity Officer (Press) N. Krishnakumar Singh, district level officer leh DIPR official te’n meeting a uap ui.
SPORTS PERSON TE DAILY REMUNERATION RS. 1,000 HITA DING: LETPAO HAOKIP
Imphal, June 6 (Nisin Thuhiltu): State, Youth Affairs and Sports Minister Letpao Haokip in tuni’n National level ah State min ah pang sportsperson te daily remuneration Rs. 200 per day ah piak hisek chu Rs. 1,000 per day hita ding in State level boxing championship ah Mary Kom-SAI Boxing Academy, National Games Village a pat boxing student medal la te Mary Kom Regional Boxing Foundation in chawihawina a nei hun a puang hi. Manipur youth affairs and sports minister Letpao Haokip in a thugenna a chun, banglam sports hita leh national level tiang ah medal a lak uh leh laklo uh thuchuam state min ah kihel thei taphawt chu daily remuneration Rs. 1,000 per day ah piak hita ding in a gen a, zia scheme chu puan a hi tawh kitawn ah chiapi pat ah um ngal ding hin le a gen hi. Hiatthei khat chu tunaicha State level boxing championship um hun a khan Mary Kom-SAI Boxing Academy, National Games Village a pat boxing student 15 te’n gold medal a dawng ua, 19 in silver leh 19 te’n bronze medal a la dawng ui. Chun, tuni kipakpina hun ah Gold medal winner te chu cash reward Rs 10,000 chiat piak a hiu a, silver leh bronze medal winner te chu Rs 7,000 & Rs. 5,000 chiat piak a hiu. Mary Kom-SAI Boxing Academy founder lak ah a challang diak chu MKRBF MC Mary Kom, MP (Rajya Sabha) leh five time World boxing champion banah SK Sharma, DIGP, CRPF, Range Imphal a hiu. 
CBI IN MAO AH COLD STORAGE MATTHEI AHILONA TAWH KISAI KHUALNA NEI
Imphal, June 6 (Nisin Thuhiltu): Central Bureau of Investigation (CBI) team in Manipur Senapati district ah cold storage kikawi matlo ah a umna tawh kisai in mun 5 a bulu (raid) ui. Mao ah UNG (Non-governmental Organisation), Associate Action for Progressive Society (AAPDS) in Union ministry of food processing industries, Cold Chain Scheme nuai ah Rs 18 crore bei ah cold storage a kawi himaleh tuni tiang ah kituptak ah matthei ah a umlo ziak ah Central Bureau of Investigation (CBI) team in khualna a nei a hi. Hiathei khat chu an-che lohing te a siat pailona ding ah 3000 matric tones kawi theina ding cold storage facility kawi ah um a hia, mipi mat thei ding ah Manipur chief Secretary O Nabakishore in November 12, 2016 a khah Accountant General Athikho Chalai of Nagaland uapna tawh a la hawn hita a hi. Imphal ah CBI Official thusuak in a genna a chun, zingkal dak 8:30 a pat Paomai Colony, Imphal ah AAPDS office, Imphal Thangal Bazar ah United Bank of India (UBI), office 2 leh Khoyathong, Imphal ah UBI te raid bawl un a taklang hi. Chuleh, hawn ah a um nung tiang ah matthei tak tak ding ah cold storage suktup ah a um theilona tawh kisai khualna nei un le a kigen hi.