CM in Senapati District a ding Rs. 202 Crore phuangdawk 

Imphal, May 22: Chief Minister N. Biren Singh in Senapati district ah developmental work chuam chaum sepdaw na ding in economic package ah Rs 202 crore a puang hi. Senapati District Headquarters ah Barak Spring Festival, 2017 hawnna leh reception function chu chief guest hina tawh uap, CM N. Biren Singh in NH-2 in a haw khak Mao-Imphal kikal lampi pua phatna chu State Government thak in 100 days programme a siam lak ah pangsak a um hi’n a gen a, kumkit a pat Sangai Festival leh Shirui Lily Festival te gual ah Barak Spring Festival chule state level tiang ah mat a hi theina ding ah local organising committee tawh state government kikhutzawp ding hi’n le a phuangdawk hi. Festival matna ding a chun kum kit a pat state government in sen leh so zosia a puak daw ding ban ah tukum ah a kimatna a chun kithuapina ding ah government in Rs. 50 lakh pia ding hi’n le a gen a, state government in zia gual state level tourism festival chu district dang a le sai ut hi’n le a phuangdawk hi. Chief Minister in NH-2 ah Imphal-Mao section puaphatna ding ah National Highway Infrastructure Development Corporation Ltd (NHIDCL) khut ah mawpuakna piak a hi tak ban ah zia bawlna ding a hin Rs 301 crore tuam bithiat a um hi’n a gen a, zia gual ma chun, Senapati leh Ukhrul district te kizawpna, Tadubi-Tolloi lampi puaphatna ding a le Rs. 64 crore bithiat a um hi’n le a gen be hi. District sung ah innsuan a tuithiang a tunna ding mega project khat chiapi hi ding a hi ban ah Dzuko ah pawimaw tourism infrastructure le bawl hi idng ti’n le CM in a gen hi. Hill district dang gual ah Senapati a le numei te market shed sakna ding ah Rs. 10 crore bithiat a um in tunung sawtlo ah pat hipai ta ding hi ah taklang kawm in a kinthei lam ah market shed chu sak a hi theina ding ah district mipi leh pawl chuam chuam te kiang ah a sakna ding mun kilem têl ding in le a dawn hi. Super Fight League champion Kario Isaac in talent a nei te chu hiatpi n ah Manipur police department ah Sub-Inspector panmun piak hi ding ti’n le mipi mai in a phuangdawk hi. CM in a gen be na’ chun, Senapati mipi te, a diak ah Naga People’s Organisation (NPO) in Barak Spring Festival mangcha ah Barak lui humbit a guat tawh kisai ah pâkchat um a sak thu a gen a, mipi kiang ah awareness bawlna ding ah festival a pat daw chu kipakpi um a sak thu le a puang hi. Chief Minister in a hun mat sung a chun, Mayangkhang ah IIIT bawldaw ding, thingthang kawchawng tiang ah electric tungsak ding, Senapati district headquarters ah high mast light tua ding, Maram tribe ah art & culture association a ding ah hall sak ding, mun chuam chuam ah IB siamdaw ding ban ah chiapi ding project dang dang te genlatna le a nei hi. Deputy Chief Minister Y. Joykumar in kihiatthiamna hawitak tawh mi zosia kituak tak ah cheng leu State le khangto in maban suan ding hi’n a gen a, Barak Spring Festival chu Barak lui humbitna ding ah mipi kiang ah awareness piakna a hi bep hilo in district mipite chawndan sulang hi’n le a gen hi. Manipu DGP lui, Dy. CM Joykumar in Senapati ah SP a la hilai ah a thil tuak te chung chang genlatna le a nei hi. Festival chu chief celebrant hina tawh uap, PHED & Printing & Stationery Minister L. Dikho in Barak lui chu district a pat kipan a hina ah lui humbit chu district mipi te mawpuakna hi’n a gen a, district ah mega water supply leh sewerage project pan ding in le Chief Minister kiang in a dawn hi. Function chu Chief Host hina tawh uap, Tribal Affairs & Hills leh Fishery Minister N. Kayisii in a thugenna’ chun, Barak lui chu Senapati sung a cheng Naga nam 5- Poumai, Mao, Maram, Zeliangrong leh Thangal te umna haw in zia zaw a chu phaicham leh hill district dang ah luang lut hi’n a taklang a, zia ziak a chu Naga People’s Organisation in zia festival chu lui humbitna campaign dan ah a patdaw hi’n a gen hi. Hun matna a chun, cultural item chuam chuam suklat in le a um hi. Hun matna kichai a chun Chief Minister leh a team te’n festival kimatna mun ah kihawng, stall chuam chuam te etthâkna nei in District ah Naga nam 5 um te a ding ah traditional house kibawl te chu le a va enthâ ui. Festival hawnna hun chu  Parliamentary Secretary - L. Sushindro, Shri Kashim Vashum, Awangbou Newmai, H. Dingo, N. Indrajit leh S Subhashchandra; MLA - Ngamthang Haokip, S Bira leh D Thaisii; ban ah Minister leh MLA lui kehnkhat, ADC Chairman leh member te, civil leh police ah top officers, NPO president Kamba Moses ban ah Tribe Hoho president te’n le a uap ui.

Voluntary Blood Donation Camp nei

Lamka, May 22 (Nisin Thuhiltu): Churachandpur District Hospital Blood Bank leh Zawlbuk Football Club kithua in tuni zingkal lam dak 9:30 a pat in Rengkai Government Higher Secondary School, Rengkai ah Voluntary Blood Donation Camp nei in a um hi.  Blood Donation hun ah Rengkai Government Higher Secondary School a pat student 10 leh Zawlbuk FC a pat mi 43 ban ah midang kiphaltak a thisan pia mi 22 tuam a ting zo hi. Zia hun a hin Blood Bank Staff t leh Suan Hauzel, ANO, NCC te’n le kithuapina a piau hi. Zawlbuk FC in a hileh District sung ah thisan pawimaw te khualna ah Churachandpur District Hospital Blood Bank tawh pangkhawm in State Blood Cell sponsor na ah zia gual Blood Donation Camp hi a sai a hi.

Cold Chain Point te ah Temperature Logger hawi hi di

Lamka, May 22 (Nisin Thuhiltu): United Nations Development Program (UNDP) a pan hung leh District sung ah damdawi kawitinna ding ah mat ding,  Temperature Logger kiti chu District sung a um Cold Chain Point zosia ah kawi hi ding a hi. Temperature Logger a hileh SIM Card tawh kithua, Temperature etna, damdawi kawiting a umte temperature dik ah kawi a hinam ti etna a hia, temperature degree Celsius 2 leh 8 kikal ah damdawi kawi ding ti a hia, zia kikal a hi temperature a um lo leh Temperature Logger in mobile phone pansan ah District sung a um Vaccine Logistic & Cold Chain Manager leh District Immunization Officer kiang ah hiatsakna pia ding a hia, UNDP head office a le message thawt ding ban ah zia message chu pansan ah temperature chu bawl dik hi ding a hi. Temperature Logger a hileh District ah Cold Chain Point zosia- DIO, District Hospital, PHC Saikot, PHC Sangaikot, PHC Singngat, PHC Behiang, PHC Sinzawl, PHC Thanlon leh CHC Parbung ah kawi hivek ding a hi.

 Pumbuk mei kâng kit 

Lamka, May 22 (Nisin Thuhiltu): Hiangtam Lamka a um, Salpha te Pumbuk chu zani, May 22 zingkal lam dak 2 tuam in melhiatlo pawl khat in a la hâl ui. Thiltung chu a hiatphat un vêngsung mipi te’n patau dâk khen in a mun a del ngal in pumbuk chu kângtum manlo ah mipi’n mei chu phelmit man uh hi’n a kigen hi. Zia hi kuate khutnung a hi hiat hichetlo maleh thiluang vuidaw ding phal nailo te hi ding ah tamtak in a muangmaw ui. Salphate pumbuk hi mei in 2vei a kâkna a hi ta,  a chiata October 8, 2016 a khan le zingkal matak dak 2 tuam ma ah mei in a la kâng hi.

 

TCYA Lamka Unit in election nei

Lamka, May 22 (Nisin Thuhiltu): Tedim Chin Youth Association (TCYA), Lamka Unit in zani sunnung dak 1:30 in unit hall ah TCYA Lamka Unit vaipaw ding telna a nei hi. Zia hun a chun, 2017-2019 sung ah TCYA Lamka Unit ah President ding in H. Suanlianpau, Vice President ding in NP Mangpu, Secretary H. Lamsuanmang, Assistant Secretary, Khamlianmung, Finance Secretary Ginkhaw-enn leh Treasurer ding in Hangkhanmuan te teltin in a um ui. Teltin thak a um te chu Adviser, Mungno Hatzaw in kitiamna neisak in Pastor S. Gouzamung in a pauchap piak hi.

Hall hawnna leh MLA kipakpina nei 

Lamka, May 22 (Nisin Thuhiltu): Haijang khua ah tuni sunma dak 11:30 in Langdong Haolai Hall hawnna leh tuchung 11th Manipur Assembly election nei hun ah 60-Singngat Assembly Constituency a pat teltin a um Ginsuanhau @ GS Haopu Zou, MLA Singngat & Chairman MANIREDA kipakpina chu Haijang Hausapa, Alun Haolai malatna in kawmipi’n a nei ui.  Kipakpina hun mat masang a chun khawmipi te mat ding ah kibawl, Langdong Haolai Hall chu GS Haopu in a hawnna nei in Pastor Onkho Haokip in Pathian kiang ah latdawna a nei hi. Hall hawnna zaw in MLA kipakpina nei in zia hun a chun Haijang Village Authority, MLA kipakpina a chun Self Help Group, khanglai Pawl leh mimal chuamchuam te’n kipakna thilpiak piakna a nei ui. Pastor Seitinmang Vaiphei, KBC Gambih Number 10 Pastor in tilkhona thugen in MLA pa leh a zi a ding in Pathian kiang ah malzawl dawt piakna a nei hi. Haijang hausa, Alun Haolai in hawndaw a um Hall chu Singngat MLA Hangkhanpau a hilai ah 2010-2011 BRGF fund mang ah bawl a um hi’n a gen a, sanction um theina ding ah bill delna ah Rs. 50,000 bei in a um nalai Rs. 4.5 lakhs chu hall bawlna ah a kidailo ziak in MERG fund chuam chuam kei kawi in Rs. 7 lakh bei ah kibawl a hi ti’n a gen hi. GS Haupu in a genna a chun, Singngat bial sung ah khua thiangtho leh khangtona pen ah kipakpina hun matthei ahina chung ah a khua enkawl tu, Alun Haolai kiang ban ah MLA ding ah telting tu, mipi leh Pathian kiang ah kipakthu a phuangdawk a, khua chu Kuki leh Zomi a ding ah mun pawimaw a hina ah ziakhua chu vangselo ding hi’n le a gen hi. Development tawh kisai a genna a chun, Manipur ah BJP sawlkar a naupang mama nalai a, state a pat le fund bangma umlo himaleh bialsung ah khantona a um theina ding ah panla a hi dan gen kawm in, tunai a Delhi a project chuamchuam a um theina ding ah kal suan a hi dan a gen hi. Singngat-CCpur lampi bawlna chu KKC in a tawp chan a sep ding ti himaleh BRO in a piakdaw nuamlo ziak in tu chan ah lampi chu bawl thei hilo hi’n a gen hi. Zia tawh kisia ah NEC leh a kisaipi department ah official chuam chuam te kimupi in thakit, June a pat nasep patthei ding ah gingcha a hi dan le a phuang hi. Zia hun matna chu Singngat bialsung a MDC, Grace Zamnu, Suanchinpau Guite leh Ngamhao Touthang ban ah Ex MDC Neihthang Mate, Tongkai Baite leh Singngat bialsung ah khua hausa hunkhawp le a pang ui.

All Communites Guru Puja 2017 kipan

Imphal, May 22 (Nisin Thuhiltu): Ni 4 um ding, kum 25 tinna All Communities Guru Puja – 2017 chu tuni’n Malem Ima Community Hall, Thangmeiband Yumnam Leikai ah pat in a um hi. Suryabara Sana Kala Kendra in a sai zia Silver Jubilee Ceremony matna chu Manipur Governor, Dr. Najma Heptullah in Chief Guest hina tawh a uap a, Chairman (MANIDCO) Dr. Radheshyam Yumnam in President leh Squn.Ldr. T.S.Singh in Guest of Honur hina tawha uap chiat ua, Undersecretary, Govt. of Manipur Ng. Noren; State General Secretary, BJP Manipur Pradesh, N.Nimbus; Principal SCM English School, Singjamei, Sh Ibohal Singh; Padmashree awardee & Ex-principal J.N. Manipur Dance Academy, Ksh Thouranishabi Devi  leh ISKCON Manipur ah member, Banamali Das te’n resource persons hina tawh a uap ua, zia hun a hin Manipur ah community chuam chuam te le a pang ui. Governor Dr. Najma Heptullah leh Dr. Radheshyam Yumnam te’n candle-lighting bawl in hun matna chu a pan ua, a chiakhawm zin leh lêng te’n Guru te zana in pâkcha piakna a nei ua, badge leh puan piak in a um chiat ui. Governor in thugenna a nei na a chun, guru leh a student te kal thu tawh kisai ah holimna nei in guru chu a siamtu, a humbittu leh a susia tu hi’n a gen hi. All communities Guru Puja silver jubilee matna hun uap thei ah a um chu kipak mama a hi dan le a phuangdawk a, pau chuam chuam thaw maleu hin le nu khat cha vek i hiu ti’n le a gen hi. Zia kawm kal a chun, Guru Pujah ni a hi tawh kitawn in, Governor Dr. Najma Heptulla leh Raj Bhawan staff te saina’n Raj Bhawan ah tuni’n ‘Clean and Green’ Cleanliness & Tree Plantation Campaign nei a um in Raj Bhavan park ah thingno phuna a um hi. Zia hun a hin, hampa lo hing no chi chuam chuam, a kigawm ah 210 tuam phudaw in a um hi.

Minister te’n Keisamthong AC ah School te entha

Imphal, May 22 (Nisin Thuhiltu): Health Minister L. Jayanta Kumar leh Education Minister Th. Radheshyam te’n Keishamthong constituency ah school te etthâkna a va nei ua, zia hun a chun Haobam Marak H. A. High School leh Ngasi Rastralipi High School te a va entha’u. Health leh education chu society khantona ding ah component 2 a hia, education in chitna leh mihiam value te supiting in damtheina chun lungmuanna, thahatna leh kimuanngamna pia hi’n Education Minister in a gen hi. Infrastructure kituplo ban ah student tawm tawh kisai ah local mite leh school a sem teacher te’n a gen uh chu minister 2 te’n ngaithâkna a nei ua, Education minister in school teacher te buaina chu sukvenna ding ah pan lak thei chan ah la ding hi’n a gen hi. Zia hun a chun, Ngasi Rastralipi High School ah student tawm maleh student te a ding in van service bawl piak a um hi ah a mu daw ban un school ah room khenkhat chu student organization khat in office ding ah lua a hi dan le a mu dawk ui. Office ding ah chool room kilua chung chang ah Education minister in lung awilo thu phaungdawk kawm in zia gual a bawl masang a organization chuna kisaipi department phalna  alak masak ngai hi’n le a gen hi.

Manipur in International Day For Biological Diversity nit 

Imphal, May 22 (Nisin Thuhiltu): Directorate of Environment saina nuai ah International Day for Biological Diversity chu tuni’n ‘Biodiversity and Sustainable Tourism’ ti thupi’ mang ah nit in a um hi. Function chua  hileh Palace Compound, Imphal a um Manipur State Film Development Society (MSFDS) auditorium hall ah nei in  aum hi. Hun matna chu Forests & Environment Minister Th. Shyamkumar in Chief Guest hina tawh uap in zia ni chu khawvel pumpi huap ah biodiversity mat phatchuam ding dan promote na ding ah mat hisek hi’n a gen a, zia ni chu sustainable tourism phatchuam dan awareness bawlna ding ah hun lemchang hi’n le a gen hi. Minister Shyamkumar in Directorate of Environment kiang ah mass awareness a um theina ding a chun zia ni chu state sung mun chuam chuam ah sai ding in a dawn a, International Day for Biological Diversity chu a lawting theina ding ah separtment zosia kithuakhawm ngai a sak thu le  puang hi. Function a chun president hina tawh uap, Shambhu Singh, Additional Chief Secretary (Forests and Environment, PHE, AR & DG-SAT) in ama mimal experience te pansan ah holimna nei in kum 32 chiata ah Manipur a phak masak pen hun a chun state chu tu sang a hin biodiversity hotspot lianzw hi’n a gen a, lui pang te tuilo ah hei daw a um chu “loot of the century” ti’n a minvua hi. Chun, state mipi te’n nature hawina susia in biodiversity siat chule a mau mawpuakna hi’n a gen hi.

Industry khantona in muna puangsak di: Th Bishwajit 

Imphal, May 22 (Nisin Thuhiltu): State government in state sung ah income sukpunna ding ah industry te promote zing hi’n Commerce & Industries Minister Th. Bishwajit in a gen hi. CSIR-North East Institute of Science & Technology Branch Laboratory, Lamphelpat, Imphal ah tuni Banana Fibre Development Centre hawnna hun ah thugenna a nei na a chun, industry techu department pawimaw tak a hina ah entrepreneur te’n sepna a bawldaw be theina ding ua tilkho pawimaw a sak thu a phuang hi. Minister in tuni ma in Ethnic Designs & Fabrics of North East India pansan ah Novel Product te chung chang ah ni 5 um ding Training  Programme chu le a hawng a, Banana Fibre Development Centre chun lobawlmite lomasuak tamsak chuam ding hi’n a gen hi. Chun, state dang a pat demand um te suk pitin na ding ah lobawl mite kianga  chun ‘Stevia’ kiti damdawi a kimang thing chikhat chu a tamthei pen ah chîng ding in le a dawn hi. Government in Bamboo Chipping Mill suk hin kit ding leh Dragon Fruit chîng chu promote gua hi’n Bishwajit in a gen a, PMGPY scheme tawh kisai a genna a chun, applicant te hawi tak ah etchian a hi zaw tak leh bep sanction hipan ding hi’n a phuangdawk hi. Zia hun chu uap ma, Revenue Minister Karam Shyam in CSIR saina nuai ah training te chu mipi te a ding ah phachuam mama ding leh lomasuak a suk pung ding ban ah kihinsuana ah matthei ding hi’ a gen hi. Hun matna tawh kisai a chun, CSIR-North East Institute of Science & Technology Branch Laboratory pamphlet hawnna le a um hi. Zia hun chu trainee 80 tuam in a uap ui.

 

SC notice to Centre, Manipur in road rage case involving CM Biren Singh's son

New Delhi, May 22 (Nisin Thuhiltu): Supreme Court in tuni’n 20 March 2011 ah tu Manipur Chief Minister N Biren Singh chapa Nongthombam Ajay Meetai in lampi awng-awt vaklo ziak ah a kaplup Irom Roger insungmite lauthawng tak ah a um  nau tawh kisai ah report pelut ding in hiatsakna a bawl hi. Irom Roger pianna nu Irom Chitra Devi in a chapa kithana chung ah amau hinna le lauthawn um a hidan taklang kawm ah court ah thil umdan a tut tawh kitawn ah advocate Utsav Bains in Supreme Court ah Irom Roger insungmi te  BJP mapui Manipur government nuai ah lungmuanglo a hidan uh Supreme Court ah a tut nung ah Supreme Court in Centre leh State chu thil umdan kichian tak pelut ding ah hiatsakna a bawl a hi. Supreme Court bench Justices L Nageswara Rao leh Navin Sinha in notice a suana a chun, Union Home Secretary leh Manipur Chief Secretary in 29th May 2017 masang ngei ah dawnhuna a piak ding ti a hi. Himaleh Supreme Court in Chief Minister leh case tawh kisai in kuama dang kiang in hiatsakna bangma a bawl puai.  A langkhatlam ah Chief Minister chapa  Nongthombam Ajay Meetai chu section 304 (culpabale homicide not amounting to murder) of the IPC nuai ah kum 5 sung jail tang ding ah thutan khum ah um leh jail ah um zing le a hi.

Mizoram ah mi Myanmar refugees 280 um 

Aizawl, May 22 (Nisin Thuhiltu): Arakan, Myanmar a pat numei leh naupang panna mi 280 te southernmost Mizoram’s Siaha district ah refugee um a hidan uh senior police official khat in a gen hi.  Official thusuak in a taklat dungzui ah Lungpuk village ah mi 200 te refugee ah kikawi leh mi 77 te Khalkhy khua ah refugee kawi a hidan a taklang a, border areas ah um Assam Rifles personnel te leh district administration in refugee te chu a pawimaw dungzui ah kithuapina pia a hidan uh le taklang in,  refugee te umna khaw neitu te’n nek leh chak ding leh giakna ding arrangements  bawl piak in a gen hi. Siaha district Superintendent of Police in Lungpuk village ah thil umdan etthakna a nei bak ah security arrangement kituptak ah siam ah um in official thusuak in a gen hi. Refugee te chu  Arakan Army (AA) thingnuai te leh Myanmarse Army te kal ah kikaptuana a um ziak ah Ralie villager te a khuau ah um ngam talo ah Myanmar gam kantan ah Mizoram lut uh hin le a kigen a, Assam Rifles official in Myanmarese army official te thil umdan hiatsak kawm ah refugee te bittak ah a um theina ding ua panla ding ah chialna bawl hin a kigen hi.

Arunachal Pradesh: State Govt. in zero interest crop loan piak lemsa

Itanagar, May 22 (Nisin Thuhiltu): Arunachal Pradesh government in tu current financial year sung ah

lobawl mite zero interest  ah crop loan piak ding in lemsakna a nei a, state finance department in a taklatna a chun, government in Chief Ministers Krishi Rinn Yojana (CMKRY) launch bawl ding leh 4% ah crop loan/kisan credit card piak ah um sek chu Rs 3 lakh tiang ah zero  interest ah loan piak ding lemsa hin a gen hi. RBI lehNABARD policy tawh kituak ah lobawl mi (farmer) te bank loan piak ding ah guanggalna chiatha zing hin official thusuak in a gen a,

zia  scheme nuai ah benefits te chu KCC/crop production loan la te tiang huap sak hiding leh commercial banks, APRB (Arunachal Pradesh Rural Bank) leh  Arunachal Pradesh State Cooperative Apex Bank (APSCAB) Limited te ah lak thei hiding in a gen hi. Chuleh, Chief Minister Pema Khandu in target ah lobawl mi7,500 nei ding lemsa hin a gen hi.

Indian Army jeep ah civilian khat kanden tu Major Gogoi award piak ah um

Kashmir, May 22 (Nisin Thuhiltu): Kashmir, Gundipora, Beerwah ah civilian khat Army jeep ah kanden tu Major Leetul Gogoi of 53 Rashtriya Rifles chu Indian Army for counter-insurgency operation Award piak in a um hi. Army Chief General Rawat in commendation card tawh award chu Major Gogoi kiang in piakdawna a nei hi. A langkhatlam in April tha ah army te’n civilian khat army jeep ah a kanden nau video social media ah takdaw ah a um tawh kitawn in demna chuam chuam army te’n a tuak ui.