MANIPUR CHIEF MINISTER N BIREN SINGH IN NEW DELHI AH FOOTBALL BALLOON HAWNG
New Delhi, May 19 (Nisin Thuhiltu) : Connaught Place, New Delhi ah Football Balloon hawnna hun chu Manipur Chief Minister, Nongthongbam Biren Singh in Chief Guest hina tawh uap in Football Balloon a hawng hi. India ah tukum October 6-28 sung um ding, FIFA Under-17 World Cup umna ding tawh kisai ah Ministry of Youth Affairs & Sports saina Football Balloon hawnna  nei a hia, zia hun chu Union Minister of State (IC) for Sports, Vijay Goel; Cricketer minthang mama Md. Kaif leh boxer Vijender Singh te’n le a uap ui. Chief Minister N. Biren in zia hun matna ah chial ah a um chu  Manipur ah football talent hiatpina a hi ziak ah kipak mama hi’n a gen a, tunung sawtlo ah Manipur in le FIFA match a zintun pai ding kiem hi’n a gen hi. Biren Singh in India in talent a nei te chu mat hawi kul a sak thu a puang a, football chu physical fitness a ding ah sports pawimaw tak hi’n a gen hi. Tu khang ah fast food chuam chuam, hisel huai-lo hindan te ziak ah thiamzilna lam ah pressure chuam chuam um a hina ah India a naupang te a ding ah physical fitness ngaikhawk ding pawimaw hi’n a gen a, physical fitness promote na ding ah pha pen le kimanpen chu football a hi ti’n a gen hi. Chun, Pandit Deendayal Upadhyaya min in tukum a pat Manipur ah Chief Minister’s Football Cup umsak ding vaisawm a hi dan puang kawm in Manipur ah State cabinet member, MLA leh MP te kiang ah amau constituency chiat ah football promote ding in le chialna a bawl hi. CM Biren in zia hun a uapna chung ah Union Minister of State (IC) for Sports, Vijay Goel in kipak mama a hi dan a phuangdawk a, Manipur in masang ah zintun nuam a hi dan hiatsakna a la bawllo ziak ah tuchung chu Imphal ah FIFA match um thei talo ding hi ah gen kawm in maban ah Imphal a le sai a hi na ding ah panla ding hi’n le a gen hi.

TRIPARTITE TALKS SUNZAWM
Senapati, May 19 (Nisin Thuhiltu): Centre leh State government te ban ah UNC in economic blockade tawh kisai issue chuam chung chang ah tripartite talks a la nei uh chu tuni’n DRDA Conference Hall, Senapati distict headquarters ah sutzawp in a um a, zia hun a chun kinawptuana chuam chuam siam in a um hi. Meeting hun a chun UNC lan a pat in UNC President, Gaidon Kamei; UNC, Gen. Secretary, S.Milan, All Naga Students’ Association, Manipur (ANSAM) President, Seth Shatsang leh Naga Women’s Union (NWU) President Asha Wungnam te a pang ua, Manipur government thasik in O. Nabakishore Singh, Chief Secretary, GOM, Dr .J. Suresh Babu, Additional Chief Secretary (Home), GOM leh K. Radhakumar Singh Commissioner (Works), GOM te a pang ban un Satyendra Garg, Joint Secretary (NE), Ministry of Home Affairs, GOI chu Centre government thasik in a pang hi. Zia kihona a chun, March 19, 2017 ah tripartite talks a la um hun ah kinawptuana a la um te chu vawpdet zing ding leh kihona um kit hun ah Manipur government in political level ah ai-aw a sawl ding ban ah zia kal a chu district thak kibawlna tawh kisai ah thubuai suk veng ding ti’n a kinawptua ua, talk chu tha 1 sung ngei in Senapati ah nei hikit ding ti’n le a gen hi. 

IED ATTACK AH MANIPUR POLICE COMMANDO 4 LIAM
Imphal, May 19 (Nisin Thuhiltu): Chandel district, Imphal-Moreh lampi Kwatha Lamkhai area ah tuni’n IED bomb a puak zak a, ziana a chun, Manipur police commandos personnel 4 in liamna a tuak ua, mi 2 te dinmun chu lauthawn um in a kigen hi.  Sun dak 12:45  tuam ah border town Moreh a pat 10 kms ah gamla Kwatha Khunou Lamkhai area a pat Imphal zuan police convoy chu attack ah um a hiu a, attack ah a um tawh kitawn in police reinforcement team sawllut ah um a hidan senior police officer khat in a gen hi. Liamna tuak police commandos personnel 4 te chu IAF chopper mang ah Imphal tut in a um ui. Tuni ah attack kibawl chu tha khat sung ah 2 vei security force te attack kibawlna hita a hia, May 9, 2017 a khan le Territorial Army (TA) road opening duty te Lokchao,Tengnoupal district ah IED mang in attack in a la um ua, jawan 2 te’n thina a la tuak ui. A langkhat in Kwatha Lamkhai area ah tuni Manipur Police Commandos te attack kibawl chu Chief Minister N. Biren Singh in nasatak in demna a bawl a, liamna tuak te thawkpi a hidan taklang kawm in  midawilawk tenasep chu state sung ah society zosia’n le a dem ding uh dawi a hidan a gen hi.

IGSS  IN WORKSHOP LEH COMPUTER SET PIAKDAWNA NEI
Lamka, May 19 (Nisin Thuhiltu): Indo-Global Social Service Society (IGSS) saina’ May 18, 2017 a khan Torbung Community Hall, Torbung ah Career-cum-Business Development Planning tawh kisai ah workshop a um a, zia hun a chun Mr Kaplianlal Tangluai, Assistant Project Manager, Northeast Region, IGSS in khangthak te mâni kitodel theina ding ah lampi um te tawh kisai in ziltilna a nei a, business model tawh kisai in le khangthak te ziltil a nei hi. IGSS panlakna chiato zel in tuni, May 19, 2017 in khangthak 100 tuam tawh tunung ah mani kitodel theina ding lampi te genkhawmna leh Kangvai Sub-Division nuai ah Youth Club 7 te  kiang ah Computer set piakdawna a um hi. Kangvai Sub-Division nuai ah Youth Club 7 te piakdawna hun chu Mr Vicky Suantak, Editor, Nisin Thuhiltu in khuallian hina tawh uap in khangthak te tilkhona leh Youth Club te’n data a kawlna ding un Computer set 7 piakdawna a nei hi. Zia ah Computer set piak daw ah um te chu IGSS nuai ah Youth Club panla chung chuang diak te kiang ah piak a hia, zia te chu – S. Kawtlian, Torbung, Kangvai, ST. Chullouphai, Zalenphai, Janglenphai leh Tollen Youth Club te a hiu.

BANK ACCOUNT TAWH AADHAAR LINK PAWIMAW
Lamka, May 19 (Nisin Thuhiltu): Centre in bank account leh Aadhaar link ding ah thusua a bawl tawh kitawn in India mi aadhaar card nei te’n a account uh tawh a ki zawpsak tei tei uh ngai ta ding a hina ah a bawl nailo te’n a kintheilam ah bawl ngai ding a hi. Account tawh aadhaar link nailo te’n mani account umna bank branch chiat ah aadhar card xerox copy chawi in va kansui ngai ding a hia, bank khenkhat a customer te a ding chu netbanking a hilo leh SMS a le link thei ding a hi.

SAS GAS AGENCY AH AWARENESS PROGRAMME
Lamka, May 19 (Nisin Thuhiltu): Churachandpur district sung ah gas agency um te lak ah a lian pen pawl ah kihia, Sialngenthang & Son (SAS) Gas Agency, Lailam Veng ah tuni sunnung dak 2:30 in gas matdan ah pilvang ding tawh kisai in Gas Safety Clinic & PMUY Awareness programme a um a, zia hun a chun custormer tamtak a chiakhawm ui. Hun matna a chun, Sialngenthang & Son Gas Agency ah Mechanic, H Pauchinlian @ PC in awareness hun la in, gas mat ding dan tawh kisai practical in a hil hi. Awareness zaw in customer te’n gas mat dan tawh kisai a hiatthiamlo teu dawtna a nei ua, Lianmang, Manger, SAS Gas Agency leh PC te’n hilchetna a piau hi. Gas mat ding dan tawh kisai ah kihil te customer te’n a hiathiam uh em ti etthâkna ding ah a chia khawm customer te lak ah 6 teldaw a um te’n test a nei na ua chun  mi 4 in a bawl dik ziak un kipakman in amau chu apron khat chiat piak in a um ui. Gas mat dan tawh kisai ah awareness a hileh India Oil Company (IOC) thupiak dungzui ah nei a hia, IOC guideline dungzui ah SAS Gas Agency in practical tawh thua ah customer te ziltilna a piak a hi. Zia hun ah customer chiakhawm te kiang ah gas stove chu cylinder sang ah niam sak zawk tei tei ding, Gas cylinder chu tungsawi lo ding, hun sin ah gas tuber tube check zing ding, Suraksah rubber hose mat teitei ding, gas mat lo hun ah regulator off ding, gas mat hun ah nylon leh synthetic puan te a kivan lo ding, gas mat lai taisan lo ding leh a dang dang te hil in a um ui.

LFS IN FOOTBALLER LEH DOCTOR ZO THAK KIPAKPI
Lamka, May 19 (Nisin Thuhiltu): Lalpuithluaii Foundation School (LFS), Bungmual ah tuni’n school huangsung in Football lam ah minthang mama, Siam Hanghal leh Doctor Specialist zo thak Dr. Thangliankham @ Khamboi tawh hun mat khawmna a nei ua, zia hun a chun Class VIII-X te leh Staff te a pang ui. Footballer, Siam Hanghal a hileh LFS a seilian a hia, ama a pat naupang football lunglut te a ding ah pawimaw thu tampi ngaithâk in a um hi. Siam Hanghal in a holimna a chun, khawitak hilehle Sappau pawimaw mama in zia na ding a chun hawitak ah kisin pawimaw mama hi’n ama mimal experience pansan in a gen a, Sappau hiatlo ziak ah a lawite tawh kihona lam buaipha sek hi’n le a gen hi. Eimi te’n football ki pumbaw maleh i baw tuk ua lawtinna chang kitamlo hi ah taklang kawm in football a le tupgukna giltak nei ngai hi’n le a gen hi. Chun, football ziak ah lekhasim lam ngaineplo ding leh a kihel te’n le chiakhawm sak ding ngai hi’n le a taklang hi. Khamboi le LFS ma ah a la seilian a hia, Russia ah doctor zil ah specialist zo thak leh inn lam ah um phawt a hi. Ama’n a genna a chun, lawtinna ding ah taimatna leh kukalna pawimaw a hi a ti. Hun matsung in LFS in kipakpi etsakna’n puan silsakna nei in photo session le a nei ui.

VDF ASSOCIATION IN THUSUA BAWL
Lamka, May 19 (Nisin Thuhiltu): Churachandpur District VDF Welfare Association (CDVDFWA) in personnel cheng hiat ding ah thuni thusua a bawlna a chun, government kiang ah thil chuam chuam a ngek te ngaituana leh baw zui na ding ah thalaw a pat Rs. 500 deduct ding tia Executive Committee in thupukna a lak chu tuni tiang ah personnel 400 bep in min pelut in suai kaipan hi’n a gen hi. May 31, 2017 tiang ah min piaklutna ding ah huntawp hi ah puangdawk kawm in pelut lo leh suai kailo te chu Assembly thupukna dungzui ah khawnung leh limsak hilo ding a hiu ti’n le a gen hi. Chun, VDF personnel te kua hitaleh Officer te za dan thiam ah Uniform chu sum lâkna leh sumkawl veina ah manglo ding in hiatsakna a bawl a, mipi hepina dawng hiakawm ah haksatna tuak te kithuapi ding ah kimansa um zing ding in le a chial hi.

ANTI-TERRORISM DAY MANG
Lamka, May 19 (Nisin Thuhiltu): Suangdoh a um C-Coy, 26 Assam Rifles in tuni’n Suangdoh Government H/S a student leh staff te Anti- Terrorism Day a matpi ui. Anti-Terrorism day a hileh India Prime Minister lui Rajiv Gandhi in thingnuaimite khut ah thina a la tuak hiat zing na ding leh minautang te kiang ah thingnuaimi te nasep a pat kiveng ding dan ziltilna ni ah kimang sek a hi. Zia hun a hin student te kiang ah thu hawi tak tak a hil ban un meithal khawidan a hil ban un refreshment hawitak le a bawl piak ui. AR personnel te’n gari 2 mang in Lungthul (T) ah Guite Road bawltu Bhartia Infracons Ltd nasepna mun leh khawl te le a va etpi ui.

CCPUR POLICE IN REFRESHERS’ TRAINING ZO
Lamka, May 19 (Nisin Thuhiltu): District Police personnel te’n Refreshers’ Course a nei uh tuni’n firing a nei zaw uh tawh kitawn in zawthian in a um hi. Rakesh Balwal, IPS, SP Churachandpur dawi gual in Churachandpur Police in mipi tawh kinawk tuana a um hun a vanmat, Riot Gear mat ding dan kizilna personnel te’n a nei zaw un Satpal Chaudhary Short Range, STC/BSF Camp ah meithal kap kisinna sun zawm in Civil Police (male), Women Police leh Village Defence Force (VDF) personnel te’n Annual Classification Range Firing 2016-2017 nei in tuni’n a zothiang ui. Firing nei sung a hin District Police personnel te’n amau mat ding ah issue a um, SLR, INSAS, AK 47 Rifles, MP-5 Rifles, 9 mm Pistol leh Point 303 Rifle te a kap ua, tuni chu a ni tawpni a hi tawh kitawn in R. Sudhan, IAS, DC Churachandpur panna’n DC Office Staff hunkhawp te’n le zia hun a chun AK 47 Rifle leh 9 mm pistol kapna a nei ui. Annual Classification Range Firing 2016-2017 competition hun ah Pistol kap kidemna a chun SI Category ah SI P Veven Gangte in 1na, Inspector AK Anil in 2na leh SI H Lalbiakmuan in 3 na a la, ASI category ah ASI Thanggoulian in 1na, ASI L Thangboi in 2na leh ASI K Paumuangsang in 3na a la’i. AK-47 kap kidemna a chun, Head Constable Category ah HC Ginzalal Khongsai in 1na la in HC V Chinbiaklal leh HC Siemkhohao Misao te’n 2na a lak ban un HC Thangthianlal in 3na a lai. Constable category ah T Thangminlen Haokip in 1na, T Lunkhomang leh Songlianmang te’n 2na leh H Pausuanmang in 3na a la’i. VDF personnel te’n Point 303 Rifle kap a kidemna ua chun Zamkhanmang leh Kh Prodeep Singh te’n 1na la in Manglun Khongsai leh Chinlianlal te’n 2na leh Md. Amar Khan, Lunkholen, Kamlensang Gangte leh Zamkholian te’n 3na a la uh a hi.

CCPUR AH TRANSFER; PROMOTION MU
Lamka, May 19 (Nisin Thuhiltu): L. Nabakishwar Singh, IAS, Registrar of Co-operative Societies, Govt. Manipur in thusua a bawl dungzui ah Co-operative Societies nuai ah Inspector mi 4 te asepna mun ua a pat mun dang ah transfer bawl in a um ui. Zia chu tawh kitawn in Co-operative Societies nuai ah Inspector Kailalngak Suantak s/o S. Minlianthang Vaiphei, (Retd) IAS chu ARCS/Irilbung a pat District Co-operative Office, Churachandpur ah transfer in a um a, a Zi Esther Fimsangkim le DCO/Imphal East a pat Churachandpur District ah sem ding ah transfer in a um hi. Chun, Manipur State Power Distribution Company Ltd. nuai ah OSD/RGVVY ah sem Mr Lalminlun Vaiphei, Manager (Elect) chu  Dy.General Manager/CCpur Division nuai ah Manager ah sem ding in L/Priyomkumar Singh, i/c managing Director, MSPDCL in order a sua hi.

CMO MAPUINA MEETING DING
Lamka, May 19 (Nisin Thuhiltu): Dr. Liankhojam Guite, CMO/Pherzawl District mapuina Pherzawl District nuai ah Medical Staff te’n May 20, 2017 zingkal lam dak 11:00 in CMO Mini-Conference Hall ah joint meeting neiding a hiu a, zia hun a chu Malaria umtheina ding leh thokang a pat kivenna ding tawh kisai banah  Medical Staff te’n maban ah a pan lak ding dan uh tawh kisai genkhawmna nei ding a hiu.

DISTT LEVEL SUBROTO TOURNAMENT-17
Lamka, May 19 (Nisin Thuhiltu): District Level Inter-School Subroto Mukherjee Football Tournament 2017 chu pawsal te a Under 14 leh Under 17 ban ah numei a Under 17 ding chu June 12-16 sung um ding a hia, zia na ding a hin CCPur district sung a um lunglutna nei school te’n May 16 a pat June 5 kikal in Churachandpur District Youth Affairs & Sports Office, Tuibong ah Eligibility Certificate leh Official Entry Form lak thei ding leh June 5, 2017 sunnung dak 3 tiang ah piaklut thei ding a hi. Under 14 (Sub-junior boys) ah player ding te chu January 1, 2004 nung ah piang a hi uh a ngai a, Under 17 (Junior boys & girls) te chu January 1, 2001 masang ah piang te hitheilo ding a hiu. Team khat ah player 16 a hi ding ban ah coach leh manager khat gel a um ngai ding a hi. Chun, age group zosia a ding ah medical age verification chu June 7-8 leh Youth Hostel, Churachandpur ah office hour hun sung le um ding a hi.

CCI IN STAFF OUTING NEI
Lamka, May 19 (Nisin Thuhiltu): Centre for Community Initiative (CCI) in kumsin ah Staff Outing a nei sek chu sunzawm in tukum a ding in Shirui Festival mang ding in tuni’n Ukhrul a zuan ua, zing leh hung tung kit ding a hiu. Ukhrul ah tuni nitaklam a tung in festival matna chu a uap ui. Zan lam leh Ukhrul a pat km 16 a gamla, camp site ah giak in zing leh Shirui Hills ah tracking nei ding a hiu. Festival uap ding ah staff te a chia ziak un CCI Office leh The Malsawm Initiative a kikhak hi. Thudang khat a chun, naupang te kisinna ding leh khenkhat te sepna mu theina hi ding ti’n Malsawm Ability Resource Centre (MARC) ah Fast Food Restaurant bawlna ding ah kisingsakna a chia tha zing a, a bûk ding chi chuam chuam a bawl laitak uh a hi. Zia restaurant chu tunung sawtlo ah hawn hipai ta ding leh a sem te chu One Life Cafe in a hil ding a hi.

AGRICULTURE MINISTER IN AGRICULTURE OFFICE CHUAM CHUAM ENTHA
Imphal, May 19 (Nisin Thuhiltu): Agriculture, Veterinary &  Animal Husbandary Minister  V. Hangkhanlian in tuni’n Agriculture Office of Wangbal, District Agriculture Office, Thoubal, District Agriculture Office of Porompat, Imphal East leh District Agriculture office of Lamphelpat, Imphal West District te etthakna a nei a, Staff member te’n kituptak in Minister V. Hangkhanlian  chu vaidawnna a nei ui. Agriculture Office, Wangbal ah Minister in Rice Research Institute, Rice Breeder House, Farm Science Centre, Krishi Vigyan Kendra nuai ah kisa building etthakna a nei a, zia hun a chustaff member te tawh holimna nei in, infrastructure dinmun, man power, experts for soil  testing, rooms  extention, fencing, repairing buildings ti te tawh kisai a genpi hi. Chun, a pawimaw dungzui ah panla ding hin a gen a, department staff te chu kukal tak leh gunchu tak ah panla chiat ding ah chialna bawl in state Agricultural Sector masawn theina ding ah theitawpsua ding a hidan a gen hi. Godown of Agriculture office, Lamphelpat etthakna a nei hun a chun, staff member te’n office zawtna lampi repairing bawl ding phutna a nei ua, Minister in etzui hiding leh a lemchan dungzui ah lampi siam hiding in thutiam a bawl hi.

EDUCATION MINISTER IN FIELD EXPOSURE VISIT FLAGGED OFF
Imphal, May 19 (Nisin Thuhiltu): Education Minister Th. Radheshyam in tuni’n District 8 a pat student 10 chiat Ukhrul ah ni 2 sung  Field Exposure Visit bawl ding leh Shirui Lily Festival, 2017 uap ding te flagged off bawlna a nei hi. Student team te chu Sarva Sikhsha Abhiyan, State Mission Authority, Manipur in a mapui a, Ukhrul Higher Secondary School, Ukhrul ah zan giak ding uh interaction hun mang ding a hiu. Ukhrul zuan ah a kipat daw ding kuan ua Education Minister Th. Radheshyam in students te tawh a holimna a chun, ziagual field visits chu pawimaw leh field visit a bawlnau a pat zildaw tamtak nei thei ding uh hin a gen hi.  State Project Director SSA/SMA leh Director, Education (S), Manipur Shri N. Praveen in a genna a chun, Irilbung High School a pat student 52 te’n le ukhrul ah Field Exposure Visit bawl ding uh le tuni Imphal tung kit ding uh hin a gen hi.

MIZORAM CM LAL THANHAWLA KUM 79 HITA
Aizawl, May 19 (Nisin Thuhiltu): Mizoram Chief  Minister  Lal Thanhawla chu tuni’n kum 79 a ting a, himaleh ama taksa  nawplo – hitang khawsik ah a um ziak in  kum 79 a tinna lawp hilo in chief minister's office thusuak in a gen hi. Prime Minister Narendra Modi in Lal Thanhawla chu wish bawl in Mizoram Chief  Minister  in damtheina tawh hun sawttak a mat ding dawisak a hidan a taklang hi. A langkhatlam ah Chief  Minister  Lal Thanhawla chu tu ni 2 sung damlona ziak ah ama official residence ah etkawl ah um zing in a kigen hi. Lal Thanhawla chu Mizoram chief minister  5 vei hita a hi.