CABINET IN UG SURRENDER TE REVISED REHABILITATION POLICY APPROVE;
MONTHLY STIPEND RS 8000 PER MONTH HITA DING LEH FINANCIAL GRANT RS 4 LAKH HITA DING

Imphal, May 21 (Nisin Thuhiltu): Cabinet Hall, Chief Minister Secretariat, Imphal ah Chief Minister N. Biren Singh chairman hina nuai ah State Cabinet in thingnuaimi ki pedawk (surrender)te ding ah revised surrender- -cum-rehabilitation policy approve a bawl hi. Revised policy approved dungzui a chu kum 3 sung thasin (monthly) stipend Rs 4000 hisek chu Rs 8000 per month hita ding, Rs 8000 lak ah Rs 2000 chu ration money ti hiding a hi. Government in thingnuaimi ki pedawk (surrender) te ‘one time financial grant” a piak sek Rs 2.50 lakh chu Rs 4 lakh ah sukpun in a um a, zia sum chu surrender te bank account ah kum 2 sung fixed deposit ah kawi ding,  kum 3 a tin tak leh withdraw bawl leh bawllo ding chu surrender te dawitelna hiding a hi. Thingnuaimi ki pedawk (surrendered) te chu, medical facility le piak hiding a hiu a, zia facility dungzui a chu rehabilitation camp ah a um sung ua damlona tuak a um ua leh total expenditure lak ah 75 per cent chu government in reimburse a bawl ding leh State Health Directorate in zia facility muthei ding leh mutheilo ding tawh kisai ah lemsakpina a piak ding a hi.  Sepna lam tawh kisai ah thingnuaimi ki pedawk (surrender) te chu physically fit cadres a hi ua leh special relaxation tawh special battalions ah sepna piak ding ti a hi. State Cabinet in surrendered militant te ding ah special unarmed battalion siamdaw ding tawh kisai le meeting hun in a pawdawk hi.  State Cabinet in Legal Advisor to Chief Minister, N Kumarjit Singh chu Advocate General of Manipur ah appoint ding in le approve a bawl a, Media Advisor & Coordinator to Chief Minister appoint ding le approve a bawl hi. Media Advisor in public leh media affairs a etzui ding leh Coordinator in Chief Minister thakhel ah Government Departments te panlakna a etzui ding a hi.  State Cabinet in Churachandpur District ah August 31, 2015 ni police firing ah thina tuak Martyr 8 te leh  liamna ziak ah disabled, mi 9 insungmite khat chiat State Revenue Department ah Grade III/IV posts piak  ding leh martyr 8 insungmite ex-gratia Rs 5 lakh chiat piak ding in le lemsakna a nei hi.

State Cabinet in Manipur Goods and Services Tax Bill, 2017 passed bawlna ding ah June 5 - 7, 2017 sung ah State Legislative Assembly special session umsak ding in lemsakna a nei a, Imphal Municipal areas huamkhalo ah disturbed area status chu tha 6 sung suksau (extend) ding in lemsakna a nei bawk hi. A langkhatlam ah State Cabinet in Technical and Promotion (TP) Cell of State Co-operative Department,  re-establishment ding tawh kisai le meeting hun in genkhawmna a nei a, Municipal Corporation case ah Corporator  ah Councillor a pan theina ding ah draft Manipur Municipalities (11th Amendment) Bill, 2017 le approve a bawl hi. Cabinet in Manipur Infrastructure Development Agency (MIDA) establish  bawl ding in lemsakna a nei a, zia chu social infrastructure project implement bawltu hiding leh Societies Registration Act, 1986 nuai ah State Planning Department in established a bawl ding a hi.  Manipur Infrastructure Development Agency chun, concepts leh DPR a siam ding, a kisaipi Ministry leh funding agency te kiang ah a pawimaw ding zat funding chu State Government kiang ah a piaklut ding a hi.  Chuleh, Chief Minister, Manipur chu agency ex-officio Chairman hiding a hi.  State Cabinet in Road accidents leh thingnuaimi te khut ah Army/CPMF/Assam Rifles personnel thina tuak te ex-gratia piak ding tawh kisai chu, case to case basis ah ex-gratia piak ding in thupukna a siam hi.

SSDC in DC/CCPur kimupi

Lamka, May 21 (Nisin Thuhiltu): Churachandpur Deputy Commissioner R. Sudhan chialna dungzui in Saikot Sub-Division Demand Committee (SSDC) ah Chairman, Timothy Z. Zote; Secretary, R. Lalkaisanga leh Executive Member Lalsandam te’n zani, May 20 a khan ama office chamber ah a va kimupi ui. SSDC in zia hun chu hun lemchang ah la in Saikot SDO office ah revenue staff a um lo leh local mite’n zia ziak ah haksatna a tuak teu chu hiatsakna in a mang hi. Zia chung chang a hin Manipur government ah hiatsakna bawl kit ding in district official te kiang ah dawn kawm in DC kiang ah kithuapi ding in dawtna le a siam hi. Government a ding ah hiatsak kitna chu a ni ma in a chai ui. Zia hiatsakkitna lekha a chun office ah staff kiningting leh furniture kawi ding, Saikot SDO office ah land transfer document process sak thei na ding, Saikot Sub-Division nuai ah khua 5 kawi be ding, Saikot SDO area nuai ah nationlised bank leh ATM facility kawi ding ban ah SDPO khat kawi ding ti te a pang hi.

May 24 leh Salphate vui hita di

Lamka, May 21 (Nisin Thuhiltu): Vuidaw nailo a um Salpha 8 te chu a hung tung ding May 24 leh vui hita ding ti’n JACAATB a pat thutut a kidawng hi. JACAATB Core Committee in tuni, May 21, 2017 sunnung dak 3:00 ah SSPP Jt. Headquarter Office, Hiangtam Lamka ah thuthak lakhawm te a kimupi hun a chun MZP Churachandpur ah Vice President, Lalhniropuia in Salphate vuidaw thei ta ding ah a um na chung ah kipakthu a phuang a, a luang uh vui ding ni, May 24, 2017 ni leh mipi a tam theipen in uap a, innsuan a mi khat bek pang chiat ding in le hiatsakna leh chialna a bawl hi. Zia ni hileh a hithei leh School zosia suty ding ah dawtna siam kawm in Class VIII a pat a chung lam te’n zia ni hi a uap ua District Morgue a pat Public Ground kikal human chain bawlna ah pang ding in le a chial hi. Chun, zia hun matna a hin mani nampuan chiat ah kivan ding leh inn tin ah nampuan tâk chiat ding in le a dawn hi. Chuleh, zia ni hileh Salphate za suklatna ding ah sumkawl veina mun te chu zingkal dak 9:00 a pat nitaklam dak 5:00 chan khak chiat ding in le a dawn hi.

Purple Math kipakpina nei  

Lamka, May 21 (Nisin Thuhiltu): 1st Shirui Lily Festival 2017 matna hun ah ShiRock 2017 band competition ah 3na la, Purple Math vaidawnna chu tuni nitaklam dak 4:00 in Unit Office a nei in a um a, Pastor Dousuankhup, Local Pastor, PCI (R) Rehobot in Purple Math member te a ding ah pauchapna a nei piak hi. Zia hun a hin Purple Math a pat Lamsuanthang in report piakna le a nei hi. YPA Lamka Unit President, S. Kamsuanlun in Purple Math kisakkhawlna leh competition ah a pang ding chu YPA in hiat piaklo maleh a lawting a pat hiatpi pan a hi dan a gen a, maban ah YPA tawh kihiatua ah zia gual panlakna um te a le kithuapina um thei te etkhawm pawimaw a sak thu a gen a, YPA chu phatchuam ngai nasep sem ding a hina ah zia gual ah kipakpina te chu YPA in a bawl ding him hi’n le a gen hi. ShiRock 2017 competion ah Audition Round a chun Band 20 tuam a um ua, zia lak a chun Band 12 teldaw a la hiu. Competition a hin Imphal a pat The Wishes in 1na la in sum Lakh 2 a sâng a, Ukhrul a pat The Retrospect in 2na leh Rs. Lakh 1 ban ah Lamka a pat Purple Math in 3na leh Rs. 50,000 a dawng ui. Purple Math a hin Singer Lianlalhnun a hia, Guitarist, Seitinhao @ Apu Sei, Guitarist, Khammuanlal (Bass) leh Lamsuanthang Drummer a hiu.

 ZAA in citywide concert 2017 nei di

Lamka, May 21 (Nisin Thuhiltu): Zogam Artistes Association (ZAA) in a hung tung ding June 24, 2017 leh Public Ground, Hiangtam Lamka ah “Together We Can“ ti thupi mang in Lamka sung huapsuak ding in citywide concert 2017 chu thupitak ah nei ding a vaisawm hi. Zia hun a hin Zosuante lak ah Band minthang mama, India Tv Music Chanel Vh 1 a dinmun pawimawtak luapha ban ah India khawpi - Delhi, Mumbai Bangalore Goa, Dubai UAE leh mun chuam chuam a la fang kual, Delhi pansan Traffic Jam le pang ding a hia, amau ma in Bollywood a pat Sound Engineer minthang mama khat kitawnpi ding a hiu. Zia hun a hin gamsung a Artiste minthang taktak te’n Live Music, Stage Performance nei ding a hiu a, Solo leh Group Song ban ah gamsung ah musician minthang taktak te’n le uap ding a hiu. Concert ding tawh kisai a hin ZAA General Headquarter in, Concert Organizing Committee kiti a la bawldawk a, concert tawh kisai thil bangkim sai fel ding in mawpuakna zosia a piak thak in a um hi.

Ukhrul ah school infrastructure entha

Imphal, May 21 (Nisin Thuhiltu): Education Minister Th. Radheshyam in tuni’n Ukhrul district ah school te etthâkna a nei hi. Sarva Shiksha Abhiyan (SSA), Education Guarantee Scheme (EGS) leh Alternative & Innovative Education (AIE) te norms dungzui ah school te sak a hilo a mu in Minister in lungnawpmaw thu a phuang a, SSA leh EGS nuai ah school developmental work te ginatak ah semlo te chung ah action khautak lak hi ding in a gen hi. Global Positioning System (GPS) dungzui ah school sakna ding mun kipiakna mun a chu sak ding ti himaleh EGS in a phallona mun tiang tiang ah sak a la hi. EGS dungzui ah school kisak thakna ding in a kîm 1km huapsung ah school dang a umlo ngai ding ti a hi. Zia scheme nuai a hin Mayotang Primary School chu Mayotang ah sak ding ah thupiak himaleh Longthang Cemetery, Hundung Village ah a la kisa hi ah mudaw in a um a, Kharaphung Primary School chu le GPS site a pat kilometer khat leh a kim ah kikak gamlak ah um a hia, SSA scheme ah 2012-13 programme nuai a 2016 a khan zawthiang hita maleh function khalo a hi. Kazripung High School a va phak hun a chun, school boundary chu piaunel la te’n kêk uh hi ah mudaw in a um a, school te chu naupang  te’n chitna, hiatna leh maban ah kihumbit thei na ding zilna ah a mat uh a hia, khawtang leh state sung bep hilo in gamsung pumpi huap ah khantona tuntu a hi ding ziak un school kim leh kiang ah zia gual thil phallo chu bawllo na ding ah lawi upate’n a khap uh ngai hi’n a gen hi. Minister in zia visit hun a chun K.K. Leishiphanit High School, Kasomtang, Pettigrew College Ukhrul ti te le a va enthâ, ITI Ukhrul, Modern High School, Greenland Primary School, Tungrei Primary School (Aided), Hungdung leh a dang dang te sakna chia tha zing chule a va entha’i.         Imphal a kile lam ah Kasturba Gandhi Balika Vidyalaya, Shangshak in a kibang malam hi. 1947 kum ah a kisa hita Shangshak Government High School chule a va entha, school bang te chu a hawi taklo ziak in tunung sawtlo ah puaphatna nasep pat hi ding in a tiam hi. Minister Th. Radheshyam chu zia school ve tha minister masapen a hina ah khawmi te’n kipak thu a phuang ua, Minister in hawitak ah a siatna a etthâk a hina ah thiamzilna a hawina ding ah na a sep kinep um ti’n le a gen ui. Education Minister Th. Radheshyam in school a ve hun a chun ZEO Ukhrul, SSA leh RMSA official te ban ah School Management Development Committee (SMDC) member te’n le a zui ui.

Lyrical Poetry book thak hawn a um 

Imphal, May 21 (Nisin Thuhiltu): Lyricist Huidrom Noren in zik, lyrical poetry – Karigee Leiramli kiti chu tuni’n hawn in a um hi. Lyrics 100 kigawpna zia lekhabu chu Kongba a um Meitei Mayek High School auditorium ah a hawnna function nei in a um hi. Lyricist minthang mama Thangjam Kora, Sahitya Academy Awardee Poet Thangjam Ibopishak ban ah Eye Surgeon leh Sculptor le hi, Dr. Leishangthem Tondon te’n zia hun matna chu special guest hina tawh uap in thugenna hun le a mang ui. Film Criticism lam ah National Film Award dawng kha, Meghachandra Kongbam in Lyric chu Poem tawh kibang lo hi’n a gen a, Lyric chu singer te’n a sak phat uh leh a thu hing sek hi’n a gen hi. Sahitya Academy Awardee Novelist B.M. Maisnamba in zia function chu president hina tawh a la uap hi.

Transfer & posting policy thak zui hipai ta di - Jayantakumar

Imphal, May 21 (Nisin Thuhiltu): Health Department a sem doctor leh staff dang te posting suk tupna ding gelna’n government in staff te transfer & posting a ding policy thak ngaitua hi’n Health Minister, L. Jayantakumar Singh in a gen hi. Health & Family Welfare Minister L. Jayantakumar Singh in tuni’n Ukhrul District Hospital ah doctor leh staff te interaction programme neipi in thingtang ah ki posting medical staff te a ding ah incentive schemes bawldaw hi ding ti’n a phuangdawk hi. State ah flying doctor umdan leh a phatchuam ding dan te genlatna le a nei a, doctor te a ding ah post awng khenkhat um te sukdimna ding ah Manipur Public Service Commission ngansia a um ding hi’n le a gen hi. Chun, hospital etkawlna ah mipi leh hospital staff te’n government kithuapi ding in le a dawn a, hospital ah pawimaw te suk pitinna ding leh staff te phatchuam theina ding ah panla ding hi’n le a gen hi. Health Minister in Ukhrul ah student leh youth wing te tawh le hun mang khawm in student leh khanthak te’n a haksatna uh a puangdawk ua, action lak ding pawimaw te la ding hi’n le a tiam hi. Zia zaw a chun hospital ah damlo te va ve in Hospital ah Labour Room, Operation Theatre leh hospital building mun khenkhat a va entha’i. Minister in Hospital a ve hun a chun Parliamentary Secretaries Khasim Vashum leh K. Leishiyo te’n le a nung a zui u’i.

AR in Anti-Terrorism Day nit

Imphal, May 21 (Nisin Thuhiltu): HQ IGAR(South) nuai a um 9 Sector Assam Rifles in zani, May 20 in Keithelmanbi ah Anti-Terrorism Day a mang a, zia hun a chun, Assam Rifles ah Officer, JCO leh personnel te zosia’n terrorism taphawt dodal ding ti’n kitiamna a nei ua, chamna, kihiatthiam tuana leh social harmony umsak leh promote zing ding in le a kitiam ui. Anti-Terrorism Day hi Prime Minister lui Rajiv Gandhi thi hiatzingna leh mihiam te a ding ah terrorism in siatna a tungsak dan te puangzak ding tupna ah kimang sek a hi. AssamRifles Public School, Mantripukhri in le Anti Terrorism Day chu a mang a, ‘Anti Terrorism’ ti thupi mang in Class I - V student te’n Drawing Competition a nei ua, VI - VIII student te’n Slogan Writing Competition a nei ban un IX - XII student te’n Debate Competition a nei ui. Competition ah winner te chu Principal, Alka Jain in kipakman piakna a nei hi.

Japan in kawng chuam chuam ah kithuapina pe nuam

Imphal, May 21 (Nisin Thuhiltu): Japan in Manipur tawh kawng chuam chuam ah kikhutzawpna siam hawi ding nuam hi’n Japanese Ambassador to India, Kenji Hiramatsu in a phuangdawk hi. State ah road connectivity, tourism, Loktak Lake sukthian na ding leh Scheduled Tribe area te ah school education, sanitation leh sewerage system ti te puatupna tawh kisai ah Manipur tawh kithuakhawm nuam hi’n a gen hi. Japanese Ambassador in tuni CM office chamber ah Chief Minister N. Biren Singh a kimupi hun a chun Japan in India, a diak ah Manipur tawh kizawpna hawi tak siam nuam hi’n a phuang dawk a, Japan in state sung ah nasep a nei hun ah vengbitna hawitak piak hi ding ti’n le CM Biren Singg in a tiam hi. Japanese Ambassador leh Chief Minister te chun Japan leh Manipur in Japan ah skill development leh employment opportunity lam ah kithuakhawmna ding lampi te le a genkhawm ua, CM N. Biren in Manipur ah Japanese pau zil thei na ding course puaklut ding thanuam a hi dan a la phuandaw chu Kenji Hiramatsu in a um theina ding ah lampi ngaitua ding hi’n a gen hi. Kenji Hiramatsu in a genbena a chun, tunai a pat Manipur leh a ki innvengpi Nagaland kal thu in hawi lam a manaw chu kipakpi mama a hi dan le a phuang hi. Imphal khawpi ah traffic jam chung chang le genkhawm in zia lak a chun flyovers leh underpass te chung chang le a pang hi. Japanese Ambassador muthei ding in Manipur government official te’n Manipur ah tourism potential te suklatna Powerpoint presentation le a nei ua, zia lak a chun mun chuam chuam 2 ah Cable Car Projects le a pang a, project masa chu Cheiraoching leh Ibudhou Marjing tang khat zawk zawk leh project 2na chu Sendra Hillock leh Loktak Lake ah Chaoba Ching zawpmat ding a hi. Presentation dang khat a chun, state in House Boat Tourism project a nei chu suklat a hia, zia project chun tourist te kiang ah Karang Chingdonpok ah zan chawlngakna diing hawi tak pia ding a hi. Project a ding in vehicle parking, amenity block, electric charging, effluent treatment plant, solid waste treatment centre, water storage tanks, drivers’ rest rooms leh tourist te a ding rest rooms/cottages leh facility dang dang chu Phubala ah sak hi ding a hi ban ah cultural complex, amphitheatre, restaurant, gift/souvenir shop, rest rooms leh medical facility centre te chu Karang Chingdonpok ah siam hi ding a hi.

Mipi phalna bei ah Oil exploration nei

Imphal, May 21 (Nisin Thuhiltu): Civil societies in Manipur ah civil society chuam chuam in Imphal West district ah oil exploration nasep chu mipi phalna bei a hi ban ah Environment Impact Assessment (EIA) leh Social Impact Assessment (SIA) tawh kisai ah document kimtak ah lâk hilo hi’n ngawna a bawl ui. Thau entha tu, Oil India Limited nuai a um Asian Oilfield Service Ltd nasepna chu mine puak a pat mihing hinna dengdel a hina ah dêmtâk sa hi’n le CSO te’n a gen ua, bomb nung ah ni’n um te chu thialdaw hilo hi’n le a gen ui. Women Action Development (WAD) office ah press conference a chun, Human Right Forum Manipur ah secretary, Kh Dilipkumar in India government thupiakna nuai ah nasem oil company te suasiatna chu Khaidem village, Imphal West ah kipan ta hi’n a gen hi. Khangabok Development & Student Union ah president, Th Kiran leh Protection of Human Rights Manipur a ding ah Youth Forum a member, T Shdhiskanta te’n le zia press conference chu a uap ua, government in developmental project tam tak chu state sung ah khangthak te sepna mu theina ding leh state khantona ding ti ah pan sek maleh a tak ah zia gual chu hi ngailo hi’n a gen ui. Khuga Dam, Singda Dam, Loktak Project leh a dang dang te a chun project patna ding ah thutiam um te tu tiang ah sukpitin hinalo hi’n le Dilipkumar in a gen hi.

JAPAN VÊ DING AH MANIPUR LEH NAGALAND A PAT MI 25 TELDAW HI DI: KENJI HIRAMATSU

Imphal, May 21 (Nisin Thuhiltu): Japanese Ambassador to India Kenji Hiramatsu in Japan ah lekha sim nuam student te a ding ah tukum November leh Imphal ah seminar khat um ding hi’n a gen hi. Battle of Imphal (WWII) kum 73 tinna hiatzingna hun matna uap ambassador chun Japan vê ding ah Manipur leh Nagaland a pat mi 25 teldaw hi ding hi’n a gen hi. World War-II lai ah kidona  ala um te lak ah Kohima leh Imphal ah kidona chu a huaisia pawl lak ah pang in Japan government gingchat dan in Imphal ah Japanese sepai 70,000 val in thina tuak hi’n Kenji in a gen a, thina tuak sepai te luang hawldawna nasep chu pat hi pai ta ding ti’n le a gen hi. Zia hawldawna ding a chun a gammi te’n kithuapina pe ding in le a dawn hi. Battle of Imphal chu Imphal leh a kiang nai tuam ah 1944 kum March a pat July tiang a la um a hia, Japanese army te’n Imphal ah Allied force te suksiat ding tup ah a bulu uh himaleh Burma tiang ah naw in a la um ui. Kohima leh Imphal ah guallelna a la tuak chu Japan khangthu ah guallelna huaise pen a la hi.

MOREH AH BOMB PUAK KIT

Imphal, May 21 (Nisin Thuhiltu): Manipur gamgi a um, Moreh ah zani (Kiginni) zan a khan bomb 2 a la puak a, a hinla liamna tuak hiat hilo hi’n thutu a kidawng hi. Bomp puak masa chu zani zan dak 9:30 tuam a khan Moreh police station kiang nai ah lampi pang ah puak a hia, a 2na a hileh Gamnom veng ah innkiang khat in zan khang dak 12:30 ah puak a hi. Bomb puak ziak ah Moreh a cheng mipi te a kiphin laitak ua bomb puak a la um kit a hi. Zia tawh kisai ah Kuki Chiefs’ Association (KCA), Tengnoupal district in nasatak ah demna a la bawl in mipi huatna nasep hi’n a gen a, zia gual ah melhiatlo mi dawilawk te khutnung chu lungkham um sak thu le a phuang hi. Chamna dawi district mipi te lungput leh ngaituana sukha hi’n le a gen a, zia gual ah gamta te tup sang ah minautang leh naupang te a diing ah district bitzaw siammdaw ding tupna chu lianzaw hi’n le a gen hi. Maban ah zia gual gamtatna chu haisan ta ding in a bawltu te kiang ah dawtna le a bawl hi. Chun, a chiata May 19 ni’ Kwatha leh Khudengthabi kikal ah IED attack ziak ah liamna tuak police commando personnel 4 te thuakpi a hi dan puang kawm in a damdaw vak uh kinep thu le a phuangdawk hi. Chuleh, state government kiang ah a kigawl khate a kinthei lam ah mandawk ding leh Tengnoupal district a cheng te a ding ah muanna leh bitna a um theina ding ah pan la ding in le a gen hi.