ZANA SANGTAK TAWH SALPHA 8 TE LUANG VUI HITA
Lamka, May 24 (Nisin Thuhiltu): Joint Action Committee Against Anti-Tribal Bills (JAC-AATB) intekna tuni, May 24, 2017 in Salphate’ te luang zana liantak tawh vui in a um hi. Joint Philanthropic organization (JPO) mapuina District Morgue a pat Salpha 8 te’ luang lakdaw in a um a, College leh Student ten amau uniform tawh Distirct Morgue a pat hunpi matna Lamka Public Ground tiang Human Chian bawl in a kigual ua, Salpha 8-te’ luang Truck 8 mang ah Lamka public ground tut in a um hi. Rev. Dr. Sut Khan Thang, Executive Secretary, Chin Baptist Association in Public Ground, Hiangtam Lamka ah pauchapna tawh salpha te suunna hun matna a hawng a, NCC Rayburn College te mapuina Salphate pakvui piakna leh suunna a kipan a, Joint Choir te a pat chawihawina laa sakna um in, JAC a pat leh Movement a pat ki withdraw nailo Tribe Leader leh Philanthropic Organization leader te’n pakvui piakna nei in, Gun Salute a um hi. Gun salute hun ah Nam chuam chuam ah leader te’n meithal a kap ua, H. Mangchinkhup, Chief Convener, JAC-AATB in thugenna nei in, Rev. K. Hangnung, President, Baptist Partnership Ministry, NTBC in Salphate’ insung mite leh Movement ah liamna tuak te pauchappiakna a nei hi. Tribe Leader chuam chuam; Vanlalrinliana, President, MPC, Chinlunthang, President, UZO, B. Dongzalian Simte, President, STC, H. Pau Za Cin, President, TCU leh T. Khailianthang, President, YPA a pat thugenna um in, Mangchinkhup in Government tawh 7-vei kihona a um nung ah May 10, 2017 ni ah Memorandum of Understanding (MoU) kai ah um a hidan te genlatna nei in, tuni ah Short term goal te sukpitin a hidan a gen hi. Special Invitee hina tawh Salpha te suunna hun uap - V. Hangkhanlian, Minister (Agriculture, Veterinary & Animal Husbandry), Work Minister Thongam Biswajit Singh, L. Ramdinliana Renthlei, General Secretary, MZP GHQ leh Chinkhanmang Thomte, Vice President, MSU GHQ te’n le thugenna a nei ua, Rev. S. Vung Minthang, General Secretary, EBC in Salpha insung mite leh Movement ah liamna tuak te ding ah thamuanna thu gen in, Rev. Stephen Chinzathang, Senior Executive Secretary, ZPCS in hun khakna a bawl hi. Chun, Salphate suunna matzaw a hinung in, Truck khat chiat ah Tipaimukh Road chuan in Salpha te Mata Dam ah Tribal Martyrs Memorial Park umna ding mun leh a kivuina ding mun ua puak in a um ui. A vuina programme chu Rev. JF Lalropuia, Presbyterian Church of India in amapui a, thamuanna thu gen in, Salpha 8-te’ luang vuiliam in a um hi. Tuni hun matna chu R. Sudhan, IAS, DC Churachandpur, Rakesh Balwal, IPS, SP Churachandpur, Khaipao Haokip, Chairman, ADC Churachandpur leh District Level Officer hunkhawp banah Minister Nemcha kipgen, L. Dikho, Chief Secertary Nabakishore te’n le a uap ui.
KUM 12 VAL THING KANGTALAI AH HINKHUA MANG TU MUALLIAM
Lamka, May 24 (Nisin Thuhiltu): New Lamka Khominthang a um, Ginzamuan tapa Pauginmuang @ Muamuang (18) in thing kangtalai chung ah kum 12 val a hinkhua a la mat nung in tuni sunma dak 11:30 tuam in a lei hinkhua a la bei tai. A luang a hileh EBCC Khominthang intekna nuai in YPA New Lamka thanmual ah tuni ma in vuiliam a hi. CT Lian Guite, MDC leh a team te’n le thigalna hun chu a va uap ua, zia hun a chun CT Lian Guite in a thânsuang bawlman chu a leng ah tuakdaw ding hi’n a gen hi. Muamuang a hileh kum 5 tuam a hi a pat damlo in a chia theilo bep hilo in chut le a la chu theipua, 2014 a khan Lamka pansan Reporter khenkhat in news ah a suadaw uh tawh kitawn in Khuga Batallion ban ah mun chuam chuam a pat mi phachuam ngai hunkhawp in kithuapina a la peto zel ua, June 23, 2014 a khan damlo inn ah admit in le a la um khai. Muamuang a hileh Colonel Anil, Commandant, Khuga Battalion leh a innkuan te’n le mimaltak a panpina thil chuam chuam a piak ban ua amau mimal gari mang in Khuga Dam etpina le a la nei ua, kithuapi thei chan in a kithua pi ui. District Hospital ah a um sung in le dawisaktu tamtak nei a nei a, Doctor chuam chuam leh hospital staff te a pat a le kituapina hawitak a mu ban ah zia hun lai ah CCpur DC, PK Jha, IAS in le hospital ah vena a la nei hi. Hospital a um sung in CT Lian Guite, MDC in Imphal ah ki etsak ding in 2 vei a la pui in Zoo leh Airport tite a va etpi hi. CCPur District Disable Union (CDDU), Kuki Students Organization (KSO)/CCpur, Ex-Chairman/ADCC, Langkhanpau Guite ban ah pawl leh mimal dang dang te bep hilo in gam dang a pat in le a khawtua leh kithuapi a tam mama hi. Ginzamuan leh Chingkhovung te gil ah ga gochan 6 lak ah a 5 na, Muamuang a hileh 1999 kum in Kangkap khua’n a piang a, nausen pangai gual ah khawvak mumaleh hisello tak in a um hi. Kum 3 a phak ah awmna nei in a nu leh pa’n District Hospital a pui in Doctor in TB natna nei hi ah gen kawm in TB damdawi a pia, a hinla, hun bang chan a hem a nek vang ah a phat diaklo ziak in damdawi nek chawlsan in amau kizen thei dan dan in a la kizen ui. 2005 kum a khan a thâgui na a hung sa pan a, damtheilo leh kibâi kawm kawm ah lam a zawt sek in a lawi leh pai te’n neukhat a suk khak mai mai uh lehle a kipuk tha pai ziang sek hi. District Hospital ah a puikit hun ua doctor te’n a thuak (brain) a thagui zam (spinal cord zui suk a chia, thâ petu) kichep tua a hi ti’n a kinthei lam a Shija Hospital ah pui ding in a hiatsak ua, ama un le X-Ray leh MRI te a lak nung un Operation a bawl uh ngai ding leh ziana ding a chun Rs.1 lakhs val bei ding a hidan a gen phat ua beidawng kisa leh lâkna ding hialo in a khua uh, Kangkap ah kilekit uh hi’n Muamuang pianna nu’n a gen hi. Khawsak nawpzawk ding gelna in 2011 kum a khan Khominthang ah pem lut a hiu.
ZILLAI GHQ IN LAWTINNA CHANG TE KIPAKPI
Lamka, May 24 (Nisin Thuhiltu): Zillai General Headquarters in HSSLC Exam 2017 ah lawtinna chang te kipakpi thu a puang a, a diak ah Lalgouboi Vaiphei (9th position) leh Meghalaya Board of School Education Higher Secondary Leaving Certificate Examination 2017, Arts Stream Topper Dimsonjem Vaiphei te kipakpi a hidan uh taklang kawm in maban ah a lawtinzawm zel ding uh dawisakthu G K Suantak, Secretary Education & Career Development suai kaina press release in a taklang hi.
FOOTBALL COACHING HAWNNA NEI
Lamka, May 24 (Nisin Thuhiltu): The Sepherd’s Football Academy (TSFA) in Lalpuithluaii Foundation School (LFS) Ground ah tuni zingkal lam dak 7:00 in Grass Root Level Football Coaching hawnna hun a mang hi. Zia hun chu Lenlai Club Manager, T. Kammuanlal Simte, MCS, CT Lian Guite, MDC leh LFS Principal, Vunglallian Tonsing te’n Chief Guest, Guest of Honor leh Special Guest hina tawh a uap ui. TSFA Manager, T. Khamminthang in Grass Root Level Football Coaching tawh kisai genlatna a nei a, Chief Guest T. Kammuanlal in Coaching hawnna nei inthugenna hun le a mang a, Churachandpur ah talent nei tam maleh grass root ah kiziltilna a umlo ziak ah sau tungzo tamlo hi’n a gen a, zia coaching chu skill development tuttu hi idng hi ah gen kawm in lawting tak ah zawthiang a hi kinep thu le a puang a, coaching hawnna le a nei ngal hi. Guest of Honor CT Lian in Football kiti Team Work a hi na ah 1 thiam ziak ah gualzaw thei hilo a hi na ah member cheng kilungtuak tak ah pankhawm na a pat lawtinna leh gualzawna um thei a hi dan zildaw ding pawimaw hi’n a gen hi. Chief Guest in coaching a hawn zaw a chun EBC Youth Coordinator, Rev. N. Pumsuanmung in tilkhona thucha genkawm in Pathian kiang ah a latna a nei hi. The Sepherd’s Football Academy a hileh Mumbai United leh SSU, Imphal ah a la kihel lui leh Himachal Pradesh a pat AIFF D License a la dawng, T. Khamminthang in a patdaw a hia, Manager leh Coach hina tawh a etkawl ding leh coaching hun sung a chun Ngulkhosiam Guite in a kithuapi ding a hi. Coaching a ding a hin mi 28 in min a khum ui.
BIALTU MDC IN BARRACK TYPE QUARTER HAWNG
Lamka, May 24 (Nisin Thuhiltu): Tuivai ADC Constituency huapsung a um Phaipheng khua ah zâni, May 23, 2017 a khan SPA 2016-2017 fund mang ah kibawl, Barrack Type Quarter hawnna leh Pathian kiang ah latna chu bialtu MDC, Langkhanpau Guite in a nei hi. Zia Building a hin Wash Basin, Ceiling, Electrical Fittings leh Fan ban ah Toilet hawitak kawi a hia, Tuiliduang huapsung ah zia gual ah quality hawi kibawl um nailo a hina ah dawisakna lântu bialtu MDC chung ah khawmite sik in khua hausa, Haumang in kipakthu a gen hi. Bialtu MDC kipiakzawna leh a bialsung mipite khualna ziak ah Dengue leh JE natna a pat kivenna ding damdawi chu hawpsuak a hi vang vang ta, a chang khanailo khua khat leh ni te kiang ah damdawi chu ASHA leh hausate pansan ah hawp hi ding in a kigen hi.
WOMEN PRAYER FELLOWSHIP 3RD CRUSADE KIPAN
Lamka, May 24 (Nisin Thuhiltu): Gouchinkhup Veng Women Prayer Fellowship in zâni, May 23, 2017 nitak in CYA Hall, Gouchinkhup Veng ah “Toupa aw, Na mite hon hihalh nawn in” ti thupi mang in a 3 veina ding Crusade chu a pan hi. Crusade a hileh May 25, 2017 chan ding a hia, programme a hileh nitak bep a um sek ding a hi. Crusade hawnna chu Pastor Gouzamung, CBA in a la nei a, thupi pansan in speaker Dainem in Pathian thu gennna a nei hi. Crusade programme chu nitak dak 6:30 in kipan sek ding a hia, May 25, 2107 leh Pastor K. Vumzathang, EBC in Crusade khakna nei ding a hi. A chiata April 2013 ah kiphutdawk, Gouchinkhup Veng Women Fellowship a hileh Kochuam chuam chuam 7 kigawm khawm a hia, Kochuam tin a pat member 4 chiat um in veng sung ah zu leh khamthei dodalna nei in zia gual thilte ah kibual te a ding in a pauchap piaksek ui. Tu din mun in Gouchinkhup veng a hin EBC, BCM leh EOC Biak inn 1 chiat ban ah MPCS leh CBA 2 gel a um hi.
KHANGTHAK 3000 SEPNA PIAK HIDI: TH. BISWAJIT
Imphal, May 24 (Nisin Thuhiltu): Commerce & Industries Minister Th. Biswajit in Secretariat New Block, ama office chamber ah tuni official te tawh meeting nei in Commerce and Industries nuai ah State Government in khangthak mi 3000 tiang sepna piak ding ah target nei a hidan a gen hi. Rural Development and Panchayati Raj Department in khangthak 3000 te schemes chuam chuam nuai ah sepna piak ding ah panlakna nei a hidan a taklang hi. Meeting hun ah Manipur ah ai-eng/aisan (turmeric) chiin na ding tawh kisai genkhawmna a nei ua, State Government zia ding a chu state government in Eighty Lakhs (80,0000/-) fund a piak ding in lemsakna a um hi. Lawting tak ah Stevia leh Lemon Grass plantation zaw ah a um nung ah ai-eng/aisan chiin ding ah guanggalna um hin a kigen a, Imphal East leh Thoubal District ah ai-eng/aisan chiin na ding gam 4000 acres sukfel ah umta hin le a kigen hi. PMEGP tawh kisai Minister Th. Biswajit in a genna a chun, scheme tawh kisai ah awareness pawimaw a hidan a gen a, department in screening committee siamdawk ding a hidan le a gen hi. Meeting chu Principal Secretary and Director of Commerce and Industries, Managing Director, Legal Advisor, Technical Consultant leh Manipur Food Industries Corporation Limited Officials te’n a uap ui.
GOVERNOR DR. NAJMA HEPTULLA IN HALIMA AZIZ JUNIOR COLLEGE HAWNG
Imphal, May 24 (Nisin Thuhiltu): Manipur Governor Dr. Najma Heptulla in tuni’n Jamia Halima Aziz Educational Trust Campus Khabeisoi (Azamnagar) Imphal East District ah Halima Aziz Junior College hawnna a nei hi. Dr. Najma Heptulla in zia hun matna chu Chief Guest hina tawh a uap a, teachers leh parents te chu chapang te ziltilna a diak ah technical line ah panla thak ding ah chialna bawl in Prime Minister Narendra Modi’s ‘sab ka saath, sab ka vikash’ & equality for all” chu muang ding in mipi te chialna a bawl hi. Hiatthei khat chu Khabeisoi Kerang Khomidok village in hun sawttak government high school leh higher secondary school a neilo ziak ah Jamia Halima Aziz Educational Trust chu kum 2004 ah a la kiphutdawk a hia, Jamia Halima Aziz Educational Trust in a tup chu minority leh insung haksate educational facility chuam chuam piak ding ti a hi. Chuleh, tuni tiang ah nauchaga 2400 leh migenthei student 6012 te Jamia Halima Aziz Educational Trust ah enrolled kibawlta a hi.
IFCD/YAS MINISTER IN MAPITHEL DAM-AFFECTED VILLAGE CHADONG ENTHA
Imphal, May 24 (Nisin Thuhiltu): Mapithel dam-affected Village chuam chuam te lak ah khat - Chadong village chu tuni’n IFCD & YAS Minister Letpao Haokip in mimal tak ah vena nei in a haksatnau leh thil umdan te etthakna a nei hi. Chadong village Church, IFCD Minister Letpao Haokip in a thugenna a chun, State government in Mapithel dam-affected villager te haksatna sukven ding ngaikhawk mama hin a gen a, a vaima theilam ah sukfel a hitheina ding ah panlkna um zing hin a gen hi. Government in Works, Agriculture, Horticulture, Forest, CAF&PD leh Education Minister te panna high power committee siam a hidan le a gen a, tunung ah Dam in chenna inn a suksiat piak te ding ah housing for all scheme chiapi hiding in a puang hi. Khawmipi te’n demand a bawl uh Chadong village ah school umsak ding le sukpitin piak ah um ding hin Minister Letpao Haokip in a gen a, khawmi te chu a tamtheipen ah Government panlakna chuam chuam te kithuapi ding in chialna a bawl hi. A langkhatlam in Chadong Katamnao Long (students’ body), youth, women society, MDAVO, village elders, etc te’n Minister pu kiang in a haksatnau leh a pawimaw te tut in holimna a neipi ui. Zia hun matna chu Vice-Chairman , ADC Ukhrul Thanmi Kashung, Engineers of IFCD leh IFCD Chief Engineer G. Robindro Sharma te’n le a uap ui.
PETROLEUM DISTRIBUTION ENZUI DING SPECIAL TASK FORCE SIAMDAW AH UM
Imphal, May 24 (Nisin Thuhiltu): Manipur ah thautui diklo tak ah kizuak leh diklo tak ah a kihawm te enzui ding in Manipur government in special task force a siam dawk hi. State Consumer Affairs, Food And Public Distribution (CAF&PD) Department in diklo tak ah retail outlets khenkhat ah petrol leh diesel zawk a hidan amudaw zing tawh kitawn ah May 17 ni a khah special task force chu siamdaw ah um a hi. Imphal East leh Imphal West district huapsung ah petroleum retail outlet khenkhat in diklotak ah thautui zawk chiing mun mama un a kigen a, May 12 ni ah police team khat in oil tanker khat black ah kizuak a matdaw nung ua khautak ah thautui zawkna etzui ding ah lemsakna um a hi.
EDUCATION MINISTER IN ‘HUMARI BETI, HUMARI SHAAN’ SCHEME HAWNG
Imphal, May 24 (Nisin Thuhiltu): Education Minister Th. Radheshyam in tuni’n Manipur a ding ‘Humari Beti, Humari Shaan’ admission scheme hawnna a nei a, zia scheme chu insung haksa numei student te ding ah game changer hiding in a gen hi. SATYA Group of Institutions in Manipur ah ziagual scheme a puaklut uh chu kipakpi kawm in a lawting theipen ah scheme chiapi a hiding kinem hin a gen hi. Scheme nuai a chu numei 100 merit cum means basis ah Group of Institutions nuai ah B.Tech(all branches), Diploma, BBA, MBA course zil te 100% tuition fee free hiding ti a hi. Scheme hawnna hun chu CEO, SATYA Group of Institutions, Amrik Singh, students, parents leh NGOs member tamtak in le a uap ui.