Rajiv Gandhi tawh kinaihna bangmah nei hetlou hinapi in amah adia ni poimawhte ah, bangchik hiam apan ka tung a thiltung a omkha vettak hi. May 21, 2008 (Rajiv’ sih champha) in ka u H. Pauzamang (Vijaya Bank) in ahon mualliamsan ziak in a vuina a tel di’n Lamphel, Imphal ah ka va hawh a, kum tamtak ka na kingaihpih, ahihziak a remchanlouhna khenkhat ziak a ka kitenpih khaklouh Nenem tawh ka va kimukha hauh uhi. Lam-etlouhpi a zawlluite ka va muhkhak ziak in ka lungsimtawng hon khoih a, huchi’n, Sian Siamlouh Ngaihnou chih itna tangthu ka gelhlawh hi. Kum 2009, August 20 (Rajiv’ pian champha) in 1st MR parade ground ah Pre-Promotion Selection Test (PPST) a tel di’n ka va zinkha chet zel hi. Huai hun in leng ka training lai thu uh ka gelh lai a a nungak dia ka zat Pangei Rani tanchin ka va zakha a, lung hon suleng mahmah in Ngaih Chullou Rani chih article ahong piang zel hi.

May 21, 2012 leng nidang mahbang in ahong tung nawn a India gamsung pumpi, Anti-Terrorism Day zang ding in kisa uhi. Khua a lum mahmah a, kei leng ka tuahsiat ding theikhol etlou in, ngeina bang in office ka va kai hi. Jacob Malsawmlien tualsihna thu in khawpi sung hon deng a, sun dak 11:00 vel apat in bandh om a, thawmhau sim hiauhuau in michih ki-om hi. Nitaklam in bel bandh khahkol in hong om a, gari leng a ngeina bang in pai nawn hi. Huchi’n, nitaklam dak 5:00 vel in inn lam zuan in ka pai a, Kangkap Centre ah ka zite’n hon na ngak ua, Diesel Auto in ka tuangtou uhi. Dorcas Road a hatsim tak a taitou, saupi tai manlou in lampi ah Uinou khat hong tai langlang a, driver in a gawikhak ding lau a kintak a (Auto) ahon heiguih leh, kei, a sik veilampang a lungmuangtak a tu phenphan kha, lengkhia in pucca road tung ah ka bawk thlorh hi. Solfa siamdeuh lou hile’ng nakpi a liam ding dan ka vele!

Paupu Auto te ka tuan chiang in, a awn liai leh driver gei ah ka tu utzaw hi. Anung a tuan a haksat ban ah midang, kum leh kal kihelh vengvung tawh kisai ka peihkei hi. Huai ka tuahsiat ni in Auto ka mawhsa kei a, a hektupa leng ka mawhsa kei a, Uinou leng ka mawhsa kei a, kei leng ka kimawhsa bok kei.Vangsiatna ahihman in ka pomsiam mahmah. Hilehleng, nengchik nuamlou ka sak chu - ka lengkhiat a lampilai ka bawhna ah ka liang, khutpek leh ka khuk liam a, ka khekor sakhau khuhna kek a, ka sakhau a ka kuah ka mobile-phone leng sia hi. Huchibang teng tuak mahle’ng driver in ‘ahiding mah’ sa ahi diam ah, hon ngaihsak hetlou a, bang ka chih leng hon donglou a, gari apat leng hong kumkhelou hi. Mi phatuamngai bangzah hiam in hong delh ua, himahleh, vangphathuai tak a ka liamnaklouh ziak in ahon buaipihluat uh ka ngaikei hi. Huan, ka vangphat mahmah na chu, huai laitak in gari dang taituah omlou hi. Huchilou hileh, gari taituahte’n leng hon chillum thei uh himawk hi.

Kum 1991, February kha in Lamka a ka u te’n scooter lei uhi. Mi leng taitai uh chi a ka taidek tei mawk leh laam 3 vel ka bawhphei ngal hi. Huchi’n hon kizirsak pah uhi. Kum 1992 hi in ka thei, huai scooter thautui va thunkhin, Bijang lak a ka hong taitouh uleh Meitei nupa cycle in hong kipua ua, ahong taikoi zorzor ziak un ut-leh-utlou in ka kibawhtuah uhi. Dan leh Dun bangmah thei nailou ka hihman in ka heh mahmah mawk hi. Kum 2003 a Mualkawi EBC Golden Jubilee lopna ding vai sai a, lawmte 2 tawh ka scooter a ka tai uleh, Gangpimuol field gei ah naupang khat, cycle a hong tai tawh ka kibawhtuah zel uhi. Kou leng kintak in pharmacy ah first aid ka va pia uhi. A Nu heh a heh mai, tampi hon liausak khawng ut mawk, police hon matsak ding peuh gen. Ataktak a lah amau’ mawh hi a ka theih uh hi si. Huai naupang kha cycle a kou side lam a hong tai nilouh, hon pel deklou hita inteh chi a side khatlam ka tot dek leh ama’n hon hekkoi phei peihpuih zel. Upai dang omlou, kiphut chorh himai!

Eiloi lak ah gari tuahsiatna tam mahmah a, niteng phial in om hi. Huchibang a tuahsiatnate, 99% gari khol lam hoihlouhna (mechanical defects) ziak hilou in, a hektu’n hek-hatlua hiam, a pilvanlouh ziak (rash or negligent driving) ahi hi. Huan, kumchinglou gari hek leng muh ding tam mahmah hi. Kou tuanna Auto leng a hektu naupang tuak mahmah a, huaiziak a pilvang zoulou deuh hidi’n ka gingta hi. Huaiziak in, kumchinglou leh naupanglua khawng in chu, gari khoih tamlouh deihhuai mahmah hi. Ka tapa tangvalnou hita a, “Pa, bike hek hon kizirsak ta ve” ahon chi a, “Class XII na pass chiang in” ka chih leh ‘aasshhh’ chi vengveng mai hi. Adiak in, sumdawnna leh passenger puakna a kizang garite hi mi tampi’ hinna, a hektu’ khut a ki-nga ahihman in mi pilvangthei tham deuh in a hek uh hoih hi. Transport Deptt. leh Police pangkhawm a gari lai (document), driving license leh adangdang etkai (check) ahih chiang in lah mipite mah a phun masa kihizel ahihman in, gari neite’n a zatdan pilvan mah hoihpen hi. Khawpi sung a traffic sign leh rules kitakte lah No Smoking chih tawh kibang!

 Gari tuahsiatna a om chiang a i thansak mahmah uh leh hoih kasak khollouh khat ahihleh ‘a hektu vuak’ ahi. Tup a tuahsiat (intentional accident?) omkha thei mahleh, atangpi in, vangsiatna ziak a tuahsiat hisek ahihman in ‘uingol gamphut’ pahpah ding hilou hi. Huan, gari lianzaw mawh gige chih bangleng khek dia hoih ka sak ahi. Siam kituhtuah mah hoihpen a, phut leh tai thuah (hit and run), zu kham ziak leh kiphatsak man khawng a mi banphut chihte khawng bel vaituam deuh hawmkhum tuak ka sa a, vangsiatna ziak liauliau a tuahsiatnate khawng chu kiliausak vakvak chi hi in ka koih kei. Khawsakna khangtou zel ah, gari neizou nailoute’n leng neihzawh hun in kinei ut ding a, a neisate’n lah ahoihzaw deih zel ding ahihman un gari in kiamlam sang in punlam nawt ding hi. Huaiziak in, e’n mi i va sukkhak hun om ding a, mi’n ei hon sukkhak hun uh om ding ahihman in sukkhak a i om leh leng, hon sukhatute’ a dia giklua leh na asakluat ding khawng ua vaihawm ngiat khollouh a, a sukkhatu a i pan leh leng mi ngaihsaklou hiam, mi’ khasiatluat na ding tan a om khak ding kiven tuak mahmah hi.

Kei’ tuahsiatna tawh kisai ka ngaihtuah thakthak chiang in, ka hinna sang a Uinou’ hinna houh manphazaw ahi dia aw, chih ton ka nei hi. Gari tuahsiatna tamtak hi ganhing, Ui, Ak, Bawng leh adangdang, lampilai a nawksaktak a omte’ ziak hisek hi. Kum 2004 May kha in Lunsieh Kipgen, IPS, SDPO/CCP leh a escort party te Leisang khua ah, Bawng a pelhna lam uah tuahsia ua, tuni tan in huai a telkha khenkhat poihlonglawh uhi. Ganhingte hi it ding, kep ding mah ahi ua, don ding leng ahi uhi. Himahleh, eiloi in, donlou in, kemlou in, i utdantak un i khahzan ua, gari in a sukkhak chiang in lah mihing’ luangman zah phialphial khawng i kigam ut uhi. Pangal-te bang houh, a aknou uh gawilupsak laizang le’ng, “hong piching dia, nou hon nei dia, a noute hong piching ding ua………” khang bangzah tan hiam hon sutpih ding uh hi tazen ei. Ei leng i hithou uh! Huaiziak in, mihing’ hinna tawh ganhing’ hinna tehvual ahikei a, mihing’ hinna adia apoi sang in ganhing in sihlawh zaw hen chih chu ka deihdan ahi, va gawilup teitei ding chihna hilou in. Huai Uinou khat hinna na humbit utziak un ka hinna chaan le’ng nou kipak di maw? Ka hehtha a suak deuhdeuh ka chi, salah, pheiphui geuh!

Adang k’on helkhawm zek ding, ka laigelh paizia mah lah ahi ngal a…. Tulai in, school teng phial ah naupangte, kumkim ekzam (ding) buai in buai uh a, huai tawh kiton in khateng tuition fee piakkholh ngai hi. Sorkar nasemte’n leng May khalawh la nailou uh a, April/March khalawh lalou leng tamtak om lai ding uhi. Huaiban ah, niteng nektawm zong leh kilawhtawmte’ adi’n leng sum muhna haksa mahmah hi. Huchibang kar ah, naupangte’ tuition fee JULY kha tan piak masak vek ngaisak school tamzaw hi mawk uh a, nu leh pa tamtak a di’n lungkhamhuai mahmah hi. Tuition fee lah kumteng a khang, uniform lah 3/4 ngaisak uh, senna ding tuamtuam om den, tulai khawvel ah i tate bangleng lai siamsak zoulou ding ki-hita hi. Huaiziak in, thuneitute’n mizawng leh gentheite’ ading leng khualkawm deuh in vai hon hawm u’henla, amau hoihsakdan kia hon paipih kei deuh le uh chihhuai mahmah hi.

Tongluang magazine vaisaitute’n ‘our last issue’ chih minvuah ahon hawmkhe zet u’chu, Zomite hon phuguihsak ngial ahi ding, facebook ah TONGLUANG BEIKEI HEN chih group ahong piang hial ahihkha! Tongluang magazine a it-huaidan, a manphatdan, bei mai dia phalhuailou ahihdan i thei phing uh ahikei maw? Paite khawnung pil! Bangteng hileh, tulel a vaisaitute’n haksatna aneih uh zaw sum thu kia hilou in ‘hun’ mahmah leng hikha ding hi. Huchibang ahihman in, Tongluang magazine sukbei utna lam hilou in, hun bubit deuh a sem man ding, mifel, thu leh la a lunglut, laigelh siam, sum nei khat in houh hon sunzom mai leh chih duhthu naktak a sam uh hizaw di’n ka gingta hi. Laibu bawl, magazine bawl kichi a haksatdan theisiam tamtak ki-om a, a theisiamlou leng hunkhop ki-om veve hi. Huaiziak in, huai haksatnate tengteng palsuak ngam a, i Nam itna tawh hong kipankhia a literature hatsaksem ding a pan la ding kua i om ua? chih lampang ah i lungsim uh pe lehang bang achi dia? Huchibang mi om taleh bangtan a phungvuh leh kithuahpih di’n i ki-ngam ua?

Dove (Dorcas Veng Gospel Singers) te’ album masa 2 te ka pahtak leh ngaihchimlouh tuak ahi uhi. Ahon phawkphak hetlouhpi un, a album 3 na uh ‘Khrist Damna Toupa’ chih suahkhe dek uh ahi chih ka zaktung apat ka na phur in, ka na ngaklah mahmah mawk hi. Ahon suahkhia ua, ka lam-et leh ngaklah bang ngei in, ‘fuh’ ka sa mahmah hi. La phuahtute leng genmaih vual hilou uhi. Pathian in a zatsek bang in lahoih tamtak hon phuah zel le uh, ‘mahni la’ a kitoudelh hun hita hi. Ka ngaikhia-khia a, ka en-en a, soiselna ding ka zonzon leh leng ka muzoukei maimah ka chi, la a saklouh sung un a maitai zoukei deuh uh chih mailouh chu, chi teitei le. Eimite’n, zi/pasal i neihkhit chiang ua lasak khawng i tawpsan mawkmawk uh pammaih ka sa hi. Huaiziak in, Dove member Nu Thianhoih kha ka missed mahmah ve. Huaiziak nawn in, tulel a member 3 te - Biakkim, Esther Mawi leh Ngaihlun chu lengkul mai uh henla, la sa-sa mai le uh va chih tha-hah di’n lah hamsiatna bang zel a maw, hahaha. Huan, tutung album a ka lungkimna mahmah chu i Nampuante uh ahon tehzan nawnlouh uh ahi. Lasak lah siam uh, a mel u’lah hoihthei ta buang, Pathian in damna pe henla, album dang leng hon bawlzel u’henla, khatvei tei re-union concert hon nei le uh chih ka duhthusam ahi, tei re-ngot in!

mangzouvl/28/5/2012