NISIN THUHILTU - 09 May 2017 | via Zogam.com

*CM N. Biren Singh in Hill Districts ah Biometric Enumeration chiapi thak ding ah thu pia*
Imphal, May 08 (Nisin Thuhiltu): Cabinet Hall, Chief Minister's Secretariat, Imphal ah tuni'n Chief Minister Nongthombam Biren Singh mapuina hill district te ah Aadhar enrolment a ding ah biometric capturing dinmun tawh kisai in review meeting a um hi. Zia review meeting chu Ministers, Parliamentary Secretaries, MLAs, top bureaucrats, hill district zosia Deputy Commissioner (DC) te leh a kisaipi official te'n a uap ui. Aadhar card generation ding ah Biometric enumeration (BME) chu tu ah MANITRON leh In-Media Computer nuai ah kawi a hi.

Meeting hun ah biometric enumeration rate chu valley district tawh tekak ah hill district ah niam mama ah mudaw in a um a, Government-sponsored welfare schemes te direct benefit transfer (DBT) a um theina ding ah Aadhar cards/numbers pawimaw ding a hina chung ah Chief Minister in kituptak ah hill areas ah Biometric enumeration (BME) bawl ding in thupiak a nei a, MANITRON leh In-Media officials te chu hill districts zosia BME team te sawl thak ding leh State Capital ah teams 4-5 bep kawi ding a hiatsak hi. Chief Minister in hill districts palai MLA, ADC Member te Deputy Commissioner (DC) leh villager te chu biometric capturing bawlna MANITRON leh In-Media official te kithuapi ding in chialna a bawl a, hapta khat sung ah nasep pan ding in le thupiak a nei hi. Principal Secretary (Planning) leh Principal Secretary to CM, Vineet Joshi in BME leh Aadhar generation tawh kisai a etzui ding ah le mawpuakna piak in a um hi. Chuleh, DC te chu BME schedules bangkim Vineet Joshi kiang ah hapta khat sung ah pelut chiat ding in le hiatsakna a bawl a, ama mimal tak ah le panlakna um te enzui ding hin a gen hi.

*IED attack ah Territorial Army personnel 2 thi, 2 liam*
Imphal, May 8 (Nisin Thuhiltu): Lokchao area, Manipur's Tengnoupal district ah tuni 8th May zingkallam dak 5:50 in IED bomb mang ah 165th Territorial Army Battalion gari attack in a um a, ziana a chun TA personnel 2 in thina a tuak ua, personnel 2 te'n liamna a tuak ui. Thina tuak personnel 2 te chu Arjun Baral s/o Tankanath Baral of Koubru Leikha village of Kangpokpi district, 165th TA B-Coy leh NK Veroso Hungyo, (38) s/o late Katohei Hungyo of Leishipung village, Senapati district a hi. Liamna tuak te a hiu leh Lance Naik Y. Govind Singh of Kakching Turel Wangma, Kakching district leh Subedar Toijam Chandra Singh of Thangnaleikai Churachandpur district a hiu. Thina tuak leh liamna tuak TA personnel 4 te chu Manipur mi a hivek ui. 165th Territorial Army Battalion chu patrolling ah chia a kile lam ua lamkal ah IED bomb mang ah attack a hiu a, a gari masang ua IED Bombs 2 puakzak a hi. Attack ah a umna mun uh chu a post a ua a pat 2 km ah gamla a hi. Chun, Moreh Police leh Assam Rifles kithua in bomb puakna mun etchianna a nei ua, search operation le a bawl ui. Police thusuak in remote control ah bomb chu sukpuak ah um hiding ah muanmaw hin a gen hi. Hiatthei khat chu Lokachao area mah ah December 2016 a khan kua a hi hiatlo pawl khat in Manipur police te ambush a la bawl ua, zia hun a a khan Manipur police personnel 3 in thina a la tuak ua, personnel 9 te'n liamna a la tuak ui. A langkhat lam in Lokchao area ah tuni 165th Territorial Army Battalion attack ah a um uh chu Manipur Chief Minister N Biren in nasatak in demna a bawl a, midawlawk te gamtatna a hi'i ti kawm in thina tuak ingsungmite suunpi mama a hidan a taklang hi. Manipur vena nei - BJP National General Secretary Ram Madhav in Lokchao area attack chung ah kigawlkha te a kituakpiu gawtna piak hiding leh action lak hiding in a gen a, government in kituptak ah khualna nei ding hin a gen hi.

*Diklo tak ah PDS items zuak a um leh action khautak lak hiding*
Lamka, May 8 (Nisin Thuhiltu): K. Radhakumar Singh, Commissioner (CAF&PD), Government of Manipur in governor min ah thusua a bawlna a chun, PDS items - rice, Kerosene, sugar etc te Prevention of Black- marketing & Maintenance of Supplies of Essential Commodities Act, 1980 leh Consumer Protection Act, 1986 panna Acts leh Rules tawh kituaklo ah open market ah zuak a um leh CAF&PD Department in a chung ua action khautak la ding a hidan a gen a, PDS items zosia chu authorised Fair Price Shops bep ah agents ding ah guat ah um te bep in a zawk ding uh a hidan a taklang hi. Chuleh, amu ding dawl (beneficiaries) te kiang ah kituptak ah atun ding pawimaw in le a tak hi.

*2 Days Parental Counselling kipan*
Lamka, May 8 (Nisin Thuhiltu): District Program Officer (DPO), Sarva Shisha Abhiyan (SSA), Right to Education (RTE), Inclusive Education for Disabilities (IED), Churachandpur District saina ni 2 sung um ding, District Level 2-Days Parental Counselling for Parents of Children with Special Needs (CWSN) kiti chu tuni, May 8, 2017 sunma dak 11:00 in Synod Hall, IB Road ah Special Guest hina tawh hun matna uap T Goukhomang, ZEO Churachandpur in a hawng a, Churachandpur District sung ah gualphalo, Children with Special Needs insungmite, nu-le-pate chiakhawm in, naupang gualphalo te etkawl ding tawh kisai in kiziltilna a um hi. Parental Counselling hawn a hi tawh kitawn in Manneikim, Special Teacher, Premlata, Special Teacher, Anita Rani, Special Teacher leh Girija, Special Teacher te'n thupi chuam chuam mang in gualphalo te etkawlna ding tawh kisai in ziltilna a nei ui. Zia traning chu sutzawm hiding a hia, 9th May ah Chongpi, Special Teacher, Manneikim, Special Teacher, Rishi Kanta, Special Teacher leh T Budhajit, Special Teacher te'n resource person hina tawh ziltilna neizawm ding a hiu.

*Youth Parliament on Skill Development*
Lamka, May 8 (Nisin Thuhiltu): Nehru Yuva Kendra (NYK), Churachandpur saina' tuni, May 8, 2017 sunma dak 11:00 in Mini Auditorium, Dorcas Jubilee Hall, New Lamka ah Block Level Neighborhood Youth Parliament on Skill Development a um a, Lucy Chonglalbiek, NYV, KYK in hun matna a mapui hi. Chun, H. Ujamkhanpau, Local Pastor, EBCC Hebron Pauchapna tawh hun hawnna a nei a, H. Doungel, District Youth Coordinator, NYK Churachandpur a pat thugenna saulo um in, Lalboi Haokip, Principal, Heritage Academy leh Former Manager, Syndicate Bank in Skill Development tawh kisai in ziltilna a nei hi. Zia hun matna chu District sung ah NYK nuai ah affiliated Youth Club member hunkhawp te'n a uap ua, R. Sudhan, IAS, Deputy Commissioner, Churachandpur in le hun matna uap ding leh Resource Person ah pang ding ti himaleh Imphal ah review Meeting ah a pan ziak in pangtheilo in a um hi. Resource Person Lalboi Haokip in a thugenna a chun, a chiata kum 10 sung ah Churachandpur dinmun et in, Paite kampau lak ah Officer lian tam maleh tu ah suan um tak tak umlo a hidan gen in, tu khangthak hun ah namdang khangthak Officer tamzawta hin a gen a, zia chu Skill Development taksap ziak a hidan a gen hi. Chun, Paite kampau mang te a ti chu a demna a gen hizawlo ah Program kimatna mun a hi ziak ah etsakna dan a taklat hizaw hin a gen hi.

*Common Facility Centre hawnna nei*
Lamka, May 8 (Nisin Thuhiltu): North Eastern Region Community Resource Management Project (NERCORMP) Churachandpur in tuni'n amau program nuai ah K.Thenjang khua, Tuibong Block nuai ah K. Thenjang Natural Resource Management Group ( NaRM_G ) ten Common Facility Centre (Semi Pucca) a sak zaw uh chu D. Khuala Vaiphei, Project Manager, NERCORMP Churachandpur in Chief Guest hina tawh uap in hawn dawna a nei hi. Khaw mipi ten kipakna etsak na in bawng khat that in mipi ankuang luina a nei ui. Chief Guest in Rs. 360000 bep kipia hawitak ah khua mipi ten a poimaw dan dan a tuakbe ua, quality hawitak leh kilawm tak ah Common Facility Centre a sak zawna chung un Khua mipi , Committe leh area enkawl ah guat ah um PNGO, MaSSCORD te chung in kipak um a sak thu a gen hi. Zia program ah chun NERCORMP lam a pat Officers Clarence Seikhongam, Business Dev Officer leh J. Lhungdim, Institutional Dev Organiser in a uap ui. Chuleh , PNGO MaSSCORD Chief Functionary Tingkhonei leh a staff ten a uap bawk ui. Zia programme chu a zaw un, N. Zalenphai khua ah Collection Centre le ribbon cutting D Khuala Vaiphei, Project Manager in a nei malam hi.

*Red Cross Day 2017*
Lamka, May 8 (Nisin Thuhiltu): Indian Red Cross Society (IRCS), Churachandpur District Branch saina' tuni, May 8, 2017 sun dak 12:00 a pan Hill Town Community Hall, Thangzam Road ah "World Red Cross Day 2017" mat in a um hi. Zia hun matna chu P. Thanglianlal in amapui a, Dr. LS Gangte, Vice President, IRCS, Churachandpur in vaidawn thu genna nei in, Dongzakai Gangte, Vice President, IRCS, Churachandpur in Indian Red Cross Society tawh kisai genna a nei a, ST Lalson, Secretary, IRCS, Churachandpur in IRCS Member thisa te suunna hun mapui in, kumlui ah IRCS Churachandpur panlakna chuam chuam um te Report piakna a nei hi. Dongzakai Gangte, in Indian Red Cross Society, Churachandpur Branch in AR Khan, DC Churachandpur ahi hun a pat pan la khawm ah, ESS Scheme nuai ah DC a hung kha te tawh kithua ah Office building sak ah um a hidan te taklang in, Red Cross Society in gal um hun leh khawtang ah haksatna a um hun ah panlak theina tampi nei maleh Active tak ah a ki pei Philanthropic Organization te'n liakhu zo mama a hidan gen a hi. Indian Red Cross Society, Churachandpur Branch in kum 2016 sung in School chuam chuam 8 ah Water Sanitation & Hygiene (WASH) kiti a chiapiu a, Class VI nuai te thianthona a ziltil banun Salem Hall, Salem Veng ah One Time First-Aid Training a nei ua, Meikang, liamna tuak, tui ah khialut ti te leh a dangdang ah haksatna tuak a um hun ah panpina piak theina ding in (Mock Drill) Ramakrishna Memorial School leh Churachandpur Government High School in a nei ua, Family News Service nuai ah kum 4 lam a insungmi te tawh kihiatua thei talo Churachandpur mi, gamdang Jail ah um mi 2 te a innsung mi teu tawh kihiattua sak a hidan uh le Cross Day mat hun ah taklat in a um hi.

*Pathian Thu ah kipawl khawmna nei di*
Lamka, May 8 (Nisin Thuhiltu): Songtal Government High School in Pathian' Thu leh Laa ah kipawl khawmna kumsin leh a nei sek uh chu May 9, 2017 in neikit ding a hiu. Zia hun a chu Elder Langkhanpau Guite in Pathian' thutak Genna leh Chialpina hun mang ding a hi. Chun, thudang khat ah a hung tung ding May 12, 2017 leh Khuanggin khua ah JB School Managing Committee, Student leh Staff te'n, hun chiasa Khuanggin khua ah School lamthil te ah pan a lakna leh maban a kithuapi to zel ding dawtna kawm in Langkhanpau Guite, Formal Chairman (ADCC) annkuang umkhawm pina nei ding un thudawnna'n a gen hi.

*ZSP in MLA GS Haupu Zou kipakpi*
Lamka, May 8 (Nisin Thuhiltu): Zou Sangnaupang Pawlpi (ZSP) General Headquarter in May 7, 2017 ni a khan Lailam Veng ah 60-Singhat Assembly Constituency (ST) a pat MLA teltin thak ah um Ginsuanhau @ GS Haupu Zou kipakpina hun mat piu a, P. Nengkhosoi, President leh Ms. Rose Hoineu, Finance Secy.,ZSP HQ ten kipakpi etsakna'n Zou Puanlaisan khat MLA GS Haupu Zou a silsak ui. MLA GS Haupu Zou in a thugenna a chun, ZSP te'n ama a ngai pawimaw nalai uh kipakthu gen in, maban ah le panlak khawm zing pawimaw a hidan te gen in, ZSP lawiupa te chung in kipakthu a gen hi. Chuleh, ama'n khawtang hinkhua hinkhua a khanto semna ding ah khuam hawi mama siamna ding ah Singngat ah High School umsa khat Higher Secondary School ah upgrade a hina ding ah panla zing a hidan le a gen a, ZSP lawiupa te chu kikhen danna tuntu (divisive force) hilo a mi gawmkhawmtu (binding force) hizaw ding a hidan a hi. Hiatthei khat chu ZSP in Chief Minister N. Biren kiang in library –cum- study center bawlna ding in memorandum a la pelut hi.

*Huntiam umlo bandh bawl ding ah vauna bawl*
Imphal, May 8 (Nisin Thuhiltu): Manipur ruling BJP leh opposition Congress in May 25, 2017 leh Rajya Sabha by-poll umna ding ah candidate ding a buaipi zing lai in Thoubal District MP Candidature Demand Committee (TDMCDC) in Thoubal leh Kakching district a pat candidate khat pen pen Rajya Sabha seat piak ding phutna kiphinna a nei zing uh tawh kitawn in a demand uh sukpitin piak ahiloleh huntiam umlo general strike pan ding a hidan uh taklang in vauna a bawl hi. Thoubal district ah Assembly constituency 7 leh Jiribam district assembly segment ah mipi te chu parliamentary (Lok Sabha) elections um hun ah vote khia sek himaleu zia constituency te a pat chu candidate a um ding uh phal hi seklo a hina chung ah Rajya Sabha seat awng lua ding ah zia area a pat chu mi Rajya Sabha member ding a nominate ding ti a hi. Manipur chu Lok Sabha seat 2 nei a hia, ST te ding ah 1 reserved a hi. TDMCDC chun National Capital, New Delhi ah le Pathianni a khan sit-in-protest a la nei ua, himaleh limsak ah a umlona chung ua Thoubal leh Kakching district pumpi huap ah May 10, 2017 zingkal lam dak 5:00 a pat hun tiam umlo general strike chiapi ding ah lemsakna a nei a hi.

*SP chang 7000 tawh mi 1 kiman*
Imphal, May 8 (Nisin Thuhiltu): Imphal West Narcotic Cell in tuni'n SP capsule piece 7000 tawh mi khat a mandawk a, mat ah um SP capsule te chu a sum ah hisap ah (local market rate ah) Rs. 3 lakh tuam man hiding in a kigen hi. Zia SP capsule tawh mat ah um chu Md Abdul Sattar (38) of Oinam Sawombung Mayai Leikai hi ah hiat a hia, zingkal lam dak 11 vel ah khamthei (SP) chu atta bag leh plastic vom khat ah a khai lai ah mat daw ah um a hi.