Manipur Police Department in kawnggak (belt) quality hawilo tak supply a muna tawh kisai khualna nei ding Inquiry committee siamdaw ah um:CM Biren
Imphal, June 7 (Nisin Thuhiltu) : CM Secretariat Cabinet Hall, Imphal ah Chief Minister Nongthombam Biren Singh in tuni nitak lam dak 5:30 in Manipur Police Department in kawnggak (belt) supply quality hawilo tak a muna tawh kisai press conference in taklatna a nei hi. Chief Minister in kawnggak (belt) supply quality hawilo tak a umna tawh kisai khualna nei ding State Government in inquiry committee siamdawk a hidan a puang a, Inquiry committee chu Additional Chief Secretary Dr. Suhel Akhtar in mapui ding leh committee member ding ah Special Secretary R. Sudhan leh IGP (Admn) Dr. S. Ibocha te guat ah um in a gen hi. Inquiry committee in tha-khat (one month) sung ah report a piaklut ding hin le a gen hi. Social networking site ah kawnggak (belt) quality hawilo tak supply kibawlna chu complaints mu a hidan le Chief Minister in a gen a, complaints a mu tawh kitawn ah Additional Chief Secretary (Home) Dr. J. Suresh Babu mapui Government’s Monitoring Cell te chu kawnggak (belt) supply dinmun tawh kisai enzui ding ah hiatsakna bawl a hidan gen kawm in Dr. Suresh Babu leh DGP L.M. Khaute banah Monitoring Cell team 2 in 1st Bn. Manipur Rifles campus ah central store leh Imphal West SP’s office complex ah district store ah stock umte dinmun etthakna a nei hun ua, kituptak ah kawnggak (belt) supply dinmun khualna nei pawimaw ding ah hiatsakna a bawl uh tawh kitawn ah ama mimal tak ah stores 2 ah kawnggak (belt) quality etthakna nei hin a gen hi. Store 2 ah kikawi kawnggak te chu quality hawilo mama, khut ah le haksalo cha kaitan/bawtan thei hin a gen a, press conference hun ah thuthak lakhawm mite chu kawnggak quality hawilo te etsakna a nei hi.
State Government in a sun a zan ah society hawina ding ah panla State Security Personnel te dinmun siamhawina ding ah pan a lak zing lai ah zia gual thil tung chu khawksa mama a hidan gen in M/s Md Gani Khan firm in sub-standard kawnggak (belts) chu Manipur Police Department supply a bawl hin le a gen a, zia firm chu blacklist bawl a hi bakah khualna (investigation) kituptak ah chiapi hiding in a gen hi. Police headquarter in kum 2013-2014 sung ah supply kipan ah taklang in a gen a, ziagual thil chu thil hitheilo a hidan genkawm in, quality hawilo tak kawnggak supply bawlna panla matdaw ah um te chung ah a kituakpiu gawtna piak hiding in a gen hi. Chuleh, tu ah state government in kuama ki melmatpi, kawi chuam neilo a hidan hilchianna bawl in, diklo tak ah nasem te matdawna ding ah panla a hidan a gen hi.
CCpur Police in tobacco product tamtak mandawk
Lamka, June 7 (Nisin Thuhiltu): Churachandpur District Police nuai ah Civil Police, Women Police leh VDF kithua in tuni’n New Bazaar bulu (raid) in Tobacco Product leh mihing damtheina ding ah hawilo, Burma nekthei tamtak a mandawk ui. Raid hun a chun Axis Bank, New Bazaar gei ah dawr bawl, Kamlesh Prasad Gupta (42) s/o Amirchand Prasad of Ward No. 2, Uttardaha Village, Bhojpur District, Bihar a pat Tobacco Product tamtak matdaw a hia, van kiman te chu CCpur Police Station ah Press/Media mai ah suklat a hi zaw in Food Safety & Standards Enforcement Wing, Churachandpur khut in a pedawk ui. Mat a um van te a hileh Baba Black (50 gram) Carton Box 2, Balmiki (10 gram) Box 56, Savera (350 gram) Carton Box 9, Severa (neute) Carton Box 3, leh a dang dang a hia, a leng ah chu Rs. 5 lakh tuam man zo ding hi’n a kigen hi. Van kimatna tawh kisai ah Churachandpur SP Rakesh Balwal, IPS in 2013 a Supreme Court Order leh Food Safety Commissioner, Health Department, Manipur thusua dungzui ah District Administration kithua pina tawh District Police in Raid a bawl hi’n a gen a, zia hi a bul patna hipan in maban ah zu, khamthei chi chuam chuam leh tobacco product zuak khamna chiapi to zel hi ding ah le gen kawm in District sung ah nek leh dawn a thianthona a um theina ding ah mipi’n le kithuapi ding in chialna a bawl hi. CCPur DC Shyam Lal Poonia, IAS in District Police te tawmngaina chung ah pakchat thu a gen a, “fssai” trademark kiziklo nek leh chak te ban ah zu leh khamthei te a pat district sukthianna ding ah Supply Point cheng hiatdaw ah bulu pawimaw hi’n a gen hi.
CM in martyr Major David Manlun suunthu puang 
Imphal, June 7 (Nisin Thuhiltu): Chief Minister N. Biren Singh in Mon district,Nagaland ah June 6, 2017 zan ah kikaptuana thina tuak 164 Brigade,Territorial Army officer, Major David Manlun suunthu a puang a, luunsun insungmi te thawkpi leh suunpi a hidan taklang kawm in gam sung a ding ah thitiang ah panla Major David Manlun chu ki atpi mama hin le a gen hi. Maj David Manlun s/o Upa Khamzalam & Manpi Manlun ahileh June 27, 1985 ah Sielmat Hospital, CCpur ah piang a hia, kum 2010 ah 164 Infantry BN, TA (Naga Regiment) ala join a hia, UNLF leh NSCN(K) kithua te tawh Lappa village, Mon district,Nagaland ah kikaptuana thina tuak a hi. Chuleh, a pianna pa le Assam Rifles ah a la sem a hina chung ah Shillong ah a la seilian a hi. Chun, a luang chu Amry Helicopter mang ah a chenna, Madanriting, Shillong tut in a um a, May 8, 2017 ah vuiliam hiding a hi.
System nei tak ah PMEGP scheme chiapi ding: Minister Th Biswajit
Imphal, June 7 (Nisin Thuhiltu): Commerce & Industries Minister Th Biswajit in Prime Minister Employment Generation Programme, implementing agency te chu system khat chiapi nei ah implement bawl ding in thupiak a bawl a, zia chu hileh department in state sung ah sepna kibelap thei ding leh unemployment ziak ah buaina um te sukven hithei ding hin a gen hi. Review meeting mapui Commerce & Industries Minister Th Biswajit in sepna 3000 lam siamdaw ding chu Department target hiding in a gen a, gawlgukna ahiloleh diklo tak ah panlakna a um leh PMEGP scheme nuai ah sepna kibelap vaklo ding hin a gen hi. PMEGP scheme nuai ah beneficiary ding guideline tawh kituak ah teldaw (select) a hitheina ding ah Task Force Screening Committee dinmun le etthak ding pawimaw in a gen a, kum 2016-2017 sung ah PMEGP nuai ah pending cases 4434 um a hidan le taklang kawm in, kum 2017-2018 sung ah of PMEGP target project 717 a hidan a gen hi. Official te chu pending cases te enthak ding leh a vaima theipen ah sufel ding in hiatsakna le a bawl a, diklo tak leh gawlgukna tawh PMEGP scheme chiapi a um leh a kituakpiu gawtna piak hiding ah vauna bawl kawm in District Industries Centre te ah infrastructure a dukdaklona chung ah a lung nawplo thu a gen hi. Chuleh, District General Manager zosia chu a haksatnau - infrastructure leh man-power taaksapna leh thil chuam chuam te taklatna nei ding in le chialna a bawl a, Centre in gamsung pumpi Livelihood Business Incubators (LBI) 20 chiapi ding lemsakna a neina Manipur ah LBI 7 umsak ding ah sanctioned bawlta hin a gen a, a vaima theipen ah LBI 7 te chu full functioning a hiding pawimaw in a gen hi. Zia meeting chu District General Manager zosia, Commerce & Industries Department official te banah MFICL officials te leh beneficiary ten a uap ui.
Tobacco items Rs 12 lakh man ding police team in man
Imphal, June 7 (Nisin Thuhiltu): Manipur police in state sung ah tobacco leh a product te sukbei ding tupna drive a sukhatthak uh tawh kitawn in tuni’n mini-truck (Tata ACE) ah kipua tobacco leh a product Rs 12 lakh man ding a mandawk ua, van puakna gari leh driver le a man ui. Mat ah um driver chu Premchand Prajapati (37) a hia, Uttar Pradesh, Ballia district, Athilapura village mi, tu leh tu innlua ah Imphal ah um a hi. Chun, local mi Khunjamayum Jhalajit Singh (41) of Imphal’s Thangmeiband area le mat in a um hi. Imphal West district SP Thimthing Ngasangba in mat ah um tobacco leh a product te chu local market ah Rs 12 lakh man hi’n a gen a,mat ah um driver chu tobacco leh a product te thak tua ah taivel mi hi ah kipuang hin a gen hi.
MP Ksh Bhabananda in ni 5 sung um ding photo exhibition hawng
Imphal, June 7 (Nisin Thuhiltu): Directorate of Advertising & Visual Publicity( DAVP),Ministry of Information & Broadcasting saina ni 5 sung um ding photo exhibition chu tuni’n Phoijing, Konthoujam A/C, Imphal West in a kipan hi. Zia photo exhibition thupi (theme) ding a chu "Sath Hai Vishwas Hai Ho Raha Vikas Hai" ti mat in a um hi. MP,Rajya Sabha & President , BJP,Manipur Pradesh - Ksh Bhabananda, Station Director in Charge, AIR,Imphal, Dilip Mayengbam, IPR Director, Meghachandra Kongbam leh MCO, PIB Imphal, Loitam Premlata Devi te’n inaugural function chu Chief Guest, President & Guests of Honour hina tawh a uap ui. Chief Guest - Ksh Bhabananda in a thugenna a chun, Photo Exhibition chu Central Government kum 3 tinna progress report gual ngai ding a hidan a gen a, Prime Minister Narendra Modi lunggel thiam ziak ah innovative ideas chuam chuam piang te leh administrative changes a um bak ah terrorism leh Corruption dodalna lawtinsaktu a hiding a nawp thu a gen hi. Government thak in Every Person is Important(EPI) ah VIP culture a sandaw dan te genlatna nei in thil neucha kisanna (change) um te a pat gam sung ah kisanna (change) umthei a hidan a gen hi.
Lekhabu simna a pat hiatna kibelap: Minister Th. Biswajit Singh
Imphal, June 7 (Nisin Thuhiltu): Lamyanba Shanglen, Palace Compound ah tuni’n Public Works, Rural Development & Panchayati Raj, Information & Public Relations, Administrative Reforms and Training, Power and Commerce and Industries Minister Thongam Biswajit Singh in lekhabu thak “Admission No. 857” kiti Col N. Hemachandra Singh in a zik chu Education, Labour & Employment Minister Th Radheshyam Singh leh Lt Gen K Himalay Singh, PVSM, UYSM, AVSM, YSM (Retd) banah chairman MPSC te uapna tawh hawnna a nei hi. Minister Thongam Biswajit Singh in a thugenna a chun lekha simna a pat hiatna kibelap a hidan a gen a, school a kailai ah zildaw (experience) a nei chuam chuam te genlatna a nei hi. Lt Gen K. Himalay Singh, PVSM, UYSM, AVSM, YSM (Retd) in a thugenna a chun, population tawh et ah Manipur a pat Army officer tampen in a gen a, State a pat Army officers 750 (approximately) um hin a gen hi. Minister Radheshyam in a thugenna a chun lekhabu sim habit ah nei ding pawimaw in a gen a, thu kigen, thu kizik te a pat nuina piang leh kana piang thei leh hausatna tut thei, gentheina tut thei leh suhatthei a hina chung ah hinkhua kiti risk leh challenge maitua zing pawimaw in a gen hi.
Ujjwala domestic free LPG connection bawlna kipan
Imphal, June 7 (Nisin Thuhiltu): Below Poverty Line (BPL) beneficiary te ding in Ujjwala domestic LPG connection bawlna state sung in a kipan hi. Pradhan Mantri UjjwalaYojana (PMUY) scheme chu Imphal ah June 5, 2017 (Monday) a khah Chief Minister N. Biren Singh leh Minister of State (DoNER) Dr. Jitendra Singh in hawnna a nei a hi. Zia chu tawh kitawn in Thoubal District leh Imphal East District ah LPG Agency te’n BPL beneficiary te ding in Free LPG connection bawl piakna a pan ua, Thoubal District ah BPL beneficiary te chu M/s Athokpam Indane Service in house to house LPG connections bawl piakna a nei a, BPL beneficiary te kiang ah subscription vouchers/customer’s document te piak in a um hi. June 6, 2017 a khan M/s RBD Indane Service, Lamlai in BPL beneficiary 18 te kiang ah LPG connection bawlna a zo thiang ui. Chun,Imphal East ah RBD Indane leh Mantripukhri ah Sawombung Indane; Heingang ah M/s Lambodara Indane te’n le BPL beneficiary te ding in LPG installation a pan ua, LPG connection umlona Lamlai Sekta ah RBD Indane in Ujjwala domestic LPG connection a bawl hi. Pradhan Mantri Ujjwala Yojana nuai a chu Central Government in financial assistance Rs 1,600/- allocate a bawl a hia, zia chu security deposit fee 14.2 kg LPG cylinder, pressure regulator, suraksha LPG hose, DGCC booklet leh installation bawlna pansak a hi. Socio-Economic Caste census 2011 dungzui ah 2,43,939 te chu Pradhan Mantri Ujjwala Yojana nuai a thawn ah LPG connection muthei ding a hiu. 01-06-2017 tiang ah state sung ah total Ujjwala KYC enrolled mi 5,104 a um hi. Ujjwala domestic LPG connections chu numei BPL family te a pat piak a hiu a, zia chu Aadhar cards leh bank account uh tawh kituak ah piakle a hiu.
CL X & CL XII Pass te kipakpina leh a Fail te siatbatna nei di
Lamka, June 7 (Nisin Thuhiltu): A chiata kum 7 sung ah Ex –Chairman ADDC, Langkhanpau Guite in a bial sung ah CL X & CL XII Pass te Kipakpina leh a Fail te Siatbatna Programme a nei sek chu tukum ah le nei zawm hiding a hi. Zia hun a chu 10 - Tuivai ADC Constituency sung ah Inn leh Lo nei, a khawsa nalai te pang thei ding a hiu a, kum dang gual ah Constituency Toppers hawldaw masat a hitheina ding ah a pass hi’n a fail te hitaleh Marksheet Xerox copy khat chiat Khaimuan Thangdong Veng, Gangpimual kiang leh bialtu MDC kiang ah June 11, 2017 tiang ah piaklut thei ding hin a kigen hi.
YVA Thanlon Block in bialtu MLA kipakpina siam
Lamka, June 7 (Nisin Thuhiltu): Young Vaiphei Association (YVA) Thanlon Block, President leh Secretary in tuni’n Thanlon Bial MLA leh MTDC Chairman Vungzagin Valte kipakpina, Imphal- Lamphel ah MLA Quarter in anei ua, a zi tawh Vaiphei Khiangkawi/ Kiangkawi puan silsakna a nei ui.
SSPP in Singngat SDO kipakpina nei
Lamka, June 7 (Nisin Thuhiltu): Siamsinpawlpi Singngat Block puitu te’n tuni 7 June 2017, nitaklam dak 2:00 in Singngat SDO Office ah Jamesson Sehlal Hangsing, SDO Singngat kipakpina hun a matpi ui. SSPP Singngat Block President Suanpau Samte in SDO leh a staff te Singngat mun mama ah office a kai uh kipakpi a hidan a gen a, SSPP liangbat khat piakna a nei hi. SDO Singngat in a thugenna a chun, Assembly election zaw ah office lua a hidan uh a gen a, himaleh, quarter lam a ki ningtinlo ziak ah office staff a tamzaw te a mun ah um theilo a hidan uh gen in, a mun ah um den theilo himaleu office chu kile thaw ah kai zing uh hin a gen hi. Chuleh, office building leh van mat chuam chuam te repairing chiatha zing a hina’, zaw thian a hitak leh amun ah pansa office kai ding uh a hidan gen in, zilna lam ah student te a kithuapi theina chan ah panlakpi ding hin a gen hi.
Scientist Haokhothang Baite kipakpina nei di
Lamka, June 7 (Nisin Thuhiltu): A hung tung ding 10th June 2017 leh N. terakhong Village ah Mr Haokhothang Baite in ARS, ASRB (ICAR), Scientist a mu kipakpina um ding a hi. Zia hun a chu Rev. Lunkholian Baite, Imphal Bial Pastor E.M.P in mawlzawl dawt piakna nei ding a hi.
RO te khut ah anchang piakdawna chia tha zing
Lamka, June 7 (Nisin Thuhiltu): Headquarter veng a um FCS Godown ah CCpur district a ding National food security Act nuai ah rationing agent te kiang ah mipi a ding April 2017 quota anchang piakdawna a chiatha zing a, tuni’n le zingkal dak 7 a pat in Nongmaithem Nicky, CSI leh NG Washington, CSI te etsuina nuai ah Saikot A/C nuai ah RO te kiang ah piakdawna a um hi. Churachanpur A/C a ding a hileh zing, June 8 leh L Sadananda Singh, CSI leh Th Chittaranjan Singh, CSI te etsuina nuai ah RO number 1-40 te kiang ah piakdaw hi ding a hia, June 9 leh RO 41-80 leh June 10 leh RO 81 a pat a chunglam sia te kiang ah piakdawna um ding a hi. Henglep A/C a ding ah anchang hawpdawna chu Sh Depankar Sharma, CSI leh B Josh Kumar Sharma, QI te’n ensui ding a hiu a, June 12 leh RO 1-30 te ban ah June 13 leh RO 31-56 te kiang ah piakdaw hi ding a hi. June 14 leh Singngat A/C ah RO 1-30 leh June 15 ni’n RO 31 a pat a chung lam te kiang ah piakdaw hi ding a hi. Thanlon A/C nuai a um Mualnuam Sub Division a ding a hileh June 16 leh Lalhriatrenga, CSI leh N Sudhir Singh, QI te etsuina nuai ah hawpdaw hi dinig a hi. NFSA nuai ah April 2017 quota a chun Saikot A/C a ding Quintal 3718, CCPur A/C a ding Quintal 2529, Singngat A/C a ding Quintal 2284 leh Henglep A/C a ding ah Quintal 1913 a hia, Pherzawl District a ding a hileh godown haw malam lo in a chuam ah chia hi’n official te’n a gen u’i.
Financial Literacy Week
Lamka, June 7 (Nisin Thuhiltu): Reserve Bank of India (RBI) in June 5 - 9, 2017 sung Financial Literacy Week a puang kawm ah zia hun sung a hin bank chuam chuam te’n financial literacy nei ding ti’n thupiak a bawl a, zia tawh kitawn a chun tuni’n Dorcas Jubilee Mini-Auditorium, Dorcas Hall, New Lamka ah National Bank for Agriculture and Rural Development (NABARD) sponsor na nuai in State Bank of India (SBI), Churachandpur in Financial Literacy-cum-Digital Banking Awareness Camp a sai hi. Awareness hun ah H Nengkhanpau, Hauzel, Chief manager and lead district manager in digital payment BHIM Apps tawh kisai in sintilna a pia, Pauneihthang Valte, Chief Manager, SBI CCpur in KYC Credit exercise discipline ban ah Thangchinkhup Guite , Assistant Manager, NABARD in banking Ombudsman tawh kisai in ziltilna a piau a, zia hun a chun mi 80 val a pang u’i. SBI a pat Thawngsuanlal Guite leh Raipao Livingstone te’n Camp a pang te kiang ah SBI Buddy apps mat ding dan a hil ban un hiattiamlo dawtna kibawl te hilchianna le a bawl u’i. Financial week matna tawh kisai ah June 5 a pat bank branch chuam chuam te’n mun chuam chuam ah Financial literacy cum digital banking Awareness camp a sai u’i.
I-League player te vaidawnna nei di
Lamka, June 7 (Nisin Thuhiltu): Happy Feet Football Academay saina’n a hungtung ding June 10, 2017 sunnung dak 2:00 leh Nghathal playground ah I-League a pang player te vaidawnna leh exhibition match um ding a hia, zia hun chu CT Lian Guite, MDC, New Lamka West in Chief Guest hina tawh uap ding in T Lianminthang Assistant Director, SAI leh T Chinzasawn, Engineer, Section Officer te’n guest of honour leh functional president hina tawh uap ding a hiu. Exhibition match ah Siam Hanghal XI leh Happy Feet Football Association te kihel ding a hiu.
District Level Orientation Training for MOs nei a um
Lamka, June 7 (Nisin Thuhiltu): District Health Society (DHS), Churachandpur saina in tuni’n DFWO Conference Hall, District Hospital ah District Level Orientation Training for Medical Officers on RI/MI, FIPV & AFP Surveillance for Financial Year 2016-2017 kiti nei in a um a, District sung ah CHC, PHC leh PHSC ah Medical Officer in-charge te a pang u’i. Training hun a chun, Routine Immunization, Fractional Inactivated Poliovirus Vaccine (FIPV) leh a dangdang tawh kisai ban ah damlo etkawlna ah damdawi piak ding dan tawh kisai ah Dr. VC Pau Tonsing, DIO/DFWO in MO te a ziltil hi.
SDO/CCPur lui leh thak in kikhutsanna nei
Lamka, June 7 (Nisin Thuhiltu): Manipur Government in June 1, 2017 ah transfer order a sua dungzui ah CCpur SDO/BDO tû, Seiminthang Lenthang, MCS leh Songsong, Mao SDO/BDO panmun lua, Thangboi Gangte chu kisângtua ding ti ah thusua a bawl tawh kitawn in tuni’n CCPur SDO/BDO Office, Headquarter ah Seiminthang Lenthang, MCS in Thangboi Gangte, MCS kiang ah charge piakdawna a nei ban in document pawimaw chuam chuam le a pedawk hi. Thangboi Gangte, MCS in tuni a pat CCPur SDO panmun a lua tak ding tawh kitawn in CCPur SDO staff te’n belpi leh puandum khat gel in Seiminthang Lenthang, MCS thâkna a nei u’i. MCS officer 2 te a hiuleh 2014 batch a hi gel ua, Seiminthang in amasapen ding in Kangvai SDO/BDO panmun a la lua a, zia zaw a chun CCPur SDO ding in Thienlaljoy Gangte, MCS a thathen hi. A langkhat lam ah, Thangboi Gangte posting masakna pen chu Mualnuam SDO a hia, zia a pat chu Senapati District a um Songsong SDO ding ah guat ah a la um a hi.
PHED in tuilawng zanna pan
Lamka, June 7 (Nisin Thuhiltu): Public Health Engineering Department (PHED), Churachandpur Division in khawpi sung ah tuinek kidaizaw a piakdaw ding gelna in tuni’n Churachandpur Government High School huangsung a um Reservoir a pat Headquarter Veng a IB Reservoir piakna ding in tuilawng a zan hi. Nasepna ding ah Department in Private JCB khat mang in tuilawng vuina ding khuatsak a hi. Tui piakdawna ding in Department in tuilawng Ductile Iron (DI) 200 mm a mat ban ah tui pump na ding in 30 Horse Power 3 tuasa’n a kawi a, tuilawng vuizaw a hi tak leh veng chuam chuam ah hawpsawn hiding a hi. Tu dinmun in, Churachandpur Government High School huangsung a tui 2,50,000 liter khawltheina Reservoir in Hiangtam Lamka area bep a pia thei a, IB Reservoir chan tui Pump tung hileh Headquarter Veng, Hill Town, Chiengkawnpang, Phailian, IB Road, Red Cross Road, Thangjam Road leh veng dang dang pesawnthei ding hi’n AE, PHED in a gen a, nasepna a hileh chawlkal kitleh zawthiang hi ding ti’n le a gen hi.