PANKHAWMNA BEI AH A PHALAM AH KISANNA UMLO DING :CHIEF MINISTER N. BIREN SINGH
Imphal, May 20 (Nisin Thuhiltu): State Government saina’ Banquet Hall, 1st Battalion Manipur Rifles ah tuni’n Anti-Terrorism Day mat in a um hi. Zia hun chu Manipur Chief Minister N. Biren Singh in Chief Guest hina tawh a uap hi. Ama’n a thugenna a chun, state government thak in state sung ah  a pha lam ah kisanna (change) a um ding tup ah nei a hidan a gen a, himaleh zia chu state sung ah society zosia’n a kithuapilo ua leh lawsam ding a hidan uh gen in mipi te kithuana a dawn hi.  Kwatha village ah zani IED Bomb mang ah Manipur Police Commando te attack ah a um uh chu nasatak ah demna bawl in ziagual attack bawltute chung a chu thipbek ah um thei hilo a hidan gen in, mi dawilawk te nasep a hi ti’n a gen hi.  Suspension of Operation (SoO ) nuai ah um thingnuaimi te leh surrendered cadre te ding ah rehabilitation package etthak leh siam thak pawimaw in le a gen a, government thak chu chamna leh khantona ti message tawh hung piang a hidan gen in,  kihiatthiamlona leh buaina um te kihona (talk) nei ah suveng ding ah government thak chu kimansa umzing hin a gen hi.   Himaleh state territorial integrity leh state mipi te kipumkhatna susia thei ding thil him him te chu nasatak ah dodal zing hiding in a gen hi. Zia ding a chun, Chief Minister in civil society organisations chuam chuam te chu community khat leh khat kal ah kimudawna leh ki chuam kawina tuntu ding thil chiapilo ding ah chialna bawl in, khantona kibang tak a um theina ding ah a kuakua panla chiat ding leh kituaktak ah khawsak khawmna ding ah panla chiat ding in chialna a bawl hi.  “Meeyamgi Numit” ah thasin date 15 chiapi ah a um chu Government thak in mipi government (People’s Government) a hidan suklat theina ding ah a panlakna chi khat a hidan a gen a, Government leh mipi te kal ah kiho matna a umlo hun hun ah kihiatthiamlona piang zing thei a hidan te taklang in, public in (Chief Minister’s) Whatsapp number nei a hi dungzui ua, Manipur Secretariat ah bureaucrats leh officer te’n a table ua file pending ah um te ngaikhawk zing a hidan uh a gen hi. Chun, Government in official/Government employee te chung ah force ah nasep ding gualo a hidan taklang in, a mawpuaknau hemilo ah semtu te’n mipi te ding ah a sep ding uh pawimaw in a gen a, state mipi te leh employee te’n  discipline nei tak ah panlakna a nei ding uh pawimaw hin a gen hi.  Anti-Terrorism Day matna uap CAF & PD Minister Karam Shyam in a thugenna a chun, mihing hinna sang ah a thupizaw thil dang umlo a hidan a gen a, terrorism in thil phachuam ding ah gasua hawitak nei ngai ngailo ding, mipi te ding ah haksatna tut zingzaw ding hin a gen hi.  Anti-Terrorism Day chu May 21 leh kum sin ah India gamsung pumpi mat hisek a hia, kum 1991 ah Prime Minister lui Rajiv Gandhi in terrorist attack ziak ah Sriperumbudur, Tamil Nadu ah thina a tuak a pat kimang zing hita a hi.


 

VPC BLOCK 2 IN VAIPAWTHAK DING TELNA NEI

Lamka, May 20 (Nisin Thuhiltu): Vaiphei Peoples’ Council GHQ saina nuai ah block election chiazom zel in tuni May 20, 2017 in VPC Lamka Block Office Headquarters Veng ah block sung a unit umte a pat palai chiakhawm in 2017-2020 sung ah block Chairman leh Vice Chairman telna a um hi. Member chiakhawmte’n kituak tak mai in N.Thanglianlal of Headquarters Veng Chairman ding leh Jamlianthang of Bijang Vice Chairman ding ah telting  in, VPC GHQ General Secretary Khamneithang Vaiphei in kitiamna a nei sak zaw in Upa Vaizalal in Chairman leh Vice Chairman thakte a ding in pauchap piakna a nei hi. VPC  constitution dungzui in teltin thak ah um ten block committee ding ni 15 sung ah a siam fel ding uh a hi. Block maban kipuihuai ding dan genkhawmna leh puitu thakte a pat holimna nei zaw a hi in hun khak a hi. Chun, VPC Eastern Block vaipaw thak ding telna le tuni’n a um a, zia chun a chun,  Chairman ding ah Mr Lamzagou Vaiphei of Salam Patong teltin in a um a, Vice Chairman ding ah  Nektinmang Vaiphei teltin in a um hi.

ZILLAI CHURACHANDPUR BLOCK  SPORTS MEET 2017 KHAK HITA

Saipum, May 20 (Nisin Thuhiltu): Zillai Churachandpur Block (ZCB) in Saipum khua ah ni 3 sung Annual Sports Meet 2017 a nei uh chu tuni, May 20, 2017 nitaklam dak 3:30 in hun khakna  a um hi.  Zia hun chu Soiminlian Lengen, MCS, CEO/ADC, Ccpur in Chief Guest hina tawh a uap a, Khuplianmang, Chief of Lingsiphai in Functional President hina hina tawh uap in,  Khamliankap, Chief of Saipum in Chief Host hina hina tawh a uap hi. Chun, Alfred Jamlallun, MCS, AC to DC, Bishenpur leh Zabiaksang Neilut, President, YVA Jt HQ Imphal te’n Guests of Honour hina tawh a uap ui. Zia hun a chun, Vicky Suantak,Vice President ZCB in vaidawnna thugenna a nei a, Zakap Hatley, Secretary Oranisational Affairs in Guest te presentation hun amapui hi. Chief Guest Soiminlian in ZCB Annual Sports Meet ah Chief Guest ding ah chial ah a um chu kipak mama in a gen a,  Zillai kiti  banglam bang ah le zil ding um a hidan te taklang in Sports le Education khat a hina ah, lekha sim bep hilo ah, taksa kitaitetna le nasatak ah chiapi pawimaw in a gen hi. Functional President in a thugenna a chun, kimelhiattuana ding ah Sports Meet conduct kibawl a hi dungzui ah kimelhiatna tak tak a um ding pawimaw hin a gen a, tu ah sport kibawl chu kimelhiat tuana gil tak a hi ding leh maban ah kingaina tak leh kipumkhat tak ah Zillai ten panlakna a nei ding uh pawimaw a hidan a gen hi. Guests of Honour, Alfred Jamlallun in a thugenna a chun, Zillai te’n zilna lam ngai pawimaw ding a hidan a gen a, competitive exam chuam chuam ah Zillai te’n panlakna a nei hun ua lawtinna a chan thei teina ding ua Block leh Zillai GHQ kithuhiat zing ah panlakna a neikhawm ding uh pawimaw in a gen hi. Zabiaksang Neilut, President, YVA Jt HQ Imphal in a thugenna a chun, Zillai te’n hangsan tak ah panlakna a nei ding pawimaw in a gen a, tuhun ah khangthak te lak ah hangsan tak ah panla ngam huntiang a um takna chung ah kipak mama a hidan a gen hi. Chuleh, thil zosia ngainepna chu gitlo thupi pen a hidan a gen hi. Hun khakna a um masang in Exhibition Football match Zillai GHQ leh Zillai CCPur Block te’n a nei ua, zia zaw a chu Men’s Football Final Zillai Buallian Unit leh Zillai S Kotlian Unit te’n match nei in, Zillai Buallian Unit in winner hina a chang ui. Final match zaw ah kipakman (prize) hawpna a um a, zia zaw a chun, Upa Genkholian pauchapna tawh hun khakna a nei hi. Zillai Churachandpur Block (ZCB) Sports Meet 2017 a chun, Numei Volleyball ah Zillai S Munnuam Unit in Winner hina a chang a, Pawsal Volleyball ah  Zillai New Lamka Unit winner in a pang hi.  Chun, Sports hun sung in football ah  Zillai Unit 15 a pat team 22 a pang ua, numei Volleyball ah team 7 leh pawsal team 10 a pang ui.

 

MAY 24 LEH THUPITAK AH SALPHA TE VUI HITA HIDING

Lamka, May 20 (Nisin Thuhiltu): Joint Action Committee Against Anti-Tribal Bills (JAC-AATB) leh Manipur State Government in May 10, 2017 ni ah Memorandum of Understanding (MoU) suai a kai dungzui ua, Tribal Movement ah thina tuak, Salpha vui nailo ah um te May 25, 2017 masang ah vuidaw ding ah kinawptuana a um tawh kitawn in, R. Sudhan, IAS, Deputy Commissioner, Churachandpur leh H. Mangchinkhup, Chief Convener, JAC-AATB mapuina team khat in vuinailo ah um Salpha 8-te’ luang vuina mun ding hun bangchan sung a hem tak khawpi sung leh paw a hawl nung un Mata Dam sak ah Helipad umna chu   salpha te vuina ding mun in thupukna a siam thei khawng ui.   Salpha te vuina ding mun sukfel ah a um tak tawh kitawn in JAC in, Tribal Movement kipat lim a pat liamna tuakte leh Salphate’ luang kipia zo tak ah enkawl Joint Philanthropic Organization (JPO) te chung in kipakthu a gen a, MoU ah suaikai, Mizo Peoples Convention (MPC) , United Zou Organization (UZO), Simte Tribe Council (STC), Tedim Chin Union (TCU) leh Young Paite Association (YPA) in Salphate’ vuina tawh kisai ah mawpuakna la ding hin a taklang hi.  Chun, JPO in Tribal Movement leh Tribal Martyr-te tawh kisai van a kawl naklai zosia chu JAC ah UZO palai, Thangzamang Zou’ khut ah pedawk ding in le hiatsakna bawl hi. Mawpuakna piak a hi dungzui ua tuni’n MPC, UZO, STC, TCU leh YPA mapuina salpha te vuina ding mun chu Sehken khaw te’n a vat thiang ui.  Salphate’ luang a hileh a hung tung ding May 24, 2017 leh thupitak ah vui ah um ding a hiu a,  suunna hun Public Ground ah mipi’n mang ding,  Salphate’ luang Truck khatchiat ah puakto hiding, Truck in a puak Salpha te lim, Truck ah takchiat hiding a hi.  A luang uh vui a hi tak leh Memorial Park siam hiding a hia, zia ding tawh kisai a chu Park bawldan ding lim zikthiam Architect khat Mizoram a pat guai (hire) hiding leh  August 31 (Tribal Unity Day) ma ah tungman ding ah Salphate’ Statue ding le Delhi ah Order ah um hin a kigen hi.

REVIEW MEETING NEI

Lamka, May 20 (Nisin Thuhiltu): Dr. Liankhojam, Chief Medical Officer, Pherzawl mapuina tuni, May 20, 2017 sunma dak 10:30 a pat CMO Mini Conference Hall, CMO Complex ah  Review Meeting a um hi.  Meeting hun ah Dr. Liankhojam in vaidawnna thu a gen a, S. Thangthianmuan, Consultant, NVBDCP in Health Department nuai ah mawpuakna chuam chuam te genna a nei hi.   Zia meeting a chun, Pherzawl District nuai ah Damtheina tawh kisai ah Department chuam chuam ah mawpuakna nei te’n banggual panlakna nei leu  maban ah masawnna a um thei diam ti tawh kisai a gen khawm ua, Dr. Phirthanglien Buhril, CMO Pherzawl banah Pherzawl District ah Medical Department, line chuam chuam ah semtu te a pang ui.

NEWS REPORTING COURSE ZILTHEI

Lamka, May 20 (Nisin Thuhiltu): State Institute of Journalism, Information & Public Relations, Manipur saina ni 7 sung News Reporting Basic Course zil nuam te ding in Seat 20 a ding Application a kihawng hi. Lunglutna nei te’n  zikthaw ah Passport size 2 tawh District Information Office, Churachandpur kiang ah May 31, 2017 tiang ah pelut thei ding a hiu a,  teldaw ah um te’n Course Fee Rs. 300/- a sum ah a piak uh ngai ding a hi. Zia course ah pang thei ding te chu thiamna lam ah Graduate a hi uh ngai ding a hia, June first week a pat District Headquarter, Churachandpur ah Class kipan ding a hi.

TRIBAL RIGHTS & FOREST SEMINAR UM DI

Lamka, May 20 (Nisin Thuhiltu): Tribal Youth Council, Manipur (TYCM) saina’ a hung tung ding May 27, 2017 leh sunma dak 10:30 a pat “Tribal Rights & Forest”  kiti tawh kisai ah TRI Hall, Chingmeirong, Imphal ah One Day Seminar um ding a hi.  Zia hun chu Mani Charanamei, Ex-MP (Lok Sabha) in Special Guest hina tawh uap ding a hia, Dr. Lokho Puni, IFS, Chief Conservator of Forest, Manipur, Dr. R. Sanga, Director, School of Preaching, Imphal leh Dr. Benjamin Dangmei te’n thupi chuam chuam mang ah ziltilna nei ding a hiu.  Chun, District zosia ADC Chairman leh Member ten, Tribal Civil Organization leh Student Organization puitu, Village Authority leh Hausa te zia hun chu uap ding ah chial a hiu.

ZMA ONE DAY SEMINAR NEI

Lamka, May 20 (Nisin Thuhiltu): Zomi Mothers’ Association (ZMA) General Headquarter saina’ tuni, May 20, 2017 sunma dak 11:00 in Synod Hall, IB Road ah One Day Legal Awareness Campaign a um hi.  Zia hun matna chu Kim Mary in amapui a, Vungmuanching, President, ZMA in vaidawnna thu gen in, Introductory Speech genna a nei hi.  Muani Tombing, Counsellor, Lainat Ministry in Kingaisiat kiti hung kipatdan, a kilatdan tangpi leh kingaisiatna ziak ah thil tung thei te genna a nei a,  Mang, Adviser, ZMA leh Siamzading Valte, Adviser, ZMA te’n Legal Rights tawh kisai genna a nei ui.  District Legal Service Authority, Churachandpur lam a pat in kipakthu genna a um a, pauchapna tawh hun khakna a nei ui.  Legal Awareness Campaign a hileh DLSA in a sponsor a hi.

YPA BLOCK 2 IN ELECTION NEI

Lamka, May 20 (Nisin Thuhiltu): Young Paite Association (YPA) Block 2- Lanva Block leh Lamka block ah in tuni sunma dak 11 in YPA GHQ leh CEC te mapuina  kum 2017-2020 sung vaipaw ding telna a nei ui.  YPA Lamka Block in YPA GHQ Hall, Hiangtam Lamka in election a nei a,  zia hun a chu YPA Lamka Block nuai a unit 9 a pat  Officer bearer te’n Singnunsiam Ngaihte, Member CEC YPA GHQ, Thangkim Samte, Senior Adviser YPA GHQ leh Upa V. Vungzathang, Senior Advisor, YPA GHQ  te mapuina President ding in Sumpi Hanghal, Vice President ding in Pumkhosiam, Secretary ding in V Hauthianmuan, Assistant Secretary ding in K Paukhanmuan, Finance Secretary ding in V Thawnkhansuan leh Treasurer ding in Nengkhansuan banah Executive member ding in Lianchinkhup Guite, TK Mang Guite, Pumzamang, Chinlalven, H Chinkhanmuan, V Doukhanpau, H Paulian, V Nenghauthang, leh Jamginmuan Guite  te a tel ting ui.  Chun, YPA Lanva Block ah 2017-2020  sung vaipaw ding kitelna a chun, President  ding ah T Zamsongin, Vice President ding ah K Sumgin, Secretary ding ah T Ginthianlal, Assistant Secretary ding ah Liankhanmung Hatlang, Finance Secretary ding ah Thangbiaklian leh Treasurer ding ah Upa Ginthiankham banah Executive member ding ah K Songpu, Khailiankham, Khenlian, H Songkhanthang, Sumzamung, H Haukhankhual, T Paukhankhual, Luaizamang, leh T Piangkhanpau te teltin in a um ui.

YPA ROAD HAWNNA NEI

Lamka, May 20 (Nisin Thuhiltu): YPA Road kiti Vengnuam South ah tuni, May 20, 2017 sunma dak 11:00 in a hawnna leh a latna a um hi.  Bialtu MDC, M. Gouzamang Guite in lampi pawimaw leh mipi a ding lampi phachuam ding dawina’nlampi a hawng a, Pastor K. Pumsuanthang, Local Pastor, EBCC Pethuel in a hawnna a nei hi.  YPA Road chu a hawilo ah mithang hilo ding in Pathian’ khut ah hawlsakna a nei a,  Pathian’ min in a lan hi.  Hawndaw thak ah um YPA Road kiti chu feet 1,234 ah sau, Goukhenpau’ Road leh ZYA Road, Kanaan Veng kikal ah um, lampi siamhawina ding ah Bialtu MDC in kawl-ek Tipper 80 a sunpiak a hi.  

ANN-NGAWL PAUCHAPKHAWMNA NEI

Lamka, May 20 (Nisin Thuhiltu): Division Baptist Dorcas Fellowship DBDF EBC, Lamka south Division in a khatveina ding in EBCC Mata Biakinn ah tu zingkal dak 7 a pat in sunnung dak 1 kikal in Pathian kiang ah anngawl pauchap khawmna a nei ui.  Anngawl pauchapkhawmna hun chu Pastor Tuanchinpau Local Pastor, EBCC  Mate in a hawnna leh a latna a nei a, mimal kipumpiakna ti thupi mang in pauchapna hun Pastor K. Vumzathang, Local Pastor, Bethlehem EBCC  BDF Adviser in amapui hi.  Pastor H Jamkhanpau, Adviser, BDF/Hebron EBCC in sual thupha chawi ah, ngaihdam dawtna mapui in Pastor K Pumsuanthang, BDF, Pethuel EBCC in kipakthugenna nei in, Pastor T Songkhanthang, Adviser BDF/Vengnuam EBCC in thil dawt pathumna- Kochuam sung tawh kisai, Pastor K Ginkhanthang, Adviser BDF Lamzang in thil dawt pauchapna- innkuan leh khawtang tawh kisai ah pauchapkhawmna a mapui hi.  Pastor K Tualkhothang, Adviser, BDF dorcas veng in thil dawt pauchapna leh nam leh gam a ding in pauchapna hun amapui hi.  Tuni ah Mata EBCC biakinn ah a khat-veina na ding ah Pathian kiang ah anngawl pauchapkhawmna hun chu EBC Lamka South division sung ah kochuam/khua chuam chuam a pat mi 200 vel a chiakhawm ui.

BATTLE OF IMPHAL, 73rd  ANNIVERSARY

Imphal, May 20 (Nisin Thuhiltu): Classic Grande, Imphal ah tuni’n Battle of Imphal, World War-II, 73rd anniversary mat in a um hi. Zia chu Manipur Tourism Forum leh 2nd World War Imphal Campaign in Department of Tourism, Government of Manipur tawh kithua ah organised a bawl hi. Chief Minister, Manipur N. Biren Singh, Parliamentary Secretary, Nagaland C. Apok Jamir, Ambassador of Japan to India, Kenji Hiramatsu leh Chairperson, Burma Campaign Society, Mrs Akiko Macdonald te’n zia hun matna chu khuallian hina tawh a uap ui. Chief Minister in WWII chu khawvel ah mihing te hinsan sangdanglamtu a hidan a gen a, gal in a suksiat leh thina tuak ahiloleh haksatna tuak tamtak muthei ah um a hidan a gen hi.  Zia chu tawh kitawn ah kituak tak leh kihepi tak ah chenkhawm ding pawimaw in a gen a, kisiam thakna leh ki ngaidam tua ti te chiapi pawimaw ina  gen hi. Ambassador of Japan to India, Kenji Hiramatsu in a thugenna a chun, World War II a pat chamna leh muanna a um theina ding ah kisiamthakna a um ding pawimaw in a gen a, Japanese government in Manipur leh Nagaland a pat khangthak mi 25  te   Japan vena neisak ding leh November 2017 leh Imphal ah official seminar nei ding ah guanggalna nei hin a gen hi.  Zia ah Japanese government in panlakna chi 2 a nei te a pat chu gam 2 te kal ah ki unauna gilzaw sem ding  leh friendship ties le hat chuam ding hin a gen hi. Chuleh,  Japanese Government in Northeastern States of India leh Manipur ah  developmental projects khenkhat financial support bawl ding hin a gen hi. Zia hun matna chu  Chief Secretary O.Nabakishore, Former President, Manipur Tourism Forum, Dr. Th. Dabhali Singh leh Japan delegate te’n a uap ui.

DIKLOTAK AH NASEM FOREST DEPUTY RANGER SUSPEND AH UM

Imphal, May 20 (Nisin Thuhiltu): Forest & Environment Minister Th. Shyamkumar in department official te chung ah action la’n department in Md. Altaf Ali Khan, Deputy Ranger, Beat Officer of Molnoi Forest Beat Office, Chandel Forest Division chu suspend bawl in a um hi. Zani tak ah bim (logs) tawh truck 2 matdaw ah a umna chung ah Deputy Ranger chu suspend ah um a hi. Central Forest Division, Range Forest Office, Mantriphukhri ah Minister Shyamkumar in thuthak lakhawm mite kiang ah a genna a chun,  DFO Central Forest Division, L. Joykumar in Matai Garden, Khabam ah zanitak dak 8:00 ah bimpua truck 2 mandawk a hidan a gen a, DFO team panlakna chu pakcha mama a hidan taklang kawm in, document kituptak bei ah Khudengthabi,Chandel District a pat truck 2 te chu Imphal tung a hidan uh a gen hi. Truck 2 te’n bim a puak theina ding ua department’s Moreh Range Office in phalna lekha issue a bawl ding himaleh  Md. Altaf Ali Khan in hammer marks (clearance sign from the Forest Department) issue a bawl ziak ah entry posts chuam chuam - Khudengthabi Army Post, Tengnoupal Army Post, Tengnoupal Police Post, Tengnoupal Forest Post, Molnoi Forest Office Post, Pallel Police Station Post, Kakching Forest Office Post, Thoubal Forest Office Post, Thoubal Haokha Range Post, Lilong Police Station Post, Singjamei Police Station Post leh Khabam, Imphal East ah document bangma pelutlo ah truck 2 te bailam tak ah Imphal tung thei a hidan uh le a gen a, diklotak ah nasep thil bawlna department in enzui zing a hina chung ah a hiding gual tak ah nasemlo Deputy Ranger chung ah action lak ah um a hidan a gen hi.  Chuleh, department in revenue target Rs 100 crore annually ah bithiat a hidan a gen a, zia chu a hiding gual tak ah panlak um hileh bailam tak ah mudaw thei ding a hidan gen a gen hi. A langkhatlam ah Forest & Environment Minister  Shyamkumar in Central Forest Division, Range Forest Office, Mantriphukhri etthakna a nei hun ah kituptak ah office huangsung etkawl ah a umlo chu khawk a sakthu a gen a, zia nung a chun, Forest Beat Officer, New Keithelmanbi le etthakna a nei hi.

GOVERNMENT GAM KEK TE DEADLINE PIA

Imphal, May 20 (Nisin Thuhiltu): MAHUD & Town Planning Minister Th. Shyamkumar in tuni’n  Greater Imphal areas - Khuman Lampak, DM College, Nagaram River Bank, Imphal Art College, Law College, Market areas -Thangal Bazar, Paona Bazar, Singjamei, Thoubal leh Bishnupur te huap sung ah diklotak ah government kek leh lua tute chu hapta kit sung ngei ah a van teu ladawk ding in huntiam (deadline) a piai. MAHUD lehTown Planning Minister chun zia area huap sung ah um te chu deeds/land deeds  kituptak pawdawk thei ding ah um ding in le hiatsakna bawl a, house deeds/land deeds kituptak neilo te’n  a kisaipi Municipal office te a thuhiat ding uh pawimaw a hidan gen in inspection/drive chiapi hiding in hiatsakna  abawl hi. Chuleh, zia hun kipia sung ah diklotak ah gam luatu te chu dan tawh kituak ah gawtna piak hiding ti’n le a gen hi.

ROMESH CHUNG AH NGAWNA THUDIK HI AH JNIMS DIRECTOR IN GEN

Imphal, May 20 (Nisin Thuhiltu): NIMS director Professor L. Deben in a chung ah Ningombam Romesh in ngawna a siam chu mumal bei hin a gen hi.  Ningombam Romesh chu Radio-diagnosis Department, JNIMS  ah attendant a hia, damlo te kiang ah sum gawlgukna a lak ziak ah Anti-Corruption cell ah complaint bawl a hi tawh kitawn ah suspend ah um a hi. Professor Deben in thuthak lakhawm mite kiang ah a genna a chun Romesh chung ah ngawna tawh kisai ah evidence um hin a gen a, sum a lak gukna video recording um a hidan genkawm in  damlo te a pat sum hung lut zosia chu cash counter tung ding himaleh zia ni a chu  Romesh in ama khut ah sum kikawi den a hidan a gen hi. Anti-corruption cell, a pat hiatsakna a um tawh kitawn ah investigation bawl ah a um nung ah  Video Footages dungzui ah Romesh in sum a lak guk chu kichian tak ah muthei a hidan a gen a, Romesh in le a video mu ah ngaidam dawn hin a gen hi.

DISTRICT THAK TE ZUKKIT HILO DI: BJP LEADER

Imphal, May 20 (Nisin Thuhiltu) : United Naga Council (UNC) panna Naga bodies chuam chuam in  Manipur ah District kisiam thak te zukkit ding phutna nei zing himaleh zukkit ding ah guanggalna bangma umlo a hidan Noney district headquarters ah “Longmai BJP Workers’ Thanksgiving Day” matna BJP Manipur Pradesh vice president Adim Pamei in a gen a, chief minister N Biren Singh mapui  BJP-led coalition government in district kisiamdaw thakna chung ah nawna zat chuam chuam  lamtua zing himaleh district thak te nung lakdaw kit zing thil bailam hilo ding in a gen hi. Gaidon Kamei, UNC president chu Noney district a pat mi a hi bak ah  district thak zukkit ding ah phutna nei zing himaleh Amu Kamei (president of the Zeliangrong Union (Assam, Manipur & Nagaland) in infrastructure tawh full-fledged district sua ding leh revenue district ah siamdaw ding government ah phutna a nei kitna chief minister ding ah thupukna siam haksa mama ding hin a gen hi.