NI 618 SUNG “ANTI-TRIBAL BILL” ZIAK AH KIPHINNA SUKVEN HITA; STATE GOVERNMENT LEH JACAATB IN MOU SUAI KAI; CM N BIREN IN KIPAKTHU GEN
 
Lamka, May 10 (Nisin Thuhiltu):  Manipur  government thak in ni 130 sung economic blockade a sukbei nung in Joint Action Committee against Anti Tribal Bills (JACAATB), Churachandpur in ni 618 sung “Anti Tribal Bills” ziak ah kiphinna a nei chu a suveng kit hi. Chief Minsiter N. Biren Singh mapui state government leh JACAATB in tuni Memorandum of Understanding (MoU) suai a kaina chung ah Chief Minister’s Secretariat, Imphal ah Chief Minister in press conference ah a taklatna a chun, tuni chu state mipi te ding ah nibik pawimaw tak a hiti’n a gen a, buaina sukven theina ding ah panla Churachandpur based Civil Society Organisation, MLA, JACAATB Convenor leh Executive member te banah Churachandpur mipi te leh Media houses te chung in kipakthu a gen hi. State government chu bandhs ahiloleh blockades bawl masang ah demand leh issue tawh kisai ah dialogue nei ding ah kihawng zing a hidan gen in, bandh chu thildiklo (illegal) a hidan taklang kawm in bandhs leh blockade support bawlte  dan (law) tawh kituak ah gawtna (punishments) piak hiding in a gen hi. Memorandum of Understanding (MoU) dungzui ah Ministry of Home Affairs Government of India in May 11, 2016 ni thusua a bawl dungzui ah President of India in Bill thum te lak ah khat - Protection of Manipur People Bill, 2015  a hengtang (withheld) ahidan suklat in a um a, Bill dang 2 - The Manipur Land Revenue and Land Reforms 7th Amendment, Bill 2015 leh Manipur Shops and Establishments Second Amendment Bill 2015 te genlat a hi kit hun hun ah, a  kisaikhakpi (stakeholders) te tawh genkhawm ding, maban ah indigenous tribal te sukha thei ding Bill a um leh State Government in India Constitution tawh kituak ah, a kisai khakpi te tawh a siam ding; State Government in SoO group tripartite talks a kithuapi ding leh panlakna thei chan ah pan a lakpi ding; State government in Singngat ah Memorial Hall sakna ding leh Lamka ah Memorial Park siamna ding ah financial assistance a bawl ding; State Government in JACAATB demand District thak hiatpi kawm a, zia chung chang chu District Boundary  Commission in State Cabinet kiang ah report a piaklut ding; State government in police firing ah civilians te’n thina a tuaknau tawh kisai khual (investigation) a nei ding leh dan (law) tawh kituak ah action a lak ding; JACAATB in 25th  May, 2017 masang ah martyr 8 te a thupi theipen ah a vui ding, State government in“Anti Tribal Bills” ziak ah kiphinna’ thina a la tuak martyr insungmite ex-gratia Rs 5 lakhs leh sepna a piak ding, liamna tuak mi 48 te compensation Rs 50,000 leh liamna ziak ah gualpha talo (disabled persons) mi 8 te compensation Rs 2 lakhs leh sepna, 25th May 2017 masang ngei ah piak ding ti a hi. Memorandum of Understanding (MoU) suai chu state government thasik in Chief Secretary, O. Nabakishore Singh in a kai a, hiatpitu Under Secretary, Ministry of Home Affairs, Government of India, A.N Jha leh JACAATB  thasik ah Chief Convenor, H. Mangchinkhup, President, Simte Tribe Council, B. Dongzalian Simte, President, Mizo People Convention Vanlalrinliana, President, United Zou Organisation, Chinlunthang, President, Young Paite Association, T. Khailianthang, President, Tedim Chin Union leh H. Pauzachin te’n a kai ui. Chuleh, Memorandum of Understanding (MoU) suai kaina hun chu Prema Nanda, Secretary, BJP Manipur State, LM Khaute, IPS DGP, leh District Administration a pat R Sudhan, IAS, DC CCpur, Rakesh Balwal, IPS, Superintendent of Police, Churachandpur banah Churachandpur ah SDO te’n le a uap ui.

CABINET IN LOKCHAO ATTACK AH THINA TUAK JAWAN TE EX-GRATIA PIAK DING LEMSA
 
Imphal, May 10 (Nisin Thuhiltu):  Lokchao area Tengnoupal District ah 8th May 2017 ni bomb attack ah thina tuak Territorial Army jawan 2 insungmite leh liamna tuak jawan 2 te ex-gratia/compensation piak ding in tuni’n State Cabinet in lemsakna a nei hi. Lemsakna dungzui ah thina tuak jawan 2 insungmite ex-gratia Rs. 5 lakhs gel piak hiding a hiu a, liamna tuak jawan 2 te compensation Rs. 50 gel piak hiding ti a hi. Chief Minister N. Biren Singh chaiman hina nuai ah tuni Cabinet meeting hun in Government of Manipur leh M/s. India Foundation to prepare “Strategic vision for Manipur in the Act East policy of India” in Memorandum of Understanding (MOU) suai a kai ding in le lemsakna a um a, State ah Urea fertilizer kining tak stock kawi ding leh State Agriculture Department in Dimapur a pat Urea fertilizer 1(one) Rake, Imphal a tut ding in le Cabinet in le lemsakna a nei a, economic blockade  um hun ah duty bawlna physically disabled ah um Usham Gojen Singh( tanker driver) chu Consumer Affairs  Food & public Distribution Deptt nuai ah sepna piak ding in le cabinet in lemsakna a nei hi.


MLA  GS HAUPU KIPAKPINA NEI
 
Lamka, May 10 (Nisin Thuhiltu): 60-Singngat A/C a pat teltin ah a la um MLA Ginsuanhau @ Haupu Zou chu term 2 a kizawm ah teltin a hi kipakpina chu tuni’n Sangaikot Sub-Division a um M. Khaukual leh G. Monglian khua ah nei in a um hi. Sunma dak 10:00 in M. Khaukual ah Ginsuanhau leh a innkuante’n a pianna pa (L) Thangzalang L. Mate thansuang ah pâk piakna nei masa in zia zaw a chun kipakpina hun matna chu pat a hi. M. Khaukual hausapa, Enkhothang in Singngat AC a pat term 2 a kizawm ah teltin a hina chung ah kipakpi thu puangkawm in vaidawnna thucha a gen hi. Hun matna a chun, khawsung chanu te, UZO Gundung Block leh Police ban ah mimal chuam chuam a pat kipakpina thilpiak piakna um in, gennawp neite a ding ah thugenna hun hawn in a um hi. MLA GS Haupu in M. Khaukual chu a pianna leh seiletna khua a hi ban ah a khanglai hunsung tamzaw chu khawtang leh kochuam ah kimangcha zing hi’n a gen a, MLA term masa thuchuam hi ta leh tuchung a le khawsung mi hina dawl ah kipanpi tua ding ah kilawm himaleh a lang pang hunkhawp a um chu thasia kisa a hi dan le a puang a, teltin a hi tawh kitawn in zia gual ah a la lang pang te chu Pathian min ah ngaidam ta hi’n a gen hi. Term masa a khan development lam tawh kisai ah sep hawi nei manlo maleh tuchung ah Sangaikot Sub-Division puaphat gua hi’n le a gen hi. Zia hun matzaw a hin G. Monglian EBC School huangsung ah kipakpina, pauchap piakne leh maicham siamna hun mat in a um hi. Zia hun a chun, Upa Sialchin, Headmaster, EBC School in vaidawnna thucha genna leh kipak thilpiak piakna hun a mang a, Village Authority, School Committee ban ah mimal chuam chuam in le kipak thilpiak piakna a nei ui. Pastor T. Dinkhansuan, Local Pastor, EBCC B. Kaljang in Ginsuanhau a ding ah Pathian thu pansan a tilkhona thu gen ban in a sungkuan uh a ding ah a pauchap piak hi. MLA GS Haupu, Kham Guite, Social Worker, Suanchinpau, MDC, Lungthul, Seimang, Social Worker ban ah hun matna uap khua hausa chuam chuam a pat thugenna le a um hi. Hun matna kichai in mipi’n ankuang sawkkhawmna le a nei ui.

LARVAE SURVEY BAWL DING
Lamka, May 10 (Nisin Thuhiltu): Khawpi sung ah Dengue natna um a hi hiatdaw tawh kitawn in CMO/CCpur in Khua / Veng 7 ah Dengue natna pua thokang tui (Larvae) um a hi em ti survey bawl ding ah thu pia in survey bawl te’n May 12, 2017 sunnung dak 2:00 chan ah report a piaklut ding un le a hiatsak hi. Survey bawl ding te tuni zingkal dak 10:00 in CMO office ah ki report in amau chu group 2 ah khen in a um ua - Nehrumarg; Zehang Lamka; Apollo Veng; Khumujamba leh Beulahlane ah Samte Chin, Male Health Superviser (MHS) malatna nuai ah Zamginmang, Male Health Worker (MHW); Kamkhenthang, MHW; Chinkamlian, MHW; Lalremthang, MHW; Thuamkhanlam, MHW; D.Biakmuanthang, MHW; Lalmalsawm, Multi Purpose Worker (MPW); Paubiaklun, MPW; T. Thangminlian, MPW leh Daiginmang Simte, MPW te’n survey ding a hiu a, Rengkai leh Neihsial Veng ah S. Jamzadou, MHS malatna in Chinzakam, MHW; Paukhothang, MHW; Benzamin, MHW; Seithang Mate, MPW; Remruotsang Infimate, MPW; V. Pauminlun, MPW; S. Thianzalal, MPW; Muanlalpaul Guite, MPW leh T. Thangminlian, MPW te’n survey ding a hiu.

DC PHERZAWL IN ENSUI DI
Lamka, May 10 (Nisin Thuhiltu): Parbung khua ah Rationing agent mi 11 te’n a hung tung ding May 13, 15 ban 16 leh Fair Price Shop ah National Food Security Act nuai ah ration card neite kiang ah anchang hawmdawk uh a hina ah DC Pherzawl in ensui ding a hi. Civil Supply Deptt. (CAF & PD) a pat Civil Supply Inspector mi 6- Nongmaithem Nicky; Ng Washington Singh; G. Sadananda Singh; Th Chitaranjan Singh, Lalhrietrenga leh Depankar Sharma te’n May 12, 2016 leh Lamka a pat Parbung chan anchang pawte zui ding a hiu a, zia na ding a hin anchang puakna ding ngaitua ding in M. Ginzasuan, DSO (CAF & PD), Pherzawl District in Rationing agent te a hiatsak hi.

2ND BATCH TE’N TRAINING PAN
Lamka, May 10 (Nisin Thuhiltu): Churachandpur SP, Rakesh Balwal, IPS panlakna ah May 2, 2017 a pat Tuibong Peace Ground ah Mob Control/Mob Disperal training a la um chu chiatha zing in, zani 1st batch te’n a zaw uh tawh kitawn in tuni’n 2nd batch te’n a pan ui. Churachandpur Police ah Sub Inspector a pat a nuailam sia chu batch-wise a kikhen in training vek ding uh hi’n a kigen hi.


Pension updation process tawh kisai ah danthak kisiam
Imphal, May 10 (Nisin Thuhiltu):  Vivek Kumar Dewangan, Commissioner (Finance),Govt. of Manipur in tuni thusua a bawl dungzui ah Manipur State ah Pensioner te ding ah pension updation process kitupzawkna ding ah dan thak siam ah um a hidan a taklang a, zia dungzui a chu Jeevan Pramaan online portal a pat Declare Digital Life Certificate (DLC) generate kibawl chu Pensioners existence, proof dang khat hiding leh Common Service Centre (CSCs) chu Manipur State ah Pensioners te ding ah Jeevan Pramaan online portal a pat Digital Life Certificate (DLC) generate bawl thei ding ah thuneina piak a hidan a taklang hi. Zia ah danthak kisiam chu zia thusua  kibawl a pat mat pat ngal hiding ti a hi.

SBI-RSETI AH TRAINING CHIATHA ZING
Lamka, May 10 (Nisin Thuhiltu): SBI-RSETI, Bijang ah kum 18 a pat kum 45 kikal mi te a ding course chuam chuam ah free training chu chiato zel in, tulaitak in beauty parlor management training a nei ui. Beauty parlor management training a hileh May 1 in a kipan a, S. Mangboi Vaiphei Faculty, SBI RSETI in May 1 a pat May 4 sung Entrepreneurship Development Program (EDP) ziltil in, May 5 a pat Lhainunnem, Beautician in trainee te practical in ziltilna a piai. A hung tung ding June tha sung in SBI RSETI, Bijang ah Course chuam chuam ah free training umkit ding a hina ah lunglutna nei kum 18 a pat kum 45 kikal te’n ngaiven thei ding a hia, course khat a hin mi 25 bep lak hi ding a hi. Course chuam chuam um ding te chu- June 5, 2017 a pat ni 13 sung dai ding EDP for Micro entrepreneurs, June 19 a pat ni 10 dai ding âk vâkna (poultry) training, June 29 a pat ni 30 sung dai ding Photography & Videography training te hi ding a hi. Zia tawh kisai ah lungluta nei te’n SBI-RSETI Temporary Office, Bijang ah office kai hunsung in ngaiven thei ding a hiu.

FREE SCREENING CAMP FOR DETECTION OF CONGENITAL HEART DISEASE
Lamka, May 10 (Nisin Thuhiltu) : A hung tung ding May 12, 2017 zingkal dak 9:30 a pat sunnung dak 2:00 chan in Don Bosco Higher Secondary School, Salem veng ah kum 15 nuailam te a ding ah ‘Free screening camp for detection of congenital heart disease’ um ding a hi. Free screening camp a hileh Catholic Medical Centre, CMC Hospital Koirengei, Imphal East te saina nuai ah um ding a hia, zia hun a hin Lisie Heart Institution, Cochin, Kerala in screening nei ding a hia, a ki etsak nuam te a ding ah registration a kihawng zing leh a bawl nuam te’n Pukhup Medi-Care, Rengkai Road, Don Bosco Higher Secondary School, Salem Veng leh Catholic Medical Centre, CMC Hospital Koirengei, Imphal East ah registration bawl thei ding a hi.



CM IN CSO 50 LEADER TE KIMUPI
 
Imphal, May 10 (Nisin Thuhiltu):  Manipur Chief Minister  N. Biren Singh in 11th April 2017 ni, Ukhrul district a phak hun ah thasin date 10 chu hill district a pat civil society organization leader leh khaw –hausa (village chiefs) te kimupina ding leh a haksatnau bak ah a dawidan teu genpina ding ah reserve a hidan a puan tawh kitawn in tuni’n ama official residence ah zingkal lam dak 8:00 a pat in nitak lam dak 1:00 kikal in civil society organization chuam chuam 50 a pat member 500 te a kimupi hi. Chief Minister  N. Biren Singh in civil society organization leader leh khaw –hausa (village chiefs) te haksatna leh a ngaidan teu a genpi nung in ama  kiang ah piaklut ah um file te chu kituptak ah etzui hiding leh a pawimaw dungzui ah a kisaipi official te a bawzui ding ah hiatsak hiding a hidan uh a gen a, ama Council of Ministers leh MLA te chu transparent manner ah mipi te kimupi ah panlakpi ding ah chialna bawl in, mi chuam gual ah kawilo ding in chialna a bawl hi. Chuleh, elected leader leh Government official te chu mipi te lungkimlona leh complaints um te ‘Meeyamgi Numit’ (15th day of every month) leh etzuipi zing ding in chialna a bawl a, Media mang ah meeting umna ding mun te advance ah sulang zing ding in hiatsakna a bawl hi. Chuleh,zia gual meeting umna ding a chu a pawimaw dungzui ah ama official residenceah arrangement bawl hizing ding in a gen hi.

EDUCATION MINISTER IN MANIPUR EDUCATION SERVICE OFFICERS TRAINING PROGRAMME HAWNG

Imphal, May 10 (Nisin Thuhiltu): Education Minister Th. Radheshyam  in tuni’n State Academy of Training, Takyelpat ah one month Induction Training Programme of Manipur Education Service Officers, inaugural function uap in Training Programme hawnna a nei hi. Education Minister in a thugenna a chun, tukhang tawh kituak ah thiamna nei mi te education department in pawimaw a hidan a gen a, Manipur Education Service Officer te’n society leh lam chuam chuam ah khantona a um theina ding ah panlakna a nei ding uh pawimaw a hidan gen in, Training Programme hun a chu topic chuam chuam leh group discussion nei ah education lam masawn theina ding tawh kisai genkhawm ding leh kituptak ah Training Programme chiapi ding a nawp thu a gen hi. Zia hun matna chu L. Nandakumar Singh, Deputy Secretary Education (S) E/O Additional State Project Director, RMSA, W. Chandra Kumar Additional Director State Academy of Training, Educational Deptt. Official te’n le a uap ui.


SOCIAL WELFARE MINISTER  NEMCHA KIPGEN - RECEPTION 
Imphal, May 10 (Nisin Thuhiltu): Department of Social Welfare, Government of Manipur saina Bal Bhavan, Khuman Lampak ah reception function a um a, zia hun chu khuallian hina tawh Nemcha Kipgen- Minister for Social Welfare and Cooperation  in a uap hi. Nemcha Kipgen in a thugenna a chun, Social Welfare Department chu department pawimaw mama leh welfare leh society banah state khanto sak thei department a hidan a gen a,  mizosia ding ah khantona a tun theina ding ah Department of Social Welfare chu meisel detu a pan ding pawimaw in a gen hi.  Naupang, numei, old-age, differently able groups leh weaker sections of society te huap ah kuama khenchuam neilo ah Social Welfare department in panlakna a nei ding le pawimaw in a gen a, nekgukna (corruption) kiti him him um theilo ding a hidan a gen hi.
Zia function chu Principal Secretary J.C. Ramthanga, IAS, Director, Social Welfare, Surrender A.Shishak leh department official hunkhawp te’n le a uap ui.


IMPHAL EAST CLUB IN OORJA CAPF U-19 TALENT HUNT FOOTBALL TOURNAMENT 2017, TROPHY DAWM

Imphal, May 10 (Nisin Thuhiltu): OORJA CAPF U-19 Talent Hunt Football Tournament 2017, trophy chu tuni’n Imphal East Club in 6 – 3 ah Thoubal Clu a zaw tawh kitawn in a chang hi.  Numei final match ah  KRYPHSA, Naoremthong in ESU (Eastern Sporting Union ,Wangkhei) a zo hi. Winner team te chu cash prize Rs. 50,000 piak in a um ui.  OORJA CAPF U-19 Talent Hunt Football Tournament 2017 chu ‘Arise, Awake and Stop Not Until The Goal is Reached’ ti thupi nei ah Assam Rifles saina Khuman Lampak Main Stadium, Imphal ah um a hi. Chun, closing function chu  Education, Labour & Employment Minister Th. Radheshyam in Chief guest hina tawh a uap a, trophy leh pize piakdawna a nei hi. YAS Commissioner H. Deleep, Major General, Virendra Singh ,VSM, IGAR South, Laishram Sarita Devi Brand Ambassador of OORJA CAPF 2017, Manipur leh Brigadier HK. Chauhan , Deputy GOC 57th Division te’n le closing function chu a uap ui.

WORKS MINISTER THONGAM BISWAJIT SINGH IN TAMENGLONG MINI SECRETARIAT DINMUN ENTHA

Imphal, May 10 (Nisin Thuhiltu): Works Minister Thongam Biswajit Singh in Tamenglong MLA Samuel Jendai, Commissioner Works K Radhakumar  te tawh kithua in Tamenglong Mini Secretariat dinmun etthakna zani 9th May 2017 in a nei a, zialo a chun, a chiatha zing road restoration work te le etthakna a nei hi. Minister Biswajit in kum 2011 ah Mini Secretariat hawn hitamaleh tuni tiang ah office lualo ah a um zing chu maksa a hidan a gen a, a kisaipi official te chu work-map siam ding leh a pha chuam theipen ah Mini Secretariat mat a hitheina ding ah panla ding in thupiak a nei hi. Rs.39.29 crore bei ah kum 2007-08  sung ah  Mini Secretariat chu kisa a hidan te le taklang in a vaima theipen ah Mini Secretariat ah office chawn ding leh mat pat hiding in a gen hi.

MP DEMAND COMMITTEE,GENERAL STRIKE IN HINDAN NGAINA CHAWKBUAI
 
Imphal, May 10 (Nisin Thuhiltu): Thoubal District MP Candidature Demand Committee (TDMCDC)  in Thoubal leh Kakching districts ah tu zingkal dak 5:00 a pat in huntiam umlo kiphinna (general strike) a pan ua, zia chu tawh kitawn in hindan ngaina nasatak in a chawk buai ui. Manipur ah Rajya Sabha seat khat umsun luatu Haji Adbul Salam a mualliam nung ah May 25 leh a thasang ding telna bye-election um ding ti a hi. TDMCDC in a demand chu Thoubal leh Kakching district a pat candidate khat pen pen Rajya Sabha seat piak ding ti a hia, a demand uh sukpitin piak ahiloleh huntiam umlo general strike chiapi zawm ding ti a hi. Thoubal district ah Assembly constituency - Heirok, Khangabok, Wabagai, Kakching, Hiyanglam leh Sugnu banah Jiribam district assembly segment ah mipi te chu parliamentary (Lok Sabha) elections um hun ah vote khia hi sek himaleu zia constituency te a pat chu candidate a um ding uh phal a hi seklona chung ah Rajya Sabha seat awng lua ding ah zia area a pat chu mi Rajya Sabha member ding a nominate ding ti a hi. Manipur chu Lok Sabha seat 2 nei a hia, ST te ding ah 1 reserved a hi. TDMCDC chun National Capital, New Delhi ah le Pathianni a khan sit-in-protest a la nei ua, himaleh limsak ah a umlona chung ua Thoubal leh Kakching district pumpi huap ah tuni May 10, 2017 zingkal lam dak 5:00 a pat, huntiam umlo general strike a pat uh a hi. A langkhatlam ah Thoubal District MP Candidature Demand Committee in Outer Parliamentary constituency 8 ah MP seat chang ngailo a hidan uh taklang kawm ah kiphinna pan  maleh tunaicha damlona ziak ah thi - Rajya Sabha seat khat umsun luatu Haji Adbul Salam  chu constituency 8 te lak ah khat Wabagai Assembly segment a pat mi a hia, zia thu chu genkhum ah a um nung un, TDMCDC Chief convenor leh former legislator Y Thambal in kum 65 sung ah Rajya Sabha member neikhalo a hina chung ua tu term ah a term bei manlo ah Haji Adbul Salam in a thisanna chung ah a term tawp tiang tuk ding constituency 8 a pat mi guatthak ding phutna nei uh hin a gen hi.


SSUM IN ENQUIRY COMMITTEE SIAMDAW DING PHUTKAWM AH VAUNA BAWL
Imphal, May 10 (Nisin Thuhiltu): Socialist Students’ Union of Manipur (SSUM) in tuni’n Manipur Chief Minister kiang in Maphou Dam- Chinkheiching ah raw water transmission work tawh kisai khualna (enquiry) bawl ding phutna nei in memorandum piakna a nei ua, a vaima theipen ah enquiry committee siamdaw ding leh nasepna bangkim khualna nei ding pawimaw in a taklang ui. Chuleh, water transmission work kituplona chung ah pipeline in Imphal East area, a diak ah Lamlai area mipi te ding ah lauthawn um leh pipe te chu kekzak ziang thei ding dinmun ah um zing in a taklang ui. Central Water Commission (CWC)  nuai ah kum 2015 ah zia nasepna chu um hitamaleh nasepna a kituplo ziak ah mipi te ding ah phat chuamna tutlo ah lauthawnna tut hizaw’n a gen hi. SSUM chun, multi crore Loktak Scam tawh kisai leh CBI khut ah piakdaw a hiloleh May 20 nung ah student body in kiphinna pan ding un le vauna a bawl hi.