MANIPUR RAJYA SABHA MP DING AH KSH. BHABANANDA SINGH TELTIN AH UM
Imphal, May 25 (Nisin Thuhiltu): Manipur Legislative Assembly ah tuni’n Manipur Rajya Sabha MP Bye- Election a um a, vote 39 tawh Kshetrimayum Bhabananda Singh teltin in a um hi. Manipur Rajya Sabha MP Bye- Election ah Kshetrimayum Bhabananda Singh of Bharatiya Janata Party ( BJP ) leh Elangbam Dwijamani Singh of Indian National Congress (INC ) te chu candidate a hiu a, Elangbam Dwijamani Singh of Indian National Congress (INC) in Manipur Legislative Assembly member (MLA) 60 umna member 21 (support) a dawng hi. Manipur Rajya Sabha MP ding ah teltin ah um Bhabananda Singh hi (L) Ksh. Dhananjoy Singh leh (L) Ksh. Ibeyaima Devi chapa, 1st March, 1960 ah piang a hia, a zi ahileh Ksh.(o) N. Marina Devi a hi. Kum 1969- 1976 sung ah Sainik School, Goalpara, Assam ah lekha a la sim , kum 1980 ah Hansraj College, Delhi ah English Honours ah graduate zo a hi. Manipur University ah LLB zo, kum 1999 a pat Bar Council of India, NE region ah registered Advocate, kum 1995 ah BJP join a hi. Booth Level to State Level ah active tak ah panla zing a hi bak ah kum 2010 ah Pravesh Prashikhan Varg masapen le a hia, BJP State President Election conduct bawlna ding ah SRO (State Returning Officer) BJP, Manipur Pradesh ding ah kum 2009 ah nominate kibawl, Booth Level Secretary, General Secretary leh President banah kum 2008 ah President, BJP, Sagolband Mandal mawpuakna tuk, Dr. Borobabu Singh President hina nuai ah kum 2009-2012 sung BJP, Manipur Pradesh Treasurer ah a la sem a hi. Chuleh, kum 2012 -2013 sung ah BJP, Manipur Pradesh General Secretary a la tu, kum 2013- 2-16 sung ah Vice- President ding ah teldaw ah um leh tu ah BJP, Manipur Pradesh President mawpuakna tuk a hi.
ADCC SAINA NUAI H TRAINING UM
Lamka, May 25 (Nisin Thuhiltu): Autonomous District Council (ADC), Churachandpur nuai ah Agriculture Department saina’n ni 2 sung dai ding, “Human Resource Development Training of Farmers on Mushroom Cultivation & Vermicompost Preparation” kiti tunisunma dak 11:00 in Council Hall, Tuibong ah a kipan hi. Training chu D. Khaipao Haokip, Chairman, ADC Churachandpur in a hawnna nei in holimna a nei a, Seilenmang, EM (Agriculture, Horticulture & Soil Conservation), ADC Churachandpur in le thugenna a nei hi. Training hun ah tuni’n S. Romendro Singh, Agriculture Officer (Soil Conservation), ADC, Churachandpur in “Cultivation of Mushroom” ti pansan in ziltilna a pia, zing leh “Preparation of Vermicompost” ti thupi pansan ah gen ding hi. Training ah District sung a hin pâ (mushroom) bawldan tawh kisai a lunglutna nei mi 280 chuam a pang ua, training a hileh zing leh zawthian hi ding a hi.
DC/ CCPUR IN BIOMETRIC ENROLMENT TAWH KISAI AH HIATSAKNA BAWL
Lamka, May 25 (Nisin Thuhiltu): Churachandpur Deputy Commissioner, R. Sudhan in tuni thusua a bawlna’ chun, Churachandpur District ah Biometric Enrolment leh AADHAR Generation tawh kisai ensui ding MANITRON kiang bep ah mawpuakna piak himaleh Private Agency khenkhat in le bawl in sum tam tak tak la uh a hi dan mudaw a hi tawh kitawn in a hung tung ding May 27, 2017 sunnung dak 2:30 leh BRGF Hall, DC Office ah meeting um ding hi’n a gen a, zia hun a chun thawnlo ah Biometric Enrolment leh AADHAR Generation a la sai private agency te pangkim chiat ding in hiatsakna a bawl hi.
ZEO/CCPUR IN HIATSAKNA BAWL
Lamka, May 25 (Nisin Thuhiltu): T Goukhomang, Zonal Education Officer (ZEO), CCpur in Mid Day Meal sângkha school te hiat ding ah thusua a bawlna’ chun, State Food Safety Commissioner in February 25, 2017 ni ah order a sua dungzui in District sung ah Mid-day Meal sâng kha Government School - ADC nuai leh Government Aided School a Principal/Headmaster/Headmistress te’n a hung tung ding June 10, 2017 ma ngei ah CMO Office Campus a Designated Officer, Food Safety, CCpur ah Registration bawlchiat ding in a gen hi.
UZO, SINGNGAT IN KIPAKTHU PHUANG
Lamka, May 25 (Nisin Thuhiltu): United Zou Organisation (UZO) Singngat Block in Singngat MLA Pu Ginsuanhau @ GS Haupu, Chairman, MANIREDA chung ah kipak thu genna thusua a bawlna’ chun, MLA GS Haupu Zou in Zogaal Hall etthâkna a nei hun ah puathak ding kilawm tampi mudawk in local fund um masapen ah puathak ding ti ah UZO leh ZSP HQ tawh pan a lak na chung ah mipi thasik ah kipakthu phuang a hi dan UZO Singngat Block in a gen hi. Chun, maban ah Pathiang in lawtinna leh damtheina tawh a um pi ding dawisak thu le a lân hi.
WORSHIP SERVICE HAWNNA LEH LATNA NEI DI
Lamka, May 25 (Nisin Thuhiltu): A hung tung ding May 28 (Pathianni) sunnung dak 2:30 leh Rayburn Chapel, New Lamka ah Rayburn English Worship Service hawnna leh Pathian kiang ah latna nei hi ding a hi. Zia hun a hin Rayburn High School Evangelical Union in praise & worship lam ah mapui ding a hia, Rev Stephen Chinzathang, Senior Executive Secretary, ZPCS & Vice President, North East India Christian Council in Rayburn English Worship Service hawnna leh latna nei ding a hia, Rev. Khenpi Tombing, Chief Coordinator, PCI-R & Principal, Rayburn College in Rayburn English Worship Service chung chang genlatna nei ding a hi.
TONIC SOLFA JUNIOR COURSE
Lamka, May 25 (Nisin Thuhiltu): EBC Nepal Mission Field siana in a chiata May 15-22 sung in Mission Field nuai ah khangthakte a ding in Tonic Solfa Junior Course a la um hi. Tonic solfa zilna hun a chun Mission Field nuai a khua chuam chuam 25 a pat khangthak 46 a pang ua, EBC Music Institute a pat N Ginzakham chu Instructor leh Examiner ah pang in chawlkal khat sung Junior Course la in exam nei in a um hi. Exam hun a hin khangthak 46 lak ah mi 6 in first class ah zo in, mi 5 in second class leh mi 8 in third in a zo ui.
ZAA IN SÛNTHU PUANG
Lamka, May 25 (Nisin Thuhiltu): Zogam Artistes Association (ZAA) ah member, Nengzachin Thomte a mualliamna chung ah ZAA in sûnthu puang kawm in ama chu mi kitak leh tawmngai mama hi’n a gen a, a nutsia a innkuan te Pathian in a umpi ding dawisak thu le a puang hi. Nengzachin a hileh ZAA active member a hi ban ah Assistant Secretary panmun le a la lua kha, a lasak te lak ah a minthang diak te – ‘Luansiam Pengpelep’, ‘Nang Loungal’ leh a dang dang a hia, ZAA Abum “Tulmoh Hen” a le a la pang hi.
LT. GEN.(RETD) KONSAM HIMALAYA IN KARGIL WAR TAWH KISAI AH LECTURE BAWL
Imphal, May 25 (Nisin Thuhiltu): Lt. General (retd) Konsam Himalaya in ‘My experience in Kargil War-Role of the Indian Army’ ti thupi mang in Raj Bhavan, Imphal in lecture a bawl hi. High Schools leh Higher Secondary School ah youths/school naupang te’n zia lecture programme chu a sai uh a hia, student 200 in hun matna a uap ui. Governor Dr. Najma Heptulla in introductory speech a piakna a chun, Indian army leh para-military forces te panlakna leh kipiakzawna chu pakcha mama hin a gen hi. Lt. General (retd) Konsam Himalaya in a genna a chun, Kargil War hun ah 27th Battalion Rajput Regiment Commanding Officer a hidan a gen a, mun haksa tak tak - sea level a pat 19,000 feet ah sang tangchung ah a chapang te galdodan te genlatna nei in, power point presentation bawl in Kargil sectors ah kidona limlak chuam chuam te suklatna a nei hi. Chun, Indian army te’n Dras sector, Tiger hill, Ladakh range, Siachen glaciers ah panlakna a neidan teu taklatna a nei a, kum 12 sung Jammu and Kashmir ah a um dan te a taklang hi.Operation Vijay of Kargil war chu 6th May 1999 ah kipan, 14th June, 1999 ah India in gualzawna chang a hidan le a gen a, khangthak te lungtup mualsuana ding ah panlakna nasatak nei pawimaw a hidan te gen in student hun matna uap te tilkhona a nei hi. Alangkhat lam ah Governor Dr. Najma Heptulla in retd) Lt. Gen. Konsam Himalaya dawtna (question) khat a dawnhu thei ziak in simple prize khat a dawng hi. Zia lecture programme chu BJP National General Secretary, Ram Madhav, Minister of Works, RD & PR, Commerce & Industries, Power & IPR - Th. Biswajit Singh, CRPF high ranking official te’n le a uap ui.
KPI AH PHED QUARTER KHAT MEI IN KANGTUM
Kangpokpi, May 25 (Nisin Thuhiltu): Kangpokpi DHQ ah PHE Department staff quarter khat tuni nitak lam dak 12:10 in mei in a kang tum a, a kiangnai ah um quarter khat leh hun tiang meikuang in a susiai. Meikuang chu mobile charger tawh power line kisuktuana a pat short circuit ziak ah kipan hin a kigen a, minute tamlo sung ah kum 50 ah upa quarter chu kangtum pai ziang hin a kigen hi. PHE Department staff quarter mei in a kat tawh kitawn ah a kiangnai ah um 38 AR Kangpokpi personnel te’n Post Commander, Maj. Syed Irfan mapuina inn katna mun del ah meikuang phelmitna ding ah panlakna a nei bak ua , Kanggui Youth Union member te’n meikuang phelmitna ding ah panlakna a nei nung ua meikuang chu phelmit ah um hin a kigen a, mei in a kattum van te chu Rs. 13,24,000/- man ding ah hisap a hi. A langkhatlam ah meikuang in a suksiat a kiangnai tuam ah thil um te chu Rs. 2,61,000 man tuam hiding in a kigen hi. Zia staff quarter kang luatu chu Goulen Khongsai, Grade IV employee of PHED Kangpokpi hi ah hiat a hia, a zi tawh a pawtdaw kal ua ziagual thil chu tung hin a kigen hi.
FREE COUNSELING & AWARENESS PROGRAM
Imphal, Ma 25 (Nisin Thuhiltu): Imphal based central institution- Institute of Bio-resources and Sustainable Development (IBSD) saina’ May 26, 2017 zingkallam dak 11:30 ah Takyelpat campus, Imphal ah under-graduate leh post graduate programme nuai ah North East students te ding ah free counseling & awareness program um ding a hi. Zia hun chu Manipur Governor Dr Najma Heptulla in khuallian hina tawh uap ding leh a hawnna nei ding a hi. Director Prof Dinabandhu Sahoo of IBSD in press conference a genna a chun, students leh nu leh Pa te’n a bawl leh a bawllo ding uh tawh kisai free counseling & awareness program hun ah genkhawm hiding in a gen hi.
FOREST DEPARTMENT IN DAILY BASIS AH RS 20-25 LAKHS MU: MINISTER TH. SHYAMKUMAR
Imphal, May 25 (Nisin Thuhiltu): Forests & Environment Minister Th. Shyamkumar in ama official quarter, Kanglapat ah tunitak lam in thuthak lakhawm mite a kimupi a, Forest Department in Rs 20-25 lakhs (approximately) average daily basis ah state Forest Beats te a pat kimu a hidan a taklang a, Koirengei Forest Beat Office a pat Rs 2 lakhs (approximately) lut zing sek a hidan a gen hi. Chief Minister N. Biren Singh mapuina nuai ah revenue department in kum khat ah Rs 100 crore target ah nei a hidan gen in, zia supitin theina ding a chu department in drive chiapi zing hin a gen hi. Chuleh, global warming leh deforestation issue tawh kisai le etzui hiding in Minister Shyamkumar in a gen a, MAHUD Department in Imphal market areas sukthianna ding ah panlakna nei zing a hidan le a taklang hi. Chun, Forest Department in Centre guidelines kituptak ah chiapi a hidan a taklang a, Forests & Environment in tunung sawtlo ah website hawng ding leh revenue collection dinmun te zia website a chu suklat zing hiding in a gen hi.
SANJAY MITRA IN DEFENCE SECRETARY MAWPUAKNA LA
New Delhi, May 25 (Nisin Thuhiltu) : India’s Defence Secretary thak ding ah guat ah um Sanjay Mitra in Defence Secretary G. Mohan Kumar thasan in tuni’n mawpuakna a la, kum 2 sung ama’n zia mawpuakna chu tuding a hi. Sanjay Mitra a hileh1982 batch IAS officer, West Bengal cadre a hia, Defence Secretary ding ah May 10, 2017 ni puan ah um a hi. Defence Secretary ding ah guat ah a um masang ah Mitra hi Road and Transport Secretary ah sem a hia, May 10 ni a khah Defence Ministry ah Officer on Special duty kikawi, Defence Secretary G. Mohan Kumar tenure a beitak tawh kitawn ah Defence Secretary thak ding ah guat a hi. Mitra in masang a khan, West Bengal Chief Secretary mawpuakna a la tu, zia nung a chun, November 2004 -July 2011 sung in Prime Minister's Office of Manmohan Singh ah Joint mawpuakna a la tui’i.
PRIME MINISTER MODI IN INDIA A DING AH LEI SAUPEN HAWNG DI
Guwahati, May 25 (Nisin Thuhiltu):Prime Minister Narendra Modi in zing leh Assam a um leh India a ding ah lui chung a lei (bridge) um lak ah saupen, Dhola-Sadia Bridge chu hawng ding a hi. Lane 3 lei hi 9.15 km a sau a hia, Brahmaputra lui zawptu, Lohit kiti lui khat chung ah ki bawl a hia, Assam ah Dhola leh Sadia zawpmattu a hi. Zia mun a hin Brahmaputra galkai na ding a hin lawng neu te ti lo lampi dang a um pua, zia chule sun bep ah hithei a hi ban ah tuilet hun ah le mat thei hi diaklo a hi. Lei thak bawlzaw a hi tawh kitawn in economic khantona a tut ding bep hilo in Arunachal Pradesh sualam tawh kikawmtuana le siam hawi mama ta ding a hi.