KOHIMA VANGKHUA AH… (Sutzopna)

 By Upa Chinsum

 

23062014| Seppatni, Dimapur to Delhi via Kolkata flight omlouh ziaka Sepnawnni (Dep: 1330 hours) adi’a ticket laak ahi. Sepnawnni zinga Kohima Circuit house (a tunga lim kitaklang) pawtsana Dimapur vanlengphual zot suak di cih sim leh taxi hekpa’n, lamkal haksatna/ buaina tuah theih, banghiam zek hileh vanleng laplouh theih hilai. Tua ahihmanin Seppatni, Dimapur a giakkhe suk a, Sepnawnni lungmuang taka vanlengphual zot hiauhiau diing hoih a sakthu honkum hi. A thugen mang. Seppatni sun-an nezou, lengthe ham veuveute’n hon na vaidawnna uh khawpi Kohima nusia-a Dimapur zuan.

 

Dimapur vanlengphual tawh kinai a teeng sanggampa Thang Cin Khup & innkuan in hon zintun ua, nuamlua himai. Khup ahihleh Manager-I, Engineering Projects India Limited(EPIL),Ms Thiankhokim (sis. of Rev Dr Langzakham) tawh pumkhat suakzou, gil a gah goutan tapa John Khan Suan Mung Naulak (4) piak a om ahi uh. Delhi metro a kum bangzahhiam sep nunga Metro corporation nusia-a Asst. Manager, EPIL a lut (March 2007), Mizoram posting tang, October 2010 in kaisang, Manager-II post ah; 2014 kumbul a Nagaland (Dimapur) suanlut a om, April 2014 a kaisang leuleu, Manager-I in; nekzonna a Toupa thupha dong lua khat ahi. Khup te nupa thusiamna tawh nitak an nezou, a car ua kitholhkhe nainai in Tuiphum Pawlpi ‘Evangelical Baptist Convention Church| EBCC Dimapur’ gam leitang [biakinn - a huang sunga pastor quarter & guest house banah chowkidar quarter om nalai] mit mahmah tawh vamu thei ing. Hiai mun ngaak, Dimapur EBCC pawlpi kem zong hipah in khangnou pastor fel mahmah Pastor Thangkhanmuan, a ji leh tate hi uh [Pastor Muan in EBCC Kohima tawh paw-khawm]. Pastorpa leh innkuan te tawh houlimna apan leh saptuam member picing houpih khak khenkhatte’ dawnna apan in Pastor Muan, Kha Siangthou in ompih banah manpha taka zang hi di ahi cih ngaihsutna ah lang hi. TOUPA’N minthanna ngahta hen!

 

Sepnawnni| 24062014 - 1330 hours a Dimapur vanglengphual nuse diing, Kolkata Subhas Chandra Bose Airport bawh khit cia’n Delhi zuan diing cih tuh, vanleng ticket tawi dan ahi. Zing khawvak ma in, AI-705 flight [Dimapur-Kolkata] lengkhe zekai diing ahih thu msg mobile ah honglut a, zinglam dak 10 lak in, zekai behlaplai ahih thu honglut leuleu. Huci’a, Kolkata Airport bawh khit nunga Delhi zotna diing AI-701 vanleeng lenkhiak hun diing laplou diing dinmun a ding. “Bangci hita diing hiam, Toupa?” cia tunglam mitsuan laitak in phone call hongpai a, huai tuh Dimapur vanlengphual a seemte apan ahi. “Pu aw, Mr…na hi maw? Dimapur - Kolkata na tunkhit cia Kolkata apan Delhi na zot na’ng vanleng dang felta ahi aw, 2030 hours a Kolkata airport nuse diing Air India flight dang khat ah.”

 

Khup leh John KSM in Dimapur Vanlengphual tan hongkha uh hive’n, Delhi IGI T-3 valengphual a te’n Delhi-Kolkata, Kolkata-Dimapur boarding pass khatvei thu a hon issue ngiah bang un, Dimapur a te’n zong ciahkikna di (Dimapur-Kolkata, Kolkata-Delhi) boarding pass hon issue ngal uh. Vanleng lamte ciang nana tuh a fel un, vai kisaituah vel dan le thawveng in nuam e cih sim in om. Hici tan hon makaihtu TOUPA ahi. Amen.

 

“Bangdang teng sang na hoih tungtuan ka Hondampa…” laphuaktu’n a na cih bangdeuh in, Kohima vangkhua| Kohima zinna thu bangteng gen in gelh mahle’ng, kipahpih luat taklat ut khat omlai. Tua bel, Kohima laibu zuakna khat a lei khak - “FROM VIOLENCE TO PEACE & PROSPERITY: NAGALAND” ahi. Laibu gelhtu Pu Thepfulhouvi Solo (IFS: RR-68) Retd. Principal Secretary, Nagaland hi. 1975-2010 sung huam Nagaland a anuam-ahaksa, anuam-anuamlou thiltungte pansan a thugelh, hun tuamtuam thupi tuamtuam a khen, topic 77 ngut khuikhawm laibu pekmai 310 vel-a sah hi. A man: Rs. 500/-. Laibu gelhtu in Introduction pekmai 3 (thum) dim a gelh, a thu hibang in pan hi: “Starting from the Emergency Rule of Indira Gandhi in the middle Seventies to the year 2010, over a period of about 30 years - a full Generation of Man Nagaland passed through some of the most tumultuous times…”

 

Pek masa para 3na vual nanung, “In addition, the Writer deeply in his marrow felt the power of the NEWS MEDIA for TRUTH and he came to realize the Pen is mightier than Nitrate from the Barrel of a Gun.” Pek thumna para 2na ah, “The Writer is very much indebted to the News Media, particularly the NAGALAND POST and NAGALAND PAGE for their partiality shown to the Writer’s Articles! The Papers got their share of the Naga threats and difficulties, but the period also saw the emergence of the Fourth Estate and to a great extent it was their fearless Publications that has been the single greatest factor in keeping the fibres of Naga life from snapping during the period” ci in, pek thumna vual nanung ah, “The Writer has an unending hope and belief the Nagas would not be separated from the Love of God and will surely end in Peace, Prosperity and Happiness ultimately: May God help” ci tou lai in Pulakna thugelh LEMETNA HING tawh zou hi. Vantang sim theih di’a thugelh zaw hici’a ‘hope alive’ tawh zawh di mah ahi cih hon ngaihsunsak; Man’s extremity is God’s opportunity cih thudik ahi. Amen.

 

Male dominated| female dominated society or organization gen-ging zekzek ahihlai in hiai hon-gen thahah le’ng bangci na sa dia’m ah. Kohima vangkhua ah (i) NPSC Examination Co-coordinator (Smt. Asangla Imti), (ii) NPSC Secretary (Smt. Sarah R. Ritse) leh (iii) Chief Secretary of Nagaland (Smt. Bano Z. Jamir) te numei ngen hi uh. [Kohima om sunga Toupa honpiak thugelh khat, Lamka niteng tanchinbu “Manipur Express” nisim 22.06.2014 issue a suak zouta anua’h taklang hang]. Simtute, TOUPA thupha!

…………

02.08.2014.

KI-ITNA LEH LEMNA’N VAIHAWM!

-Upa Chinsum,

Camp: Kohima

 

One of the greatest forces to correct Evils in the modern world today is ‘Exposure’ of the misdeeds in the Media. – Theopfulhouvi Solo (IFS: RR-68), Retd. Principal Secretary, Nagaland.

 

            “Ki-itna leh lemna’n I gam ah vaihawm henla…” cih laphuaktu’n southern Manipur (Lamka leh a sehvel) a thiltungte enkawm a la a gelhkhiak lai in, I tenna district pen khimjing bang ahi (hinna kilaaksak chot, a si’ suun sungkuante diipkua, a gal a kuante, a kuanloute le patau veve).

 

            Tu 2014 June kha I hongkai touh cia’n, “…hicitan hon makaihtu TOUPA ahi” cih phawk kilkel kawmin, A’ hoihna leh citna I tan zelte saulou suutkhawm samsam le I ci hi. Tua I suut sawm point-te theisiam leh valh diing bangtaka I valh theihna di’n (i) Hon vualzawlna khatkhat in sim in (ii) Nitumna lam na et gige leh nisuak (kilawmtak) na mu ngeikei diing, cih thuvual nih ah khawl (hu-la) phot ni. Selah.

 

1. ADCC MEMBER-TE: June 2010 apan ADCC member 24+2 neithei in TOUPA’N hong bawl a, amaute tungtawn a thil hoih leh phatuam sepkhiak a om zouzaite hang in Vanglian TOUPA min I phat hi. Hill district tenga ADC ofis phot-hing (revive) ahihlai in, ei district a heutute bang, Manipur hill district danga heutute sanga niam/ mawl zaw tuan hetlou uh ahi, cih hinalai set. Toupa hoih hi.

 

• Hun khatlai a examna-a hihhoih tungtuante KIPAHPIHNA & HANTHAWNNA program, khawbing youth club/ students’ organization in sum-le-pai seenga I na hih tangpi uh, tucia’n ADCC member zahtakhuaite’n amau bial ciat ah hon pibawl uh a, zillai/ siamsinte hampha na hi uh;

 

• Development work leh social welfare scheme sepkhiakna kong ah zong, amaute hong kipan lou (ADCC phot-hing hilou) hileh kiseem mailou diing – lei (bridge), khawlbuuk (waiting shed), kikhopkhawmna inn (community hall), leh adg.dg. mun tamtak ah tunding in om. Mipi Lam Ai-awh (MLA) leh ei mipite kaal a ding, zomtuahtu (bridge) poimawhtak ahong hi ua;

 

• Chief Guest culture, “Khuallian in sum bangzah pia a?” ci’a kidot keukauna khawvel (a khuallian lah tension, muh kineem association/ organization te lah tension veve) hinkhua khaw-ciik taka pan chief guest zatdan leh lamet tuamdeuh, progressive-oriented khuallian neihna / cialna hun ah pii-lut in I om panta ua, hiai in zuun diing ngaak I khawsung leh gamsung puahna lam hon naihsak hiaihiaita. Toupa hoih hi.

 

2. MIPI LAM AI-AWH (MLA)-TE: March 2012 apan Ccpur district (sehguk a khen) ai-awh di’a mipi’n I teelkhiak MLA/ Minister gukte zahna I pe masa. MLA-te zong amau bial (constituency) ciat ah thanop suah in, hongpang siausiau uh a, mipite I hampha uhi. Amaute’n tangpi-tangta khantouhna diing leh a bial mite noptuamna diing en kilkel kawma naa honsep lai ua, mimal khattou hamphatna diing kineem (kineem thawn) I omkhak zenzen leh, khase kei ni, diktattak in thilte en zaw ni. I palaite, a sep diing bang uh seem sak phot peuhmahl e, tangpi-tangta hoihna di leh khantouhna di a’ ngaihsutte uh hon sepkhiak khit ciang ua NOPTUAMNA tang diing, a zar zou diing EI (a bial mite) mah I hi.

 

• MLA khat in a bial afan in, sum 500/ 1000/ 5000 ci bang in hawm mawkmawklou a, khawsung mite kikoptheih di SUANGGAL, TUPI, SUAHDUL cihte khawteng ah hawm. Tua kawm in, “Na khawsung/ I khua in a poimawh ‘hiaite/ huaite’ cih theikhe di’ng hong tukhawm (kikum) unla, na muhkhiakte uh poimawh khatna, poimawh nihna, thumna… cia vualsuk in honpe lut un. Fund hongpai hun ci’a hih theih bangbang, hih theih zahzah khawsung puahna a zang di, pangkhawm diing I hi,” ci’n vaikhak zel. Tua diing dan mah ahi. [Athem a (sum)hawm ciin ahihci’a a poimawh tam, a deih tam; sep diing zawk pen seem khalou a hun beibei – a lungkim khuk lah omlou, (missing the mark or majoring the minors, and minoring the majors) kihithei ahi, lawmte].

 

• MLA khat leuleu inlah, welfare scheme leh development works te abial sunga kisep dan a va-etcet kawmkawm in, mimal leh pawl tuamtuam dolkhaat (petition/ representation) nauhnauhte lak ah, “Chini, khawjang a I kikop (dawnkhawm) di uh k’on puak a, inn-inn a hawm diing bel hilou ahi. Hausapu a.k.l. Village authority-pu inn ah chini bag na koih di ua, lou kuan dek bang, lou kuan tung bang, biakinn kai tawp bang na paikhawm in nana dawn zel di uh,” ci. Hih hoih lua! “Tuahna diing simthu lel ni, Laizom it vangngaihnoute aw…” (V Siampu).

 

3. SIKKIM IN ‘GAM GALMUANG KIPAHMAN’ MUH KINEEM: Tulel a Sikkim Chief Minister, Pu Pawan Kumar Chamling (63), regional party Sikkim Democratic Front (SDF) tungtawna Chief Minister kaai, 1994 apan CM dinmun khah nailou khat ahi. Tunai zek a CM dinmun a luahnawn pen a luah nga veina hita a, West Bengal CM hihna 1977-2000 sung na len paisuak a ‘the longest serving Chief Minister of India’ hihna title len Pu Jyoti Basu title suhsak hita!

 

• Ei tenna gam, Outer Manipur bangthou India malsuah a gam kensia leh phok lak hisam Sikkim in mahni-kivaihawm gam thum – China, Nepal leh Bhutan tawh gamgi kikop in vaihawmna leh gamsung dan-le-dun etzuina kong ah ‘awlsam lou hial’ (state sung leh state paw-lam apan) thil tampi phutou; saipi lampai bang in mailam nawt zel…

 

• Hinapi inlah, muanna, bitna leh khantouhna solkar awlmawhpen ahih dungzui in tu kum 20 (sawmnih) paita sung a state sung galmuang petmah a, huan, zawnna (poverty) kici zong beisak zou petmah di bang in langta uh (poverty-free state)! Waka. Ahucih kawmin, Pu Narendra Modi Prime Minister-na a NDA solkar ding thak ah ‘gamgalmuang kipahman’ (peace bonus) – airport leh rail connectivity kineem khinkhian in om uhi. Hon mu takpi uh heh aw!

 

• Assembly election 2009 in, SDF in Sikkim a MLA seat 32 omte luakgai keuhkeuh ua, tunai zeka kiteelna ah ahihleh Sikkim Krantikari Morcha (SKM) in seat 10 la in SDF in seat 22 tangban uhi. BJP heutu cingkam Atal Bihari Vajpayee PM hihlai a (i) Limbo-Tamang te Scheduled Tribe status piaka om, (ii) Sikkim, North Eastern Council a guanlut a om, (iii) Look East policy nuai a Nathu-la honkhiak a om cihte ngaihsut cia’n, CM Chamling in Phualpi solkar dingthak, BJP’ lu (head) letna a lamet/ kinep hunkhop a neihte neithei mah hitah e… cih hon ngaihsun sak.

 

• Manipur in vanleengphual kizenmawhlou, Imphal khaw-nawl a I neihlai in, Sikkim in vanleeng tukna di vanleengphual gentaklouh rail connectivity zong neilou uh! NE state-te laka rel lampi in atot khak nailouh hiam aw, vanleengphual om nailouhna ‘state omsun’ Sikkim ahi. Bengal mallam Siliguri apan Sikkim sun lampi pen a’ state zotna lampi omsun ahilai. Tua bangteng kawmkal ah Pu Chamling, a hanciam CM, muhkholhna leh tupkician nei heutu ahih kilatna khat –

 

            “By 2020, we would have empowered our workforce with enough skills and opportunities to economically sustain their families and only minimal welfare schemes will be necessary. We want to be self-reliant by the end of the 12^th Plan period.” [The Morung Express daily (Dimapur), 3.6.2014 issue, p. 3].

 

            Awle, ki-itna leh lemna’n I gam/ district a vai ahawmna dia pankhakna I neih tek bangin, tua (ki-itna leh lemna) KEPBITNA leh ZUUNNA ah zong pankhakna nei tek hang. Tua I panna lel, concerned citizen leh responsible individual hihna, lungtunhuai taka seemkhia I hihtekna du’n tunglam akipan PILNA LEH THEIHKHENTHEIHNA (wisdom and discernment from above), hiai thugelh simtute aa hong hita hen! Toupa thupha!

………

 

RELATED ARTICLE: KOHIMA VANGKHUA AH…