“Paite khawnung pil chih paunak kha dik ka sa kei, a hunlai in i kihaisak sek ua hizaw veh aw”. - J K Siam Guite
India gam pumpi adia Beauty Institute minthang Svastii Wellness Academy ah international course khenkhat - damlou kepna (home nursing), innsung kepdan (house keeping) leh nau kepdan (baby sitting) kha 1 sung sintheih ding a, manbei ahih ding ban ah stipend leng piak hiding a, training course zawh hun ah sepna ompah ding hi. Big opportunities in international BeautyCourse! India’s most reputed Beauty Institute, Svastii Wellness Academy offers international courses in Beauty, Hair dressing, Spa, Make-up & Spa Management. Join our one month course and work in Star Hotel, Cruise Line, Luxury Day Spa and Abroad. Suaaa……Suah, a fresh maw-maw tawh, gingta mawngmawng si’ng. Hithute, maw get-get ding zong hilou…..P!
Tulai in gintak ngam huailou, mi hip taktak thupuan, chialna leh semtu zonna (advertisement) niteng tanchinbute ah tuang gige hi. Huai thute i sim kawmkawm un kum 2008 a Lamka mipite’sum tamtak hong luakkhia a kihemmang hiau Johnson Enterprise-te, Mizoram-te’ Chiahpuam Bank, nikum zek a Company a sem ding interview bawl a hong kuante leh adangdang phawk di’n hoih ka sa hi. Huchibang thusuah bawltu newspaper-te i mawhsa hetkei, himahleh, ana simtu mipite’ adi’n pilvantuak a theih in a om chihthu ahizaw. Huan, huchibang thusuahte a muantak kei chi leng i hipah kei. Hileleng, adiak in, khawpi a Beauty Parlour, Spa leh Massage (malis) mun khawng a sem ding chi a nungak-noute khemkhia a, kizuakna mun a zuak mai sek, human trafficking case i chihte tamtak om ahihman in pilvanhuai hiveh aw, chi i hizaw hi.
India gamsung a khawpite kia hilou, gamdang (Singapore?) a sepna ding omsa a va sem dia numei tamtak sawlkhiak a omsek uh ahihdan leng i thei uhi. Huai munte ah va sem taktak, inkuante sum leh van khakthei zel, phattuampih mahmah leng hunkhop a om uh chih ke’n leng ka thei hi. Huchibang kar ah a tuakkhial leng hunkhop om veve ding un gintakhuai hi. Gamdang genlouh, India khawpite ah leng ‘nungak bangzah hiam hutkhiak in om uh’ chih thuthak zak ding om gige a, huaite kha amau’ ut-thu a va awk-kha hi khollou ua, sepna piak ding chi a zolkhiak a om, kizuakna mun peuh a khum bichilh khawng hisek uhi. Advertisement tuamtuam hong kibawlte gingtalou a, lauhbawl a, hunhoih omte i khahsuah vek leh mundang ah na- hoih leh sepna changkangzaw kimu ngeilou ding hi. Ahi a, muantak hina hia? Pankhelh a tuitaw hon tuntu ding hizaw hia? chihte chet masak poimawh hizaw hi.
Chennai khawpi lel ah kizuakna-inn 4000 val a om kichi hi. Huai munte ah Madam khat etkolna nuai ah, atangpi in nungak kum 18-25 ngen 10-15 bang om uh kichi a, kha 1 in Rs. 10,000 apat 25,000 khawng lawh uhi. I tanute sep mumal nei ngellou a khawpi a om ua, khateng a sum hon khak toihtoih zel uh ahih in chu ‘gulau’ theih mahmah di’n ka ngaihtuah! Bangteng i gen hang in, khawpi a Spa leh Beauty Parlour a semtute khawlou uh ahi chihna hi tuanlou a, kuhkal leh taimatak a va sem trangtrang leng hunkhop om ding uhi. Huaiziak in, advertisement hoih leh kilawm taktak hong kibawlte i bawhzui ding leh leng, muanhuai mah hia chihte chet masak hoih hi. Khawpi a huchibang munte a semtu di’n North-east numeite deihtuam se uh chih hizawmah a, eimite, akua-kua leng ahunlai a hai - akhawnung a pil kihimawk ahihman in, pilvan kana omkei.
Khawsakna khangtouzel ah, khawmpi vaihawmna, Committee neihna leh thupukna laktheih na thilte ah, gam changkangte’ hihdan zui in eiloi in leng draft resolution i thangsak mahmah ta uhi. A omzia chu, genkhawm nilouh a kisel kongkong ngailou a amam theipen dia kilang thupukna ding awm mi bangzah hiam in duanlawk a, palaite’ lak a luikhiak chihna ahi mai a, ahoihna chu hun heklou a, laktaklouh ngaihdan gen nilouh chih leng omlou a, misiamte’ khuak baihlamtak a kikoppihna ahi. Himahleh, eite’n i zang siamkei sek uhi. A luikhetute’n leng palaite’n hon pompih kei mawk le uh nuam salou phial ding hilehang kilawm a, mun khenkhat ah houh genkhawm khollouh ding, genkhawm theihlouh draft-sa om maithei lai hi. Genkhawm tawk lehang leng ngaihdan hoihtak pawsuahtu kha a khawsakna zir in a thugen laktak leh laktaklou chih bang eilak ah tam a, a neizoute’n ‘ehem’ achih maimai ua leh leng ‘adik, adik’ i chi uhi.
Eimite hi thudik hi a i chet khollouh bang leng gengen peih, kihilhsawn daudau chi, damlou gimdeuh bang leng a theikha nunung lamte’ adia chu si top sak zoute i hi uhi. Nungak leh tangval kingaihzawng thu peuh, kuamah hon dotlouh a leng gengen chih khawng nupite’ hobby himawk. I hoihna sang a i hoihlouhna lam kigenkhum gige-te i hi ua. Kei bang leng mi’n, hon theiloute’ kiang a ahon gen chiang un “theilou maw, huai Singngat te, tua Mualkawi a om” achi ding ua, ahon theihkei lai uleh “huai newspaper a mak deuhdeuh gelhsekpa” ahon chinawn ding ua, huchia leng ahon theihkei lai uleh, ka hoihlouhna lam ngen a kigenkhum nilouh ding uhi. English film khat Eyes Wide Shut (zapi a mitsi) chih ka muhkhak in ka nuih a zasim a, ka ngaihtuah thak lelah omzenei lua khat hi in ka thei hi. Huai bangdeuh in, eiloi in leng i insung fellouhnate khawng uh, dik leh diklou hitaleh milak ah phoukhia-khia kei in i kam uh zapi in chip (mouth wide shut) thei le’ng hoih mahmah di’n ka gingta.
Eipau hi pau haksa mahmah khat ahi. English khawng bel gelhmat ding leh gelhmatlouh ding ah buaihuailou a, eipau chu huai mahmah a gelhhaksatna hizaw hi. Huaiban ah, a gelhthawh leh a genthawh bangleng thuvual paidan a chituam hun tamtak a om. Hon leh hong, k’ong (ka hong) leh k’on (ka hon) chihte vel bang, adiak in, khangthak laisiampi-pite’n leng kizangkhial gige hi. Huaiban ah, thugelh aluandan apat simnuam ahih na di’n atawpna ah ki-nga mahmah a, ‘hi’ ‘ahi’ chih kia khawng a atawp zut chiang in ninhuai in lungluthuai theilou zaw hi. Huan, thumal zatngei mah zatnon munluat bangleng kisuumtuak mahmah khat ahi, i pau hauhsakna alatsem na di’n. Hileleng, eipau kha ‘a’ chih khawng leh ‘hi’ ‘ahi’ chih hilou thumal dangdang a atawp chiang in a thuvual chinglou bang a gelhdan buaihuaipi suak veve hi. Huchibang teng ziak in, grammatical tak in dik kholkei mahleh, asimtute’ adia matnuam leh simnop ahih na ding ka khualluatna in, eipau gelh haksa ka sa deuhdeuh ve.
Natwar Singh hi Indian Foreign Service retired ahi a, a hunlai in Foreign Secretary dinmun sawtkhop lenkha hi. A pension nung in politics a lut in India-te’ Foreign Minister hihna leng sawttak lennawn hi. Laigelhsiam mahmah khat ahi a, Frontline magazine ah At Random chih column zang in thu gelh gige hi. A thugelhte taidarh (random) deuhmai ngen hi mahleh simnuam in lungluthuai viau uhi. Laibu a simkhak ngei khat khawng in hon pan a, a lawmngaih khat tawh a kimuhkhakna un hon zom a, American foreign policy hon dem ek a, Indian foreign policy tangpi hon taklang (highlight) in Cricket match peuh in hon tawpsak thepthup hi. Thupi khat paipih ngorngor a thu i gelh/gen chiang in simtu/ngaikhetute’n chimtakhuai (boring) sa uh a, alang-lang i hon helkhawm chiang’, simtu leh ngaikhetute khawvel pumpi kifansuakpih ahihman in lungluthuaizaw hi. Ama’ paizia zui zaw ka hi tuan kholkei!
Manipur adia khawpi nihna chi in kiphausak in, au-au sa mah lehang tuni tan a Mini-Stadium khat bek leng nei nailou a i omtel uh lungkhamhuai mahmah eive. Congress sorkar nuai a Congress ngen MLA 6 nei hang a, MDC lah Independence Day parade contingent khat a pangthei ding zah zet nei hang a, tu term sung bek a stadium kilawm huntawk i neihzawh kei uleh chu sports ah chikmah chiang in ma kisawn ngei nawnlou ding hi. Ahimhim in, kimawlmite’ lak ah leng kuhkalna leh tupguhna kitasam a, vualzawh leh Zu, vuallelh leh leng Zu mah chih paidan kipaipih lailai hileh kilawm hi. Huan, ana tungsang deuh i chihte leng ettontham a om sang a, kihisak leh indiscipline pen khawng a pang i hihman un hiaitan i phaktawp uh himai lou hia? chih ka muhdan ahi!
Ka lawmte khat in, “Mi khat in, na lawmpa leng newspaper ah article hoihtaktak agelh zut na a, amah lah…. blah blah blah…. ahon chi” chih ahon gen ni in ka zum mahmah ve. Diktatna, taihmakna, lawhchinna, phatuamngaihna, hauhsakna i chihte mi khat tung a om gige ding a sehtuam ahi tuankei. Pathian in pha A sak chiang in huaite chu midang’ tung ah leng a suankualthei mahmah. Huaiziak in, mi, a khawsakna hiam, a hihna hiam a etbelhluat a, muhniam a, simmawh pah ding ahi tuankei. Ganggam.com ah hichi’n a kigelh - Rs. 100 na guk leh Village Authority-te’ khut a piakkhiak na hi dia, Rs. 1,000 na guk leh Police-te’ khut a piak na hi dia, Rs. 10,000 na guk leh UG-te’ khut a piak na hi dia, Rs. Lakh 1 tunglam na guk leh Chief Guest a chial in na om ding!!!!!!!!
Sepna ding hoihtak a omkei thak. Theihkhelh khak ahi, I am sorry, executive me! Hehehe….!
mangzouvl/13/7/2012
.